!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Kриминални групи ја загрозуваат регионалната безбедност, истакна Спасовски


Трст, 24 октомври, 2017 - 19:34 (META) 

Дејствувањето на криминалните групи не предизвикува само економски последици, туку тие сериозно ги загрозуваат и националната и регионалната безбедност, изјави денеска во италијанскиот град Трст, министерот за надворешни работи Оливер Спасовски, додавајќи дека неопходно е соработката да биде приоритет на земјите од Западен Балкан.

Спасовски во своето обраќање на завршната министерска конференција за проектот „Борба против организираниот криминал: Меѓународна соработка во кривичното право“, рече дека проектот треба да придонесе за подобрување на меѓународната стратешка и оперативна соработка, како и за унапредување на размената на информации и на разузнавачки сознанија во италијанскиот град Трст.

– Треба да се поттикне употребата на современата технологија за комуницирање и механизмите за заштита на податоците, усогласени според стандардите на ЕУ – рече министерот Спасовски.

Проектот се реализираше како регионален проект ИПА 2014, а како негов носител од страна на ЕК беше назначено италијанското министерство за внатрешни работи и е наменет за полициите на Македонија, Албанија, Србија, Црна Гора, Косово и на Босна и Херцеговина.


Спасовски со италијанскиот колега Минити договарал проширување на соработката


Трст, 24 октомври, 2017 - 15:45 (META) 

Министерот за внатрешни работи, Оливер Спасовски, денеска во Трст, Италија, се сретнал со министерот за внатрешни работи на Италија, Марко Минити, при што се разговарало за продлабочување на соработката меѓу двете министерства.

Како што соопшти македонското Министерство за внатрешни работи (МВР), двајцата министри констатирале дека соработката меѓу двете министерства е одлична, а особено значајна во областа на борбата против трговијата со дрога, при што претставници од македонското МВР присуствуваат на обуки за борба против трговијата со дрога, главно во Централната дирекција за борба против дрога во Рим, Италија.

„Двајцата соговорници искажаа подготвеност и за продлабочување на соработката, особено во областа на организираниот криминал и на финансиските истраги.  Министерот Минити ја нагласи безрезервната поддршка од Република Италија за реформите во Република Македонија“, се вели во соопштението од МВР.

Министерот Спасовски вчера и денеска во Трст учествува на завршната министерска конференција за проектот „Борба против организираниот криминал: Меѓународна соработка во кривичното право“.


Анѓушев – Гарет: Македонија може повеќе да извезува во Велика Британија


Скопје, 19 јули, 2017 - 18:11 (META) 

Вицепремиерот за економски прашања, Кочо Анѓушев, денеска се сретна со британскиот амбасадор во земјава, Чарлс Гарет, со кој разговарал за економската соработка помеѓу Македонија и Обединетото Кралство.

Тие заклучиле дека соработката е на солидно ниво, но и дека постои можност економските односи уште повеќе да се развијат, особено во поглед на извозот од Македонија.

„Обединетото Кралство е значаен економски партнер на Македонија, втора земја по обем на трговската размена. Сметам дека досегашната меѓусебна економска соработка е добра основа која може да ја надградиме, особено во намалување на трговскиот дефицит и зголемување на извозот кон Обединетото Кралство. Со економските политики кои Владата ќе ги спроведe во наредниот период, ќе се насочиме кон тоа да ги развиваме македонските компании да произведуваат производи со повисока додадена вредност, да станат поконкурентни на регионалните и на европскиот пазар и да го зголемат извозот, со што ќе придонесеме и за отворање нови работни места и за побрз пораст на економијата“, истакна Анѓушев.

Амбасадорот Гарет се осврнал на активностите од Берлинскиот процес, односно на самитот за Западен Балкан кој се одржа во Трст, но и на активностите кои следуваат наредната година.

„На самитот во Трст, Македонија навистина имаше успешно претставување. Наредниот самит за Западен Балкан ќе се одржи во Обединетото Кралствo и се надевам дека планираните реформски процеси во земјата ќе бидат реализирани, а Република Македонија ќе добие уште поголема поддршка на наредниот самит“, изјавил Гарет.


