!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Компаниите бараат функционалност на Коридорот 10 зашто нема алтернатива


Скопје, 16 март, 2017 - 14:59 (META) 

Воспоставувањето целосна инфраструктурна функционалност на Коридорот 10 и обезбедувањето непречен пристап на стоките од и до пристаништето во Солун треба да биде приоритет, бидејќи во моментов нема алтернатива.

Ова е еден од заклучоците на тркалезната маса на тема „Сигурност во снабдувањето со стоки и со нафтени деривати – Можности и алтернативи“, која се одржа во Стопанска комора на Македонија.

– Инфраструктурата, царинските премини и терминали на коридорот Исток – Запад не се доволни и не се соодветни за редовно снабдување со стоки, а особено за нафтени деривати во подолг период. Инцидентно, може да помогне во одредени ситуации, кога има нарушување на снабдувањето преку Коридорот 10. Краткорочно гледано, во случај на нарушување на снабдувањето со деривати и со други стоки, неопходна е диверзификација на превозните средства (користење на железница и автоцистерни или камиони) и користење на повеќе влезни и излезни царински премини во државата – се предлог-заклучоците на тркалезната маса, информираат од Стопанска комора.

Еден од предлозите бил и промена на легислативата за зголемување на капацитетот на резервоарскиот простор кај трговските компании, како услов за добивање лиценци за трговија.

– Со заокружување на процесот на приватизација на пристаништето во Солун, односно негово давање под концесија, како и со либерализација на пристапот кон грчката железничка инфраструктура и влез на приватни оператори, ќе се овозможи либерализирање на односите по повеќе основи (избегнување на можни штрајкови, подобрување на брзината на испораките, намалени трошоци) – велат од Стопанска комора.

Преку пристаништето во Солун поминале 3.322.000 тони стока во 2016 година и 4.056.840 тони во 2015 година, од кои, во увоз и во извоз, количеството на стока за Македонија за 2016 година е 885.000 тони.


Вклученоста на Ромите во образовниот процес е значително подобрена, велат невладините организации


Тетово, 16 март, 2017 - 13:55 (META) 

Состојбата на Ромите и нивното вклучување во образованието етапно се подобрува, како резултат на проектите што ги спроведуваат невладините организации, сметат учесниците на тркалесната маса „Подобрување на состојбата на Ромите во образовните процеси“.

Од невладината „Сонце“ велат дека бројката на Роми што се запишуваат во основно и во средно образование е многу зголемена. Ваквиот став го делат и други невладини организации што учествуваа на денешната тркалезна маса.

– Децата подолго престојуваат во училиште и мошне е подобрена состојбата со завршување и на основно и на средно образование. Со големи напори на невладиниот сектор и на државните институции, сметаме дека од сите сектори каде може да се дејствува во образованието е најмногу постигнато и ние работиме да се зајакнат капацитетите на семејствата и да го поддржуваат образованието кај своите деца – рече Елена Мишиќ, од фондацијата „Чекор по чекор – Македонија“.

На тркалезната маса учествуваа и претставници на невладини организации од Косово, кои нагласија дека Ромите не се прифатени во нивното општество. Најчесто, како што посочија, тие се дискриминирани во процесите на вработување и на образование.

Оттаму се надеваат дека со нивните активности и преку националната стратегија за подобрување на статусот на Ромите, дискриминацијата кон оваа заедница ќе се намали.


Беса: ДУИ не е достојна да свика средба на албанските партии


Скопје, 20 февруари, 2017 - 14:52 (META) 

Бучавата што се прави за заедничката тркалезна маса на албанските парламентарни партии е за некои албански партии во Македонија да придобијат политички поени во пресрет на локалните избори, велат од Движењето Беса.

Ставот на Беса е дека не прифаќа состанок кој е инициран од претседателот на ДУИ во Скопје.

