!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Одобрено обвинението за Мијалков и за Грујевски за „Трезор“


Скопје, 6 декември, 2017 - 10:35 (META) 

Советот за оценка на обвинителниот акт при Кривичниот суд го одобрил обвинението за случајот „Трезор“ на Специјалното јавно обвинителство.

Во случајот обвинети се поранешниот шеф на УБК, Сашо Мијалков, поранешниот началник на петтата управа, Горан Грујевски, поранешниот шеф на кабинет на Мијалков, Тони Јакимовски, и поранешниот помошник-министер во МВР, Небојша Сајковиќ.

Според СЈО, осомничените преку фирмата „Финзи“, со која во еден период управувал сега починатиот Коста Крпач, набавувале опрема за УБК и го оштетиле буџетот за 862.045 евра.


„Шпаркасе“ спроведува истрага заедно со МВР за кражбата од сефовите на банката


Скопје, 5 декември, 2017 - 16:30 (META) 

„Шпаркасе банка“ – Македонија попладнево испрати соопштение до јавноста дека продолжува со редовно работење со сефовите, откако МВР соопшти дека пет граѓани пријавиле исчезнување на предмети и на пари од сефовите во објект на банката.

Како што извести „Нова ТВ“, откако беше објавена информацијата за исчезнувањето вредни предмети и пари од сефовите, пред банката се создал метеж од клиенти кои сакале да проверат дали нешто недостига и во нивните сефови.

Од банката велат и дека спроведуваат истрага заедно со МВР и оти ги преземaат сите мерки за да ги заштитат интересите на клиентите.

– „Шпаркасе банка“ – Македонија во соработка со Министерството за внатрешни работи, во согласност со законските прописи спроведува истражна постапка во однос на изолираните пријавени инциденти во сефовското работење. „Шпаркасе“ продолжува регуларно да ги извршува активностите во доменот на сефовското работење, во согласност со поставените интерни процедури и законските прописи – стои во соопштението.


Им ги испразниле сефовите на пет граѓани во „Шпаркасе банка“


Скопје, 5 декември, 2017 - 14:06 (META) 

Пет граѓани пријавиле во СВР Скопје дека од сефови што ги изнајмиле во „Шпаркасе банка“ им биле одземени пари и предмети.

Како што извести полицијата, за настанот бил известен и јавен обвинител и се спроведува истрага.


За милионскиот грабеж во НЛБ, поднесени обвиненија против осум лица


Скопје, 7 јули, 2017 - 14:11 (META) 

Основното јавно обвинителство – Скопје до Основен суд Скопје 1 поднело обвиненија против осум лица, вработени во НЛБ, за кражбата на околу три милиони евра од трезорот на банката. Со обвиненијата се побарани и мерки за обезбедување присуство, односно за првите тројца обвинети е побарано продолжување на притворот, а за едно лице е определена мерка за претпазливост.

Обвинителството утврдило дека во периодот од 31 март до 8 април годинава првите четворица обвинети, искористувајќи ја својата работна позиција, украле 400.000 швајцарски франци и 375.000 евра. На 10 април се украдени два милиона  швајцарски франци и 270.000 евра, за што беше уапсен вработениот Бобан С.

Првообвинетиот се гони за затајување сторено повеќепати, како и за тешка кражба. Исто е обвинението и за второто лице, но со квалификација помагање. Третиот обвинет се товари за тешка кражба со помагање, а четвртиот за соизвршителство во затајување. Пропишаните казни за тешка кражба се од три месеци до десет години затвор, додека за затајување од една до десет години.

Другите четворица обвинетите се товарат за несовесно вршење на должностите со што ја овозможиле кражбата. Двајца се товарат за несовесно работење во подолг период, а другите двајца за еднократно сторено кривично дело. Во согласност со Кривичниот законик, предвидена казна за ова кривично дело е затвор од шест месеци до три години, како и задолжителна парична казна за сторителите.


Парите од НЛБ отишле во Србија, тројца му помагале на Бобан С. во грабежот


Скопје, 19 април, 2017 - 15:24 (META) 

Единицата за економски и за компјутерски криминал на МВР до надлежното Основно јавно обвинителство поднела кривична пријава против уште три лица осомничени дека биле вмешани и му помагале на Бобан С. во грабежот на 3 милиони евра од трезорот на НЛБ, соопшти денеска МВР.

Како што информираат оттаму, станува збор за братот на Бобан С., 44-годишниот Г.С., потоа 24-годишната Е.П., вработена како банкарски комерцијалист во НЛБ, и за 38-годишниот Б.М., пријател на првоосомничениот.

Според полицијата, за нив постојат основани сомнежи дека директно му помогнале на Бобан С. во грабежот на банката.

