„Гугенхајм“ не дава слика на Ван Гог за Белата Куќа, нуди шолја за тоалетот


Њујорк, 26 јануари, 2018 - 12:43 (META) 

Белата Куќа во септември годинава побарала од музејот Гугенхајм во Њујорк да и ја позајми сликата „Пејсаж со снег“ на Винсент Ван Гог, насликана во 1888 година, за со неа да го украси резиденцијалниот дел од Белата Куќа, во кој живеат претседателот на САД и првата дама, Доналд и Меланија Трамп.

Одговорот што стасал од Ненси Спектор, главниот кустос на „Гугенхајм“ бил дека тоа барање не може да биде задоволено ама затоа може да ја позајмат скулптурата „Америка“ за тоалетот. „Америка“ е тоалетна шолја, од 18-каратно злато, дело на уметникот Маурицио Кателан, која изминатава година беше „изложена“ во музејот, известува весникот „Вашингтон Пост“, кој тврди дека има копија од електронското писмо што Спектор го испратила до Белата Куќа.

Целосно функционалната златна тоалетна шолја, критичарите на уметноста ја оквалификуваа како сатира за преголемото богатство во САД. Изминатава година таа беше во тоалет на петтиот кат на музејската зграда, каде сите посетители можеа да ја користат како секоја друга тоалетна шолја.

Бидејќи изложбата по една година траење е завршена, шолјата е на располагање „доколку претседателот и првата дама се заинтересирани да ја инсталираат во Белата Куќа, напишала Спектор, која е критичар на Трамп.

„Уметникот би сакал да ја понуди на Белата Куќа како долготрајна позајмица. Шолјата, се разбира, е екстремно вредна и лесно оштетлива, но ќе ви ги дадеме сите инструкции за нејзино инсталирање и за одржување“, напишала Спектор во електронското писмо цитирано од „Вашингтон Пост“.


Градоначалникот го прогласи Чикаго за „зона без Трамп“


Чикаго, 7 септември, 2017 - 21:27 (META) 

Рам Емануел, градоначалникот на Чикаго, го прогласи градот за „зона без Трамп“ во знак на револт од одлуката на претседателот на САД, Доналд Трамп, да ја укине програмата што ги штитеше од депортација децата на нелегалните имигранти.

Програмата беше воведена од претходниот американски претседател, Барак Обама, за да се заштитат од депортација младите имигранти кои пристигнале во САД нелегално како деца, односно, како што се наречени „сонувачи“. Програмата им овозможуваше да студираат и да добиваат дозволи за работа иако немаат дозволи за престој.

– На сите „сонувачи“ во оваа просторија и во градот Чикаго им порачувам: добредојдени сте во Чикаго. Ова е ваш дом и нема зашто да се грижите. Чикаго, нашите училишта и нашите соседства, нашиот град, поради она што го рече претседателот Трамп, ќе станат „зона без Трамп“. Сакам да знаете дека не треба да се грижите. Продолжете да се борите за своите соништа – рекол Емануел на средбата со „сонувачи“ во едно училиште во Чикаго.


Папата Франциск одби да коментира за Трамп


Ватикан, 11 ноември, 2016 - 11:15 (META) 

Римскиот папа Франциск одби да изнесе личен став за доаѓањето на Доналд Трамп на претседателското место со објаснување дека тој е заинтересиран само за влијанието на политичките одлуки врз сиромашната популација, јавува „Ројтерс“.

„Не расудувам карактери на личности и на политичари. Само сакам да знам какви страданија предизвикуваат нивните однесувања врз сиромашните и врз запоставените“, одговори папата Франциск на поставеното прашање од италијанскиот весник „Ла Република“ во врска со неговото мислење за победата на магнатот за недвижности на американските избори.

Папата со аргентинско потекло посочи дека неговата најголема загриженост во овој момент се бегалците и мигрантите и притоа додаде дека мора да се урнат ѕидовите што разделуваат. Во февруари годинава, за време на посетата на Мексико, папата изјави дека личноста што размислува само за градење ѕидови, а не за градење мостови, не е христијанин.


Моќна антирасистичка насловна страница на „Шарли ебдо“ по изборот на Трамп


Париз, 9 ноември, 2016 - 16:13 (META) 

Францускиот сатиричен неделник „Шарли ебдо“ на најновата насловна страница пластично покажува како се чувствуваат голем дел од американските граѓани по победата на Доналд Трамп на претседателските избори.

CH

На цртежот е прикажан испотениот претседател Барак Обама со зацрвенети очи, како бега од двајца бели полицајци кои пукаат кон него.

„Обама, повторно обичен граѓанин, како сите нас“, пишува на насловната страница.

Цртежот се однесува на сè поизразениот проблем со полициската бруталност во САД и верувањето дека полицијата ги матретира граѓаните со афроамериканско потекло.

Неделникот „Шарли ебдо“, кој нема објави на „Твитер“ од минатиот јануари кога во терористички напад на редакцијата загинаа 12 вработени, излезе денеска и насловната со цртежот на Обама ја стави на профилот како главна и како подглавна фотографија.


Вучиќ и Николиќ: Големата победа на Трамп е надеж за подобри односи САД – Србија


Белград, 9 ноември, 2016 - 13:54 (META) 

Премиерот на Србија, Александар Вучиќ, му ја честиташе победата на Доналд Трамп на претседателските избори и притоа изрази надеж дека неговата „голема победа“ ќе придонесе за унапредувањето на односите меѓу Србија и САД.

Српските аналитичари, пак, не очекуваат битни промени во односите на Вашингтон кон Србија и кон регионот.

„Верувам дека на должноста 45. претседател на САД ќе пристапите со посветеност и со одлучност, карактеристики со кои се одликуваше и Вашата исклучителна кампања. Лидерството со кое се истакнавте, претставува силна волја која е неопходна не само на граѓаните на САД, туку и низ целиот свет“, истакна Вучиќ во честитката.

Српскиот претседател Томислав Николиќ во честитка за победата оцени дека по доаѓањето на Трамп на претседателското место, може да се очекува соработка помеѓу Русија и САД, како и подобро разбирање со Србија во однос со косовското прашање и односите со Москва. Николиќ најави и дека од српската влада ќе побара анализа за влијанието на победата на Трамп врз српската економија.

Опозициската партија Демократската странка на Србија оцени дека односот на САД кон Србија со доаѓањето на Доналд Трамп во Белата куќа не може да биде понеповолен од тој за време на владеењето на администрациите на Клинтон, Буш и на Обама, чија политика кон Србија била сè друго освен пријателска.

Поранешниот амбасадор на Србија во САД, Иван Вујачиќ, верува дека суштински нема да се промени надворешната политика на САД кон Западен Балкан и смета дека САД ќе ја поддржуваат секоја влада која е ориентирана кон Брисел и која ја чува регионалната стабилносст.

Претседателката на белградскиот Центар за надворешна политика, Александра Јоксимовиќ, изјави дека победата на Трамп ќе се коментира како поголем шок од Брексит, но и таа е уверена дека политиката кон Западен Балкан, која не е во фокусот на САД, сепак ќе остане непроменета.