Претходната власт плаќала три пати поскапо за авионски карти, хотели и ресторани


Скопје, 22 март, 2018 - 11:40 (META) 

Алатката за отчетност за трошоците на носителите на јавните фунцкии, која владата ја промовираше вчера, покажува дека најголеми разлики во трошењето помеѓу сегашната и минатата власт има во авионските карти, хотелското сместување, но и кај трошењето во ресторани во странство.

За шестмесечен период, министерствата предводени од минатата власт за овие ставки потрошила двојно, а некаде и тројно повеќе народни пари за овие услуги.

Периодот кој што се анализира со оваа алатка е од 1 јуни до 1 декември 2014 година од владеењето на претходната власт и од 1 јуни до 1 декември 2017 година за време на владеењето на оваа власт, односно првите шест месеци од стапувањето на функции по прземање на власта.

Анализирањето на трошења по министерства, покажува дека министерството за финансии предводено од Зоран Ставрески потрошило 2.619.357 денари, а со Драган Тевдовски 583.170 денари.

Најголема разлика во трошењата има кај авионските карти, при што, Ставрески потрошил 947.579 денари, наспроти 144.514 денари потрошени од Тевдовски. Голема разлика има и кај хотелското сместување, 834.802 денари наспроти 206.283 денари. Евидентна е разликата и кај угостителски услуги во странство 345.243 денари, наспроти 32.748 денари.

MinFin

За угостителски услуги во земјата преку надворешни угостителски објекти, биле потрошени 171.469 наспроти 47.242 денари.

Разлики во трошењето има и во министерството за транспорт и врски, па така, кабинетот на Миле Јанакиески за авионски карти потрошил 615.774 денари, а за кабиентот на Горан Сугарески нема таков трошок.

За угостителски услуги во земјата, Јанакиески потрошил 286.661 денари наспроти 31.265 денари потрошени од Сугарески. Хотелското сместување во странство, Јанакиески го чинело 301.727 денари наспроти 16.700 денари потрошени од Сугарески.

Трошоците за мобилен телефон на кабиентот на Јанакиески се 419.132 денари, а на Сугарески 14.998 денари.

Кај Министерство за здравство, интересен е податокот што Никола Тодоров не потрошил ниту денар за авионски карти, но затоа за угостителски услуги во земјата преку надворешни угостителски објекти потрошил 816.607 денари, наспроти 276.982 денари, потрошени од Таравари.

MinODB

Министерството за одбрана за време на Зоран Јолевски потрошило 1.020.347 денари, а за време на Радмила Шекеринска 447.044 денари. Најголеми разлики во трошењето има кај авионските карти 636.533 денари за време на Јолевски, наспроти 225.872 денари за време на Шекеринска.

Речиси четири пати е поголема сумата потрошена на угостителски услуги преку мензи, ресорани и бифеа во рамките на институциите за време на Јолевски (800.277), наспроти 197.393 денари за време на Шеќеринска.


Министерството за одбрана се отвора кон јавноста и ќе објавува сè што не е тајно


Скопје, 16 јануари, 2018 - 14:39 (META) 

Трошењата на министерот за одбрана , платите и јавните набавки во Министерството за одбрана повеќе нема да бидат тајна, порача Радмила Шекеринска, првиот човек на ова министерство на прес-конференција.

– Министерството за одбрана, не само во Македонија, но особено во Македонија се сметаше за едно од традиционално најзатворените министерства, заради природата на работа, но и заради таквата политичка волја. Зад параванот на класифицирани информации важни за безбедноста на државата во минатото се криеја потези кои значеа криминал, злоупотреба на средства, лагодно однесување од страна на раководителите во Министерството, па дури и манипулации.  Во име на законската потреба од класифицираност околу споделувањето на информации за суптилни безбедносни прашања се правеле манипулации кои оделе директно на штета и на безбедноста на државата, но и на буџетот на Република Македонија. На таа практика и дојде крајот – порача Шекеринска.