Анѓушев: Добивме 70 милиони евра грант од ЕУ за пругата кон Бугарија


Скопје, 13 јули, 2017 - 14:15 (META) 

Од вкупно 194 милиони евра грант наменет за развој на инфраструктурата во Западен Балкан, Македонија на самитот во Трст добила 70 милиони евра за доизградба на пругата од Бељаковце до Крива Паланка, информираше денеска вицепремирот задолжен за економски прашања, Кочо Анѓушев, кој додаде дека оваа неповратна помош, доволна за да се покрие 46 отсто од вкупната сума што е потребна за изградба на втората делница од пругата кон Бугарија.

– Препознаен е реформскиот дух на Владата практично да ги имплементира сите процедури и потребни чекори за побрзо и полесно пристапување кон Европската Унија и до нејзините фондови – изјави Анѓушев.

Одговарајќи на новинарско прашање, Анѓушев кажа дека пругата ќе биде градена во континуитет и дека третата делница ќе се гради откако ќе биде завршена втората.

Тој, исто така, нагласи и дека биле направени контакти со Светска банка, која била незадоволна што последните две-три години воопшто не биле склучени нови договори за изградба на инфраструктура во Македонија, а и тие чија реализација почнала не е на потребното ниво.

Средствата што ги нуди Светска банка најчесто се за автопатска мрежа, а било разговарано и за буџетска поддршка која, како што рече Анѓушев, конечно ќе заврши кај македонските компании.


Лидерите од Западен Балкан во Трст го усвоија Акцискиот план за економска интеграција


Трст, 12 јули, 2017 - 21:16 (META) 

Шесте земји од Западен Балкан, меѓу кои и Македонија, денеска на Самитот во Трст го усвоија повеќегодишниот Акциски план за регионален економски простор на Западен Балкан наречен МАП (Multi-annual Action Plan – Повеќегодишен акциски план), соопшти Регионалниот совет за соработка (РСС), кој е овластен да го следи целиот процес.

МАП има цел да овозможи „непречен протек на стока, услуги, капитал и на квалификувана работна сила“, со што регионот би требало да биде поатрактивен за вложувања и за трговија и да го забрза приближувањето кон ЕУ на земјите потписнички.

Со МАП се предвидени мерки за приватниот сектор да може да се реализира на пазар од приближно 20 милиони луѓе и да се насочи кон модел на регионален пораст со долгорочни стапки. Мерките се фокусираат на промовирање на понатамошна трговска интеграција, воведување динамичен регионален простор за инвестиции, олеснување на регионална мобилност и создавање програма за дигитална интеграција.

Надгледувањето на напредокот и реализацијата на МАП му е доверена на Регионалниот совет за соработка и на Секретаријатот на ЦЕФТА.

Генералниот секретар на РСС, Горан Свилановиќ, изрази задоволство што од шесте лидери и од ЕУ, добиле задача да го надгледуваат процесот.

– Шесте лидери на Западен Балкан изразија целосна определеност за спроведување на МАП. Ова ќе даде силен поттик на процесите на пристапување во ЕУ врз основа на индивидуални заслуги, целосно ќе го забрза исполнувањето на економските критериуми од Копенхаген и ќе ослободи поголеми економски потенцијали – изјави Свилановиќ.

Во соопштението се наведува дека лидерите од Западен Балкан ги повикуваат меѓународните организации и донаторите кои ги поддржуваат реформите во областите што ги предвидува МАП, своите програми за помош да ги сообразат со МАП. За таа цел, до крајот на 2017 година треба да се организира конференција посветена на координација на донаторите.


Заев: Во Македонија владее оптимизам од подадената рака од меѓународната заедница


Трст, 12 јули, 2017 - 20:45 (META) 

Има голема потреба од формирање рамка за унапредување на односите меѓу земјите од Западен Балкан, кон што е силно определена новата влада на Република Македонија, а постои и голема потреба не само од реформи, туку и од фокусиран забрзан реформски напредок, рече премиерот Зоран Заев за време на неговото обраќање на самитот за Западен Балкан во Трст.

