Мицкоски користи неажурирани податоци од „Транспаренси Интернешнл“


Скопје, 17 декември, 2018 - 10:58 (META) 

Во текот на својот говор пред зградата на Владата на Република Македонија, а кој претседателот на ВМРО-ДПМНЕ, Христијан Мицкоски го одржа пред партиските членови и симпатизери во рамките на третиот протестен марш на оваа партија во средата на 12 декември 2018 година, тој ја даде и следнава крајно манипулативна и невистинита изјава, пишува „Вистиномер“.

Ќе речат реформи правеле во судството. 112-та земја според „Транспарентност Интернационал“. 112-та земја сме на ранг листата. Танзанија и Етиопија се пред нас. Ќе речат во Европа нѐ носеле. Не Европа, Африка ја донесоа во Македонија. Африка ја донесоа во Македонија. Ете тоа направија од европска Македонија. Афричка Македонија според степенот на корупција која што владее во моментот во Република Македонија.

Факт е дека последното рангирање на „Транспаренси Интернешнл“ (ТИ) не се однесува на периодот во кој СДСМ е на власт. Напротив. Ова истражување за перцепцијата на корпуцијата сѐ уште се однесува на периодот од пред доаѓањето на СДСМ на власт, односно се однесува на периодот кога токму ВМРО-ДПМНЕ беше на власт.

Целата статија прочитајте ја на „Вистиномер.мк“.


„Транспаренси Интернешнл“ и ограноците ја повикаа Унгарија да го испорача Груевски


Скопје, 20 ноември, 2018 - 14:07 (META) 

„Транспаренси Интернешнл“ преку нејзините ограноци во Македонија и Унгарија денеска ги повика унгарските власти да го екстрадираат Груевски од Унгарија, каде што тој моментално бара азил во обид да избегне затворање по осуда за корупција.

– Оваа ситуација е голем тест за македонските и унгарските власти и треба да се реши во согласност со унгарскиот закон. Ги повикуваме унгарските власти да се придржуваат до принципот за немање неказнивост, како што е наведено во Европската конвенција за екстрадиција – вели Слаѓана Тасева, претседател на „Транспаренси Интернешнл – Македонија“.

Во барањето, двата ограноци го образложуваат целиот случај „Тенк“, како и тоа дека пресудата за Груевски е правосилна, но и посочуваат на сомневањата за Груевски за грабеж на буџетски пари.

„Случаите на Груевски ги води Специјалното јавно обвинителство, кое беше формирано во 2015 година по нелегалното прислушување на повеќе од 20.000 лица, вклучително и новинари и активисти од граѓанското општество. Според завршените истраги и обвиненија од страна на Специјалното јавно обвинителство, во периодот кога Груевски бил премиер, заедно со неговите соработници пренасочиле стотици милиони евра од јавниот буџет од народот на Македонија“, велат организациите.


ТИ: Македонија на најниското место откако постои Индексот за перцепција на корупцијата


Скопје, 22 февруари, 2018 - 17:55 (META) 

Македонија е рангирана на 107. место на Индексот за перцепција на корупцијата за 2017 година на Транспаренси Интернешенл (ТИ), што е пад за 17 места во однос на рангот во 2016 година и е најлошиот резултат за земјава откога се изработува индексот, посочија од Транспаренси Интернешнл – Македонија.

За падот на Македонија на листата реагираше и ВМРО-ДПМНЕ, кое порача дека власта на СДСМ ја одбележуваат многу случаи на корупција и криминал и дека и тие случаи и непотизмот придонесуваат за тој пад во последната година, посебно поради тоа што никој не понесува одговорност.

Од СДСМ одговорија дека падот на индексот за перцепција на корупција „е резултат на 10 годишното криминално владеење на ВМРО-ДПМНЕ и дека на граѓаните им е совршено јасно кој работеше криминално коруптивно“. Владејачката партија вели дека работите се менуваат, „а резултатите од тоа очекувано е да се рефлектираат за состојбите во 2018 година“.


Маневски ги смеша датумите: Македонија падна на индексот на корупција во време на ВМРО-ДПМНЕ!


