!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

СДСМ со поддршка од ДУИ поднел четири амандмани за законот за јазици


Скопје, 21 ноември, 2017 - 15:46 (META) 

Пратеничката група на СДСМ и на коалицијата поднесе четири амандмани на предлог-законот за јазици, со кои ќе се унапредат правата на етничките заедници во земјата, изјави координаторот на пратеничката група на СДСМ, Томислав Тунтев, на прес-конференција во Собранието.

Според Тунтев, со амандманските решенија ќе се унапредува позицијата на помалите етнички заедници што се наведени во преамбулата на Уставот, со што ќе се овозможи и овие заедници да остваруваат одредени права предвидени во предложениот закон.

– Истовремено, предлагаме намалување на висината на казните што беа наменети за институциите што нема да го почитуваат овој закон. Според нашиот предлог, казните од 4.000 евра до 5.000 евра се намалуваат на 1.000 до 2.000 евра. Ние како пратеници сме задоволни што за предложените амандмански решенија добивме поддршка и од нашиот коалициски партнер ДУИ. Наша заедничка цел е да дојдеме до квалитетно решение, кое и практично ќе биде применливо – рече Тунтев.

Координаторот на пратеничката група рече дека Владата преку МНР ќе побара мислење од Венецијанската комисија за целиот текст на законот по неговото усвојување, како и за отворените прашања што не се дел од овој закон, а веќе се доставени до Венецијанската комисија.


Тунтев: Работиме на амандмани за да нема различни толкувања на законот за јазиците


Скопје, 15 ноември, 2017 - 14:11 (META) 

Пратениците на Социјалдемократскиoт сојуз на Мaкедонија работат на амандмански предлози за предлог-законот за упиреба на јазииците со кои сакаат да интервенираат во законот секаде онаму каде што се отвора проблем за различни толкувања на членовите, изјави коодринаторот на пратеничката група на СДСМ, Томислав Тунтев на прес-конференција во Собранието.

– Со денешното изгласување на потребата за донесување на законот почна постапката за целосно решавање на ова прашање отворено со потпишувањето на Охридскиот рамковен договор. Со ова конечно ќе се заокружи имплементацијата на делот на Охридскиот договор за човековите права и слободи. Се надевам дека во понатамошната процедура и ние од владејачката коалиција, но и другите ќе го изгласаме овој предлог-закон – рече Тунтев.

Тој кажа дека пратениците од СДСМ ја гледат Македонија како општество за сите во кое сите ќе бидат еднакви.

– На оваа држава и треба соработка за сите да можеме да се избориме за подобра држава, за подобра иднина и живот каков што граѓаните заслужуваат – рече Тунтев.

Одговарајќи на новинарски прашања, Тунтев рече дека станува збор за закон за сите јазици, кои што ги зборуваат заедниците во Македонија, а не само за албанскиот јазик и рече дека пратениците од СДСМ ќе се потрудат граѓаните да го добијат сето она што Уставот го препознава како право.

На прашање дали законот предвидува двојазични банкноти и униформи Тунтев одговори одречно.


Пратениците се поправија, го усвоија извештајот на Народниот правобранител


Скопје, 8 ноември, 2017 - 17:43 (META) 

Собранието попладнево го прифати извештајот на Комисијата за политички систем за спроведување на препораките за надминување на констатираните состојби содржани во извештајот на Народниот правобранител за почитување, унапредување и заштита на човековите слободи и права за 2016 година.

Со ова, како што изјави координаторот на пратеничката група на СДСМ, Томислав Тунтев, се поправа грешката со неусвојувањето на извештајот направена на седницата во понеделникот, оваа недела, поради, како што рече недоволна координација на пратеничките групи и на претседателот на Собранието, Талат Џафери.

Препораките на Народниот правобранител вчера беа на повторно разгледување во Комисијата за политички систем и односи меѓу заедниците, по што повторно беа ставени на дневен ред и усвоени на денешната седницата, но, овој пат како извештај на Комисијата. Ова, како што рече Тунтев, е направено во договор со четирите најголеми парламентарни партии.

На ваков начин, рече Тунтев, ќе се овозможи спроведувањето на клучните реформи во државата, кои што ќе значат унапредување на демократските процеси во земјата и вистински напредок на демократијата.

Собранието претходно денеска ги верификуваше мандатите на пратениците Костадин Ацевски и Агим Муртезанов.


