Обид за шверц на два килограми кокаин на скопскиот аеродром


Скопје, 7 декември, 2018 - 13:27 (META) 

Два килограми кокаин, кои биле скриени во багажот на Венецуелец, се откриени на Меѓународниот аеродром „Скопје“, соопшти Царинската управа на Република Македонија. Дрогата при продавање во количества „на мало“ би достигнала цена од околу 570.000 евра, се објаснува во соопштението.

Шверцерот слетал на скопскиот аеродром завчера во 20.30 часот со лет од Цирих и бил издвоен за детален преглед, по што била откриена дрогата за која и анализата од цариниците и втората анализа од вештаци потврдила дека е кокаин.

„Вредноста на запленетата дрогата, на црниот пазар во Република Македонија, изнесува околу 140.000 евра, додека истата при продажбата на мало би била повеќекратно зголемена и би достигнала вредност околу 570.000 евра“, соопшти Царина, нагласувајќи дека е поднесена кривична пријава против Венецуелецот.


Новиот систем за обработка на царински декларации ќе стартува кон средината на 2019


Скопје, 19 ноември, 2018 - 13:34 (META) 

Царинската управа го прифати новиот систем за обработка на царински декларации и акцизни документи (СОЦДАД) кој ќе ја замени досегашната (АСИКУДА).

На овој начин, како што информираат од Царинската управа, започнува дигиталната ера во оваа институција, за која се подготвувале пет години.

„Новиот систем има за цел да ги замени царинските постапки што се базираат на хартија со електронски постапки. На тој начин ќе се создаде поефикасна и модерна царинска околина во согласност со глобалниот развој. Со него треба да се поврзат сите постоечки дигитални системи во една интегрална целина и воведување на електронска царинска декларација за сите царински постапки во увозот и извозот, како и електронско поднесување и обработка на акцизни документи. Исто така, со овој систем ќе обезбедиме намалени трошоци за трговските трансакции, олеснето спроведување на договорите за слободна трговија, подобро управување и контрола“, информираат од Царинската управа.

Новиот систем, додаваат од таму, претставува предуслов за понатамошно развивање на дигиталните решенија и услуги, правејќи го животот полесен за учесниците во царинската и надворешно-трговската постапка, за другите гранични агенции што се присутни на граница, како и за царинските службеници.

„Примената на новиот систем за обработка на царински декларации и акцизни документи ќе започне во првиот квартал од 2019 година преку пилот царински испостави, а негово целосно ставање во функција се очекува во средината на 2019 година. Ова меѓу другото ќе резултира и во поуспешна наплата на приходи, порационално искористување на ресурсите и поефикасна меѓународна трговска размена во која трговците електронски ќе разменуваат информации со Царината и останатите агенции учесници во царинската постапка“, се додава во соопштението.


Тевдовски: Подготвени се законски измени за намалување на царинските глоби


Скопје, 11 април, 2018 - 15:21 (META) 

Релаксирање на казнената политика и намалување на казните кај Царината, најави министерот за финансии Драган Тевдовски на одбележувањето на Денот на Царинската управа.

– Во координација со Царинската управа се изврши сеопфатна анализа на казнената политика и се изготвија предлози за намалување на глобите, односно за нивно изрекување соодветно на тежината на сторениот прекршок – истакна министерот Тевдовски.

Тевдовски, на одбележувањето на Денот на Царината, истакна дека се спроведуваат повеќе проекти за олеснување и подобрување на трговската размена преку граничните премини.

– Во унапредувањето на трговската размена од големо значење ќе бидат и активностите кои се преземаат за спојување на граничните премини со дел од соседните земји (Србија, Албанија и Косово). Концептот со едно застанување, на еден граничен премин, да се поминат граничните контроли во двете земји значително ќе ја забрза и олесни стоковата размена. Идејата за единствен граничен премин ќе придонесе за унапредување на регионалната соработка, ќе го направи регионот поконкурентно место за стопанисување и ќе влијае на трговскиот пораст – рече Тевдовски.

Како што посочи министерот за финансии преку ИПА-фондовите се модернизираат и граничните премини Табановце и Ќафасан, што ќе ја олесни стоковата разман и транспортот на коридоритте 8 и 10.

– Модернизираниот граничен премин Табановце се очекува да се пушти во употреба во наредните неколку месеци. Кон крајот на 2018 година се очекува да заврши и проектот за реконструкција на објектите за царинење и инспекција на граничниот премин Ќафасан, исто така финансиран од ИПА фондовите. Со реконструкцијата на преминот, долж Коридорот 8 се создаваат услови за натамошно забрзување на прекуграничниот промет – рече Тевдовски.


