Герберих: Владата и опозицијата да ја спроведат волјата на населението за излез од чекалната на ЕУ и НАТО


Скопје, 9 октомври, 2018 - 14:39 (META) 

Со преку 91 отсто од гласовите „за“, гласачите во Македонија јасно гласаа за европскиот пат и за понатамошната ЕУ и НАТО перспектива на својата земја. Иако, за жал, само 37 проценти од официјалната бројка на гласачи учествуваа на референдумот и со тоа не се постигна официјалниот кворум, рече германскиот амбасадор Томас Герберих по повод Денот на националното единство.

– Но, сеедно која математика ќе се примени за пресметка на бројот на гласачите, сигурен сум дека мнозинството од македонското население со тоа ја искажа својата волја конечно да излезе од чекалната на ЕУ и НАТО. Сега на ред се владата и опозицијата, заедно да ја спроведат оваа волја и со промена на уставот да го одобрат патот на својата земја во правец на НАТО и ЕУ и да ја покажат својата политичка одговорност, за да не се случи овој пат повторно да биде блокиран на долг рок за Македонија и земјата да биде во Европа во изолација – вели Герберих.

Тој во својот говор истакна дека Германија е и останува да биде најзначајниот трговски партнер на македонското стопанство со билатерална трговска размена што се очекува на крајот на годината да достигне 4 милијарди евра.


Со македонските возачки дозволи ќе се вози и во Германија


Скопје, 18 септември, 2018 - 16:21 (META) 

Министерот за внатрешни работи Оливер Спасовски и амбасадорот на Германија, Томас Герберих, денеска во Скопје ја потпишаа заедничката декларација меѓу македонското МВР и германското сојузно министерство за транспорт и дигитална инфраструктура, за олеснување на постапките за меѓусебна замена на возачките дозволи на граѓаните од Република Македонија и Сојузна Република Германија.

Со тоа македонските државјани во Германија ќе може да управуваат возила само со македонска возачка дозвола и ќе нема потреба да вадат меѓународна дозвола.

-Овој процес со години беше заглавен во лавиринтите на меѓусебното нормативно усогласување помеѓу  надлежните служби на Македонија и Германија, без надеж за успешно решавање на отворените прашања. Граѓаните со право беа нестрпливи, затоа што со години  им беа давани празни ветувања, но од денес, со потпишувањето на Декларацијата,  ќе им  овозможиме на нашите граѓани, од двете пријателски земји, да ги користат бенефитите од меѓусебното признавање на возачките дозволи – рече Спасовски.

Такви и слични договори веќе има со повеќе европски земји како Италија, Шпанија, Белгија, Романија, Чешка, Унгарија, Австрија, како и со земјите од регионот – Србија, БИХ, Албанија, Словенија, Хрватска, Бугарија, Црна Гора, а во завршна фаза се договарањата со Турција, Велика Британија, соседно Косово, како и Австралија и Нов Зеланд, известуваат од МВР.


Стабилна политичка клима и правна сигурност се значајни за германските инвеститори


Скопје, 29 мај, 2018 - 10:12 (META) 

Министеркaта без ресор задолжена за странски инвестиции, Зорица Апостолска остварила работна средба со германскиот амбасадор Томас Герберих, на која што разговарале за економско-трговските релации помеѓу двете земји.

Амбасадорот Герберих потенцирал дека, стабилизацијата на политичката клима, работата на реформскиот процес, особено обезбедувањето на правна сигурност се значајни фактори за германските компании да инвестираат во Македонија.

„Заеднички беше констатирано дека досегашната економска соработка помеѓу двете држави е на високо ниво, за што освен одличната трговска соработка зборува и фактот дека во Македонија работат околу 200 фирми со германски капитал, во кои се вработени над 20 илјади луѓе. Германија и Македонија во 2017 година остварија трговска размена од 3,15 милијарди евра“, информираат од кабинетот на министерката.


Герберих: Клучни се реформите и дијалогот власт – опозиција


Скопје, 26 април, 2018 - 13:17 (META) 

Потребни се реформски зафати што ќе ги опфатат сите во општеството и вистински дијалог меѓу власта и опозицијата, рече германскиот амбасадор Томас Герберих говорејќи за евроатлантските интеграции на Македонија на конференцијата „Македонија: Евроатлантска интеграција, нови предизвици и можности“ што се одржа во Министерството за надворешни работи.

Според германскиот амбасадор,  Владата во изминатата година постигнала голем напредок, поради што стаса и препораката од Европската Комисија за почеток на преговорите, но реформите мора да продолжат со вклученост на сите фактори.

– Реформите мора да се спроведат со вклученост на сите во општеството и да се врати доверба во институциите, кои треба да работат во рамки на нивниот мандат почитувајќи го правото и применувајќи ги највисоките професионални стандарди, оти само тогаш ќе можеме со сигурност да кажеме дека реформскиот процес пристигнал во оваа земја. Опозицијата мора да биде вклучена како клучен дел во функционирањето на демократијата. Конструктивниот политички дијалог меѓу Владата и опозицијата надминувајќи ги сите политички разлики е клучно за соодветно функционирање на една парламентарна демократија – рече Герберих.


Герберих на Заев му ја пренел поддршката од Германија за евроатлантските аспирации


Скопје, 16 април, 2018 - 11:51 (META) 

Премиерот Зоран Заев претпладнево се сретна со амбасадорот на Германија, Томас Герберих кој пренел поддршка од Германија за евроатлантските аспирации на државата.

Герберих го информирал Заев дека Македонија ја има мнозинската поддршка и од германскиот Бундестаг за пристапување на земјава во Европската унија.

„Амбасадорот Герберих соопшти дека пратениците од германскиот Бундестаг се вратиле во Германија со позитивни импресии од посетата на Македонија, за конструктивните политики низ кои што се решаваат прашањата важни за напредок на Македонија“, се вели во соопштението на Влада.

На состанокот се разговарало и за важноста на Дигиталниот самит што ќе се одржи оваа недела во Скопје, како и за инвестициските можности што треба да придонесат кон економски развој.


Заев – Герберих: Германија ги поддржува реформските процеси


Скопје, 11 септември, 2017 - 21:04 (META) 

Премиерот Зоран Заев денеска се сретна со Томас Герберих, новоименуваниот амбасадор на Република Германија во Република Македонија. Герберих, како што соопшти владината прес-служба, истакнал дека се случува позитивен и охрабрувачки развој на Република Македонија преводен од новата влада.

– Охрабрува реформската посветеност на Владата за обезбедување квалитетен живот на граѓаните и колку добро ги развивате односите со соседите за што имате отворена поддршка од Република Германија. Република Германија останува голем пријател и поддржувач на евро-атлантските аспирации и на добрата иднина на граѓаните на Република Македонија – соопштил Герберих.

Заев го нагласил ставот на Владата за мирни, фер и регуларни избори, како и цврстата определба да се реализира планот „3-6-9“.

– Очекуваме наесен овие напори на Владата во соработка со граѓанската, општествената и политичката јавност да резултираат со повлекување на условеноста на препораката за почнување преговори со ЕК, а наскоро Македонија да добие и датум за почеток на преговори за членство во ЕУ. Исто така, сметаме дека се реални нашите очекувања за напредок на Македонија во НАТО-интеграциите – рекол Заев.

Заев и Герберих констатирале дека постои голема економска соработка помеѓу Македонија и Германија, а амбасадорот Герберих најави дека економската поддршка ќе продолжи и ќе се зголеми.