Министерката за одбрана вели дека и понатаму ќе има доверливи и класифицирани информации, но исклучиво оние поврзани со безбедносните интереси на државата. Во таа категорија нема да бидат трошењата на министерот или раководната структура, платите на раководството на министерството, услугите, јавните набавки, а институцијата, според Програмата за работа на Владата, ќе ги споделува информациите дури и истите пред да бидат побарани од страна на граѓаните, невладините организации, медиумите.

„Затоа на веб страната на министерството е отворена опцијата „Јавноста има право да знае“ каде што се ставени голем број на информации кои за прв пат се достапни до јавноста и со кои го отвараме министерството кон граѓаните“, вели министерката.

Таков ќе биде третманот на сите програми, стратегии, буџетот, организацијата и трошоците во работењето. Шекеринска најавувајќи го објавувањето на документите поврзани со своето материјално финансиско работење, рече дека сите информации ќе бидат достапни без да се доставуваат барања по Законот за слободен пристап до информации, а исто така ќе бидат постојано ажурирани гарантира Правилникот за транспарентност во работењето на министерството.

Ќе се објавува и Планот за јавните набавки и секој заинтересиран ќе може да ги види огласите за јавните набавки на министерството, а како што тече процедурата за јавни набавки така ќе бидат објавувани и известувањата за одлуки и потпишаните договори за јавни набавки.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Пленарната расправа за ребалансот на буџетот ќе продолжи во 11 часот


Скопје, 3 август, 2017 - 10:01 (META) 

Собраниската седница за ребалансот на буџетот ќе продолжи денеска во 11 часот.

Министерот за финансии, Драган Тевдовски, на првата пленарна седница, во вторникот, рече дека основната цел на ребалансот на буџетот е да се зголеми животниот стандард на граѓаните и да се поддржат домашните претпријатија.

Тој додаде дека при правењето на ребалансот имале одредени ограничувања, како што се склучување договори за тековни или идни проекти за кои ако се раскинат, државата ќе плаќа пенали. Затоа, скратиле на непродуктивни трошења, службени патувања, репрезентации и сл.

Од ВМРО-ДПМНЕ, пак, посочуваат дека капиталните инвестиции се скратени за 58 милиони евра, а задолжувањето ќе се зголеми за 148 милиони евра.


СДСМ: Владата ги намали долговите за 55 милиони евра


Скопје, 18 јули, 2017 - 13:55 (META) 

Владата предводена од СДСМ, за 55 милиони евра ги намали долговите што ВМРО-ДПМНЕ ги правеше за луксузирање и за криминално богатење, се вели во реакцијата на СДСМ на соопштението на ВМРО-ДПМНЕ за ребалансот на буџетот.

Во реакцијата на владејачката партија се додава дека ВМРО-ДПМНЕ, 11 години тајно и нетранспарентно ги задолжувала граѓаните, а парите од задолжувањата ги трошела за лускузирање и за криминално богатење на поединци.

„За разлика од расипничкото владеење на ВМРО-ДПМНЕ и на Никола Груевски, новата влада предводена од СДСМ преку ребалансот ги крати непродуктивните трошења и парите ги враќа кај граѓаните“, велат од СДСМ.


Димитров ја укина тајноста на податоците за службените патувања на дипломатите


Скопје, 15 јуни, 2017 - 20:46 (META) 

Министерот за надворешни работи, Никола Димитров, донел решение со кое се укинува тајноста на сите документи што се однесуваат на службените патувања на шефот на дипломатијата и на сите вработени во МНР, соопшти денеска МНР.

Ова значи дека документите поврзани со службени патувања на вработените во Министерството за надворешни работи повторно стануваат информации од јавен карактер, односно медиумите и јавноста ќе имаат пристап до нив.

„Министерството за надворешни работи на Република Македонија ги информира медиумите и пошироката македонска јавност дека во духот на транспарентноста и на отчетноста пред сите граѓани, со решение на министерот за надворешни работи донесено на 12 јуни 2017 година, се укинува претходното решение на заменик-министерот за надворешни работи од 14 февруари 2017 година за класификација на сите документи што се однесуваат на службени патувања на министерот и на сите вработени во Министерството, како и на сите службени патувања на лица кои се во делегација или во придружба на истата“, стои во соопштението.

