Извозот лани се зголемил за 6,9, а увозот за 5,7 отсто во однос на 2015 година


Скопје, 3 февруари, 2017 - 13:18 (META) 

Извозот лани изнесувал 4.329.267.000 евра и е зголемен за 6,9 проценти во однос на 2015 година, покажуваат податоците на Државниот завод за статистика.

Вредноста на увeзената стока, во истиот период, изнесува 6.106.727.000 евра што е за 5,7 проценти повеќе во споредба со истиот период од претходната година. Трговскиот дефицит лани изнесувал 1.777. 461.000 евра.

Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите од проводници за палење и слично, за возила, авиони или бродови, фероникелот и облеката.

Во увозот најмногу се застапени платината и легурите на платина, необработени или во прав, нафтените масла и маслата добиени од битуменозни минерали.

Македонија лани најмногу тргувала со Германија, Велика Британија, Србија, Грција и со Италија.


Македонски компании ќе учествуваат на Саемот за храна во Москва


Скопје, 9 септември, 2016 - 13:27 (META) 

Седумнаесет македонски компании ќе учествуваат на големата саемска манифестација „Мир питание 2016“ (World food 2016) во Москва, од 12 до 15 септември 2016 година.

Македонските производители и преработувачи на свежо овошје и зеленчук ќе имаат национален штанд кој ќе се простира на површина од 110 квадратни метри.

– Се зголемува побарувачката за македонските земјоделски производи од страна на руските компании. Во изминатиот период зголемен е и бројот на пратките и количествата што се пласирани на овој голем пазар – истакна директорот на Македонско-руската стопанска комора, Дејан Бешлиев.

Во првите седум месеци од годинава, Македонија и Руската Федерација оствариле меѓусебна трговска размена од 92,9 милиони долари, што во споредба со минатогодишните 127,2 милиони долари во истиот период е опаѓање за дури 27 отсто.

Но, структурата на размената во овој период покажува позитивни тенденции за македонското стопанство. До крајот на јули годинава, Македонија го зголемила извозот во Руската Федерација за 48,9 отсто, а увозот го намалила за 39,1 отсто во споредба со истиот период од 2015 година.

На рускиот пазар во овој период се пласирани стоки во вредност од 26 милиони долари (лани 17,5 милиони долари), а од таму се увезени производи за 66,8 милиони долари (лани 109,7 милиони долари).

Ваквиот обем на тргување со големиот руски пазар придонел трговскиот дефицит на Македонија со Руската Федерација да биде повеќе од преполовен и до крајот на јули да достигне 40,7 милиони долари. Лани во овој период Македонија имала негатива во размената со Руската Федерација од 91,4 милиони долари.

Покрај тоа што учеството на саемот компаниите ќе го искористат за интензивни контакти со руските партнери, се очекуваат и бројни деловни средби со претставници на руската комора и со официјалните лица на руската администрација.


Скопјанец фатен во Кичево со нелегална ловна пушка и со арсенал муниција


Кичево, 13 јули, 2016 - 10:53 (META) 

Скопјанецот А.Ј (23) е фатен на железничката станица во Кичево со нелегална ловна пушка и со арсенал муниција.

При извршен преглед, кај него се пронајдени и му се одземени едно огнено оружје – ловна пушка марка „ТОЗ БМ” со калибар 16 милиметри од руско производство, како и повеќе видови куршуми.

Поради постоење основан сомнеж за недозволено изработување, држење, посредување и тргување со оружје или распрскувачки материи, полициската станица од Кичево му поднесе кривична пријава, додека работите кои нелегално ги поседувал, му се одземени и се предадени на вештачење во Министерството за внатрешни работи во Скопје.


Пад на европските берзи по терористичкиот напад во Брисел


Брисел, 22 март, 2016 - 15:29 (META) 

По терористичкиот напад на бриселскиот аеродром и во метрото, акциите на европските берзи паднаа, со што најголем пад доживеаја акциите на патничките и на авиокомпаниите, јавува „Ројтерс“.

– Геополитичките ризици, вклучувајќи ги и терористичките акции кои директно го погодуваат тргувањето или движењето на инедксот, сè уште претставуваат исклучително ризичен фактор кој треба да се следи – велат аналитичарите.

Инвеститорите остануваат фокусирани на развојот на ситуацијата во Брисел, иако и денеска се објавени некои позитивни податоци што донесоа олеснување на перспективите на економскиот пораст на еврозоната и им помогнаа на европските берзи да излезат од длабок минус.


Од првиот ден на тргување до денеска, Македонска берза со промет од 3,3 милијарди евра


Скопје, 14 септември, 2015 - 14:59 (META) 

Од првиот ден на тргување до денеска, односно од 28 март 1996 година до 31 август 2015 година, на берзата е остварен вкупен промет од повеќе од 3,3 милијарди евра (апроксимативно 90 проценти акции, 10 проценти обврзници) и се склучени 468.258 трансакции со повеќе од 600 хартии од вредност.

Ова денеска го истакнаа од Македонска берза по повод прославата за 20 години постоење.

– Овие резултати се остварени преку активностите на вкупно 32 финансиски посредници (банки и брокерки куќи, кои во определен временски период биле активни членки на берзата) на вкупно 3.834 денови на тргување, односно трговски сесии. Најголем промет е остварен во 2007 година, во износ од околу 680 милиони евра. Берзанскиот индекс МБИ 10 е воведен во 2005 година, со базна вредност од 1.000 поени – информираа од берзата.

Првото основачко собрание на акционери на Македонска берза АД Скопје, било одржано на 13 септември 1995 година, а во просториите денеска се одбележа јубилејот со презентација за берзанското работење.