Законот за употреба на јазиците со 9 гласа „за“ помина во Комисијата за европски прашања


Скопје, 7 септември, 2017 - 14:58 (META) 

Законот за употреба на јазиците го помина првото читање во собраниската Комисија за европски прашања. Пратениците со девет гласа „за“ и ниту еден „против“ и „воздржан“ од вкупно 18 членови, го усвоиле заклучокот дека законот е прифатлив од аспект на неговата усогласеност со правото на ЕУ и дека треба да се даде на понатамошно читање.

Пратеникот од ВМРО-ДПМНЕ, Антонио Милошоски, побара наместо оваа Комисија, предлог-законот да го разгледува Комисијата за политички систем како матично тело.

– Оваа комисија не е матичното тело. Предлог-законот треба да го разгледува Комисијата со која претседава Александар Кирацовски, генерален секретар на СДСМ. Да го слушнеме неговото мислење и да го слушнеме мислењето од Комисијата за да може содржински да расправаме за тоа што Владата ни го наметнува и сака да го помине за три дена – рече Милошоски.

Претседателот на Комисијата за европски прашања, Артан Груби, му реплицираше дека според деловникот, претседателот на Собранието одредува кое е матичното тело и го одби неговто барање.

Пратеникот Ејуп Алими, кој е и координатор на пратеничката група на ДУИ, во завршниот говор за предлог-законот за унапредувањето на употребата на јазиците, рече дека со овој закон ќе се надминат јазичните бариери и ќе се подобри меѓуетничка толеранција.

– Предложениот закон за употреба на јазиците ниту значи двојазичност на цела територија на Република Македонија, ниту било какви права кои излегуваат надвор од Уставот – рече Томислав Тунтев, координатор на пратеничката група на СДСМ.


Собраниската расправа за огласот за нов државен јавен обвинител продолжува в среда


Скопје, 4 септември, 2017 - 18:32 (META) 

Претседателот на Собранието, Талат Џафери, точно во 18 часот ја прекина расправата по точката за предлогот на Владата за распишување оглас за именување нов државен јавен обвинител, по разрешувањето на претходниот – Марко Зврлевски.

Следното продолжение на седницата Џафери го закажа за среда, во 11 часот, затоа што утре тој ќе присуствува на Меѓународната научна конференцијата „Балканот помеѓу Западот и Истокот: Стари и/или нови безбедносни предизвици“ во Охрид.

Расправата по оваа точка помина во говори на пратениците на ВМРО-ДПМНЕ кои го обвинија владејачкото мнозинство дека незаконски, спротивно на членот 8-а од Изборниот законик, сака да го протурка именувањето на новиот државен јавен обвинител.

Илија Димовски од ВМРО-ДПМНЕ рече дека одењето спротивно на законот и на членот 8-а, кој беше изгласан на барање на СДСМ, е ароганција и надминување на нормалното функционирање на државата.

Координаторот на пратеничката група на СДСМ, Томислав Тунтев, рече дека доаѓањето на новиот јавен обвинител е неминовно и дел од пакетот реформи во правосудството.


Почна и веднаш заглави расправата за распишување оглас за наследник на Зврлевски


Скопје, 4 септември, 2017 - 16:52 (META) 

Собранието ја почна расправата за предлогот на Владата за распишување оглас за именување нов државен јавен обвинител, по разрешувањето на претходниот – Марко Зврлевски.

Координаторите на десетте пратенички групи на ВМРО-ДПМНЕ, кои почнаа да се јавуваат за збор, еден по еден, обвинија дека постапката се води незаконски за време на распишани избори, идентично како и при разрешувањето на Зврлевски, бидејќи е во спротивност со членот 8-а од Изборниот законик.

– Ако за граѓаните беа разбирливи полтичките причини за разрешувањето на претходниот јавен обвинител, одењето спротивно на законот и на членот 8-а, кој беше изгласан на барање на СДСМ, е веќе ароганција и надминување на нормалното функционирање на државата. Тоа значи дека Собранието е над сите закони и дека пратениците можат да се повикуваат на имунитет за секоја одлука што исто така е ароганција – рече Илија Димовски, координатор на една од пратенички групи, кој, повикувајќи се на одлука за апанажа на Зврлевски, додаде дека со одлуката за негово разрешување, тој не само што заминал од функцијата државен јавен обвинител, туку го загубил и работното место, бидејќи е разрешен поради нестручно, несовесно и незаконско вршење на службата.

Димовски рече дека Владата на 24 август донела одлука да стави во мирување четириесетина постапки за изменување на државни функционери, токму поради членот 8-а од Изборниот законик.