– Знам дека граѓаните на Македонија се изморени од долгогодишната стагнација. Но, сакам да го споделам и оптимизмот во нашата држава, што го заменува тој замор. Тој оптимизам е резултат на видиците што ги отворија демократските промени во Македонија, но и подадената рака од Брисел и меѓународната заедница, кои тоа го препознаа и ги отворија вратите за Република Македонија. Тоа се врати на перспективи за граѓаните на Македонија, на верба и на надеж дека ова е моментот што не смее да се испушти. Ова е шансата за напредок. И ние тоа го имаме предвид – изјави Заев.

Пред лидерите на земјите од Западен Балкан, еврокомесарот за проширување, Јоханес Хан, шефицата на европската дипломатија, Федерика Могерини, како и шефови на држави членки на ЕУ, Заев потенцираше дека постои политичка волја кај владата на Република Македонија да ја поддржи и да ја прифати Агендата за поврзаност на регионот.

Тој додаде дека Македонија ќе работи на унапредување на владеењето на правото и доброто управување.

– Длабоката и долгогодишна политичка криза, предизвикана токму од непочитувањето на овие базични обврски, ни покажа дека тоа е и потреба за граѓаните кои имаат уставно право на правда и почитување на нивните слободи и права. Ве уверувам, Македонија може да биде и ќе биде кредибилен партнер на ЕУ во регионот, а тоа ќе испрати и нова мотивирачка порака за целиот Западен Балкан, затоа следете нè и поддржувајте нè. Потребна ни е вашата помош и поддршка – рече Заев.

Македонскиот премиер потенцираше дека Македонија ќе остане цврст партнер во справувањето со предизвиците во борбата против тероризмот, илегалната миграцијата, радикализацијата и мигрантската криза.

По обраќањето, Заев заедно со премиерите од Западен Балкан го потпиша Договорот за транспортна заедница.


Меркел: Политичката стабилност на Балканот значи и наша стабилност


Трст, 12 јули, 2017 - 19:34 (META) 

Германската канцеларка Ангела Меркел денеска на самитот за Западен Балкан во Трст изјави дека должност на Европска Унија е да го приближи регионот „бавно, но сигурно“ во правец на членство на ЕУ.

– Политичката стабилност во регионот значи политичка стабилност и за нас. Ние го знаеме тоа од искуство – рече Меркел.

Претходно, австрискиот канцелар Кристијан Керн изјави дека на регионот мора да му се врати јасната европска перспектива.

– Западниот Балкан не е заден двор на Европа, туку наша дневна соба. Европската Унија на терен го изгуби влијанието, а во исто време се зголеми руското, кинеското, вахабитското, но и турското влијание – смета Керн.

Тој посочи и дека новиот американски претседател Доналд Трамп вовел нова динамика за Западен Балкан и нагласи дека „не смее да се дозволи формирање на воневропски сили“.


Заев – Брнабиќ: Ќе ја развиваме регионалната соработка, имаме заедничка иднина во ЕУ


Трст, 12 јули, 2017 - 17:56 (META) 

Премиерот Зоран Заев и премиерката на Србија, Ана Брнабиќ, денеска на билатерaлната средба во Трст на самитот за Западен Балкан констатирале дека постојат услови за продлабочување на односите меѓу двете држави, како и дека тоа ќе биде силна порака кон Европската Унија, за европска интеграција на земјите од Западен Балкан кои припаѓаат на Унијата.

„Има заедничка согласност дека на граѓаните на Македонија и на Србија им е неопходен економски развој и дека тој е можен само преку вистинска регионална соработка. Во таа насока се разговараше за поддршката во државите на „старт ап центри“ коишто отвораат можност за нови работни места. Се зборуваше и за регионално поврзување на младите, како и за размена на искуства во дигиталната технологија. Со тоа, премиерите Заев и Брнабиќ оценија дека може да се придонесе кон интересот што го имаат и двете држави, да го спречат одлевањето млади, квалитетни луѓе во странство и мотивација на тие кои заминале, да се вратат. Премиерите на Македонија и на Србија, придружувани од министрите за надворешни работи, Никола Димитров и Ивица Дачиќ, изразија согласност сите отворени прашања на двете пријателски земји да се решаваат низ конструктивна соработка и дијалог“, соопштија од кабинетот на Заев.

