!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Светскиот шампион Нико Розберг се пензионира од Формула 1


Брејкли, 2 декември, 2016 - 15:16 (META) 

Светскиот шампион во Формула 1, Нико Розберг, денеска објави дека се пензионира од Формула 1 и дека неговата одлука е конечна и веднаш стапува на сила, јавува „Би-би-си“.

Триесет и едногодишниот Германец својата прва шампионска титула ја освои во неделата, завршувајќи ја трката за Големата награда на Абу Даби на втората позиција, пред неговиот тимски колега од „Мерцедес“, Луис Хамилтон.

„Јас ја искачив мојата планина, сега сум на врвот и мислам дека ова е исправната одлука“, напишал Розбрег на „Фејсбук“.

Розберг во годинешната сеозона триумфураше на 9 од 21 трка, победувајќи го во конечниот пласман трикратниот светски шампион, Хамилтон, за пет поени.


Хашим Тачи е прогласен за почесен доктор на науки на ДУТ


Тетово, 14 октомври, 2016 - 20:11 (META) 

Со одлука на Сенатот на Државниот универзитет Тетово, косовскиот претседател Хашим Тачи вечерва беше прогласен за почесен доктор на науки.

Титулата му ја додели ректорот на Универзитетот во Тетово, Вулнет Амети, каде по тој повод се одржа свечена церемонија. Тачи изјави дека е горд на признанието, за кое, како што рече, биле заслужни сите Албанци од Косово.

– За добивањето на оваа титула не сум заслужен само јас, туку и сите Албанци од Косово. Со оваа титула, ме направивте мене и целиот албански народ кој живее во Косово горд. Сакам да ги поздравам и Албанците од Македонија, особено елитата која на времето студираше на универзитетот во Приштина. Меѓу нив се и лидерите на ДУИ и на ДПА, Али Ахмети и Мендух Тачи, кои се лидери на албанскиот народ во Македонија и на кои сум особено горд, поради нивните политики за што побрзо зачленување на Македонија во НАТО и во Европската Унија – изјави Тачи.

Ректорот Амети рече дека Тачи ја заслужил оваа титула поради неговите залагања и политики за демократизација на косовското општество.

– Косовскиот претседател Хашим Тачи многу придонел за демократизацијата на институциите во Косово. Тој придонел и за приближување и зачленување на Косово кон голем број меѓународни организации, но и за признавања на Косово од голем број држави – изјави Амети.

На церемонијата присуствуваа лидерите на ДПА и на ДУИ, Мендух Тачи и Али Ахмети, повеќе министри од ДУИ, градоначалничката на Тетово, Теута Арифи, ректорите на повеќе универзитети од Македонија, Косово и од Албанија, како и голем број на студенти и професори.


Аутсајдерот Лестер, нов шампион на Премиер-лигата


Лестер, 3 мај, 2016 - 13:41 (META) 

Екипата на Лестер ја освои шампионската титула во Премиер-лига, што во Англија, но и во целиот свет се коментира како еден од најголемите спортски настани на сите времиња.

Шансите за Лестер, кој сезонава влезе во Премиер-лигата, да ја освои титулата беа 5.000 спрема 1, но екипата имаше само три порази во лигата, што англиските медиуми го опишуваат како „бајка“ и како „најневеројатниот триумф во историјата на тимскиот спорт“.

Второпласираниот Тотенхем, по нерешените 1 – 1 на Лестер со Манчестер јунајтед во неделата, требаше да ги добие преостанатите три меча за да ги достигне „лисиците“.

Сепак, нерешениот резултат од 2 – 2 со Челси ги закопа сите шанси за Тонтенхем и го промовираше Лестер во нов шампион во најсилната фудбалска лига во светот.

Гери Линекер, поранешен играч на Лестер, на Евертон и на репрезентацијата на Англија, достигнувањето на тимот од својот роден град, за „Би-би-си спорт“ го опишал како најголем спортски шок во неговиот живот.


Пекинг е нова претстолнина на милијардерите


Пекинг, 24 февруари, 2016 - 13:04 (META) 

Њујорк повеќе не е претстолнина на милијардерите, бидејќи таа „титула“ ја презеде Пекинг.

