!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Вчера на Блаце фатен еден тон марихуана – најголема заплена досега


Скопје, 1 ноември, 2017 - 17:05 (META) 

Екипите на Царинската управа вчера заплениле околу еден тон марихуана, чија вредност се проценува на околу четири милиони евра, соопшти денеска директорот на Царината, Ѓоко Танаскоски, кој заедно со министерот за внатрешни работи, Оливер Спасовски, го посетија граничниот премин Блаце, каде беше запленета дрогата.

Станува збор за најголемо количество на запленета дрога во еден случај.

Марихуаната била пронајдена во товарно возило, кое било товарено во Косово, а крајната дестинација му била Турција, каде, според информациите на Царината и на полицијата, требало да заврши и марихуаната.

Возачот на камионот успеал да побегне откако вчера царинските службеници го известиле дека ќе извршат детален преглед на камионот и на товарот.

– По консултација со јавен обвинител, направен е детален преглед на полуприколката, која била товарена во Република Косово со отпадна хартија наменета за Република Турција. При прегледот, со отстранување на неколку бали хартија, во средишниот дел на приколката пронајдени се вкупно 839 пакувања завиткани во проѕирна најлонска фолија со различна тежина. Тие биле наполнети со растителна материја со зеленкаста боја, за која на тестер на дрога се покажа дека се работи за наркотична дрога, марихуана – изјави директорот на Царинската управа.

Министерот за внатрешни работи, Оливер Спасовски, истакна дека запленетата дрога покажува дека Владата и МВР се решителни во справувањето со криминалот и со корупцијата.


Тринаесет мигранти од Ирак откриени во камион на граничниот премин Богородица


Гевгелија, 22 октомври, 2017 - 14:46 (META) 

Полициска екипа и службеници на Царинската управа синоќа, околу 20.45 часот, на граничниот премин Богородица, при контрола на камион со бугарски регистарски ознаки, управуван од 45-годишен грчки државјанин, откриле група од 13 мигранти од Ирак, соопшти денеска Министерството за внатрешни работи.

Мигрантите, како што информира МВР, биле пронајдени во специјално направен бункер во предниот дел на приколката, веднаш зад кабината на возилото.

Регионалниот центар за гранични работи Југ при МВР до Основното јавно обвинителство за гонење организиран криминал поднел кривична пријава против грчкиот државјанин С.А., поради сомневање дека криумчарел мигранти.


ДДВ да се плаќа по наплатена фактура и помали казни, бараат компаниите


Скопје, 2 октомври, 2017 - 13:28 (META) 

Компаниите детектирале 60 проблеми при примената на одредени закони, а честите измени на регулативата изминатите неколку години им создавале проблеми во работењето, изјави денеска Јадранка Аризанковска, виш советник во Стопанска комора на Македонија.

Стопанска комора, во соработка со другите комори и со помош на УСАИД, го спроведуваат проект „Партнерство за подобра бизнис-регулатива“, за компаниите полесно да ги применат законите што се однесуваат на нивното работење и да предложат измени каде што има проблеми.

Бизнис-заедницата бара данокот на додадена вредност да се плаќа по наплатена, наместо како што е сега, по издадена фактура.

Исто така, бараат измени во Законот за готовинско плаќање, во кој доколку се утврдат неправилности при издавање фискални сметки, според нив, би требало да следува само парична казна, но не и забрана за вршење на дејноста. Овие барања за измени на овој закон веќе се влезени во собраниска процедура.

Во однос на Законот за работни односи, компаниите бараат практиканството да биде посебно регулирано, пред да биде склучен договорот за работа, бараат прецизирање во однос на исплатата на К-15, како и намалување на висината на казните.

– Практичната работа треба да биде посебно регулирана, односно надвор од договорот за работа. Сега како што е регулирано, претставува финансиско оптоварување за компаните, бидејќи постојат специфични индустрии каде што освен плаќањето придонеси има и други давачки –  изјави Павлина Димовска, правен советник за регулатива во рамките на УСАИД.


Штрајкот на грчките цариници на полноќ ќе ги затвори граничните премини Евзони и Дојрани


Атина, 31 мај, 2017 - 16:29 (META) 

Патувањето кон Грција утре ќе биде отежнато поради 24-часовниот штрајк на грчките цариници кои реагираат поради владините мерки за штедење. Од граничните премини Евзони и Дојрани велат дека границите ќе бидат затворени од полноќ вечерва до полноќ в четврток, а работата ќе се нормализира в петок.

