Осумдесет отсто од дизелот го трошат камиони и автобуси (инфографик)


Скопје, 22 ноември, 2018 - 12:24 (META) 

Половина од возилата кои се учесници во сообраќајот возат на дизел, покажуваат податоците на Државниот завод за статистика. Дизел користат над 90 отсто од автобусите, 80 проценти од товарните возила и 48 отсто од автомобилите регистрирани во Македонија.

„Речиси 80 отсто од дизел горивата кои се продаваат во Македонија се користат во транспортниот сектор, во тешките товарни возила и автобусите. Железничкиот сообраќај во Република Македонија се погонува со дизел гориво и електрична енергија. Најголемиот дел од моторните бензини кои се продаваат во Република Македонија се употребуваат во транспортниот сектор, во лесните патнички возила“ – стои во Националниот план за заштита на воздухот 2013-2018 година.

Решавање на проблемот со загадувањето на воздухот ќе биде стратешки приоритет на Владата, соопшти минатата недела заменик-министерот за животна средина Јани Макрадули. Во Планот за чист воздух стои дека активностите за спречување на загадувањето од транспортот ќе бидат насочени не само кон намалување на емисиите, туку и кон намалување на изложеноста на граѓаните дури се движат од едно до друго место.

Според Државниот завод за статистика, во 2016 година, во однос на 2015 година, превозот на стоки во товарниот патен превоз е зголемен за 40,5 отсто, а во железничкиот превоз има намалување од 13,3 отсто.

Бројот на регистрирани патнички автомобили во 2017 година изнесувал 403.316 што е зголемување од над 100.000 возила во споредба со 2012 година кога биле регистрирани 301.761 автомобили. Автобусите во земјава лани минале 42,3 милиони километри, а камионите 902 милиони.

Податоците на ДЗС покажуваат дека патниот сообраќај учествувал со 2,2 отсто во загадувањето со ПМ2,5 честички во 2016 година, а со 1,9 отсто во загадувањето со ПМ10 честички. Студијата на МАНУ за загадувањето на воздухот од транспортот вели дека кај емисиите на нитроген оксид (NOx) главен виновник е транспортниот сектор кој учествува со 60 отсто од емисиите.

Меѓународната агенција за истражување на ракот, издувните гасови од дизелот, ги категоризира во група 1 канцерогени супстанци и предизвикуваат рак на белите дробови и имаат поврзаност со рак на мочниот меур. Освен тоа, тие влијаат и на оштетување на срцето, белите дробови и на мозочните активности.

Пишува: Игор К. Илиевски


Домаќинствата се виновни за 90 отсто од вкупните емисии на ПМ честички


Скопје, 20 ноември, 2018 - 15:45 (META) 

Загревањето на домаќинствата придонесува со најголема количина на ПМ емисии односно дури 90 отсто доаѓаат од овој сектор, а само 10 отсто доаѓаат од транспортот. Кај емисиите на нитроген оксид (NOx) главен виновник е транспортниот сектор кој учествува со 60 отсто од емисиите. Ова го покажуваат студиите на истражувачкиот центар за енергетика и одржлив развој при МАНУ кој ги презентираше Александар Дединец на денешната дебата во Град Скопје за загадувањето на воздухот.

– Најбрза мерка која што може да се реализира во однос на загревањето е приклучувањето кон топлификацискиот систем за греење. Потоа субвенции за промена на начинот на греење односно замена на начинот со печки на пелети и топлотни пумпи односно инвертори. Изолација на домовите е мерка која што ја препорачуваме и може да ги намали потребите за греење а со тоа ќе го намали и локалното затоплување. Во поглед на транспортниот сектор има лепеза на мерки, најголемиот дел се однесуваат на промена на начинот на оданочувањето на возилата и воведување нова методологија која што ќе се базира на ЦО2 емисии, односно колку едно возило повеќе емитира толку повеќе ќе плаќа при увоз во државата и при регистрација. Конкретно за Град Скопје предвидуваме електрификација на Градот до 2025 година – вели Дединец.

Во однос на загадувањето предизвикано од големите индустриски капацитети, Дединец вели дека во следниот период ќе изработат посебна студија и ќе ги презентираат резултатите.

Според студиите на МАНУ, со примена на сите мерки во секторот загревање може да дојде до намалување на 93 отсто на ПМ емисиите, додека во транспортниот сектор би се намалиле за околу 20 отсто.

За загадувањето во Скопје, виновни сме сите, индивидуално и колективно и за тоа не може никој да биде амнестиран, вели Цветанка Икономова Мартиновска – раководител на секторот за заштита на животната средина во Град Скопје.

