Трговска војна помеѓу Србија и Косово во пресрет на новата рунда дијалог во Брисел


Белград, 7 ноември, 2018 - 16:08 (META) 

Одлуката на владата на Косово да го зголеми данокот на увоз на роба од Србија и Босна и Херцеговина за 10 отсто, предизвика критики од Белград кој побара итна реакција на меѓународната заедница, во очи на новата рунда дијалог со Приштина која е закажана утре во Брисел.

Оданочувањето на увозот од Србија и БиХ, Владата на Косово го образложи како заштита на домашниот пазар, но повеќе косовски политичари рекоа дека таа мерка е „најдобриот одговор на деструктивното однесување на Србија“. Претходно косовските медиуми пишуваа дека Косово го освојува роба „Made in Serbia“, како и дека до крајот на годината увозот од Србија ќе изнесува 400 милиони евра.

Мерката ќе се применува на увозот на млеко и млечни производи, вода, бисквити, градежен материјал и сокови со потекло од Србија и БиХ, но дека нема да се однесува на производите на меѓународните брендови кои се произведуваат во Србија и БиХ како на пример „кока-кола“.

ЕУ побара од Приштина итно разјаснување на новите мерки, со напомена дека станува збор за јасно кршење на ЦЕФТА (Централно европскиот договор за слободна трговија).

Шефот на српската дипломатија, Ивица Дачиќ, оцени дека одлуката на властите во Приштина е еден вид на притисок врз ЕУ на Косово да му одобри либерализација на визниот режим. Дачиќ рече дека претседателот на Србија. Александар Вучиќ, за одлуката на приштинските власти ќе разговара со европските функционери за време на самитот на Европската народна партија во Хелсинки. Се очекува тоа да биде тема и на состанокот на Вучиќ и косовскиот претседател Хашим Тачи, кој за утре во Брисел го закажа високата претставничка на ЕУ, Федерика Могерини.


Размената со Русија падна за 13 проценти, причините не се политички туку економски


Скопје, 6 септември, 2018 - 15:11 (META) 

Трговската размена помеѓу Македонија и Руската Федерација бележи опаѓање од 12,7 отсто, што е помалку за 9,3 милиони долари во однос на истиот период од минатата година, беше истакнато на трибината на Македонско-руската стопанска комора и еднодновната обука на тема „Особености на рускиот пазар и стратегија на успех (потенцијал, можности, реализација)“.

Исто така, загрижувачки е што македонскиот извоз е намален за речиси четвртина во споредба со истиот период лани (24,36 проценти).

– Овој преоден шестмесечен намален обем на трговска размена со Руската Федерација воопшто не се должи на некои политички причини или притисоци, имајќи ја предвид чувствителната фаза на меѓусебните односи на двете земји. Единствено се работи за економски причини, македонските извозници се подложни на огромно зголемена конкуренција на рускиот пазар од производители од другите земји. Претстои макотрпно прилагодување за да се издржи и задржи позицијата кај руските трговци – увозници. На пример, добар дел од намалениот македонски извоз во овој период се должи на драстично намалениот пласман на македонската рана зелка, бидејќи рускиот пазар беше преплавен со овој зеленчук од Иран и други земји со далеку пониски цени – рече Ѓорѓи Дика, претседател на Македонско-руската стопанска комора.

Препорака е бизнисмените да настапуваат со разработена маркетинг стратегија на овој по големина петти пазар во светот.

– Во Москва се присутни производите од Македонија и проценуваме дека имаат голема шанса за пласман на рускиот пазар. Но, мора да има баланс меѓу цената и квалитетот на производите и на тоа посебно треба да се посвети внимание – истакна Виктор Алексеев, експерт за продажба во „Македонски дом“.


Извозот во првите шест месеци со пораст од 26,5 проценти


Скопје, 6 август, 2018 - 14:08 (META) 

Во првите шест месеци, извозот бележи пораст од 26,5 проценти и изнесува 3.323.298.000 долари, објави Државниот завод за статистика. Вредноста на увезената стока во истиот период изнесува 4.441.172.000 долари и бележи пораст од 24 проценти.