„Тие што беа главни виновници што на Беса ѝ беа одземени два пратеника за да ѝ се дадат на ВМРО-ДПМНЕ, немаат веќе легитимитет да ги застапуваат Албанците, ниту се достојни да свикаат средба на албанските политички партии во Македонија. Нивниот лидер може да биде поглавар на некоја партија или алијанса, но за нас тој е главниот виновник за актуелната состојба на Албанците во Македонија. Поради оваа причина, ваквите иницијативи, наводно во име на албанските интереси, но злоупотребувајќи ја тркалезната маса, за нас се со лоши намери и за цел ја имаат само рехабилитацијата на тие што 15 години екстремно го уништија интересот на Албанците во Македонија. На тој што му се потребни јавни средби со Беса, за да може како Пилат да си ги измие рацете од кривичните дела, не можеме да му го дозволиме тоа задоволство“, велат од Беса.

Според партијата, состаноците кои се одржуваат во име на платформата, повеќе личат на разговори за коалиција на ДУИ и на Алијанса на Албанците. Од партијата додаваат дека сè уште ја поддржуваат платформата и дека нејзините пратеници ќе гласаат по нејзините точки кога ќе дојдат на дневен ред во Собранието.


Ѓукановиќ и Месиќ утре на тркалезната маса по повод 95. години на Стопанска комора


Скопје, 16 февруари, 2017 - 10:28 (META) 

Тркалезна маса на тема „Позицијата на малите земји во меѓународната економија – предности и недостатоци“ ќе организира Стопанска комора по повод 95-годишнината од коморското организирање во Македонија.

На тркалезната маса која почнува утре во хотелот „Александар Палас“ во 11 часот, ќе учествуваат домашни и странски реномирани претставници од научната и стручната јавност, сегашни и поранешни претседатели и премиери на држави од регионот, како и повеќе звучни имиња од бизнисот.

Меѓу учесниците се црногорскиот премиер Мило Ѓукановиќ, поранешниот хрватски претседател Стипе Месиќ, хрватскиот милијардер Бранко Роглиќ, српскиот бизнисмен Миодраг Костиќ, македонските бизнисмени Светозар Јаневски, Кочо Анѓушев, економскиот експерт Владимир Глигоров и други.

Оперативниот директор на Стопанска комора на Македонија, Елена Милевска Штрбевска за „Мета“ вели дека 95 години се години за респект и години на работа кои треба достојно да се одбележат.

– Темата за тркалезната маса која ја организираме на нашиот јубилеј е всушност резултат на двегодишна работа на формулирање и развивање на една значајна инцијатива, а тоа е иницијативата за поврзување на претприемачите од малите земји. Иницијативата ги надмина првичните цели отворајќи ги клучните и темелни прашања: каква е позицијата на малите земји во поголемите интегративни процеси, дали процесите во малите земји имаат посебни карактеристики, дали тие можат да се сублимираат на едно место и дали некој се занимавал со овие прашања? Така дојдовме и до оваа иницијатива за подобрување на економските можности на бизнисите од малите земји – изјави Милевска Штрбевска.


Тркалезна маса во Охрид: „Секој може и има право да биде вработен“


Охрид, 15 февруари, 2017 - 10:44 (META) 

Институтот за економско истражување и политики „Фајненс тинк“ (Finance Think) од Скопје, денеска во Охрид организира тркалезна маса под мотото „Секој може и има право да биде вработен“.

Тема на дебатата ќе бидат проблемите и можностите за вработување на жителите на Охрид, градот кој, веќе години наназад, е на самиот врв според бројот иселени од земјава, а заминуваат, главно, млади луѓе.

Соговорници на заинтересираните за темата, меѓу другите ќе бидат Наташа Павиќевиќ – Стојменовска од „Фајненс тинк“, Димче Каневче од Младински Совет од Охрид, Павлина Пероска од Меѓуопштинскиот Центар за социјална работа од Охрид и Маја Ташева – Биткоска од охридскиот Центар за вработување.


Македонските студенти ретко пријавуваат корупција


Тетово, 20 декември, 2016 - 15:31 (META) 

Студентите во Македонија ретко пријавуваат корупција, покажа истражувањето на проектот „Можностите за законот за заштита на укажувачи и спречување на корупција во високото образование во Македонија“. Универзитетскиот професор Миша Докмановиќ смета дека студентите малку го познаваат законот за заштита на укажувачи и затоа не се осудуваат да пријават корупција.