Од Евзони во телефонски разговор за „Мета“ потврдија дека границата ќе биде главно затворена и се очекуваат проблеми и долги задржувања за патничките возила поради штрајкот. Посочуваат дека ќе има само гранично обезбедување и дека ќе може да се преминува пеш.

Неофицијално, од грчката граница велат дека има шанси да се отвори преминот во одреден момент на кратко за да се пропуштат одредени возила или камиони кои се итни случаи, како и дека доколку има голема редица и за да им се излезе во пресрет на патниците, но велат дека главно преминот ќе биде блокиран во текот на речиси целиот ден поради договорениот штрајк на цариниците и на вработените во Министерството за економија.

Од преминот Дојрани кај Дојран, пак, велат дека границата ќе биде затворена и нема да се пропуштаат ниту патнички возила ниту камиони во текот на целиот ден.

Граничарите и вработените во министерството бараат подобрување на работничките услови, проценката на нивната работа и плати, а најавуваат и протест пред просториите на министерството во Атина утре изутрина.

Штрајк за утре најави и грчката железница, поради што нема да има ниту еден воз во Грција во текот на целиот ден.

Од македонското Министерство за внатрешни работи попладнево соопштија дека добиле известување од грчките власти за еднодневниот генерален штрајк на грчките царински служби, поради што од вечерва па во наредните 24 часа, во прекин ќе биде сообраќајот на сите три гранични премини кон Република Грција.


Камионите што ни носат нафта се најпогодени од блокадата на грчката граница


Скопје, 3 февруари, 2017 - 15:58 (META) 

Камионите што превезуваат нафта и нафтени деривати се најзагрозени помеѓу превозниците кои се заглавени на грчка граница поради блокадата и штрајкот на грчките земјоделци, вели за „Мета“, Билјана Муратовска од Здружението на превозници „Макам-транс“.

Таа додава дека камионите што превезуваат друг вид стока се пренасочуваат кон граничниот премин Дојрани и поради тоа тензиите се намалени.

– Порадби безбедност, потребно е грчката полиција во коридор да ги спроведе камионите и да ги донесе во меѓузона. Препораките и на Светската царинска организација се дека камионите што превезуваат опасни материи не треба да се држат во место, а нашите камиони таму стојат од понеделникот. Во нивна близина луѓето се греат, палат цигари, а сето тоа може да биде многу опасно – додава Муратовска.

Таа истакна дека проблемот не е во грчката царина, која постојано е во комуникација со македонските царински служби, туку проблемот треба да се реши на повисоко институционално ниво.

– Ние испративме допис до Канцеларијата за врски на Грција во Скопје, но сè уште нема одговор. Засега ситуацијата е статус кво и нема информација кога границата ќе биде одблокирана – вели Муратовска.

Директорот за продажба во „Макстил“, Јане Адамчевски, вели дека тие како компанија индиректно се загрозени од блокадата на границата.

– Заради специфичноста на производите, транспортот од и кон Солун го правиме преку железнички пат. Но, сега, заради блокада на границата, сите превозници се ориентираа кон железнички превоз. Побарувачката за овој транспорт е зголемена, а капацитетите на македонската и на грчката железница се ограничени и не можат да одговорат навремено на овој обем на побарувања. Поради тоа планираната и нормална динамика на испорака на производите е загрозена – изјави Адамчевски за „Мета“.

Првиот човек на солунското пристаниште, Константинос Мелиос, во изјава за грчката информатицна агенција АПЕ, посочил дека во моментов на пристаништето се насобрани 15.000 тони никел, 10.000 тони сол и 7.000 тони челик, сите наменети за индустриите во Македонија.

– В понеделник чекаме на пристаништето да пристигнат уште два брода кои носат 43 тони никел – вели Мелиос.


На Блаце откриени 68,5 килограми марихуана


Скопје, 7 јануари, 2017 - 12:38 (META) 

Царинските инспектори завчера на граничниот премин Блаце пронашле околу 68,5 килограми марихуана при контрола на комбе во специјално направен бункер, соопшти денеска Царинската управа.

„Инспекторите завчера околу 22:30 часот на Блаце запреле комбинирано комбе (патничко-товарно) со хрватски регистарски ознаки, управувано од Б.К., хрватски државјанин. При преглед на возилото со царинско куче и рачен скенер, помеѓу задните седишта и делот наменет за товар, бил пронајден специјално направен бункер. Во бункерот биле сместени 39 опаковки со различна големина обвиткани со стреч фолија исполнети со марихуана со вкупна тежина од околу 68,5 килограми“, стопи во соопштението.

