Албанија и Косово ќе ги обединат царините и ќе го укинат роамингот


Пеќ, 26 ноември, 2018 - 15:54 (META) 

Владите на Косово и Албанија на денешната заедничка седница во Пеќ, Косово потпишаа девет договори и протоколи со кои, меѓу другото, во наредните шест месеци ќе се обединат царините и ќе се укине роамингот во меѓусебните телекомуникации.

Потпишани се договори за меѓусебно признавање на возачките дозволи, за заедничка царинска контрола на граничниот премин Морина, за јавниот долг и заедничката соработка со меѓународните финансиски институции, за укинување на роамингот, за соработка во областа на младите и за соработка во здравството. Исто така биле потпишани и договори за признавање на фитосанитарните и ветеринарни уверенија, за создавање на заедничка Стопанска комора на Косово и Албанија и соработка за признавање на индустриската сопственост.

Косовскиот премиер Рамуш Харадинај рече дека граѓаните на Косово и Албанија очекуваат уште повеќе од двете влади, но дека и договорите што се потпишани денеска претставуваат „конкретизација на дамнешните приоритети на двете страни“.

Албанскиот премиер Еди Рама рече дека воведувањето на таксата од 100 отсто на производите од Србија и Босна и Херцеговина била „исправна реакција на неправдите кои се прават кон Косово, често и со поддршка на разни европски земји“.

Од друга страна, како што појасни тој, за кратко време Косово и Албанија ќе направат целосна унификација на царините.

– Кој смета дека ова претставува закана, било во Белград или во Брисел, добредојден е да дојде, да седне на маса и да му објасниме дека не е закана, туку е покана за сите други да земат пример од оваа соработка и Србија прва да го следи овој пример – порача Рама.


Турската централна банка презема мерки да го запре падот на лирата


Истанбул, 13 август, 2018 - 12:31 (META) 

Централната банка на Турција денеска порача дека е подготвена „да ги преземе сите неопходни мерки“ за да ја зачува финансиската стабилност по големиот пад на лирата во последните неколку дена. Таа вети дека на банките ќе им ја обезбеди „сета ликвидност што им е потребна“.

Ефектот од оваа најава среде растечкиот дипломатски спор со САД, кој предизвика силен удар на турскиот финансиски пазар беше слаб. Пред најавата од Централната банка лирата беше падната за 9%, а потоа дојде на пад од 6%.

Падот на лирата почна уште на почетокот на годината, од кога загуби речиси 34 отсто од својата вредност во однос на доларот. Најновата криза почна во четвртокот вечерта, кога се менуваше по курс 6,3 лири за еден американски долар,  додека на крајот на јануари еден долар вредеше четири лири.

Работите се влошија во петокот, кога претседателот на САД, Доналд Трамп, го одобри удвојувањето на царините за челикот и алуминиумот увезен од Турција. На тоа претходеше одбивањето на Турција да се пушти на слобода американски пастор кој е во притвор во Турција речиси две години.

Експертите падот на лирата го толкуваат и со стравови дека и турската економија е во пад.

Сепак, тоа позитивно влијае на туристичката индустрија на Турција, која поради ниската вредност на лирата, станува многу конкурентна со пониските цени за странските гости.


ЕУ и САД ја прекинаа трговската војна


Вашингтон, 26 јули, 2018 - 11:40 (META) 

Претседателот на САД, Доналд Трамп и претседателот на Европската комисија, Жан Клод Јункер се договорија дека „ќе ја прекинат трговската војна“ и ќе почнат преговори за отстранување на пречките во трговијата.

„Ова е голем ден за слободната трговија. Веднаш ќе почнеме со преговорите, но добро знаеме во која насока одат“, изјави Трамп по состанокот со Јункер во Белата куќа.

Тој додаде дека заеднички ќе работат на ослободување од царините и субвенции за индустриските производи, со исклучок на автомобилската индустрија.

„Исто така ќе работиме на намалување на пречките и зголемување на трговските услуги, хемиски, фармацевтски, медицински производи“, изјави Трамп и додаде дека Европа ќе го зголеми купувањето на природен плин од САД.

Преговорите ќе го решат проблемот и со високите царини кои САД ги воведе за челикот и алуминиумот од Европа, но Јункер додаде дека се договориле дека нема да воведат нови царини за време на разговорите.

„Имавме конструктивен состанок“, накратко додаде Јункер.