Скопје, 23 јануари, 2018 - 14:03 (META) 

За само осум месеци од доаѓањето на власт на СДСМ и коалицијата со ДУИ, Македонија падна во однос на индексот на корупцијата од 66-то место на 90-то место. Тоа е влошување за цели 24 места, со што Република Македонија се става во друштво со некои африкански држави.

Оваа изјава на актуелниот советник во Град Скопје и поранешен министер за правда од ВМРО-ДПМНЕ, Михајло Маневски, а дадена на прес-конференција на партијата, е комплетна невистина, оценува „Вистиномер“.

И тоа станува збор за невистинити податоци кои се откриваат како такви за само 30 секунди. Едноставно, кога ќе отидете на веб-страницата на „Транспаренси Интернешнл“, невладина организација која ја мери перцепцијата за постоење на корупција во 176 земји на светот, веднаш се гледа дека последното рангирање е објавено на 25 јануари 2017 година и се однесува на 2016 година, односно кога на власт во Република Македонија беше влада составена од министри на ВМРО-ДПМНЕ и ДУИ.

(Целиот текст од „Вистиномер“ можете да го прочитате и да го преземете ТУКА)


ТИ: Не се преземаат доволно активности за борба против корупцијата


Скопје, 22 декември, 2017 - 12:06 (META) 

Македонија и понатаму не презема доволни напори за исполнување на препораките на Групата на држави против корупција на Советот на Европа (ГРЕКО), информираат од „Транспаренси интернешнл“ Македонија.

Во соопштението се додава дека, државата се уште не постапила адекватно за да отстрани низа забелешки дадени во извештајот на ГРЕКО, донесен пред четири години.

„Ова го потврдува и неодамна дадената изјава на претседателот на ГРЕКО, Марин Мрчела кој истакна дека ГРЕКО очекува препораките да се исполнат не поради самата група на држави за борба против корупцијата, туку поради граѓаните. Од 19 препораки во извештајот, три се исполнети, десет се делумно исполнети, а шест не се воопшто исполнети“, се додава во соопштението.

Од „Транспаренси интернешнл“ велат дека, државата не презема доволно активности за борба против корупцијата согласно овие препораки, за што информирале и на почетокот на годината.

„Четири од препораките за кои недостасува имплементација се однесуваат на спречувањето на корупција кај членовите на Собранието, а другите две неспроведени препораки се однесуваат на судството и јавното обвинителство. Денес, речиси една година подоцна,  работите не се поместени од точката на која што биле и тогаш“, се додава во соопштението.

„Транспаренси интернешнл“ ја повикува Владата сериозно да се зафати со исполнувањето на овие препораки, така што ќе формира посебен тим кој ќе го следи спроведувањето на овие препораки.


Тасева: Индексот за перцепција на корупцијата е збир од различни меѓународни истражувања


Скопје, 27 јануари, 2017 - 17:23 (META) 

„Слабиот резултат на Македонија укажува на потреба од зајакнување и од заштита на граѓанското општество, а не негово слабеење. Тоа е пораката на индексот за перцепција на корупцијата“, порача д-р Слаѓана Тасева, претседател на „Транспаренси интернешнел“ – Македонија (ТИМ).

Организацијата што таа ја раководи, како и матичната организација, денеска реагираа на нападите против нив што се појавија во некои медиуми откако во средата беше објавен годишниот извештај за перцепцијата за корупцијата во јавниот сектор на „Транспаренси интернешнел“ (ТИ) и на ТИМ, според кој Македонија само за една година паднала 24 места подолу.

– Индексот за перцепција на корупцијата е збирен индекс, комбинација од различни меѓународни истражувања и оценувања за корупцијата, собрани од различни реномирани институции. Индексот влече податоци од тринаесет истражувања од различни независни институции, специјализирани за анализа на владеење и на бизнис-клима и опфаќаат оценки и видувања на бизнисмени. Ниту едно од овие истражувања не е направено од „Транспаренси интернешнл“ – се вели во реакцијата.

ТИ посочи и линк на кој може да се види листата на нејзините донатори.


