Обвинителството ги отфрли кривичните пријави на Тодор Петров против уставни судии


Скопје, 2 јули, 2018 - 15:54 (META) 

Основното јавно обвинителство (ОЈО) Скопје ги отфрлило кривичните пријави поднесени против судии од Уставниот суд од страна на Тодор Петров, претседател на Светскиот македонски конгрес (СМК). Петров ги товари судиите дека ја злоупотребиле службената положба и направиле самовластие со тоа што не постапиле по трите иницијативи што гој ги поднел, со кои барал поништување на законот за Специјалното јавно обвинителство, поништување на изборот на претседателот на Собранието Талат Џафери и поништување на Одлуката за стапување на Македонија во членство на Северноатланската Алијанса – НАТО.

„Надлежен јавен обвинител од Основното јавно обвинителство Скопје утврди дека нема основано сомнение дека осомничените ги сториле кривичните дела за кои беа пријавени, по што донесе Решение за отфрлање на кривичните пријави. Утврдено дека во Уставниот суд веднаш по приемот на иницијативите, а согласно на Деловникот за работа на Уставниот суд, се оформени предмети по кои во континуитет се преземани дејствија од судско-аналитички карактер, барани се податоци потребни за одлучување по предметот и вршено е споредбено истражување на нормативните решенија и  уставно судски одлуки. Проверена е и уставно-судската практика како елемент кој се зема предвид при одлучувањето на Уставниот суд“, соопштија од ОЈО Скопје.

Постапката по две иницијативи е во тек во Уставниот суд, додека за иницијативата за поништување на Одлуката за стапување на Република Македонија во членство на Северноатланската Алијанса – НАТО е одлучувано на седница на уставниот суд, при што е донесено Решение за неповедување на постапка за оценување на уставноста и законитоста.


Тодор Петров со иницијатива до Уставниот суд го оспори изборот на Џафери за спикер


Скопје, 10 мај, 2017 - 18:58 (META) 

Претседателот на Светскиот македонски конгрес, Тодор Петров поднел иницијатива до Уставниот суд за оценување на уставноста за изборот на Талат Џафери за претседател на Собранието.

Тој од судот барал да ја поништи одлуката за изборот на Џафери за претседател на Собранието, која беше објавена во „Службен весник“.

Петров за телевизија „Телма“  изјавил дека очекува судот да ја прифати неговата иницијатива.

Шефот на кабинет на лидерот на ДУИ и пратеник, Артан Груби одговарајќи на новинарско прашање за оваа иницијатива изјави дека „не може да се оспорува волјата на мнозинството на граѓани во Македонија и волјата на мнозинството на пратеници во Собранието на Македонија.“

„ВМРО-ДПМНЕ треба да ја прифати новата реалност и да се однесува како конструктивна опозиција. Да дозволи да се основаат институциите во земјата и во согласност со волјата на мнозинството на граѓани, да почне ерата на реформи и враќањето на државата на евроатлантскиот пат,“ изјави денеска Груби пред Основното јавно обвинителство каде што беше повикан да даде исказ за нападите во Собранието на 27 април.


СНС Македониум: Тодор Петров е портпарол и активист во сенка на ВМРО-ДПМНЕ


Мелбурн, 22 јануари, 2017 - 11:11 (META) 

Претседателот на Светскиот македонски конгрес (СМК), Тодор Петров, наместо да ги застапува националните интереси, стана портпарол и активист во сенка на ВМРО-ДПМНЕ, вели за „Мета“ заменик-претседателот на новоформираниот Семакедонски национален совет – Македониум, Никола Ставрески.

Тој вели дека Семакедонскиот национален совет – Македониум е национална и непартиска организација, а разликата меѓу нив и СМК е што тие работат тимски и координирано, додека Светскиот македонски конгрес е „човек организација“.