Од МНР велат дека решението на Димитров е „производ на посветената заложба на Министерството за целосна транспарентност пред граѓаните и пошироката македонска јавност и за отчетност во работата на Министерството и начинот на трошење на парите на даночните обврзници, без притоа да ја загрози сензитивноста или безбедноста на својата работа“.


СДСМ: Пред 11 години долгот изнесуваше 1,8, а денес повеќе од 5 милијарди евра


Скопје, 19 мај, 2017 - 17:07 (META) 

„Следува период во кој новата влада ќе ги преиспита сите задолжувања што ги направи досегашната власт изминативе години на крајно нетранспарентен начин,“ велат од СДСМ.

Од партијата најавуваат дека ќе биде спроведена и темелна ревизија на сите нетранспарентни трошења на пари на граѓаните од буџетот на државата.

„Никола Груевски и неговите соработници заминуваат од власт оставајќи јавен долг во висина од речиси пет милијарди евра. Пред 11 години, во 2006 година јавниот долг изнесуваше 1,8 милијарди евра. На девизната депозитна сметка Груевски затекна над 250 милиони евра. За сите злоупотреби на пари на граѓаните ќе следува одговорност. Новата и одговорна влада ќе ја подигне економијата и транспарентно и отчетно ќе раководи со јавните финансии“, стои во соопштението на СДСМ.


СДСМ: Ќе има ревизија на сите трошења на пари на граѓаните од Груевски и од соработниците


Скопје, 17 мај, 2017 - 16:43 (META) 

„Граѓаните набргу ќе ја добијат новата реформска влада, која детално ќе ги преиспита сите задолжувања што беа направени на крајно нетранспарентен начин изминативе години, а исто така ќе направи и детална ревизија на сите нетранспарентни трошења на парите од буџетот“, се вели во реакцијата на СДСМ на текстот „СДСМ наследува полн буџет од 180 милиони евра кеш за трошење, во 2006-та ВМРО-ДПМНЕ наследи само 1 милион евра и блокирана сметка“, објавен на порталот „Курир“.

Во реакцијата се вели дека досегашната власт на Никола Груевски го издигна јавниот долг на историски највисоко ниво, во висина од најмалку 4,7 милијарди евра.

„Пред 11 години, во 2006 година, јавниот долг изнесуваше само 1,8 милијарди евра. Новата реформска влада транспаретно и отчетно ќе раководи со јавните финансии и граѓаните ќе ги добијат сите потребни информации за нетранспарентните задолжувања и трошења направени изминативе години“, се додава во реакцијата на СДСМ.


Партиите имале 1,4 милиони евра, а потрошиле 3,1 милиони евра за кампањата


Скопје, 12 декември, 2016 - 12:11 (META) 

За време на изборната кампања, политичките партии потрошиле двапати повеќе пари од што имале приходи. Вкупните приходи на сите политички партии изнесувале 88.314.902 денари (1.436.015 евра), а расходите биле 195.501.767 денари (3.178.890 евра).

Ова денеска го соопшти „Транспарентност Македонија“ при презентирање на резултатите добиени од надзорот на трошењата на политичките партии во периодот од 1 до 9 декември и од анализата на вторите финансиски извештаи што политичките партии ги доставија до надлежните институции.

Најголем дел од трошоците политичките партии ги имале за телевизиски рекламни кампањи, митинзи, средби со граѓани и за печатење пропаганден материјал.

Она што останува непознато е сумата потрошена за рекламирање на интернет, кое политичарите го плаќале лично наместо од изборната сметка.