МВР и Царина запленија стотици килограми марихуана на Блаце


Скопје, 31 октомври, 2017 - 20:35 (META) 

Царинската управа и Министерството за внатрешни работи денеска попладне заплениле поголемо количество дрога на еден од граничните премини, дознава „Мета“ од извори во истрагата.

Според нашите информации, запленети се неколку стотици килограми марихуана на граничниот премин Блаце, кои биле откриени во камион.

Од МВР и од Царинската управа засега нема официјална потврда за заплената, но според нашите извори, сè уште трае увидот на нивните екипи и утврдувањето на точното количество дрога, кое е големо.

Вчера на истиот граничен премин беа запленети 16 килограми марихуана.


Запленети 7 килограми хероин на граничниот премин Богородица


Гевгелија, 18 април, 2017 - 11:44 (META) 

Царинските инспектори од одделението за оперативни работи за време на велигденските празници на граничниот премин Богородица заплениле 7 килограми хероин, соопштија денеска од Царинската управа.

Како што информираат оттаму, дрогата е запленета во саботата, а била сокриена во возило што го управувал државјанин на Србија, кој бил пријавен за влез во земјава.

„При контрола на возилото во два акумулатори, од кои едниот бил сместен под хаубата, а другиот во багажниот простор, царинските службеници пронајдоа вкупно 14 пакувања облепени со леплива лента, наполнети со кафеава прашкаста материја, за која по извршеното тестирање на тестер за дрога е утврдено дека се работи за хероин со вкупна тежина од 6,9 килограми“, стои во соопштението на Царината.

Оттаму информираат дека осомничениот го набавил хероинот во Истанбул и требало да го пренесе до Нови Пазар во Србија.

Против него Царинската управа до надлежното јавно обвинителство во Велес поднело кривична пријава за неовластено производство и пуштање во промет на наркотични дроги и прекурсори.


Запленети 144 килограми марихуана на граничниот премин Богородица


Гевгелија, 13 април, 2017 - 11:04 (META) 

Царинските службеници на граничниот премин Богородица, на македонско-грчката граница, вчера заплениле 144 килограми марихуана, која била сокриена во приколка од товарно возило, соопшти денеска Царинската управа.

Како што информираат оттаму, камионот со странски регистарски таблички, управуван од бугарски државјанин, бил пријавен за излез од земјава. Цариниците го селектирале за детална контрола откако се посомневале во тврдењата на возачот дека приколката е празна.

„При контрола на возилото, царинските службеници забележале дека страничните штици од полуприколката биле наполнети со наркотична дрога марихуана. Вкупното количество на запленетата марихуана е 144 килограми“, стои во соопштението од Царинската управа.

Од Царината велат дека предистражната постапка за случајот е сè уште во тек и дека се прибираат докази, а против осомничениот е поднесена кривична пријава за неовластено производство и пуштање во промет на наркотични дроги, психотропни супстанци и прекурсори.


Царината минатиот месец поднела 10 кривични пријави против 14 лица и пет фирми


Скопје, 5 април, 2017 - 12:10 (META) 

Царинската управа на Република Македонија, постапувајќи по констатирани неправилности, во март годинава до надлежните јавни обвинителства поднела 10 кривични пријави против 14 физички и пет правни лица.

Како што соопштуваат од Царината, пријавите се поднесени за неовластено производство и пуштање во промет на накротични дроги, психотропни супстанци и прекурсори, за криумчарење, фалсификување пари, фалсификување исправа, царинска измама и за недозволено пренесување акцизни стоки.

Меѓу осомничените, како што стои во соопштението, се и тројца македонски државјани, кои се товарат за обид за шверц на 10 килограми марихуана. Дрогата била откриена во патничка торба, во автобус кој сообраќал на линијата Гостивар – Женева и во кој патници биле тројцата осомничени.

Кривична пријава до Основното јавно обвинителство Куманово е поднесена и против српскиот државјанин кој на средината од минатиот месец беше уапсен на граничниот премин Табановце, откако кај него беа пронајдени фалсификувани евра во вкупна вредност од 27.700 евра. Тој, врз основа на предлог-спогодба со Основниот суд Куманово, бил осуден на условна затворска казна од две години, која нема да се изврши доколку во рок од пет години не стори ново кривично дело.

