!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Горивата поевтинуваат ноќеска на полноќ


Скопје, 2 мај, 2017 - 13:45 (META) 

Бензините и дизел-горивата од ноќеска на полноќ поевтинуваат за еден и пол денар по литар, одлучи денеска Регулаторната комисија за енергетика (РКЕ).

Новата малопродажна цена на „еуросупер БС-95“ ќе изнесува 66 денари, на „еуросупер БС-98“ е 68 денари, а на „еуродизел“ – 51 денар.

Како причина за намалување на малопродажните цени на нафтените деривати од РКЕ ги посочуваат за 4,86 отсто пониската просечна цена на суровата нафта на светскиот пазар во изминатите 14 дена и за 0,035 отсто понискиот курс на доларот во однос на денарот.


Нема да има зголемување на цената на струјата, најавија од ЕЛЕМ


Битола, 22 април, 2017 - 10:23 (META) 

Цената на струјата нема да се зголеми и покрај тоа што на почетокот на годината ЕЛЕМ купи скапа струја, одговори генералниот директор на компанијата, Христијан Мицкoски, на новинарско прашање при посетата на РЕК Битола.

– Струја извезовме во ноември и во декември, во јануари купивме скапа струја, потоа ја набавивме евтино. Ќе се обидеме да купиме евтина струја до јуни, кога ќе заврши оваа регулирана година – вели Мицкоски.

Загубата на струја, според него, ќе се надомести со зголеменото производство на електрична енергија за 10 отсто во првиот квартал на годината во однос на истиот период лани и со намалената цена на увезената енергија во март и во април. Исто така, од ЕЛЕМ велат дека во овој момент се во поволна финансиска кондиција.

– Продолжуваме да произведуваме согласно потребите на регулираниот пазар. Ако реализираме вишоци на енергија, ќе ја пласираме на слободниот пазар. Битно е да обезбедиме пари кои ќе ги вложиме во развојни проекти – додаде Мицкоски.

Ако пазарот на струја беше либерализиран, цената на електричната енергија, според Мицкоски, ќе беше за 25 отсто повисока. Во 2020 година се очекува либерализирање на пазарот и тогаш цената може да биде повисока и повеќе од 25 отсто.

– Либерализацијата ќе значи за оние кои ќе сакаат да излезат на слободниот пазар. Граѓаните, претпоставувам, нема да сакаат да излезат на тој пазар и ќе останат на регулираниот пазар, па ќе продаваме електрична енергија по регулирана цена. И сега е така кај компаниите. Не сите компании се на слободниот пазар, како што е, на пример, АД ЕЛЕМ, која во моментов е на регулиран пазар – изјави Мицкоски.


Горивата поскапуваат од ноќеска на полноќ


Скопје, 18 април, 2017 - 12:45 (META) 

Бензинот од ноќеска на полноќ поскапува за 2,5 денари, а дизел-горивото за два денара по литар, одлучи денеска Регулаторната комисија за енергетика (РКЕ).

Новата цена на „еуросупер БС-95“ ќе изнесува 67,5 денари за еден литар, литар „еурoсупер БС 98“ ќе се продава за 69,5 денари, а литар „еуродизел“ за 52,5 денари.

РКЕ ја утврди новата цена на горивата врз основа на движењето на просечната цена на суровата нафта на светскиот пазар во изминатите 14 дена и курсот на доларот во однос на денарот.


Горивата поскапуваат од ноќеска на полноќ


Скопје, 6 март, 2017 - 13:36 (META) 

Цената на дизел-горивата од ноќеска на полноќ се зголемува за 1,5 денар по литар, а цената на бензинот се зголемува за 0,5 денари по литар, одлучи денеска Регулаторната комисија за енергетика (РКЕ).

Малопродажната цена на „еуросупер БС-95“ ќе изнесува 67 денари за еден литар, а „еуросупер БС-98“ ќе се продава за 69 денари.

Новата цена на дизелот е 54 денари за еден литар.