Од Царинската управа соопштуваат дека осомничениот Б.К. изјавил дека дрогата ја набавил од лице од Р. Албанија со намера да ја транспортира преку Македонија со крајна дестинација Германија, а за пренесувањето на марихуаната требал да добие парична награда. Цената на западноевропскиот пазар за каде била наменета запленетата марихуана се проценува на 200.000 евра, додека во малопродажба може да биде и двојно поголема.

Против сторителот, Царинската управа ќе поднесе кривична пријава за сторено кривично дело „неовластено производство и пуштање во промет на наркотични дроги, психотропни супстанции и прекурсори“ до надлежното Јавно обвинителство, а сторителот ќе биде изведен пред надлежен судија на претходна постапка.


Притворен албански државјанин осомничен за шверц на 24,5 килограми марихуана


Куманово, 14 октомври, 2016 - 10:49 (META) 

Кумановското јавно обвинителство донело наредба за спроведување истражна постапка против албански државјанин, во чиј автомобил на граничниот премин Табановце, завчера биле пронајдени 24,5 килограми марихуана.

Албанскиот државајнин, како што информираат од јавното обвинителство, се товари за неовластено производство и пуштање во промет на наркотични дроги, психотропни супстанции и прекурсори, од член 215, став 1 од Кривичниот законик.

„На 12 октомври, на граничниот премин Табановце при излез од Република Македонија, при извршена контрола на патничко моторно возило, царинските службени лица пронашле 24,5 килограми наркотична дрога – марихуана. Дрогата, спакувана во пакувања со различни големини, била сместена во касета и во специјално направен бункер на подот од возилото“, стои во соопштението на обвинителство.

Вчера, јавниот обвинител што го води случајот извршил распит на осомничниот, кој, како што информираат оттаму, делумно го признал делото за кое се товари.

На барање на обвинителот, судија на претходна постапка на албанскиот државјанин му одредил притвор од 30 дена.


Македонската и албанската царина заедно ќе се борат против царински измами


Подградец, 17 јуни, 2016 - 13:22 (META) 

Во Поградец, Република Албанија, се одржа билатерална средба помеѓу царинските управи на Република Македонија и на Република Албанија.

Состанокот на делегациите, предводени од директорите на двете служби, се одржа во насока на зајакнување на соработката помеѓу двете земји, воспоставена во рамките на Спогодбата за билатерална соработка помеѓу Република Албанија и Република Македонија за заемна помош и соработка помеѓу царинските органи.

Двете делегации разговарале за унапредување на електронската размена на царински податоци за спречување царински измами во двете земји, унапредување на соработката на оперативно ниво при вршењето на тековното царинско работење, координирање на активностите во насока на олеснување на трговијата и на безбедноста, како и за меѓусебна соработка помеѓу службите при имплементирање на современите компјутерски системи.

Претставниците на царините од двете земји усвоиле и повеќе заклучоци кои ќе бидат содржани во акционен план за размена на податоци за спречување на царински измами.

Искажано е задоволство од досегашната соработка и заинтересираност за организирање на нови активности и за размена на искуства што ќе биде од полза за двете страни.


Србија се премислила за екстрадицијата на Даравелски


Скопје, 25 март, 2016 - 13:27 (META) 

Српското министерство за правда го повлекло решението за екстрадиција на поранешниот директор на Царинската управа, Драган Даравелски, изјави денеска министерот за внатрешни работи, Оливер Спасовски.

– Вчера бевме известени дека барањето е прифатено, дека има решение и дека Даравелски ќе биде екстрадиран. Подоцна дојде информацијата дека српското министерство за правда го повлекло решението за екстрадиција – рече Спасовски.

Одговарајќи на новинарско прашање за случајот со личните карти, Спасовски рече дека Специјалното јавно обвинителство ја отвори истрагата „Титаник“ и во рамки на таа истрага, се спроведуваат сите можни активности.


Патник за Албанија „заборавил“ дека во џебот има 7.400 евра


Струга, 29 февруари, 2016 - 15:47 (META) 

Македонската царина запленила 7.400 евра, откриени при личен претрес на македонски државјанин, кој управувајќи автомобил со македонски регистраски таблички, се пријавил за излез од земјава на граничниот премин Ќафасан, кај Струга.

Патникот пријавил дека носи 2.000 евра, но при извршениот личен претрес, во неговиот паричник се пронајдени уште 7.400 евра за кои не поседувал потврда за потекло.

Во согласност со законските прописи, на патникот му се вратени 2.000 евра, износ што резидент може слободно да го изнесе од земјата.