Осомничената Е.П., како што информираат од полицијата, помогнала во прикривањето на кусокот од 100.000 швајцарски франци, односно првиот затаен износ од авионската пратка од вкупно 1.000.000 швајцарски франци што го украл Бобан С. Потоа, по негово упатство, додека двајцата биле на смена, тој во трезорот, таа на шалтер во банката, примила пари од трезорот во апоени од 500 и од 100 евра, вкупно 375.000 евра, и без да подготви документ за исплаќање на парите од трезорот, му ги дала на рака на Бобан С., кој ги изнел од банката.

На 10 април, кога осомничениот трезорист ја изнел најголмата сума од 2.000.000 швајцарски франци и 270.000 евра од девизниот трезор, сокриени во украсна ќеса, според полицијата, тој парите му ги предал на својот брат, кој, пак, му ги дал на Б.М., кој наредниот ден по 14 часот, преку граничниот премин Табановце со возило „фолксваген голф“ ја напуштил земјава.

Од МВР наведуваат дека вчера тој бил уапсен и бил изведен пред судија на претходна постапка, но не посочуваат каде е извршено апсењето.

„Од страна на СВР Скопје – Единица за економски и за компјутерски криминал, во координација со Основното јавно обвинителство во Скопје, и понатаму се преземаат мерки за целосно расветлување на кривично-правниот настан, за утврдување на кој начин Б.С. изнел од банката дополнително и уште 300.000 швајцарски франци“, стои во соопштението на МВР.

Сепак, и понатаму останува мистеријата што се случило со украдените пари, кои сè уште не се пронајдени.


Љупчо Шврговски ќе го брани Бобан С. за кражбата на 3 милиони евра од НЛБ


Скопје, 18 април, 2017 - 14:05 (META) 

Поранешниот државен јавен обвинител Љупчо Шврговски му е адвокат на 40-годишниот Бобан С., осомничен за кражбата на 3 милиони евра од трезорот на НЛБ во Скопје.

Информацијата за „Мета“ ја потврди самиот Шврговски.

– Да, јас сум му адвокат – ни рече Шврговски, но не сакаше да коментира ништо во врска со случајот.

Бобан С., осомничениот за најголемата кражба во историјата на независна Македонија, трезорот на банката го испразнил од 6 до 10 април, соопшти МВР. Против него е поднесена кривична пријава за затајување и во моментов е на издржување на 30-те дена притвор што му ги одреди судот.

Овој случај од почетокот го следат низа контроверзии, а најголема мистерија е што се случило со украдените пари, кои и по речиси 10 дена сè уште не се пронајдени.

Шврговски за државен јавен обвинител беше избран во 2007 година и оваа функција ја извршуваше до 2013 година, кога на негово место беше именуван актуелниот јавен обвинител, Марко Зврлевски.


Кражбата на околу 3 милиони евра од НЛБ, најголем грабеж во историјата на Македонија


Скопје, 11 април, 2017 - 16:12 (META) 

Случајот од вчера, кога вработен во НЛБ украл речиси 3 милиони евра во франци и во евра од трезорот на банката, е најверојатно најголемиот грабеж во историјата на суверена Македонија.

Вечерта едно лице било приведено за овој грабеж, со што случајот влегува во друга интересна статистика – еден од најбргу расчистените грабежи во поновата македонска историја. Во МВР не сакаат да потврдат дали парите се пронајдени.

Со речиси три милиони евра, барем според сегашните информации, сумата украдена од трезорот на НЛБ е 15 пати поголема од другата слична кражба од трезор на банка, во 2014 година. Тогаш беше осомничен главниот трезорист со ортаци од „Охридска банка“. Во вчерашниот случај, пак, директорот на трезорот на НЛБ е тој што ја пријавил кражбата. Имено, во септември 2014 година, тројцата вработени во „Охридска банка“ добија кривични пријави оти во период од три месеци, манипулирајќи со парите со кои требало да се полнат банкоматите, од банката украле вкупно 200.000 евра.

Тоа се најголемите кражби на пари во Македонија направени без закана со оружје.grabezi tabela

Досега најголемиот грабеж на пари од банка е тој од 9 јануари 2010 година, кога од „голф“ на „Стопанска банка Битола“, на патот Прилеп-Битола, под закана за оружје беа однесени 450.000 евра.

Најголемиот поединечен вооружен грабеж на возило со пари, пак, е тој од декември 2005 година, кога на уличката во скопска Топана, под касарната „Илинден“, од комби на „Македонска пошта“ беа украдени 670.000 евра.