Трговскиот дефицит, во првите шест месеци е 1.117.874.000 долари, a pокриеноста на увозот со извоз, во периодот јануари – јуни 2018 година, изнесува 74, 9 проценти.

Во увозот најмногу се застапени платината и легурите на платина, необработени или во прав, нафтените масла и маслата добиени од битуменозни минерали (освен сурови) и друго.

Најзастапени во извозот се катализаторите на носачи со благородни метали или нивни соединенија, сетови на проводници за палење и слично, за возила, авиони или бродови, делови на седишта и моторните возила за превоз на 10 или повеќе лица.

Македонија најмногу тргувала со Германија, Велика Британија, Грција, Србија и Бугарија.


Во првиот квартал, БДП со пораст од 0,1 отсто


Скопје, 7 јуни, 2018 - 12:32 (META) 

Домашниот бруто-производ во првиот квартал годинава забележал стапка на пораст од 0,1 процент, објави Државниот завод за статистика. 

Во првото тримесечје од 2018 година, најголем пораст е забележан во секторите уметност, забава и рекреација од 12,1 отсто, трговија на големо и трговија на мало, поправка на моторни возила и мотоцикли, транспорт и складирање, објекти за сместување и сервисни дејности со храна од 10,5 отсто и стручни, научни и технички дејности, административни и помошни услужни дејности од 8,5 отсто.

Финалната потрошувачка на домаќинствата, вклучувајќи ги непрофитните институции кои им служат на домаќинствата, во првото тримесечје од 2018 година, номинално растел за  четири отсто, а нејзиното учество во структурата на домашниот бруто- производ изнесува 64,3 отсто.


Анѓушев и Љајиќ ќе ја олеснуваат трговијата помеѓу Македонија и Србија


Белград, 12 април, 2018 - 16:19 (META) 

Вицепремиерот за економски прашања, Кочо Анѓушев кој денеска е во официјална посета на Србија, одржа состанок со потпретседателот и министер за трговија, туризам и телекомуникации, Расим Љајиќ.

Вицепремиерите, како што соопштуваат од кабинетот на Анѓушев, се договориле Владите до 30 јуни да ги потпишат и ратификуваат Меморандумот за соработка во областа на безбедност на храна и ветеринарнство и Меморандум за фитосанитарна соработка, со кои, меѓусебно ќе бидат признаени сертификатите на двете земји.

„На тој начин ќе престане потребата за двојно земање на примероци и анализа на прехранбените производи, што во голема мера ќе ги намали дополнителните и непотребните трошоци со кои се соочуваат стопанствениците од двете земји. Анѓушев и Љајиќ се согласија, дека до тогаш, двете влади ќе ги превземат сите неопходни мерки се со цел олеснување на трговијата и отстранување на вонцаринските бариери при трговијата на двете земји“, се вели во соопштението од кабинетот на вицепремиерот.

Во соопштението се додава дека српските гранични служби, се обврзуваат да ги отстранат бариерите во трговијата на ориз, сувомеснати и млечни производи од Македонија во Србија, што беше и главното барање на македонските компании кои извезуваат во Србија.

„Во исто време, од македонска страна е договорено, како привремено решение да се работи на враќање на стариот Правилник за контролните маркици за брашно, кој важеше до 7 февруари оваа година. Но, во тој случај, при увозот на брашно треба да се овозможат услови за непречен инспекциски увид на увозното брашно од страна на инспекторите на македонската Агенција за храна и ветеринарство на граничниот премин, со што ќе се контролира дали маркиците се соодветно залепени на брашното и дали брашното има соодветна декларација“, се додава во соопштението.