Координаторот на пратеничката група на СДСМ, Томислав Тунтев, реплицирајќи, обвини за двојни аршини кај пратениците на ВМРО-ДПМНЕ, а како пример го посочи токму именувањето на Марко Зврлевски за државен јавен обвинител на 21 јануари 2013 година, 10 дена по распишувањето на локалните избори, кои се одржаа на 24, односно на 7 април 2013 година.

На ова реагираше Димовски, кој истакна дека во 2013 година во Изборниот законик ја немало алинејата што ја забранува ваквата постапка за време на избори и дека таа е донесена во 2015 година.

Петре Шилегов од СДСМ од говорницата порача дека ќе продолжат со тоа што го зацртале и дека мислењето на Државната комисија за спречување на корупција околу примената на ченот 8-а не може да влијае на работата на Собранието.

– Антикорупциската комисија е синоним за криминалот, исто како и Марко Зврлевски – додаде Шилегов.


СДСМ ќе поднесе три закони – за минимална плата, за стечајци и за радиодифузна такса


Скопје, 1 септември, 2017 - 16:14 (META) 

СДСМ пред пратениците во Собрание ќе поднесе пакет закони кои ќе бидат од особено значење за економско ранливите категории, соопшти денеска координаторот на пратеничката група на СДСМ, Томислав Тунтев.

Пакетот закони, како што информираше Тунтев, ги опфаќа законот за минимална плата, закон за стечајните работници и законот за укинување на радиодифузната такса.

– Побарав да ги донесеме по скратена постапка како предлог од група пратеници, односно, да бидам поконкретен, како предлог од координаторите на пратеничките групи. Oчекуваме поддршка од опозицијата и ако ја добиеме, денеска, до крајот на работното време, законите ќе ги поднесеме со нивна поддршка, ако не, тогаш ќе ги поднесеме како координатори на пратеничките групи од парламентарното мнозинство. Очекувам овојпат интересот на граѓаните да биде пред партискиот интерес – рече Тунтев.

Координаторот на пратеничката група на СДСМ апелираше до опозицијата за конструктивност бидејќи, како што нагласи, со овие законски решенија ќе им се помогне на граѓаните.

Тунтев во Собранието денеска имаше средба и со тројцата европратеници, Иво Вајгл, Кнут Флекенштајн и Едвард Кукан, на која било разговарано за напредокот на политичкиот дијалог во Собранието и потребата за вклученост на сите парламентарни групи.


Утре продолжува седницата за разрешување на Зврлевски, малку шанси за разврска


Скопје, 14 август, 2017 - 19:24 (META) 

Претседателот на Собранието, Талат Џафери и покрај најавата дека собраниската расправа во рамки на шестата седница за разрешување на јавниот обвинител на Република Македонија, Марко Зврлевски ќе продолжи и по 18 часот, сепак ја прекина седницата и го закажа продолжението за утре во 11 часот.

И денешната седница мина во меѓусебни реплики и контрареплики на пратениците на ВМРО-ДПМНЕ, кои бараа да не се расправа за Марко Зврлевски, туку за стратегијата за бегалците, договорот со Бугарија, задолжувањето, депонијата во Струга, партизација на администрацијата.

Координаторот на ВМРО-ДПМНЕ, пратеникот Илија Димовски ја обвини СДСМ дека пред изборите ветувале воведување ред и поредок, еднаквост транспарентност, а откако се на власт ги заборавиле ветувањата и се насочиле кон партизација на администрацијата.

Пратениците од ВМРО-ДПМНЕ во текот на меѓусебните излагање рекоа дека СДСМ ја продава државата и националните интереси, а дебатата за разрешувањето на Зврлевски е само начин да се дефокусира јавноста од вистинските проблеми.

Владејачката партија СДСМ денеска не учествуваше во расправата, единствено координаторот на пратеничката група Томислав Тунтев се појави на говорницата и рече дека тоа што го прави ВМРО-ДПМНЕ на седницата за разрешување Марко Зврлевски „наликува на април“, алудирајќи на случувањата и насилствата на 27 април при изборот на претседателот на Собранието.

Тој истакна дека мнозинството нема да учествува во „бесмислената расправа“.

– Сите се откажавме од нашите дискусии за час поскоро да заврши оваа бурлеска околу сосема законско разрешување на државниот јавен обвинител. Ова што се случува сега, овој говор на омраза, ова многу наликува на април и се надевам дека колегите од опозицијата ќе прекинат и час поскоро да почнеме со постапката за именување на нов државен јавен обвинител – рече Тунтев.