ВМРО-ДПМНЕ: Помала е штетата на Заев да му се удоволи власт, од цената што ќе ја платат граѓаните


Скопје, 28 февруари, 2017 - 10:26 (META) 

„Аболираниот Зоран Заев би го продал и најмилото и највредното само за да се дограби до власт. Тој не чувствува ни грам одговорност кон заштита на државните и националните интереси“, се вели во соопштението на ВМРО-ДПМНЕ.

Оттаму велат дека „тој одлучил да става на маса и да продава нешто што не е негово“.

– Одлучи да ја продава и да ја редефинира Македонија. Граѓаните не гласаа ниту за менување на банкнотите, ниту за официјализирање на албанскиот јазик на цела територија, ниту за создавање бинационална држава или федерализација или кантонизација. Граѓаните не гласаа за платформата од Тирана – се вели во соопштението на ВМРО-ДПМНЕ.

Оттаму додаваат дека „Заев го прифаќа сè ова само за да се дограби до власт без поддршка од народот“.

Од ВМРО-ДПМНЕ велат дека „помала е штетата е да му се удоволи патолошката желба на Заев за власт, отколку граѓаните на долг рок да ја плаќаат цената“.

– ВМРО-ДПМНЕ ја реафирмира понудата до Заев да се откаже и да ја отфрли платформата од Тирана и антидржавните проекти, а за сметка на тоа ќе ја добие поддршката во Собранието – велат од ВМРО-ДПМНЕ.


Народна банка пушти во оптек нови ковани пари за колекционерски цели


Скопје, 20 февруари, 2017 - 15:19 (META) 

Народна банка го издаде и го пушти во оптек комплетот ковани пари за колекционерски цели наречен „Триптих“.

Исус Христос, Богородица и Св. Никола Чудотворец се на монетите за колекционерски цели „Триптих“. Цената на комплетот изнесува 4.500 денари.

Кованите пари за колекционерски цели издадени од Народната банка се законско средство за плаќање во Македонија.


Дизелот поевтинува за половина денар, цената на бензинот останува иста


Скопје, 20 февруари, 2017 - 13:25 (META) 

Малопродажните цени на дизел-горивата од ноќеска на полноќ се намалуваат за половина денар по литар, а цената на бензот останува иста, одлучи денеска Регулаторната комисија за енергетика (РКЕ).

Цените на „еуросупер БС-95“ и на „еуросупер БС-98“ не се менуваат, односно остануваат 66,5 и 68,5 денари за еден литар.

Како причина за намалување на малопродажните цени на нафтените деривати од РКЕ ја посочуваат за 1,36 отсто пониската просечна цена на суровата нафта на светскиот пазар во изминатите 14 дена.


Петиција на „Арсена“: Бараме поради арсенот гевгеличани водата да ја плаќаат како техничка


Гевгелија, 12 февруари, 2017 - 20:18 (META) 

Граѓанската иницијатива „Арсена“ денеска поведе граѓанска петиција за намалување на цената на водата од градскиот водоводен систем во Гевгелија на ниво на техничка, со цена од 5 денари за потрошен кубен метар.

Поводот петицијата, велат од здружнието, е неколкугодишното игнорирање од страна на локалните власти и Јавното претпријатие „Комуналец“ од Гевгелија да се соочат со проблемот со високата концентрација на отровниот металоид арсен во градскиот водоводен систем и забраната за употреба на водата изречена од државната Агенција за храна и ветеринарство.

„Општинските власти, пред сè Советот на општина Гевгелија досега не обезбедија мерки за снабдување на гевгеличани со чиста вода за пиење. Иако повеќе од 4 години и 4 месеци е на сила забраната за употреба на водата поради констатирани енормни концентрации на арсен кои се движат од 50 до 130 отсто над максимално дозволената граница пропишана од Светската здравствена организација, локалните власти и ЈПКД „Комуналец“ не се ниту обидоа граѓаните да ги известат дека водата смеат да ја користат само како техничка. Од тие причини, а и според Законот за заштита на потрошувачи, корисниците на вода од градскиот водоводен систем се должни да го плаќаат тоа што го добиваат – техничка вода за одржување на хигиената, а не и отровниот арсен за кој надлежните не најдоа решение“, велат од „Арсена“.