Бектеши ги презентираше условите за инвестирање пред словенечките бизнисмени


Скопје, 4 април, 2018 - 15:57 (META) 

Министерот за економија, Крешник Бектеши заедно со министерот за економија и технологија на Словенија, Здравко Почивалшек учествуваа на македонско-словенечкиот бизнис форум на кој присуствуваа над 100 компании од двете земји, организиран во рамки на официјалната посета на нашата земја од страна на владината делегација од Словенија, предводена од премиерот Миро Церар.

Бектеши пред бизнисмените од Словенија ги презентираше условите и поволностите кои ги нуди Македонија за сите заинтересирани компании за инвестирање.

„Владата дава поддршка за нови вработувања, за воспоставување и унапредување на соработка со добавувачи од тука, за технолошки развој и истражување, за инвестициски проекти од значаен економски интерес, за зголемување на конкурентноста на пазарот, за освојување на пазари и пораст на продажба. На располагање се и технолошките и индустриските зони кои нудат бројни даночни и царински или надвор од нив“, изјави Бектеши.

Со Почивалшек денеска се сретна и вицепремиерот за економски прашања, Кочо Анѓушев. На средбата тие разговарале за можностите за соработка во туризмот.

Почивалшек истакнал дека туризмот во Словенија изнесува околу 2,7 милијарди евра, односно околу 13 отсто од домашниот бруто-производ (БДП). Тој посочил дека бањскиот туризам учествува со дури 40 отсто во вкупните приходи од туризам и нагласил дека словенечки компании се заинтересирани за инвестирање во оваа гранка кај нас.

Во поглед на соработката во земјоделскиот сектор, Почивалшек потенцирал дека македонските земјоделски производи во Словенија се препознаваат како врвен квалитет и дека Македонија треба да ги искористи природните услови за да ги максимизира ефектите од земјоделието.

Во 2017 година Словенија беше петнаесетти трговски партнер на Македонија со вкупна вредност од околу 390 милиони евра и пораст во трговската размена од 11 отсто во однос на 2016 година, со што е позиционирана на петтото место во однос на странските директни инвестиции во државата.


Николовски – Пелеши: Додека чекаме да влеземе во ЕУ, да ја зголемиме трговијата


Охрид, 3 април, 2018 - 16:02 (META) 

Министерот за земјоделство, шумарство и водостопанство, Љупчо Николовски и неговиот колега од Албанија, Нико Пелеши денеска во Охрид разговарале за можноста за зголемување на трговијата, за системот на следење на млечни и месни производи, како и мерките на двете држави за контролата на искористувањето на пастрмката во Охридското Езеро.

„Отворивме повеќе прашања кои и претходно се отворале, но немало резултат. Разговаравме за зголемување на потенцијалот за трговска размена со Албанија. Во 2015 и во 2016 година имало проблеми во делот на задржување на робата на граница. Разговаравме и за рибарството, односно делот со мерките за контрола на искористувањето на рибниот фонд во Охрид. Со министерот Пелеши се договоривме да има зајакнати контроли од двете страни“, изјави Николовски.

Пелеши посочил дека двете земји треба да го искористат времето до влез во Европската унија, за унапредување на трговската размена и прилагодување кон европските регулативи, особено во делот на земјоделството.

Воедно, двајцата министри се договориле да ја разгледаат можноста за искористување на меѓуграничните проекти поддржани од ИПА-инструментот.

Македонија и Албанија имаат потпишано Протокол за соработка во областа на земјоделството, во јуни 2005 година во Тирана, кој е се уште важечки, но не е функционален.


Во Москва прославена 13-годишнината од Македонско-руската стопанска комора


Москва, 28 март, 2018 - 11:36 (META) 

Македонско-руската стопанска комора и нејзината активност во сите овие изминати години придонесе за пораст на економската соработка меѓу двете земји и за успешен влез на низа македонски производи на рускиот пазар, рече Димитри Бистров регионален директор на одделот за Меѓународна соработка на Стопанската комора на Руската федерација, со која Македонско-руската стопанска комора има партнерски однос.