Заев денеска имал средба и со потпретседателот на Светска банка, Цирил Милер. Попладнево следува самитот на шефови на држави и влади од Западен Балкан, на кој ќе бидат присутни премиери на држави од Европската Унија и претставници на највисоко ниво од Брисел.


Хан: Барањата на граѓанскот сектор од Балканот се прифатливи


Трст, 12 јули, 2017 - 16:16 (META) 

Најголем дел, околу 90 отсто од барањата и од препораките на граѓанскиот сектор од Балканот се прифатливи, само треба да се најде начин за нивна имплементација, оцени еврокомесарот за проширување, Јоханес Хан, денеска во Трст, откако присуствуваше на средбата меѓу претставниците на граѓанскиот сектор и шефовите на дипломатиите на земјите од Западен Балкан. На средбата шефот на македонската дипломатија ги охрабри граѓанските организации и иницијативи да ја критикуваат власта.

По вчерашниот целодневен Форум на цивилното општество, барањата на министрите и на еврокомесарот им ги презентираше Срѓан Сушиќ, консултант на германската фондација „Хајнрих Бел“, која е коорганизатор на настанот.

Министрите, меѓу кои и шефот на македонската дипломатија, Никола Димитров, позитивно реагираа и побараа од граѓанскиот сектор уште поактивна улога. Димитров ја истакна улогата на невладиниот сектор во неодамнешната криза во Македонија, оценувајќи дека таа помогнала во евроинтеграциските процеси.

– Желбата на регионот е да влезе во ЕУ. Веќе изгубивме многу време и крајно време е да ја завршиме работата. Критичкиот однос е многу важен и затоа немојте да се двоумите дали да нè критикувате –  изјавил Димитров.

Препораките се однесуваат на демократските процеси, владеењето на правото, деловното опкружување и иновациите, енергијата и климатските промени и слободата на говорот и улогата на медиумите, што беше посебно нагласена од еврокомесарот Хан, како многу важен услов за евроинтеграциите и како критична точка во регионот.

– Медиумските слободи можат да бидат унапредени само доколку создадеме медиумски пазар и со тоа да им овозможиме на медиумите да не бидат зависни од финансиска помош – оцени Хан.

Третиот Форум на цивилното општество од Западен Балкан, на кој учествуваа и претставници од Македонија, беше замислен како претходница на денешниот самит во Трст. Шефовите на дипломатиите и премиерите на Македонија, Албанија, БИХ, Црна Гора, Косово и на Србија треба да ги земат предвид барањата на граѓанскиот сектор, кој од страна на ЕУ е оценет како значаен фактор за побрза евроинтеграција и е составен дел од Берлинскиот процес.

Состанокот на Западен Балкан со ЕУ завршува вечерва, со заедничка декларација и со одлуки кои ќе бидат сериозно придвижување кон регионалната соработка и забрзување на евроинтеграциските процеси.


Заев: Од Трст се испраќаат охрабрувачки пораки дека ќе се приближиме кон Европа


Трст, 12 јули, 2017 - 15:17 (META) 

Европската Унија мора подиректно да му помогне на регионот за да се забрза неговата евроинтеграција, а самитот во Трст испраќа пораки на охрабрување дека ќе се приближиме кон Европа, рече македонскиот премиер Зоран Заев во емисијата „Окружење“, која се снимаше денеска на самитот ЕУ – Западен Балкан, што се одржува во Трст во рамки на Берлинскиот процес.

Според Заев, блокирањето на Македонија поради нерешеното прашање во врска со името и спорот со Грција ги демотивира македонските граѓани, но новата Влада има пријателски односи кон сите соседи и никого нема да провоцира.

– Грција може многу да ѝ помогне на Македонија, која е подготвена да возврати на таквата помош. Се менува односот на ЕУ кон Балканот, па така од првичната изјава на Жан-Клод Јункер дека ќе нема проширување на ЕУ до 2019 година, дојде до тоа Балканот да биде во фокусот на Унијата – рече Заев.

Во емисијата „Окружење“, која се снимаше утринава пред официјалниот почеток на самитот во Трст, освен Заев, учествуваа и премиерот на Албанија, Еди Рама, шефот на дипломатијата на Србија, Ивица Дачиќ, и генералниот секретар на Регионалниот совет за соработка, Горан Свилановиќ.