Здружението и граѓаните бараат ваквата цена за техничка вода да трае сè до моментот на обезбедување на чиста, здрава и безбедна вода за пиење за граѓаните на општина Гевгелија.


Тетовци протестираа пред седиштето на ЕВН во Тетово


Тетово, 10 февруари, 2017 - 15:55 (META) 

Околу илјада граѓани протестираа попладнево пред седиштето на ЕВН во Тетово, незадоволни, како што велат, од цената што ЕВН им ја наплатува за потрошена електрична енергија. Тие упатија повеќе барања до компанијата ЕВН, меѓу кои и да се либерализира пазарот на дистрибуција на струја.

– Бараме ЕВН да ја намали цената на киловат-час електрична енергија, затоа што цената на отворена берза е многупати помала од таа што се фактурира на граѓаните на Македонија, да се отстрани индустриската тарифа, итно да се либерализира за сите потрошувачи пазарот на дистрибуција. Да ѝ се забрани на ЕВН основните средства за дистрибуција што ги плаќа потрошувачот да ги присвои како свои инвестиции. Да не наплатува такса за приклучок на потрошувачот од 500 евра, затоа што тоа е нешто кое е забрането со закон – рече Џемал Хасипи од организациониот одбор за протести против ЕВН.

Учесниците на протестот побараа од компанијата да ги пронајде крадците на струја, за да не се казнуваат сите потрошувачи и да се забрани поставување на броила на јавни површини.

Од организациониот одбор за протести против ЕВН, рекоа дека протестите ќе продолжат и понатаму, во зависност од тоа дали ЕВН ќе ги прифати нивните барања.


Забавена е доставата на нафта во земјава, можно е поскапување


Скопје, 7 февруари, 2017 - 15:03 (META) 

Девет камиони што превезуваат нафта и нафтени деривати и беа заглавени на граничниот премин Евзони поради штрајкот на грчките земјоделци, се пуштени да влезат во земјава, вели за „Мета“, Билјана Муратовска од Здружението на превозници „Макам-транс“.

– Вчера, со посредство на Канцеларијата за врски на Грција во Скопје, девет камиони ја поминаа границата, а шест останаа да чекаат. Ги пропуштија само оние кои се сметаат за опасни. Засега нема најава кога ќе бидат пуштени другите што останаа – вели Муратовска.

Таа објаснува дека доставата на нафта во земјава не е редовна како претходно, а компаниите се снаоѓаат од каде ќе ја купат и ќе ја донесат во земјава. Можно е, според Муратовска, цената на нафтата да се зголеми поради зголемување на трошоците и користењето на алтернативни патишта за да се донесе.

– Компаниите бараат алтернатива од каде ќе ја купат. Од Грција им беше најблиску и си ги знаеја доставувачите, а сега бараат начини тоа да биде преку Бугарија, што ги чини поскапо – вели Муратовска.

Министерот за економија, Дритон Кучи, на денешната прес-конференција изјави дека контактираат со грчките органи за да се надмине проблемот, бидејќи ја загрозува економската ситуација во земјава.

– Блокадата е внатрешен проблем на Грција и се надевам дека што поскоро ќе се реши. Како надлежен орган, правиме напори да им олесниме на сите што патуваат кон Грција, а не само на транспортерите –  изјави Кучи.

Тој додаде дека Министерството за економија ќе спречи да дојде до каква било нафтена криза.

– Вчера од секторот за енергетика ми укажаа дека веќе треба да се справиме со можната нафтена криза и затоа од денеска ќе ги интензивираме состаноците за надминување на проблемот – рече Кучи.

Камионите што превезуваат нафта и нафтени деривати се најзагрозени помеѓу превозниците кои се заглавени на грчко-македонската граница, бидејќи превозниците на друг вид стока се пренасочуваат кон граничниот премин Дојрани.

Поради блокадата на Евзони, железничкиот превоз e оптоварен и капацитетите на возовите се целосно исполнети.