– Ние, Македонците од целата дијаспора, најдовме заеднички јазик по прашањето дека е потребно да се обединиме во една таква организација, преку која, во една позитивна насока, ќе ги штитиме интересите на македонскиот народ. Ние сме национална, непартиска организација и нашата комуникација, засега, се одвива само по електронски пат, затоа што технологијата тоа го овозможува. Што се однесува до прашањето за Светскиот македонски конгрес, за нас тоа е човек – организација и разликата, меѓу нас и т.н. СМК, е во тоа што ние работиме тимски и координирано. Тимот од СМК е во нашите редови и свесно се дистанцираа од Тодор Петров, затоа што тој наместо да ги застапува националните интереси стана потпарол и активист во сенка на ВМРО-ДПМНЕ – вели Ставрески.

Семакедонскиот национален совет – Македониум, како што беше наведено во нивниот проглас, е формиран на 19 јануари оваа година, на Богојавление – Водици, од страна на истакнати Македонци од Австралија, Америка, Канада, Словенија, Швајцарија, Италија и од други земји на дијаспората, како и од Република Македонија.

Целта на организацијата е, како што се наведува во прогласот, одбрана на македонските национални интерси.

За претседател е избран Страшко Олумчев, додека заменици претседатели се Нестор Огинар, Никола Ставрески, Ристо Поповски-Лавот, Виолета Матијевиќ и Ицо Најдовски-Перин.


Уставниот суд ја отфрли иницијативата на Тодор Петров за Изборниот законик


Скопје, 7 јули, 2016 - 17:41 (META) 

Уставниот суд на денешната седница не ја прифати и не поведе постапка по иницијативата за утврдување на уставноста и на законитоста на дел од измените на Изборниот законик, донесени во ноември минатата година, а во согласност со Договорот од Пржино.

Иницијативата беше поднесена од претседателот на Светскиот македонски конгрес (СМК), Тодор Петров, кон крајот на минатата година, кратко по донесувањето на измените на Изборниот законик од Собранието во ноември.

Уставниот суд оценил дека оспорениот член 4 од Изборниот законик, каде е дефинирана методологијата за избор на пратеници од дијаспората, е во согласност со Уставот.

Постапка не била поведена ни за членот 31, за начинот на одлучување на Државната изборна комисија по предлог-одлука која се однесува на интересите на немнозинска заедница.


Поднесено обвинение за физичкиот напад врз Тодор Петров


Скопје, 4 јули, 2016 - 14:50 (META) 

Основното јавно обвинителство Скопје денеска до Кривичниот суд поднело обвинителен предлог против три лица кои се товарат за физичкиот напад врз претседателот на Светскиот македонски конгрес (СМК), Тодор Петров. Инцидентот се случи на 27 февруари годинава, по церемонијата на осветување на темелите на 55-метарскиот крст кој треба да биде поставен во општината Бутел.

Како што информираат од Јавното обвинителство, обвинетите Б.Е., Б.А. и Е.А. се товарат за кривичното дело насилство од член 386, став 3, во врска со став 1 од Кривичниот законик.

„Кривично-правниот настан се случил во ресторан во близина на Скопскиот саем, на 27 февруари годинава, околу 12.30 часот. Оштетениот Т.П., кој бил гостин во ресторанот во придружба со уште едно лице, бил физички нападнат од обвинетиот Б.Е. и од едно НН-лице, кои со тупаници го удирале во пределот на главата. Сакајќи да се заштити, оштетениот се повлекувал наназад и влегол во блиското сепаре и сместувајќи се во агол со рацете ја покривал главата. На нападот се приклучиле и обвинетите Е.А. и Б.А. со уште едно НН-лице и продолжиле да го удираат оштетениот со тупаници и со клоци во пределот на главата и по телото. Обвинетиот Б.А. го фатил оштетениот за врат и го турнал, при тоа заканувајќи му се“, стои во соопштението на Обвинителството.

Од ударите, се додава во него, Петров добил телесни повреди, односно потрес на мозок, контузии на коски на лицето и површински повреди на лицето.

Поставувањето на крстот во Бутел, кој е донација на Светскиот македонски конгрес, предизвика тензии откако членови на ДУИ и нивни поддржувачи поставија камп и протестираа против изградбата, на што со контрапротести одговори СМК.