Таа потенцираше дека во буџетот за 2019 година на Град Скопје предвидени се 15 милиони денари за субвенционирање на граѓаните за набавување на печки на пелети.

Шефот на кабинетот на градоначалникот на Град Скопје, Никола Наумовски вели дека градската администрација во изминатата година преземала 25 мерки за намалување на загадувањето.

– Направивме обуки на 20 нови оџачари, за 30 отсто е зголемена бројката на подигнати возила од пајак службата, ослободени се четири километри тротоар за пешаците и велосипедистите, воведовме бесплатен јавен превоз во деновите со енормно загадување, во тек е постапката за набавување на 40 еколошки автобуси, субвенции има за велосипеди и електрични тротинети, редовно ги миеме улиците, воведовме систем за пријавување на огнови на отворено, дуплирани се казни од инспекторите, поставен е филтер на Дрисла и воведовме бесплатна автобуска линија за Водно – истакна Наумовски.

Пишува: Симона Атанасова


Сугарески учествува на конференција во Софија за мултимодален транспорт


Софија, 20 март, 2018 - 11:55 (META) 

Министерот за транспорт и врски, Горан Сугарески учествува на конференција посветена на европскиот мултимодален транспорт, која се оддржува во Софија.

Во рамките на конференцијата, Сугарески ја претставил стратегијата за развој на мултимодалниот транспорт, како можност за подобро поврзување.

„Македонија има изработено физибилити студија во која е утврдена една точка каде се вкрстуваат патничкиот и железничкиот транспорт. Мултимодалниот транспорт во таа точка треба да обезбеди побрзо и поефикасно одвивање на целокупниот транспорт. Во следниот период, потребно е да се изработи проектна документација и да се распише јавен повик за изградба на таква функционлана целина која ќе ги задоволи сите меѓународни стандарди за унапредување на севкупниот транспорт во Македонија“, изјави Сугарески.

Тој додаде дека државата видела различни искуства во земјите од Европа како е спроведен овој вид на транспорт.

Во рамките на конференцијата, Сугарески се сретнал со еврокомесарката за транспорт, Виолета Булц, но остварил и билатерални средби со министрите за транспорт од регионот.


Грција ја поддржa Македонија за приклучување кон Јадранско-јонската иницијатива


Скопје, 23 февруари, 2018 - 10:33 (META) 

Грција ја поддржува кандидатурата на Македонија за членство во Јадранско – јонската иницијатива, јавува Македонската информативна агенција (МИА).

– Заменикот министер за надворешни работи на Грција, Јоргос Катругалос, со допис до надлежните комесари за проширување, Јоханес Хан и за регионална политика, Корина Крецу, ја објави намерата на Грција да ја поддржи кандидатурата на ПЈРМ во рамките на стратегијата на Европската унија за Јадранско –јонскиот регион (EUSAIR) – пишува во соопштението од грчкото МНР.

Од грчкото МНР потсетуваат дека во иницијативата вклучени се Грција, Италија, Словенија, Хрватска, Србија, Црна Гора, Албанија и Босна и Херцеговина, а соработка се реализира преку четири столба кои се однесуваат на „синиот раст“, односно растот во морските и поморските сектори, поврзувањето, односно транспорт и енергетика, животна средина и туризам.

Грчката поддршка за македонската кандидатура во Јадранско – јонската иницијатива, беше договорена и соопштена на средбата на Зоран Заев и Алексис Ципрас во Давос, како една од двете отстапки што ќе ги направи официјална Атина откако Македонија ги преименува аеродромот и автопатот.


Поради уцена притворен државниот секретар за транспорт на Романија


Букурешт, 14 ноември, 2017 - 10:08 (META) 

Обвинителите од Националната антикорупциска управа на Романија, вчера под обвинување за уцена го притворија Нинел Церцел, државен секретар во Министерството за транспорт на Романија.

Случајот на антикорупционерите е поврзан со  инцидент од 31 октомври годинава, кога во еден од вагоните на воз натоварен со амониум нитрат избил мал пожар, а Министерството за транспорт и националната компанија ЦФР Марфа не го третирале случајот како сериозен инцидент, велат обвинителите.

Следниот ден Церцел побарал од менаџерот на Центарот за транспорт за зоната Брашов да си даде оставка ако не сака да биде отпуштен, иако инцидентот со возот не се случил на територија под негова надлежност. Државниот секретар за транспорт на менаџерот му рекол и дека ако си даде оставка, нема да се поведе дисциплинска постапка против него, а ќе стане советник во Советот на општина Брашов и подоцна пак ќе добие работно место во компанијата ЦФР Марфа. Но, менаџерот не го прифатил тоа и пријавил.

