МВР за „Вистиномер“: Ќе се гради нов објект на Прифатниот центар, а не нов бегалски камп


Скопје, 4 јули, 2018 - 10:42 (META) 

По шпекулациите во јавноста дека се планира целосно нов центар за азиланти во Визбегово, од Министерството за внатрешни работи (МВР) за „Вистиномер“ ги негираат гласините, велејќи дека е планирано само да се изгради нов објект за постоечкиот Прифатен центар за странци, кој сега се наоѓа во поранешната детска градинка на Гази Баба и е во катастрофална состојба и не ги задоволува ниту елементарните услови.

Објектите на детската градинка се користат како азилантски центар уште од 2005 година, а јавноста со условите во нив се запозна повеќе во 2015 година, кога мигрантската криза го стави во центарот на вниманието.

Како што пренесува „Вистиномер“, новиот објект во кој ќе се пресели Центарот, нема да биде во Визбегово, туку во Бардовци, на парцела од 4.483 квадратни метри што Владата ја доделила на МВР во декември минатата година и повеќе ниски објекти со различна квадратура.

Во текстот се вели и дека помешувањето на Бардовци со Визбегово е поради тоа што Министерството за труд и социјална политика во Визбегово сака да гради центар за бездомни лица, при што ќе им се обезбеди дом на 80 лица кои живеат на улица.

Целиот текст прочитајте го на веб-страницата на „Вистиномер“.


Пожар во центар за азиланти во Шведска


Стокхолм, 16 октомври, 2016 - 17:42 (META) 

Шведската полиција отвори истрага за пожарот што утринава избувнал во центарот за азиланти во јужниот дел на Стокхолм, при што оштетена била зградата и евакуирани биле 37 азиланти.

Пожарот го забележала полициската патрола која била во близина. Никој од жителите на центарот не е повреден.

Пожарникарите успеале да го згаснат пожарот по неколку часа.

Стокхолмската полиција тврди дека пред пожарот немало закани, иако агенцијата „Ројтерс“ наведува дека претходната ноќ биле откриени канистри со бензин.

Шведска минатата година прими рекордни 163.000 баратели на азил, повеќе од која било европска земја ако се земе предвид големината на земјата и бројот на жителите.