Зголемен е индексот за перцепција на корупцијата во Македонија, оцени ТИ


Скопје, 25 јануари, 2017 - 12:20 (META) 

Македонија, според меѓународната организација „Транспаренси интернешнл“, со индекс на перцепција на корупција 37, се наоѓа на 90. место од 176 земји колку што се рангирани во 2016 година, објавено е на веб-страницата на организацијата.

Земјите се рангираат како многу корумпирани (0) до многу „чисти“ без корупција (100).

Минатата година Македонија од 168 земји беше на 66. место со индекс на перцепција 42. Ако се спореди индексот на перцепција, тоа значи дека перцепцијата за корупцијата во Македонија е зголемена.

Во 20016 година, 69 отсто од земјите од вкупно 176 се наоѓаат под индексот 50 на скала од 0 (високо корумпирани) до 100 (земја без корупција).

Индексот на перцепција на корупцијата се прави врз основа на процената на експертите, претставници на институциите и на бизнисмените, заедно со истражувањето што го спроведува меѓународната организација.


„Транспаренси интернешнел“: Албанија е една од четирите најкорумпирани земји во Европа


Тирана, 17 ноември, 2016 - 12:28 (META) 

Во извештајот на „Транспаренси интернешнел“ објавен во средата се вели дека Албанија прави напори за борба против корупцијата, но сепак е една од четирите земји со најкорумпирана политичка класа во Европа.

Податоци покажуваат дека за разлика од Косово, Шпанија и од Молдавија, каде што корупцијата се смета за еден од трите главни проблеми, во Албанија тоа не е случај.

„Транспаренси интернешнел“ проценува дека албанските граѓани сметаат дека нивната политичка класа е меѓу најкорумпираните од земјите вклучени во анализата.

„Граѓаните на Украина, Албанија, Босна и на Романија се повеќе склони кон ставот дека пратениците се многу корумпирани“, стои во извештајот.

Албанија се смета за една од земјите каде митото во замена за јавни услуги е широко распространето. Албанија ги има добиено највисоките оценки во регионот и во Европа, што покажува дека културата на ситна корупцијата е широко распространета, рангирајќи се на исто ниво со Русија и оставајќи ги зад себе само земјите од Централна Азија.


По „бомбите“, граѓаните се песимисти дека нешто можат да сторат против корупцијата


Скопје, 16 ноември, 2016 - 14:46 (META) 

Зголемена апатија и намален број на граѓани кои се подготвени да направат нешто во бората против корупцијата, се главните карактеристики на годинешниот „Барометар на глобалната корупција“, за ситуацијата во Македонија, кој денеска го презентираше претседателката на „Транспаренси интернешнл Македонија“, Слаѓана Тасева.

Имено, за разлика од пред две години, кога 88 отсто од анкетираните граѓани рекле дека се подготвени да направат нешто во борбата против корупцијата, во годинешниот извештај ваква подготвеност искажале 65 отсто од испитаниците, а речиси 40 отсто се изјасниле дека не може ништо да се направи против корупцијата. Ваквите одговори доаѓаат пред и по објавувањето на прислушуваните разговори од СДСМ, кои открија многу скандали за корупција во највисоките државни кругови.

– Намален е бројот на граѓани кои се подготвени да направат нешто во борбата против корупцијата, а зголемен е бројот на граѓани кои сметаат дека не може ништо да се направи од нивна страна во борбата против корупцијата. Зголемен е бројот на тие што сметаат дека е многу силно влијанието на политиката и дека во начинот на кој се водат политиките влијание имаат моќните, влијателните и богатите луѓе, а во тоа е вклучена и политичката корупција – вели Тасева, додавајќи дека е неопходно да се зајакне транспаретноста и заштитата на луѓето што се подготвени да пријават корупција.

Според извештајот, Македонија е на средина од земјите од Европа и од Централна Азија, според личните искуства на граѓаните со случаи на корупција. Една третина или 35 отсто од испитаниците во земјава сметаат дека корупцијата, односно поткупот се една од трите најзначајни проблеми со кои се соочува државата.