– Голема сума пари останува во сивата зона на рекламирањето на интернет. Не знаеме колку пари се потрошени за кампањи на интернет. Политичарите овие трошоци ги покриваат од лични сметки, а не од изборната сметка. Интересно е што во албанските печатени медиуми, рекламирањето е платено од поединци, односно од министри, а не од партија. ДУИ, а и други албански политички партии, имаат прикажано нула трошоци за реклами во печатени медиуми – изјави првиот човек на „Транспарентност Македонија“, Слаѓана Тасева.

Според неа,  личното спонзорство од страна на политичар кој не настапува како самостоен кандидат, туку е дел од политичка партија и коалиција, е прекршок.

Според финансиските извештаи за периодот од 1 до 9 декември, кои партиите ги доставиле до надлежните институции, а во поглед на бројот на објави на националните телевизии, ВМРО-ДПМНЕ се огласувала најмногу, а СДСМ иако помалку се рекламирал, тоа повеќе го чинело. Тасева вели дека овој феномен треба посебно да се истражува.

Голема е разликата помеѓу вкупните приходи (294.825 евра) и расходи (1.905.898 евра) на ВМРО-ДПМНЕ и на Коалицијата за живот во Македонија и според претседателката на „Транспарентност Македонија“, треба да се види како таа дупка ќе се пополни.

Финансиски извештај до надлежните институции не доставила ПДП.

Проекцијата на „Транспарентност Македонија“ е дека политичките партии повеќе потрошиле од што прикажале, а тоа ќе се утврди по затворањето на изборната сметка, 30 дена по изборите, и по доставувањетo на финалните финансиски извештаи.


Николов: Со овој неразвоен буџет се проектира нов дефицит и долгови од 305 милиони евра


Скопје, 28 септември, 2016 - 16:15 (META) 

„Владата ги игнорира укажувањата на Светска банка дека мора да почне да ја намалува задолженоста и да почне фискална консолидација, бидејќи јавниот долг ќе достигне повеќе од 50 проценти од домашниот бруто-производ. И во 2017 година Владата со овој неразвоен буџет проектира нов дефицит и нови долгови од 305 милиони евра“, истакна претседателот на собраниската Комисија за финансирање и буџет, Марјанчо Николов.

Тој истакна дека повторно се игнорира укажувањето на Светска банка дека зголемуавњето на приходите е минимално.

– Наспроти тоа, имаме експанзија на буџетските расходи чие трошење е неосновано затоа што најголем дел од овие расходи одат за непродуктивни трошења и за неразвојни проекти како што се барокни фасади, панорамски тркала, рајски градини. Светска банка потврди дека во 2017 година трансферите кон ПИОМ ќе се зголемат за 20 милиони евра со што дефицитот во ПИОМ ќе го достигне историски највисокото ниво од 450 милиони евра. Ова е уште една потврда за катастрофалните фискални политики – истакна Николов и додаде дека буџетот за 2017 година ќе претрпи темелна ревизија.

Денеска во Комисијата за финансирање и буџет почна расправата за предлог-буџетот за 2017 година.


Општините мал дел од буџетот го реализираат за капитални инвестиции


Скопје, 16 март, 2016 - 13:40 (META) 

Стапката на реализација на капиталниот буџет од страна на општините за 2015 година е многу мал и кај некои општини изнесува дури помалку од 30 процнети. Кај реализацијата на оперативниот дел од овој буџет, односно плати и намирување на други тековни трошоци, таа стапка е многу повисока и изнесува од 80 до 89 процнети. Ова се однесува на 24 општини од осум региони во земјава.

– Ниту една општина не го реализирала капиталниот буџет со повеќе од 80 проценти, кај пет општини тој процент изнесува од 50 до 59 проценти – изјави Весна Гарванлиева-Андонова од Центарот за економски анализи.

Во февруари годинава, од вкупно 49 проекти, 35 отсто биле предвидени во програмите на општините, за 27 отсто имало донесено одлука од советот на општината и 41 отсто биле предвидени во буџетската програма и план на општината.

– Ниту едно од идентификуваните трошења не е предвидено во сите стретешки и тековни документи. Скромен дел, односно една третина, биле дел од барем два документи – додава Гарванлиева-Андонова.