Бектеши од косовскиот колега ќе бара укинување на царината за сите производи


Скопје, 25 јули, 2018 - 16:21 (META) 

Mинистерот за економија Крешник Бектеши најави состанок со неговиот косовски колега Бајрам Хасани, в петок на 27 јули. Производи кои останаа неопфатени со одлуката на косовската Влада за повлекување на мерките се доматите, пиперките, јаболката, крушите, сливите, малините и грозјето.

„Во име на досегашната успешна трговска и, воопшто, економска соработка со Република Косово се надевам дека ќе најдеме заеднички јазик со мојот косовски колега, а дека средбата ќе резултира со решение кое ќе биде од взаемен интерес. Уверен сум дека имаме заедничка цел, а тоа е олеснување на трговијата на Западен Балкан, согласно правилата на договорот ЦЕФТА и принципите на слободна трговија“, вели Бектеши.

Министрите од регионот денеска во Белград на заеднички состанок ја повикаа косовската Влада целосно да ги укине зголемените царини за извоз на земјоделски производи во Косово.


Преговорите течат, Владата се уште не воведува реципрочни мерки кон Косово


Скопје, 23 јули, 2018 - 13:43 (META) 

Во насока на решавање на проблемот со воведените зголемени царини од страна на Косово, министерот за земјоделство, шумарство и водостопанство, Љупчо Николовски е во постојана комуникација со ресорните министри од Косово и од регионот, информираат од МЗШВ.

Од таму додаваат дека Владата прави се, за да не дојде во ситуација да воведува контрамерки како одговор на постапката на Косово и очекува, Владата на Косово да ја повлече донесената мерка со што ќе се надмине спорот.

„В среда ќе има и заедничка средба на сите ресорни министри од регионот на која како претставник од Македонија ќе биде министерот Николовски. На средбата ќе се бара заеднички модел како да се надмине овој проблем со Косово. Исто така, доколку не се надмине проблемот во среда, Николовски и министерот за економија Крешник Бектеши, ќе се сретнат и со косовските ресорни министри и ќе се бара начин за надминување на ситуацијата. Целта е Укинување на одлуката и овозможување на брз проток на стоки и услуги како и трговска размена помеѓу двете земји“, се вели во соопштението.

Минатата недела Министерството за земјоделство,шумарство и водостопанство и Министерството за економија, испратија допис до ЦЕФТА, Европската унија и до Владата на Косово, со кое се бара повлекување на одлуката на Косово за зголемување на царините за увозното овошје и зеленчук.

Доколку и покрај сите напори и средби кои престојат Косово не ја повлече одлуката, Владата ќе преземе мерки за заштита на домашното производство.


За зголемените царини во Косово, Македонија ќе се жали на ЦЕФТА и ЕУ


Скопје, 19 јули, 2018 - 14:52 (META) 

Против одлуката на Косово да ги зголеми царините за одредени земјоделски производи, Македонија денеска ќе се пожали на ЦЕФТА и ЕУ, а ќе испрати и допис до министерството за трговија и индустрија на Косово, соопшти министерот за земјоделство, шумарство и водостопанство, Љупчо Николовски.

Тој рече дека зголемувањето на царината за 30 отсто е прекршување на договорот ЦЕФТА договорот, како и на Спогодбата за стабилизирање и придружување на Косово со ЕУ и нивната спогодна за стабилизација и асоцијација со Европската унија. Ако одлуката не биде повлечена, и Македонија ќе преземе мерки за да го заштити своето производство, најави министерот.

– Очекувам дека одлуката ќе биде повлечена. Ако тоа не се направи во најкраток временски период ние ќе го заштитиме нашето домашно производство – ова е нашиот приоритет. Ние од страна на Косово не сме консултирани во овој процес, јас се надевам на дијалог и на разумност од страна на Косово, оти веќе Владата има усвоено Меморандум со нивното министерство за земјоделство – вели тој.

Како што велат од Министерството за земјоделство, шумарство и водостопанство (МЗШВ), тие и Министерството за економија во одлуката на Косово утврдиле правно нејасни елементи.

„Утврдени се елементи кои се формално правно нејасни. Така на пример, во дел од одлуката стои дека се однесува за овошје и зеленчук, а во листата на производи за кои ја зголемуваат царина стои пченка. Во самата табела каде што се наведени производите кои подлежат на зголемената царина, не се наведени тарифните броеви. Исто така се наведува дека се направени некои интерни консултации со домашните производители, има сериозни пропусти во целата процедура. Најмногу погодени производи од оваа одлука во овој период би бил извозот на доматите, пиперките и сливите. Во моментот се анализираат точните податоци, вкупниот извоз во Косово за 2017 е околу 6 милиони евра, а во првите шест месеци од годинава 2,5 милиони евра. Увоз на земјоделски производи од Косово нема“, соопшти МЗШВ, најавувајќи дека се контактира со другите министри во регионот за да се преземат заеднички мерки.