Церцел сега е во 30-дневен притвор, а премиерот Михај Тудосе го разреши од функцијата.


ВМРО-ДПМНЕ: Поголема акциза за нафтата значи помалку пари во семејниот буџет


Скопје, 2 ноември, 2017 - 16:44 (META) 

Со зголемување на акцизата на горивата за фрапантни 3,54 денари, ќе се одземат пари од семејниот буџет на граѓаните, изјави на прес-конференција Драган Данев од ВМРО-ДПМНЕ, како реакција на најавеното зголемување на акцизата на нафтата и на нафтените деривати во предлог-буџетот за 2018 година.

Тој додаде дека зголемувањето на акцизата на горивата ќе значи и поголем трошок за повеќе производи кои директно зависат од цената на горивото, како транспортните услуги, градежните услуги, па дури и цената на лебот и прехранбените продукти.

– Ќе настрадаат сите граѓани, бидејќи зголемената цена на нафтата значи отворање на спиралата на инфлацијата: повисоки цени на превозот, повисоки цени на прехранбените и сите други производи. Доколку имате едно возило во семејството и месечно трошите 100 литри гориво, ќе плаќате 354 денари повеќе, а тоа во период од една година се 4.248 денари повеќе од секое семејство. Доколку имате две возила во семејството, тоа се 8.496 денари годишно, пари кои ќе се земаат од секое семејство за прикривање на расипништвото на СДС – изјави Данев.


Потребна е поголема искористеност на ИПА-средствата за поврзување на регионот


Скопје, 1 ноември, 2017 - 19:25 (META) 

Наша обврска е што повеќе да ги искористиме средствата предвидени за инфраструктурно и за енергетско поврзување на земјите од Западен Балкан, рече вицепремиерот за европски прашања, Бујар Османи, на координативниот министерски состанок на Националниот ивестициски комитет (НИК).

Како национален координатор за ИПА-фондовите, тој даде насоки за условите за успешно функционирање и за користење на средствата од фондовите ИПА2, особено регионалните фондови во делот на инфраструктура во транспорт, енергетика и животна средина.

НИК е советодавно тело кое е формирано за подобро да се планираат проектите, да се одредува нивниот приоритет и да се распределуваат средствата за транспортната инфраструктура и за енергетска поврзаност на земјата со земјите од Западен Балкан во рамките на инвестициската рамка за Западен Балкан.


Железничките делници на Коридорот 8 се заеднички приоритет на земјите од регионот


Варшава, 25 октомври, 2017 - 14:15 (META) 

Министеркaта без ресор задолжена за странски инвестиции, Зорица Апостолска, денеска учествуваше на втората министерска конференција за транспорт што се оддржува во Варшава, Полска.

На конференцијата на која присуствуваат министрите за транспорт од земјите од Централна и од Источна Европа и од Кина, се разговара за развојните стратегии во насока на реализација на инфраструктурните и транспортни проекти и нивното регионално значење.

Апостолска ја нагласила потребата од изградба и модернизација на коридорите 8 и 10, како најважни транспортни врски со земјите од Централна и од Југоисточна Европа.

„Во моментов сме фокусирани на изградба на нови автопатишта и патишта, нови железнички пруги, како и реконструкција и модернизација на старите. Коридорот 10 е стратешки многу важен бидејќи наjголем дел од стоките што доаѓаат од странство се транспортираат главно низ овој коридор. Затоа неговата функционалност е од суштинска важност“, изјавила Апостолска.

На оваа конференција, Апостолска информирала дека стратешката цел на Владата е финализирање на оската Исток-Запад, конкретно железничките делници на Коридорот 8, што е заеднички приоритет за сите земји во регионот, а кој ги поврзува транспортните текови од Јадранското и од Јонското Море во Европа со Црното Море и со Азија.


Заев се сретнаа со еврокомесарката за транспорт, Булц


Скопје, 16 октомври, 2017 - 18:53 (META) 

Премиерот Зоран Заев, вицепремиерот за европски прашања, Бујар Османи, и министрите за надворешни работи, Никола Димитров, и за транспорт и врски, Горан Сугарески, попладнево се сретнаа со комесарката за транспорт на Европската комисија, Виолета Булц.

Евркомесарката Булц на министрите им пренела дека Еропската комисија ги цени и ќе продолжи да ги поддржува напорите на Владата за зајакнување на регионалната соработка и за отворање евро-атлантски перспективи на Македонија и на државите од регионот, како и за отворените реформски процеси во државата.

