„ТЕ-ТО“: Сите активности на компанијата се одвиваат согласно законите


Скопје, 20 јуни, 2018 - 15:47 (META) 

Компанијата „ТЕ-ТО“ АД Скопје ја поздравува одлуката на надлежниот Суд за одобрување на планот за реорганизација со цел финасиска консолидација на компанијата и овозможување истата да продолжи редовно да работи што е во интерес на државата, вработените, акционерите и корисниците на нејзините услуги, се вели во реакцијата на компанијата на обвинувањата од страна на директорот на „Топлификација“ АД, Димитар Хаџи-Мишев, дека „ТЕ-ТО“ отворил лажна стечајна постапка за да не го исплати долгот кон „Топлификација“ од 30 милиони евра.

Од таму додаваат дека „ваквата одлука на Судот, која е донесена согласно законските одредби, следува откако доверителите со над 85 отсто од побарувањата дадоа согласност за реализација на понудениот план за реорганизација.“

„Меѓу овие доверители е и реномирана Германска банка чиј глас беше клучен за изгласувањето на Планот. Планот за реорганизација е изготвен според објективни критериуми, согласно сите законски процедури и предвидува рамноправен третман на сите доверители кои припаѓаат на соодветна класа на доверители, како што е предвидено со закон.  Уште еднаш напоменуваме дека сите активности на „ТЕ-ТО“ АД Скопје се одвиваат согласно законите на Република Македонија. Наводите што ги изнесува во јавноста одредена заинтересирана страна во постапката се невистинити и целосно ги отфрламе. Тие наводи претставуваат обид за манипулација со пошироката јавност со крајна цел вршење притисок врз независните судски органи“, велат од „ТЕ-ТО“.


Хаџи-Мишев: „TЕ-ТО“ отвори лажен стечај за да не го плати долгот кон „Топлификација“


Скопје, 20 јуни, 2018 - 14:01 (META) 

„Топлификација“ АД Скопје ја обвини компанијата за комбинирано производство на топлинска енергија „ТЕ-ТО“ дека покренала стечај сама на себе, за да не го плати долгот кон Топлификација и тоа во период, кога по тригодишен период на лоши финансиски резултати, лани остварува добивка од 8 милиони евра.

– Причина за овој судски процес во кој фирмата „ТЕ-ТО“ предлага стечај сама на себе е пресудата на Врховниот суд од 27 декември 2017 година, во која, Врховниот суд го прифаќа барањето на „Топлификација АД“, дека заемите дадени од „Топлификација АД“ на „ТЕ-ТО“ во периодот на градба на објектот се достасани и „ТЕ-ТО“ треба да и плати на „Топлификација“ АД околу 6,3 милиони евра главен долг, а со камата, „ТЕ-ТО“ треба да и плати на „Топлификација“ 11,4 милиони евра. Имајќи предвид дека оваа тужба на „Топлификација“ е за дел од заемите дадени во периодот на градба на објектот, вкупниот долг на „ТЕ- ТО“ кон „Топлификација“ ќе биде над 30 милиони евра со камати пресметани до 1 март 2018 година. Доколку оваа стечајна постапка на „ТЕ-ТО“ се реализира, како што е замислена, штетата на „Топлификација“ ќе биде над 30 милиони евра – рече директорот на „Топлификација“ АД, Димитар Хаџи-Мишев.

Тој додаде дека имајќи предвид дека дел од побарувањата на „Топлификација“ од „ТЕ-ТО“ се реинвестирани кредити кои „Топлификација“ ги добила од „Комерцијална банка“, доколку се реализира стечајот како што е замислен, сериозни штети може да има и банката-кредитор.

„Врховниот суд одлуката ја носи во декември, одлуката станува извршна на 2 април 2018 по доставување на истата на тужениот. Во меѓувреме „ТЕ-ТО“ започнува активности со серија незаконитости со цел преку лажен стечај да спречи извршување на судската пресуда на „Врховен суд“ и да ја оштети „Топлификација“ за над 30 милиони евра – додаде Хаџи-Мишев.

Овој судски спор, како што рече Хаџи-Мишев, нема да се одрази на испораката на топлинска енергија кон граѓаните, но неисплаќањето на 30 милиони евра ќе има сериозно влијание врз работењето на компанијата.


Отворена предстечајна постапка за „Топлификација“


Скопје, 15 мај, 2018 - 15:07 (META) 

Основен суд Скопје 2 донесе одлука за претходна постапка за утврдување на условите за отворање стечај за „Топлификација АД Скопје“.

За привремен стечаен управник е назначен Ацо Дамчевски кој е задолжен од судот да го заштити имотот на „Топлфикација“ до донесувањето на одлуката за отпочнувањето на стечајната постапка, за да се избегне значително намалување на имотот, како и да утврди дали постои имот над кој може да се отвори стечајна постапка и да се обесштетат доверителите.

Според најавите, судската одлука за отворање на претходна постапка за утврдување на условите за отворање стечај за „Топлификација“, нема да ја ги остави граѓаните на Скопје без парно греење.