Во главниот град на Кина сега живеат 100, а во Њујорк 95 милијардери покажуваат податоците на компанијата „Хурун“ од Шангај, која ја објавува годишната листа.

Пекинг минатата година доби нови 32 милијардери, а Њујорк само четворица. Москва е на трето место на таа листа со 66, Хонг Конг со 64 и Шангај со 50 богаташи.


Ѓоковиќ триумфираше на турнирот во Доха


Доха, 9 јануари, 2016 - 18:35 (META) 

Најдобриот светски тенисер, Новак Ѓоковиќ, ја освои титулата на АТП-турнирот во Доха, Катар, откако во денешното финале го совлада вториот носител, шпанецот Рафаел Надал, со убедливи 2 – 0 во сетови.

Српскиот тенисер двата сета ги доби убедливо, првиот со 6 – 1, а вториот со 6 – 2 во гемови.

Со триумфот во Доха, Ѓоковиќ се наметнува како еден од најсериозните кандидати за освојување на првиот турнир за големата награда годинава, Отвореното првенство на Австралија, кое ќе почне на 18 јануари.


Хокеарите на Чикаго блекхокс го освоија купот „Стенли“


Чикаго, 16 јуни, 2015 - 15:53 (META) 

Хокеарите на Чикаго блекхокс го освоија купот „Стенли“, откако ноќеска со 2-0 го совладаа тимот на Тампа Беј лајтнинг и со вкупен резултат од 4-2 во победи, ја добија финалната серија во НХЛ.

За Чикаго блекхокс ова е шеста титула во нивната клупска историја.

Погодоците за шампионскиот тим ги постигнаа Данкан Кит, во 37. и Патрик Кејн во 55. минута од натпреварот.

Трофејот „Кон Смајт“, кој се доделува на најдобриот играч во разигрувањето за титулата, му припадна токму на стрелецот на првиот гол.

Чикаго ги доби шесте натпревари против Тампа Беј, со вкупен резултат од 13-10, што говори за слабата ефикасност во годинешната финална серија.


Ѓоковиќ ја одбрани титулата на мастерс-турнирот во Индијан Велс


Индијан Велс, 23 март, 2015 - 10:35 (META) 

Најдобриот светски тенисер, Новак Ѓоковиќ, ја одбрани титулата на мастерс-турнирот во Индијан Велс, совладувајќи го во финалето Рожер Федерер, со 2-1 или по сетови 6-3, 6-7 и 6-2.

За Ѓоковиќ ова е четврти триумф на турнирот во Индијан Велс. Тој титулата најдобар ја понесе во 2008, 2011, 2014 и, сега, во 2015 година.

Финалето се играше 2 часа и 17 минути, а од вкупниот награден фонд, кој изнесува 5,4 милиони долари, победникот ќе добие 900.000 долари.


Федерер го предаде мечот, титулата во Лондон за Ѓоковиќ


Лондон, 17 ноември, 2014 - 9:46 (META) 

Новак Ѓоковиќ го освои Мастерс-купот во Лондон откако Рожер Федерер, поради болка во грбот, реши да не настапи на финалето и го предаде мечот. Швајцарецот излезе пред публиката и се извини што ги разочара, но истакна дека тој и неговиот тим донеле одлука дека е преголем ризик тој да настапи во финалето.

– За жал, не сум подготвен да го играм мечот денеска. Не сакав да е вака. Цела година се обидуваш да бидеш подготвен за АТП-финалето и не сакаш ваков крај. Направив сè што можам во саботата и во неделата, лекови против болка, одмор, но не можам да се натпреварувам на ова ниво со Новак. Во вакво финале и со моите години ќе биде преризично. Се надевам дека разбирате – изјави Федерер.

Организаторите потоа соопштија дека ќе се игра егзибициски меч меѓу Ѓоковиќ и Енди Мареј, кој Британецот го загуби со 8:5 во гемови.

Прворангираниот светски тенисер, Новак Ѓоковиќ, изјави дека нема да ја слави оваа победа затоа што тој сакал да игра против Федерер, но дека дека освоениот пехар во Лондон е заслужен по тешката година.