– Резултатите од вчерашните избори се силен позитивен поттик за Владата да ги реализира најавените политики за квалитетен живот на граѓаните и за отворање перспективи на Република Македонија. Ова е моментот да се направи отскок напред – рече Булц.

Заев и Булц се согласиле дека транспортното поврзување во регионот, во што се очекува да помогне Договорот за основање транспортна заедница потпишан во Трст, како и финансиската поддршка од ЕУ за Коридорот 8 и функционалноста на Коридорот 10, ќе придонесат за подобра комуникација меѓу државите, а со тоа и за подобри резултати на економски план.

– Потребна е предвидлива, транспарентна клима за инвестирање, што ќе помогне на државите во регионот полесно да се поврзат со земјите од ЕУ, а со тоа и да обезбедат подобар живот за граѓаните во своите држави – додаде Булц.

Заев истакнал дека Владата презема конкретни чекори за реализирање на планот „3-6-9“ и додал дека ќе продолжат да даваат позитивен пример за тоа како се градат добрососедски односи и пријателства.


Јосифовски: Случајот со преземањето на „Макпетрол“ сè уште е заглавен во КХВ


Скопје, 19 септември, 2017 - 15:36 (META) 

Случајот со компанијата „Макпетрол“ и обидот за преземање од страна на „Балкан петролеум“ е заглавен во Комисијата за хартии од вредност, информираше денеска претседателот на управниот одбор на „Макпетрол“, Андреја Јосифовски, на прес-конференцијата по повод 70 години од постоењето на компанијата.

Според него, во нормална правна држава, понудата од оваа компанија веднаш би била отфрлена од надлежните институции.

– Станува збор за офшор-компанија чијшто основачки капитал е 1.000 евра и која е основана еден месец пред да ја достави понудата за преземање. Таа компанија нема ниту вработени, ниту луѓе кои го познаваат овој бизнис, ниту склучила некоја зделка. Нè зачудува односот на двете надлежни институции, Централниот депозитар за хартии од вредност и Комисијата за хартии од вредност (КХВ). Компанијата не обезбеди банкарска гаранција и не депонираше средства за откуп на акциите, а Комисијата за хартии од вреднoст не ја отфрли понудата и сè уште не донела решение за претходно правно решение доставено од Централниот депозитар за хартии од вредност по овој случај – изјави Јосифовски.

Тој додаде дека поради тоа што предметот не е затворен, „Макпетрол“ трпи штети и е блокиран во одреден дел од работата. Јосифовски најави дека ќе побара правна одговорност од двете институции и членови на управни одбори, особено од КХВ.

На забелешката на новинарите дека одредени имиња од врвот на претходната власт се вртеа во јавноста во врска со овој случај, тој рече дека со тоа што „Балкан петролеум“ отворила сметка во Стопанска банка Битола, можеби некои работи ќе бидат појасни.

На новинарско прашање дали се сомнева дека можеби во игра бил и поранешниот прв човек на Управата за безбедност и контраразузнавање, Сашо Мијалков, бидејќи набргу потоа тој отвори безнински пумпи, Јосифовски рече дека Мијалков си влегол во бизнисот легално, бидејќи законот дозволувал лиценца за трговија со нафта и со нафтени деривати секому, „освен на тој што нема да ја побара“.

Првиот човек на „Макпетрол“ имаше забелешка и за работата на Регулаторна комисија за енергетика, за која, како што вели, иако се вели дека е независна, сепак нејзините членови ги избира Собранието и „во неа членуваат партиски послушници“.

Во однос на тврдењето дека Регулаторна комисија за енергетика го принудува „Макпетрол“ да складира државни резерви на нафта, Јосифовски рече дека РКЕ двапати незаконски ја продолжувала лиценцата за таа работа, иако „Макпетрол“ тоа не го побарал од неа. Бидејќи, како што објасни, првиот пат кога побарале продолжување на лиценцата, биле одбиени, иако ја доставиле истата документација, со која лиценцата ја добиле и пред 10 години.

Јосифовски рече дека ниту една влада не може да го заврши процесот на гасификација без учество на АД „Гама“, која го изградила гасоводниот систем и занаетот го научила од руски компании.

– Претходната Влада ја формираше компанијата Македонски енергетски ресурси, каде што има вработено неколку луѓе. Се знаеше зошто ја формираа, таму се украдоа 50 милиони долари. Во АД „Гама“, Макпетрол и државата се акционери и доколку оваа компанија беше во игра за гасификација, нашите директори ќе вршеа контрола на јавните набавки – додаде Јосифовски.

Како заклучок додаде дека во нафтениот бизнис се прави голем криминал и дека тој потекнува од врвот на власта.