Од граѓаните кои имале контакт со некоја од јавните институции, 12 отсто рекле дека платиле поткуп. Најмногу вакви случаи имало во јавниот здравствен систем, потоа со сообраќајната полиција, а на трето место се образованието и институциите за издавање службени документи. Корупција, според анкетите, пријавиле 28 отсто од тие што претходно дале поткуп. Како главна причина за непријавување на случаите на давање мито, 29 отсто од граѓаните го посочиле стравот од тоа дека можат да се соочат со последици. На прашањето, пак, дали премиерот, претседателот на државата и вработените во нивните канцеларии се вклучени во корупција, 31 отсто рекле оти сметаат дека се вклучени.

Во годинешниот извештај најлошо се оценети Украина, Молдавија, Босна и Херцеговина и Шпанија.

На прашањето за политичката корупција за време на изборната кампања, Тасева вели дека таа се јавува, пред сè, затоа што државата нема доволно развиен систем за контрола на финансирањето на политичките партии.

– Политичката корупција е присутна овде постојано, а меѓу формите во кои таа се јавува за време на избори е финансирањето на изборните кампањи преку поединци и компании што по изборите сакаат да имаат влијание и учество во начинот на кој ќе се водат политките. Моќните поединци предвреме инвестираат во изборните кампањи за да бидат сигурни дека по изборите ќе имаат глас. Ова е можно и се случува кај нас пред сè затоа што немаме доволно транспарентен систем за контрола на финансирањето на полтичките кампањи. Не се објавуваат имињата на донаторите на политичките партии ниту, пак, се објавуваат изворите преку кои се финансираат одредени активности во рамки на кампањата, а кои се донации во вид на услуга, односно не се директно давање пари. Исто така, има и ситуации кога некој друг ги плаќа сметките и фактурите, но многу малку за тоа можеме да видиме информација – вели Тасева.

„Транспаренси интернешнл“ дава четири клучни препораки до владите во Европа и во Централна Азија за намалување на политичката корупција и за помагање на луѓето да пријавуваат корупција без страв од одмазда.

„Потребни се транспаретни услови за лобирање и јавен регистар на лобисти, со што ќе се олесни надзорот над политичките одлуки. Потребно е да се обезбеди независност на судството, особено во земјите кандидати за членство во Европската Унија, преку намалување на влијанието на извршната власт врз судството и обвинителството и преку објективни и транспаретни системи за назначување, преместување или разрешување на судии и на обвинители. Покрај тоа, нужно е да се усвои и да спроведе опсежна легислатива за заштита на укажувачите и да се обезбеди соодветно проследување на она што укажувачите го откриваат“, се вели во Глобалниот барометар за корупција за 2016 година.


ТИ: Измените на Законот за заштитени сведоци се од голема важност за борбата против корупција


Скопје, 6 октомври, 2016 - 11:13 (META) 

Здружението „Транспаренси интернешнел“ изразува негодување во врска со неизгласувањето на измените на Законот за заштитени сведоци предложени од Специјалното јавно обвинителство, а за кои се расправаше и се гласаше на седницата во Собрание одржана на 4 октомври.

– „Транспаренси интернешнел Македонија“ смета дека предложените измени се од голема важност за борбата против корупцијата која во моментов се случува во Македонија. Соодветната заштита на сведоци е од суштинско значење во водењето истраги во случаи на корупција. Тие по својата природа се такви што вклучуваат големи ризици за сведоците што би можеле да откријат важни информации за откривањето на криминалот. Поради тоа, нагласуваме дека Македонија мора да го направи секој можен чекор кон обезбедување што е можно поголема заштита за сведоците во ваквите истраги – се вели во реакцијата на „Транспаренси интернешнел“.

Тие ги повикуваат сите политички чинители, кои веќе претходно му обезбедиле позиција на Специјалното јавно обвинителство да ги гони сторителите на кривични дела што произлегуваат од прислушуваните разговори, сега да му обезбедат и можност соодветно да ги процесира случаите.

– Работата на оваа институција е од голема важност во борбата со корупцијата во Македонија и поради тоа сметаме дека треба да му се дадат на располагање алатките што ги има и ЈОРМ, а при тоа и да се елиминираат сите законски пречки кои можат да му попречат во работата – велат од оваа организација.