Тунтев: Ова многу наликува на 27 април, нема да учествуваме во бурлеската околу Зврлевски


Скопје, 14 август, 2017 - 13:23 (META) 

Координаторот на пратеничката група на СДСМ, Томислав Тунтев на денешното продолжение на собраниската седница за разрешување на државниот јавен обвинител, Марко Зврлевски рече дека она што го прави опозициската ВМРО-ДПМНЕ  „наликува на април“, алудирајќи на случувањата и насилствата на 27 април при изборот на претседателот на Собранието.

Тунтев рече дека мнозинството нема да учествува во „бесмислената расправа“.

– Сите се откажавме од нашите дискусии за час поскоро да заврши оваа бурлеска околу сосема законскот разрешување на државниот јавен обивнител. Ова што се случува сега, овој говор на омраза, ова многу наликува на април и се надевам дека колегитте од опозицијата ќе прекинат и час поскоро да почнеме со постапката за именување на нов државен јавен обвинител – рече Тунтев.

Инаку, и денешното 10. продолжение на седницата за разрешување на Зврлевски се одвива во реплики и контрареплики меѓу пратениците на ВМРО-ДПМНЕ, кои бараат наместо за разрешувањето на јавниот обвинител да се зборува за задолжувањето, Статегијата за бегалци, депонијата во Струга, Законот за јазиците. Дел се осврнаа и на вчерашното одблежежување на 16-годишнината од Охридскиот рамковен договор, на кое, според нив, македонскиот јазик бил третиран како јазик од втор ред.


Џафери: Додека имаме работа ќе мора да работиме, продолжуваме утре


Скопје, 12 август, 2017 - 19:19 (META) 

Претседателот на Собранието, Талат Џафери не го прифати барањето на кооридинаторот на една од 10-те пратенички групи на ВМРО-ДПМНЕ, Илија Димовски, седницата за разрешувањето на државниот јавен обвинител, Марко Зврлевски да продолжи в понеделник и продолжението на расправата го закажа за утре во 11 часот.

Денешното продолжение на седницата за разрешување на јавниот обвнител помина без тензии, со реплики и контрареплики меѓу пратениците на ВМРО-ДПМНЕ, а, освен меѓусебните надмудрувања, поголема нервоза немаше ниту пред крајот, кога Џафери не го прифати барањето на Димовски.

– Денешното однесување е резултат на однесувањето на секој пратеник поединечно. Додека имаме работа ние ќе мора да работиме. Вие ја воспоставивте динамиката во која тече дебатата. Јас не можам да ја прекинам дебатата. Денеска на двајца говорници имаме 60 пријави за реплики од кои освен двајца, сите останати се од пратеници на ВМРО-ДПМНЕ. Оставам мојот начин на работа да го ценат граѓаните, јас не очекувам оценка од тие што не ме признаваат – рече Џафари.

И денеска пратениците на ВМРО-ДПМНЕ меѓусебно си реплицираа и контрареплицираа, барајќи наместо за разрешувањето на Зврлевски, кое според нив во период на распишани локални избори е незаконски, да се расправа за пожарите, задолжувањето, стратегијата за бегалци, Законот за јазиците, депонијата во Струга и кадровските промени во државните институции.

По пладневната пауза, која беше и единствената денеска, пратениците на опозициската партија во најголем дел зборуваа за членот 8-а од Изборниот законик тврдејќи дека според него, во ситуација кога се распишани локални избори не може да се одлучува за разрешување на јавниот обвинител.

На ова реагираше координаторот на пратеничката група на СДСМ, Томислав Тунтев, според кого ваквите тврдења на опозицијата се бесмислени.

– Фала ви што што го прочитавте членот 8-а од Изборниот законик. Кој овде разговара за престанок на работен однос или за вработување? Ние зборуваме за престанок на мандатот на фукционер, на носителот на функцијата државен јавен обвинител. Кога ќе го разрешиме тој нема да остане без работа, повторно ќе биде јавен обвинител, само нема да ја врши функцијата Јавен обвинител на Република Македонија. Дајте да се заложиме сите да се разреши Марко Зврлевски и да почнеме процедура за избор на нов државен јавен обвинител – рече Тунтев.

Претходно, пред паузата, дел од пратениците на ВМРО-ДПМНЕ ги нападнаа медиумите и невладините организации дека одработуваат за власта со критики до опозицијата дека го блокира разрешувањето на јавниот обвинител, наместо да известуваат за „важните прашања“.