„Испораката на топлинска енергија ќе се одвива редовно и согласно планираните активности и во новата грејна сезона 2018/2019 година. Сите подготвки се во тек согласно редовниот оперативен план“, велат од БЕГ.

Судот закажа рочиште на 28 јуни 2018 година, а дотогаш издадена е општа забрана за располагање со имотот на должникот, се забрануваат исплати од сметка како и присилна наплата. Во одлуката на судот се вели дека против ова решение не е дозволена жалба.

„Топлификација“ е сопственик на топланите Исток, Запад и Кисела Вода, преку кои се обезбедува топлинска енергија за граѓаните на Скопје, а ги издава под наем на Производство на топлина – „Балкан енерџи“.

Барање за стечај поднесе еден од доверителите кои побарува долг од над еден милион евра од „Топлификација“, заради неможност подолг временски период за наплата на средствата. Според неофицијалните информации, се очекува и други доверители да поднесат барање за стечај.


Владата уверува дека следната година исклучените нема да плаќаат паушал за парно


Скопје, 22 декември, 2017 - 13:40 (META) 

Владата на Република Македонија денеска порача дека домаќинствата кои се исклучени од централното греење во град Скопје, во наредната година ќе бидат ослободени од плаќање на паушалот кој во моментов го плаќаат.

„Проблемот со кој се соочуваат граѓаните, владата предвиде да го реши во рамките на новиот предлог Закон за енергетика. Имено во подзаконските акти на Законот за енергетика кој ќе се воведе во текот на 2018 година се предвидени специфични решенија со кои во рамките на законската регулатива ќе се реши оваа наследена ситуација“, се вели во соопштението од Владата.


Анѓушев уште еднаш ги повика ЕЛЕМ да го сопрат објавувањето јавни повици


Скопје, 19 јуни, 2017 - 16:31 (META) 

Вицепремиерот за економски прашања, Кочо Анѓушев, уште еднаш го повика раководството на АД ЕЛЕМ, веднаш да го запре објавувањето на јавните повици со проценета вредност од 80 милиони евра, за да се избегне штета на државниот и на буџетот на компанијата.

„Наспроти укажувањето од Владата, раководството на ЕЛЕМ, најпрвин во петокот, на 15 јуни, објави јавен повик за набавка на рударска опрема за РЕК Битола во вредност од 34 милиони евра, за денеска да го објави и јавниот повик за изградба на топлификација на Битола, Новаци, Логоварди и на Могила во вредност од 46 милиони евра“, се вели во соопштението од кабинетот на Анѓушев.

Оттаму потсетуваат дека раководството на ЕЛЕМ имало 11 години да ги реализира овие проекти, а особено проектот за топлификација на Битола.

Вицепремиерот нагласи дека одредена штета е веќе направена со објавувањето на јавните повици, но според него, „крајно време е управниот одбор на компанијата да донесе одлука за мораториум на проектите за да не се направи поголема штета и да не се загрози имиџот на Македонија и во меѓународни рамки“.


Анѓушев бара да се стопираат тендерите што ги најави ЕЛЕМ, за нив ќе решава новата влада


Скопје, 15 јуни, 2017 - 16:56 (META) 

Откако директорот на државната компанија „Електрани на Македонија„ (ЕЛЕМ), Христијан Мицкоски, денеска објави дека компанијата ќе објави тендери за набавка на рударска опрема за РЕК Битола и за топлификација за Битола, Новаци, Логоварди и за Могила, во вкупна вредност од 80 милиони евра, реагираа и вицепремиерот за економски прашања, Кочо Анѓушев, и СДСМ.

Анѓушев побара веднаш да се стопираат повиците за набавка на опрема и за изградба на топлификација. Тој вели дека во изминатите 11 години имало спорни и незаконски тендерски постапки и избор на изведувачи на тендери објавени од АД ЕЛЕМ и дека новата влада нема намера да дозволи тоа да се повторува.

СДСМ порача дека Мицкоски повеќе нема право да ветува што било и најави дека ќе се прави ревизија на сите тендери на ЕЛЕМ од страна на новото раководство.

„Христијан Мицковски нема право да ветува ништо повеќе, туку треба да одговори зошто 11 години се распишуваа сомнителни тендери, наместо компанијата ЕЛЕМ сама да врши ископ на јаглен и на јаловина. Цели 11 години стотици милиони евра се одлеаа по фирми блиски на ВМРО-ДПМНЕ, преку ангажирање надворешни фирми, за што се водат и кривични процеси пред судовите. Сите тендери внимателно ќе бидат темелно ревидирани од новото раководство, чиj врвен приоритет ќе биде зголемување на домашното производство, но и реализација на клучните енергетски капацитети“, стои во соопштението на СДСМ.