На протестот пред МВР побарана одговорност од Спасовски и најавени нови „иницијативи“ на СМК


Скопје, 5 март, 2016 - 15:16 (META) 

Околу илјада граѓани денеска се одзваа на повикот на Светскиот македонски конгрес (СМК) и излегоа на протест пред зградата на МВР за да искажат револт против министерот за внатрешни работи Оливер Спасовски, кој според СМК,  дозволил лица предводени од ДУИ да ги запоседнат темелите на крстот во Бутел.

Пред МВР се носеа транспаренти на кои што пишуваше „Оливер, зошто земаш плата“, „Оливер исполни си ја должноста“,„Оливер остави професионалци да си ја извршат работата“ и се извикуваше „Оставка“, „Македонија, Македонија“ и „Предавник“.

Пред граѓаните се обрати претседателот на СМК, Тодор Петров кој рече дека, и покрај физичкиот напад од групата на Изет Меџити пред една недела, смогнал сили да дојде денеска на протестот.

Тој го осуди вандализмот и како што рече „сквернавењето на темелите на крстот во Бутел од страна на демонстрантите предводени од раководството на ДУИ“,  додавајќи дека „СМК нема да дозволи сириско и ирачко сценарио во Македонија“ и меѓуетнички поделби во државата.

– СМК го осудува однесувањето на министерот за внатрешни работи Оливер Спасовски, бидејќи дозволи демонстрантите вандалски да ги запоседнат темелите на крстот. СМК бара од Спасовски да обезбеди услови за изградба на крстот и да си ја заврши работата за граѓаните да не ги преземаат работите во свои раце, како што тоа го стори градоначалникот на Општина Чаир, Изет Меџити и групата предводена од него – рече Петров.

Тој најави дека од Собранието ќе бара да биде поништен Договорот од Пржино и, како што рече, „да биде вратен уставниот поредок во земјата“.

На Спасовски му порача да не го провоцира трпението на мнозинството и додаде дека крстот во Бутел не подлежи на Бадентерово мнозинство при донесување на одлука за негово поставување.

Тој рече дека крстот не е одговор на двоглавиот орел на споменикот кој беше поставен во Чаир кој за него е провокација, дивоградба и споменик на војната од 2001 година.

Петров рече дека СМК во знак на помирување на 13 март, на Прочка, ќе покрене иницијатива за изградба на Црква во име на Теофан Силијат Ноли или попознат како Фан Ноли, основач на албанската православна црква. Црквата, според иницијативата на СМК, би се наоѓала помеѓу општините Чаир и Бутел.

На протетсот беа присутна и претседателката на Комисијата за односи со верските заедници, Валентина Божиновска и пратенокот на ВМРО-ДПМНЕ, Андон Чибишев.

На протестот немаше големо озбезбедување и тој заврши мирно со ракоплескање и со песната „А, бре Македонче“.


Кривична пријава за тројца осомничени за напад врз Тодор Петров


Скопје, 3 март, 2016 - 15:36 (META) 

Три лица добија кривична пријава од МВР затоа што на 27 февруари годинава во угостителскиот објект „Казабланка“ физички го нападнале Тодор Петров.

По извршените консултации со јавен обвинител, Единицата за насилен криминал, во текот на денот, ќе поднесе кривична пријава против Е.Б., А.Е. и А.Б. поради основано сомневање дека извршиле насилство, казниво по член 386 од Кривичниот законик.