– Ние направивме анкета на 513 македонски студнети од четирите најголеми универзитети во земјава. Од анкетираните, само 7 отсто ни одговорија дека има корупција на нивните факултети. Голем дел од нив, најверојатно, се плашат да ги пријават ваквите појави, не знаат дека законот за заштита на укажувачи е донесен пред една година и им овозможува тајност во пријавувањето корупција – изјави професор Докмановиќ.

Дел од професорите што учествуваа на тркалезната маса на Универзитетот на Југоисточна Европа во Тетово, каде беа презентирани резултатите од истражувањето на проектот, сметаат дека студентите не ги познаваат сите облици на корупција.

– Можеби процентот на пријави на корупција од страна на студентите е мал затоа што студентите, ако сакаат да пријаваат корупција, ги пријавуваат директните облици на корупција, како поткуп и слично, но немаат информации дека во корупција спаѓа и непотизмот, на пример – изјави универзитетската професорка Беса Арифи.


Тасева: Нема политичка волја за заживување на Законот за заштита на укажувачите


Скопје, 14 ноември, 2016 - 14:13 (META) 

Во ниту една државна институција во земјава не се спроведува Законот за заштита на укажувачите (whistleblowers), иако е донесен пред точно една година, а нема ниту интерес и политичка волја кај надлежните за имплементација на законот.

Ова беше главна тема на денешната завршна тркалезна маса во рамките на проектот на „Транспаренси интернешнл Македонија“, насловен „Законот за заштита на сведоци – искуства и предизвици“, а поддржан од Кралството Холандија.

Претседателката на „ТИ Македонија“, Слаѓана Тасева, истакна дека Законот за заштита на укажувачите, донесен пред една година, е еден од најдобрите во кој се вградени најдобрите меѓународни практики и искуства, но следниот предизвик е борбата тој да заживее и да почне да се применува. За ова, како што истакна Тасева, нема ниту волја, ниту интерес кај државните институции, кои треба да преземат марки за внатрешно и за надворешно пријавување на неетичко и на незаконско дејствување и да ги заштитат пријавувачите.

– Нашите институции, без исклучок, не преземаат никакви чекори за заштита на пријавувачите и немаме никакви активности и интерес за спроведување на Законот, а знаеме дека интересот оди од горе надолу, односно од тие што раководат со институциите. Мораме да бараме одговорност за непримена на законот. Во овие две години, двапати се носеше буџет, но во него не видовме средства наменети за спроведување на овој закон – рече Тасева, додавајќи дека е потребна барем една институција што ќе направи исчекор и ќе покаже дека е возможна примена на ова законско решение, особено во предизборниот период, кога е потреба заштита на луѓето што имаат да пријаваат некакви неправилности.

Таа истакна дека поголема заинтересираност покажале приватните компании, кои, исто така, имаат обврски кон законот. Сепак, според Тасева, ваквот случај е, пред сè, поради стравот на фирмите од санкциите што произлегуваат од законот.

– Иста казна е предвидена и за приватните фирми и за јавните институции, но поради селективната правда која постои, кога инспекторите ќе тропнат на врата, сигурно нема да го казнат, на пример, директорот на Државната комисија за спречување на корупција – посочи Тасева.

Амбасадорот на Кралството Холандија, Ваутер Пломп, истакна дека поддршката на Холандија за овој проект произлегува од нивниот став дека борбата со корупцијата е најважното прашање што земјите од Западен Балкан мора да го решат на својот пат кон интеграцијата во Европската Унија. Според него, покрај владата и невладиниот сектор, чија соработка треба да биде континуирана, одговорност за демократските процеси имаат и граѓаните како поединци, чија волја се изразува на избори, кои се нивна најмоќна алатка.

– Изборите се ден кога поединецот е исто толку моќен како кој било друг политичар. Ако не гласате, дозволувате другите да одлучат за вашата иднина. Демократијата не е само гласањето еднаш на секои четири години или еднаш на предвремени избори. Одлуките на политичарите секој ден влијаат на граѓаните и затоа граѓаните мора да бидат информирани кога и како тие одлуки ќе влијаат врз нив. Демократијата е сопственост на граѓаните, а не на политичарите – заклучи Пломп, додавајќи оти се надева дека колку што е можно повеќе граѓани ќе излезат и ќе гласаат на изборите на 11 декември.