На одбележување на 13-годишнината од основањето на Македонско-руската стопанска комора која се одржа во комлексот „Фуд сити“, присуствуваа претставници на бизнисот од Македонија и Русија, челните луѓе од низа трговски претставништва на земјите од Евроазиската унија, претставници на Евроазискиот деловен сојуз и на други деловни асоцијации.

Извршниот директор на Македонско-руската стопанска комора, Дејан Бешлиев, подвлече дека во вкупниот обем на размената пораснал во сите сегменти, но највисок раст забележал македонскиот извоз за 10,6 отсто. Размената лани достигнала 202 милиони долари со пораст од 5,6 отсто и годинава очекува таа да биде уште повисока.

– Ваквиот тренд на придвижување нагоре продолжува и на стартот од 2018 година. Вкупната размена во јануари скокнала за 14,2 отсто, македонскиот извоз се покачил за 6,7, а увозот за 15,3 проценти. Меѓутоа, во размената со Руската федерација земјава остварува значаен трговски дефицит, кој лани изнесуваше 94,3 милиони долари, кој се должи на македонскиот увоз на нафта и гас. За негово врамнотежување мора постојано да го зголемуваме нашиот извоз – додаде Бешлиев.

Проектот „Македонски дом“ формиран во партнерство на Македонско-руската стопанска комора и со поддршка на Стопанската комора на Москва, помогнал на рускиот пазар да се појават производи кои досега не се извезувале во оваа земја.

– Руските потрошувачи веќе може да се снабдуваат со кондиторски производи, вода, сирење, кроасани, ајвар, бурек од „Кадино“. За македонските компании, членки на „Македонски дом“, кои се веќе 18 на број, обезбедуваме комплетна услуга за настап на рускиот пазар од сертификација до продажба, како и целосна царинска и правна подршка. Во првата година постигнавме голем успех, бидејќи руските потрошувачи почнаа да ги препознаваат македонските производи – истакна Ина Владимирновна Жарова, генерален директор на „Македонски дом“.


Кина со повик до светот да се здружи против САД


Пекинг, 22 март, 2018 - 10:18 (META) 

Кинеските државни медиуми денеска ги повикуваат државите во светот „цврсто да се постават“ против „протекционистичките“ мерки на Вашингтон.

„Бидејќи се чини дека САД и понатаму ќе се однесуваат на таков начин, другите држави би требало да престанат да се надеваат дека ќе бидат поштедени од нивните протекционистички потези и да бидат цврсто поставени против САД“, пишува „Чајна дејли“.

Можеби американските царини би го зголемиле растот на БДП и би го забавиле кинескиот економски раст, но исто би го забавиле и светскиот економски раст, објави весникот наведувајќи истражување на банката „Чајна интернешенел кепитал корпорејшн“.

Се очекува, американскиот претсеател, Доналд Трамп денеска да објави нови санкции против Кина по повеќемесечна истрага за наводна кинеска кражба на интелектуална сопственост. Мерките може да бидат царини меѓу 30 и 60 милијарди долари и ограничувања на вложувања, објавија американски медиуми.


НБРМ: Економијата закрепнува по падот во првата половина од 2017 година


Скопје, 14 февруари, 2018 - 18:08 (META) 

Економијата во четвртиот квартал од 2017 година закрепнала со подобро темпо во однос третиот, било заклучено на редовната седница на Комитетот за оперативна монетарна политика на Народна банка.

„Во однос на активноста во економијата, по падот во првата половина на 2017 година и умереното закрепнување во третиот квартал, во четвртиот има закрепнување со нешто подобро темпо. На ваква констатација посочуваат податоците за најновите остварувања во индустријата и трговијата, додека градежната активност продолжи да се намалува. Анкетните истражувања укажуваат на натамошно задржување на довербата на економските субјекти“, се вели во соопштението на Народна банка.

Во него се додава дека инфлацијата е во рамки на проекциите.