Како што најавија од македонското Министерство за надворешни работи (МНР), утре и задутре шефот на македонската дипломатија Никола Поповски утре и задутре ќе биде во посета на Косово, каде покрај другите теми, се очекува да разговара и за економската размена и трговијата.


ЕУ со реципрочни мерки кон САД, воведува царина за американски производи


Брисел, 6 јуни, 2018 - 16:50 (META) 

Европската унија соопшти дека од јули почнува со воведување царини на увоз на американска стока, како одговор на одлуката на американскиот претседател Доналд Трамп да воведе царини на увоз на челик и на алуминиум од Европа.

– Листата на американски производи за кои ќе се воведе царина ќе биде готова овој месец и ќе се применува од почетокот на јули, изјави денеска потпретседателот на ЕК, Марош Шефчовиќ.

ЕУ нагласува дека ќе воведе царина за американски стоки меѓу кои се челик, земјоделски производи, бурбон путер од кикирики и сок од портокал.


Земјите погодени од одлуката на Трамп за оданочување на челикот, најавија контрамерки


Вашингтон, 1 јуни, 2018 - 10:55 (META) 

Европските лидери реагираа остро на одлуката на американскиот претседател Доналд Трамп, за воведувањето на данок на увоз на челик и алуминиум од земјите-членки на Европска унија, Канада и Мексико.

Земјите кои се погодени од оваа одлука, која денеска стапува на сила, најавија контра-мерки. Францускиот претседател Емануел Макрон во телефонски разговор со Трамп, овие даноци ги опшал како „илегални“. Макрон исто така рекол дека ЕУ ќе реагира на цврст и соодветен начин.

Воведувањето на новите царини, кои стапија на сила на полноќ, Трамп ги оправда со тврдењето дека американските производители на челик и алуминиум се од витално значење за националната сигурност, но се загрозени од глобалното снабдување.

Владата на САД преговара и за Северноамерикански договор за слободна трговија.Трамп му упатил порака на канадскиот премиер Џастин Трудо дека „САД ќе прифатат фер договор или воопшто нема да има договор.“

Трудо, пак, царините ги нарече „потполно неприфатливи“ и најави дека тие би можеле да ги променат односите на двете земји. Тој објави план за воведување на царина на 12,8 милијарди долари, американски извоз.


Кина со повик до светот да се здружи против САД


Пекинг, 22 март, 2018 - 10:18 (META) 

Кинеските државни медиуми денеска ги повикуваат државите во светот „цврсто да се постават“ против „протекционистичките“ мерки на Вашингтон.

„Бидејќи се чини дека САД и понатаму ќе се однесуваат на таков начин, другите држави би требало да престанат да се надеваат дека ќе бидат поштедени од нивните протекционистички потези и да бидат цврсто поставени против САД“, пишува „Чајна дејли“.

Можеби американските царини би го зголемиле растот на БДП и би го забавиле кинескиот економски раст, но исто би го забавиле и светскиот економски раст, објави весникот наведувајќи истражување на банката „Чајна интернешенел кепитал корпорејшн“.

Се очекува, американскиот претсеател, Доналд Трамп денеска да објави нови санкции против Кина по повеќемесечна истрага за наводна кинеска кражба на интелектуална сопственост. Мерките може да бидат царини меѓу 30 и 60 милијарди долари и ограничувања на вложувања, објавија американски медиуми.


УЈП објави нова листа на должници, прва годинава


Скопје, 11 јануари, 2018 - 10:31 (META) 

Управата за јавни приходи (УЈП) ја објави првата листа на должници за оваа година на која се најдоа вкупно 3.964 физички и правни лица.

Нивните долгови се доспеани до 30 септември и неплатени до 31 декември лани, а се по основ на данок на додадена вредност (ДДВ), данок на добивка, персонален данок на доход, придонеси за задолжително социјално осигурување, акцизи и царини.

Кај физичките лица и самостојни вршители на дејност, долгот надминува 120.000 денари, додека кај правните лица тој износ е повеќе од 300.000 денари.