На денешниот настан, присуствуваа и претставници од Министерството за внатрешни работи и од канцеларијата на Народниот правобранител, кои ја истакнаа потребата од поангажиран пристап во спроведувањето на заштитата на укажувачите.

Иако поканети, на тркалзената маса не дојдоа претставници од Јавното обвинителство и од Државната комисија за спречување корупција, институција која, како што рече Тасева, традиционално не соработува и не презема ништо за да се овозможи примената на законот.

На денешната тркалезна маса беа презентирани и резултатите од истражувањето на агенцијата „Рејтинг“, спроведено во рамките на проектот, според кое, 31,7 отсто од вработените во јавниот и во приватниот сектор знаат дека е донесен Закон за заштита на укажувачите и се запознание со нивите права. 63,1 отсто би пријавиле незаконско постапување, но дури 70,3 отсто сметаат дека доколку пријават, би имале последици, што укажува на недоволна заштита од институциите.

Истражувањето е спроведено преку телефонска анкета, врз репрезентативен примерок од 400 вработени во 23 општини во земјава.


Денеска почнува августовскиот дел од Научната и уметничка визита „Охрид 2016“


Охрид, 3 август, 2016 - 12:15 (META) 

Денеска почнува вториот, августовски дел од Научната и уметничка визита „Охрид 2016“, во организација на Македонската академија на науките и уметностите.

Предавање во Куќата на Уранија ќе одржат академиците Вера Битраковска-Грозданова и Газанфер Бајрам, на тема „Мозаиците во минатото и современоста“.

Научната и уметничка визита продолжува со изложби и со промоции, како и свечена академија по повод 1.100-годишнината од упокојувањето на свети Климент Охридски.

На програмата е и една тркалезна маса за високото образование и за науката.

Завршната конференција е посветена на процесите на модернизацијата на Балканот. Научната и уметничка визита ќе заврши на 2 септември, со симпозиум за Богомилското движење и за богомилската книжевност.


МАНУ ја откажа дебатата во Охрид и наместо неа ќе одржи тркалезна маса


Охрид, 19 јули, 2016 - 15:05 (META) 

На Научната и културна визита Охрид – 2016, во организација на МАНУ, за утре беше предвидено да се одржи дебата на тема „МАНУ и македонската наука и уметност“.

Во меѓувреме, од Академијата соопштија дека оваа дебата е откажана и, наместо неа, утре, во Куќата Уранија во Охрид, ќе се одржи тркалезна маса под наслов „МАНУ, науката, уметноста и високото образование – состојби и перспективи“.

До крајот на Научната и културна визита Охрид – 2016, ќе се одржат уште два настани. На 23 јули ќе има обраќање на академик Цветан Грозданов на тема „Фрескоживописот на „Света Софија Охридска“ во светлината на најновите проучувања во светот“.

Последниот настан од оваа визита е на 27 јули. Предавање ќе има академик Иван Катарџиев на тема „Сталин, културната автономија на Пиринска Македонија и патот на студентите од Пирин до Скопје“.


Потребни се законски измени за поголема заштита на потрошувачите


Скопје, 17 февруари, 2016 - 16:18 (META) 

Неопходни се измени на законската регулатива за заштита на потрошувачите и на конкуренцијата за да се подобри општата состојба во овие области, оценија претставниците на компаниите членки на Американската стопанска комора во Македонија, Државниот пазарен инспекторат и Организацијата на потрошувачите на Македонија на тркалезната маса во организација на комората.

– Постои голем јаз меѓу практиките на меѓународно конкурентните компании и локалната законска рамка. Поради ова, овие компании треба да бидат вклучени во подигнувањето на стандардите и во дефинирањето на правните обврски при заштитата на потрошувачите и на конкуренцијата – рече Мишел Османли, извршен директор на Американската стопанска комора во Македонија.

Присутните заклучија дека само директното вклучување на деловната заедница при подготвувањето на законските решенија што се однесуваат на заштитата на потрошувачите и на конкуренцијата, ќе доведе до поквалитетни решенија, кои вистински ќе одговорат на предизвиците со кои се соочуваат и потрошувачите и компаниите.