ТЕ–ТО го доби спорот со „Топлификација“


Скопје, 13 јуни, 2017 - 15:38 (META) 

Апелацискиот суд во Скопје донесе пресуда со која го одби тужбеното барање на „Топлификација“ АД за присилна наплата на побарувања врз основа на заеми, што „Топлификација“ АД ги дала на ТЕ-ТО АД, се вели во соопштението објавено на веб-страницата на Македонската берза за хартии од вредност.

За овој предмет првостепениот суд еднаш донесе пресуда во корист на „Топлификација“ АД, на што ТЕ-ТО АД поднесе жалба во Апелацискиот суд, кој го врати предметот во Основен суд, кој повторно донесе иста пресуда како претходно. На втората жалба на ТЕ-ТО, Апелацискиот суд ја отфрлил тужбата од „Топлификација“ и пресудил во полза на жалителот.

ТЕ-ТО АД е когенеративна термоелектрана на природен гас во Скопје, со капацитет од 220 мегавати за производство на електрична енергија и 160 мегавати за производство на топлинска енергија.


Повеќе од 30.000 тужби од БЕГ за исклучените граѓани


Скопје, 6 октомври, 2016 - 12:34 (META) 

Се проценува дека повеќе од 4.000 граѓани се соочуваат со извршни судски решенија бидејќи, иако не користат парно греење, треба да плаќаат за цевките што минуваат низ нивните станови, пренесува БИРН.

Точниот број на исклучени корисници не е познат затоа што ниту од стара „Топлификација“, ниту од сегашниот снабдувач со топлинска енергија, „Балкан енерџи груп“ (БЕГ), не даваат податоци. Според слободни пресметки на исклучените граѓани, од топлификациската мрежа до 2012 година се исклучиле половина од корисниците, односно околу 20.000 граѓани. Дел од нив, околу 8.000, под притисок на извршители и поради тужби, повторно се вратиле во системот, додека 12.000 останале исклучени. Од нив, околу 4.000 не сакаат да плаќаат за т.н. додаток за ангажирана моќност, односно за поминувањето на цевките од топлификациската мрежа низ нивните станови.

Поради тоа, компанијата БЕГ одлучува да ги тужи. Бројот на тужби постојано се зголемува, бидејќи граѓаните кои не сакаат да платат за додатокот, добиваат нова тужба на секои шест месеци. Оттука, според проценката на здружението што ги штити интересите на овие граѓани, „Но пасаран“, вкупниот број на тужби по оваа основа е повеќе од 30.000.

Повеќе прочитајте тука.


Од утре радијаторите ќе бидат топли


Скопје, 4 октомври, 2016 - 16:29 (META) 

За потрошувачите кои се во системот на снабдување на „ Балкан енерџи“ во Скопје, од утре почнува новата грејна сезона.

Испораката на топлинска енергија до потрошувачите почнува порано од вообичаено поради падот на температурата.

„Согласно регулативите, снабдувањето со толинска енергија на тарифните потрошувачи може да почне и пред 15 октомври, доколку прогнозираната средна надворешна температура за следниот ден е еднаква или помала од 12 Целзиусови степени, според податоците од Управа за хидрометеролошки работи на Република Македонија. Конечната одлука за испорака на топлинска енергија во деновите пред официјалниот почеток на грејната сезона, односно 15 октомври, ја носи Регулаторната комисија за енергетика.
Во изминативе неколку денови, екипите вршеа континуирани ладни проби на системот за да се отстранат евентуалните пречки и да се обезбеди навремена и квалитетна испорака на топлинска енергија до потрошувачите“, се вели во известувањето од компанијата.


Парите од БЕГ одат на приватни сметки на ВМРО-ДПМНЕ во Кипар, обвини Левица


Скопје, 3 октомври, 2016 - 16:13 (META) 

Компанијата БЕГ е основана за да се испумпаат парите на граѓаните и да одат на приватни сметки на лицата од ВМРО-ДПМНЕ во Кипар, обвини денеска Владимир Куновски од политичката партија Левица.

Тој рече дека незаконските дејства на ВМРО-ДПМНЕ со БЕГ почнале уште во 2011 година.

„Сè почнува на 9 ноември 2011 година, на состанокот помеѓу Никола Груевски, Димитар Петров, директорот на Регулаторна комисија за енергетика и Хаџи-Мишев, директор на „Топлификација“. Целта била да се вратат сите исклучени потрошувачи. Лицето Н.Г. добива идеја и истата ја реализира во 2012 година, кога е одржан состанокот со Леонид Лебедев, сопственик на „Синтез груп“, руски бизнисмен на Кипар, и кога се формира БЕГ за 50.000 евра“, рече Куновски.

Од Левица велат дека голем криминал е направен во 2012 година, кога три лиценци се издадени на БЕГ, и тоа на 31 декември 2012 година, а во истиот ден се објавени во „Службен весник“, за да може веќе од 1 јануари 2013 година да издадат фактури.

„Имаме три месеци искористување на личните податоци на 40.000 граѓани бесправно, бидејќи БЕГ нема никаква правна и законска можност да ги користи нивните податоци“, додаде Куновски.