Сличен грабеж како тој на патот Прилеп-Битола се случи во февруари лани во Велес, кога беше пресретнато возило на фирма за обезбедување и под закана со оружје ѝ беа украдени околу 65.000 евра. Разбојниците беа наскоро пронајдени.

Најголемата сума вкупно одземена од некоја институтција е, секако, таа од вкупно 2,5 милиони евра, но во различни грабежи извршени во експозитури на АД „Македонска пошта“, најчесто на поштенските комбиња со кои се вршеше трансферот на парите. Грабежите се случуваа интензивно до пред седум-осум години, а во вкупната сума влегува и погоре споменатиот грабеж на 670.000 евра.

Оваа серија грабежи влезе и во листата на најголеми светски грабежи што во 2013 година ја направи деловниот магазин „Бизнис инсајдер“.


Приведено едно лице за кражбата на речиси 3 милиони евра од НЛБ


Скопје, 11 април, 2017 - 13:26 (META) 

Едно лице е приведено во врска со грабежот во НЛБ вчера, на крај на работното време, при што беа украдени речиси три милиони евра од трезорот на банката, соопшти СВР Скопје.

Случајот го пријавил директорот на трезорот на банката, вчера во 16.58 часот. Тој кажал дека нивниот вработен Б.С.(40) од Скопје извршил тешка кражба од трезорот на банката. Тој, според пријавата, украл швајцарски франци и евра, сè во вкупна вредност од околу три милиони евра, по што заминал.

Како што соопшти МВР, вчеравечер во 19 часот во полициската станица во Кисела Вода е приведено едно лице во врска со грабежот и се работи на целосно документирање и расчистување на случајот.


Ограбен трезорот на НЛБ во Скопје, вработен однел 2 милиони франци и 270.000 евра


Скопје, 11 април, 2017 - 10:36 (META) 

Вработен во НЛБ во Скопје од трезорот на банката вчера украл околу 2 милиони швајцарски франци и околу 270.000 евра. Случајот за „Мета“ го потврдија од Министерството за внатрешни работи (МВР).

Како што информираат оттаму, кражбата вчера во 16.58 часот ја пријавил директор во банката.

Според информациите на МВР, 40-годишниот Б.С. од Скопје, вработен во банката, ги зел парите од трезорот, ги ставил во ќесе и без да биде забележан од никого, заминал во непознат правец.

Од МВР велат дека трагаат по осомниченото лице, кое е во бегство.


Мијалков си замина од распитот, судијата ќе решава дали ќе му го земе пасошот


Скопје, 3 ноември, 2016 - 14:03 (META) 

Поранешниот директор на Управата за безбедност и контраразузнавање и актуелен член на извршниот комитет на ВМРО-ДПМНЕ, Сашо Мијалков, по речиси двочасовен распит го напушти Кривичниот суд. Тој излезе од истиот спореден влез на зградата на Кривичниот суд од каде што и влезе, а неколку минути подоцна и припадниците на специјалните полициски сили го одблокираа влезот. Засега од судот нема информации дали покрај Мијалков денеска на распит дошле и другите двајца осомничени во случајот „Трезор“, Тони Јакимовски поранешен шеф на кабинет на директорот на УБК, и Небојша Стајковиќ, поранешен помошник-министер во МВР, иако биле уредно поканети.

Одлуката за тоа дали и која мерка на претпализвост ќе му биде одредена на Мијалков, треба да ја донесе судијата на претходна постапка.

Поранешниот директор на УБК денеска точно напладне се појави во Кривичниот суд Скопје.

Мијалков во судот влезе од споредниот источен влез, придружуван од уште две лица.

Петнаесетина минути пред да пристигне Мијалков, неколкумина припадници на специјалните полициски единици што денеска го обезбедуваат судското рочиште за „Диво Насеље“, го блокираа приодот кон споредниот влез на судот и не им дозволија на новинарските екипи да чекаат пред вратата, како што беше случај претходно.

Специјалното јавно обвинителство за Мијалков и за другите двајца осомничени во „Трезор“ бара од судот да им определи мерки на претпазливост.

Иако истражната постапка за „Трезор“ беше отворена кон крајот на септември, тројца осомничени дури денеска ќе бидат сослушани од судија на претходна постапка бидејќи СЈО бараше изземање на судијката надлежна за овој предмет поради сомнежи дека нема да постапува непристрасно зашто нејзиниот девер (братот на нејзиниот сопруг) имал деловни врски со фирмата „Финзи“, која е опфатена во случајот „Трезор“.

Според СЈО, осомничените преку фирмата „Финзи“, со која во еден период управувал сега починатиот Коста Крпач, набавувале опрема за УБК и го оштетиле буџетот за 862.045 евра.