Кривични пријави се поднесени и за фирми од Прилеп, Битола, Кичево и за две фирми од Скопје, а се товарат за фалсификување исправа, царинска измама и за недозволено пренесување акцизни стоки.


Откриени 20 килограми марихуана на граничниот премин Блаце


Скопје, 22 март, 2017 - 16:43 (META) 

Царинските инспектори во соработка со Министерството за внатрешни работи вчера на граничниот премин Блаце, пронашле и заплениле 20 килограми марихуана, сокриена во возило што го управувал македонски државјанин.

Како што соопшти денеска Царинската управа, возилото вчера околу 10.30 часот се пријавило за влез во земјава.

„При прегледот на возилото, во задните врати на комбито помеѓу лимот и тапацирот, поточно во левата и во десната задна врата и во внатрешноста на моторот биле пронајдени 42 пакувања, со вкупна тежина од околу 20 килограми. Сите пакувања биле наполнети со растителна материја, а при нејзиното тестирање со тестер за дрога добиени се индикации дека се работи за марихуана. Сите подготвени документи, дрогата и лицето се предадени на службени лица од Министерството на внатрешни работи за понатамошна постапка“, стои во соопштението на Царинската управа.


Српски државајнин се обидел да изнесе фалсификувани евра од земјава


Куманово, 14 март, 2017 - 13:40 (META) 

Царинските службеници од граничниот премин Табановце вчера спречиле обид за изнесување од држвата на фалсификувани пари со вкупен износ од 27.700 евра. Фалсификуваните банкноти, како што информираат од Царинската управа, биле пронајдени во возило што го управувал српски државјанин, против кого е поднесена кривична пријава.

„На 13 март годинава, околу 7 часот наутро, на граничен премин Табановце за излез од Република Македонија се пријавило патничко возило со српски регистарски таблички управувано од српски државјанин. При контролата на возилото и на патникот, во потпирачот меѓу предните седишта, во врзано снопче со ластик, замотани во бела хартија, пронајдени биле девизи. Царинските службеници забележале дека има 39 банкноти во апоени од 100 евра со ист сериски број, потоа 39 банкноти во апоени од 200 евра со ист сериски број, како и 32 парчиња во апоени од 500 евра исто така со ист сериски број. При преглед со УВ-лампа, констатирано било дека девизите се со лош квалитет и се фалсификувани“, стои во соопштението на Царината.

Српскиот државјанин бил веднаш уапсен и предаден на инспекторите од одделението за истраги на Царинската управа, кои, според доказите, утврдиле дека осомничениот фалсификуваните евра ги направил сам и ги испечатил со печатач во боја на обична хартија, а истото го потврдиле од Народната банка на Република Македонија при вештачењето на парите.

„Царинската управа против осомничениот до Основното јавно обвинителство Куманово поднесе кривична пријава за фалсификување пари, а осомничениот е предаден на судија за претходна постапка во Основниот суд Куманово, кој му одреди мерка претпазливост – привремено одземање на патна исправа со обврска да се јавува во судот двапати неделно“, додаваат од Царинската управа.


Царината спречила шверц на 18 килограми марихуана, сокриена во плинска боца


Куманово, 26 јануари, 2017 - 13:49 (META) 

Царинските екипи на граничниот премин Табановце вчера спречиле обид за шверц на 18 килограми марихуана, што била сокриена во плинска боца.

Како што информираат од Царинската управа, вчера, околу 6 часот, на граничниот премин за излез од Македонија било пријавено возило, со албански регистарски таблички, а управувано од И.Ш., државјанин на Албанија. Возилото било селектирано за детална контрола и при прегледот на багажникот била пронајдена плинска боца, во која биле сокриени 15 вакумирани пакетчиња облепени со проѕирна леплива лента, наполети со марихуана со вкупна тежина од околу 18 килограми.

Во предистражната постапка, што ја спровеле инспекторите на одделението за истраги на Царинската управа, било утврдено дека осомничениот ја набавил марихуаната во Албанија и требало да ја прошверцува до Германија.

„Против сторителот, Царинската управа поднесе кривична пријава за неовластено производство и пуштање во промет на наркотични дроги, психотропни супстанции и прекурсори до надлежното јавно обвинителство, а судијата на претходна постапка му изрече мерка притвор во траење од 30 дена“, стои во соопштението на Царината.

Оттаму додаваат дека во текот на декември, царинските екипи во соработка со Министерството за внатрешни работи заплениле 70 килограми марихуана, сокриена во ПВЦ-прозорци.