„На 3 март 2016 година, во Полициската станица Бит-пазар, беа повикани лицата Ќ.М. (64), Е.Б. (55), А.А. (53), И.Г. (52) и Б.А. (41), Е.Б. (32), А.Е. (37), Б.Љ. (28) и Х.А. (34) сите од Скопје. На поканата не се јавија само А.Б. и И.Г. Во извршените разговори со лицата, тие изјавија дека на 27 февруари годинава биле присутни во угостителскиот објект каде се случи кривично-правниот настан. Истиот ден во полициската станица Бит-пазар, во присуство на јавен обвинител, беше извршено соочување помеѓу оштетениот и лицата Е.Б. (32), А.Е. (37), Б.Љ. (28) и Х.А. (34). При тоа, од страна на оштетениот лицата Е.Б. и А.Е. беа посочени како лица кои биле во групата која физички го нападнала на 27 февруари во угостителскиот објект „Казабланка“, заедно со лицето А.Б.. Исто така, по дадена насока од јавен обвинител, Е.Б. и А.Е. се лишени од слобода, па ослободени со обврска во текот на утрешниот ден да се јават кај јавниот обвинител“, стои во соопштението од МВР.


МАЕИ: Претепувањето на Петров е антимакедонски чин


Тирана, 28 февруари, 2016 - 18:25 (META) 

Претепувањето на претседателот на Светскиот македонски конгрес, Тодор Петров, за партијата на Македонците во Албанија – Македонска алијанса за европска интеграција (МАЕИ), е антимакедонски чин и варварски акт со кој се сака да се внесе страв меѓу Македонците.

„Македонска алијанса за европска интеграција, како и Македонците во Албанија се шокирани од вчерашното бруталното насилство врз претседателот на Светскиот македонски конгрес, Тодор Петров. Нападот врз Петров е напад врз сите Македонци, каде и да се наоѓаат. Бараме од надлежните институции на Република Македонија да ги пронајдат насилниците и напаѓачите и соодветно да ги казнат“, пишува во реакцијата на МАЕИ.


Рангелова до Спасовски и до СДСМ: На 5 јуни народот ќе ви покаже дека не ве трпи


Скопје, 28 февруари, 2016 - 17:35 (META) 

Дали Едмонд Темелко, единствениот градоначалник Македонец надвор од земјава, е поголема безбедносна закана за Република Македонија од насилниците што вчера брутално го претепаа претседателот на Светскиот македонски конгрес, Тодор Петров, прашува Даниела Рангелова, пратеничка и член на извршниот комитет на ВМРО-ДПMНЕ.

Таа на денешната прес-конференција рече дека Оливер Спасовски, незаконски, без наредба на судот и во договор со Катица Јанева, наложил Едмонд Темелко да биде уапсен пред сопствените деца, заради невистинити, измислени и конструирани наводи на Специјалното јавно обвинителство.

„Оливер Спасовски веќе втор ден по претепувањето на Тодор Петров, се крие и не кажува зошто не ги уапси насилниците што го претепаа претседателот на СМК. Во својата изјава Петров јасно кажа и кој го нападнал и каде го нападнал и зошто го нападнал. За жал, тие што беа посочени од Тодор Петров и денеска слободно се шетаат, а полицијата нема наредба од Спасовски да ги уапси. МВР под Оливер Спасовски мора да престане да функционира само како партиски разгранок каде што генералниот  секретар на СДСМ ќе ги згрижува и унапредува партиските кадри и роднините на своите колешки. Оливер Спасовски мора да почне да го работи тоа за што е платен од граѓаните“, рече Рангелова.

Таа на Спасовски му порача дека граѓаните на 5 јуни, на демократски начин, со заокружување на гласачкото ливче,  ќе ѝ порачаат на партијата на Спасовски дека народот веќе не ги трпи.


Тодор Петров претепан по осветувањето на крстот во Бутел


Скопје, 27 февруари, 2016 - 15:57 (META) 

Тодор Петров, претседателот на Светски македонски конгрес, еден од донаторите на крстот чии темели утрово беа осветени во општината Бутел, бил претепан од непознати лица, потврдија од Министерството за внатрешни работи.

Како што јавуваат медиумите, Петров бил претепан по завршувањето на настанот на кој тој одржа говор.

Во моментов тој се наоѓа на Ургентниот центар, каде му се вршат компјутерски испитувања, по кои ќе се направи процена дали ќе биде задржан на понатамошно болничко лекување.

Од МВР соопштија дека подоцна ќе објават повеќе детали за овој настан.