Укинати притворите на Темелко и Поповски


Скопје, 16 мај, 2018 - 16:13 (META) 

Основниот суд Скопје 1 им ги укина притворите на поранешниот началник во МВР, Оливер Поповски кој е обвинет за настаните од 27 април во Собранието, како и на градоначалникот на Општина Пустец, Едмонд Темелко, обвинет во предметот на СЈО „Титаник“.

„Кривичниот совет на одделението за организиран криминал и корупција, постапувајќи по предлог на одбраната на Поповски, опфатен со обвинителниот акт поврзан со настаните во Собранието на Македонија, донесе решение со кое го уважи предлогот за укинување на мерката притвор со понудена гаранција во недвижен имот, со кое по правосилноста на решението и запишување на хипотеката од страна на Агенцијата за катастар, мерката притвор ќе се укине, а заради обезбедување присуство во текот на постапката на обвинетиот му се определуваат мерки за претпазилвост и тоа: Обврска на обвинетиот да се јавува еднаш неделно на одговорно службено лице во судот и Привремено одземање на патната и друга исправа за преминување на државната граница, односно забрана за нејзино издавање“, се вели во соопштението од Основен суд Скопје 1 – Скопје.

Кривичниот совет го укина и куќниот притвор на Темелко обвинет во предметот „Титаник“ на СЈО, по претходно барање на одбраната, а како гаранција е понуден недвижен имот.

Судот донел решение со кое го уважи предлогот за укинување на мерката куќен и го уважува предлогот на СЈО, со кој заради обезбедување присуство во текот на постапката, му се определуваат мерки за претпазливост и тоа, обвинетиот има обврска еднаш неделно да се јавува во Основен суд Ресен и привремено одземање на патната и друга исправа за преминување на државната граница, односно забрана за нејзино издавање.


СЈО побара да се конфискува имот на Груевски, Протоѓер и Димовски, вреден 2,26 милиони евра


Скопје, 9 мај, 2018 - 16:39 (META) 

Специјалното јавно обвинителство (СЈО) денеска побара на дел од обвинетите во процесот „Титаник“, вклучувајќи го и поранешниот премиер Никола Груевски, да им биде конфискуван имот.

Обвинителката Лиле Стефанова, во воведниот говор покрај осудителна пресуда, побара за надоместување на незаконски обезбедените средства за финансирање на изборната кампања во 2011 година конфискација на имот на Никола Груевски и Мартин Протoѓер во вредност од 34.908.777 денари (567.620 евра) што одговара на вредноста на парите прибрани за изборната кампања во таа година.

За изборите во 2013 година, Стефанова побара конфискација на имот во вредност од 41.435.100 денари (673.740 евра) од Никола Груевски, Илија Димовски и Леко Ристовски. Имот во вредност од 62.732.874 денари (1,02 милиони евра) треба да се конфискува од истите тројца поради незаконски прибраните средства за изборната кампања во 2014 година, посочи Стефанова.

Вкупниот имот што СЈО сака да се конфискува од обвинетите ако бидат прогласени за виновни е со вредност од 2,26 милиони евра.

Во обвинителниот акт за предметот „Титаник“, во кој се опфатени 21 обвинет, пишува дека Никола Груевски и Мартин Протоѓер од мај до јуни 2011 година како организатори на изборната кампања користеле недозволени средства за изборна кампања, кои потекнуваат од неидентификувани извори. Спротивно на Изборниот законик, не го пријавиле изворот на финансирање, со што го злоупотребиле законското овластување како организатори на изборната кампања.

Истото во 2013 година го правеле Илија Димовски и Леко Ристовски, поттикнати од Никола Груевски како соизвршители во кривичното дело.


Врховен суд ги одби барањата на одбраната на Груевски за изземање на судиите во „Титаник“


Скопје, 2 мај, 2018 - 16:31 (META) 

Врховниот суд ги отфрли барањата на одбраната на поранешниот премиер Никола Груевски и останатите 20 обвинети за изземање на судиите во случајот „Титаник“ на СЈО.

„Врховниот суд постапувајќи по барање на одбраната за изземање на в.д. претседателот на Апелациониот суд – Скопје, Лидија Димчевска, на 27 април донел решение со кое барањето се одбива како неосновано. Врз основа на ова решение, а постапувајќи по барање на одбраната за изземање на претседателот на Основниот суд Скопје 1, Иван Џолев, в.д. претседателот на Апелациониот суд на 30 април, донел решение со кое барањето на одбраната се отфрла како недозволено. Сите решенија се експедирани до странките во постапката“, се вели во соопштението.

Денеска рочиштето за случајот „Титаник“ беше одложено за 9 мај бидејќи до почетокот на судењето не беа стасани одлуките на Врховен и Апелација за изземањето на судиите.


Одложено судењето за „Титаник“


Скопје, 2 мај, 2018 - 12:18 (META) 

Во Основен суд Скопје 1 денеска повторно се одложи рочиштето за предметот „Титаник“ и следното рочиште е закажано за 9 мај. Судијата Осман Шабани пред сите обвинети соопшти дека денешното рочиште се одлага затоа што Врховниот и Апелацискиот суд се уште не ги доставиле одговорите на барањето за изземање на в.д. претседателот на Апелацискиот суд и неговиот заменик, како и на претседателот на Кривичниот суд и и неговиот заменик.

Во случајот на СЈО „Титаник“ се обвинети поранешниот премиер Никола Груевски и поранешните владини функционери или функционери на ВМРО-ДПМНЕ Мартин Протуѓер, Кирил Божиновски, Миле Јанакиески, Гордана Јанкулоска, Билјана Бришкоска – Бошковски, како и Илија Димовски, Мунир Пепиќ, Едмонд Темелко, Леко Ристовски, Кирил Тодоровски.

Осомничени се за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања во 2012 година.


Јанкулоска е на боледување, „Титаник“ одложен за 2 мај


Скопје, 26 април, 2018 - 11:09 (META) 

Судот денеска го одложи рочиштето за случајот „Титаник“ во кој се обвинети 21 лице за изборни измами, поради фактот што сè уште нема донесено одлука за изземање на судиите во овој предмет, јави Макфакс.

На денешното судско рочиште во Основен суд Скопје 1 не се појави обвинетата екс-министерка Гордана Јанкулоска, нејзината адвокатка Сања Алексиќ рече дека Јанкулоска има отворено боледување поради нарушена здравствена состојба, кое ѝ истекува утре, по што ќе биде познато дали боледувањето ќе ѝ биде продолжено или прекинато.

Судијата Осман Шабани следното рочиште го закажа за 2 мај.


Судењето за „Титаник“ одложено за 26 април, адвокатите на Груевски побараа изземање на судиите


Скопје, 12 април, 2018 - 12:34 (META) 

Рочиштето за случајот на СЈО „Титаник“ се одложи за 26 април, бидејќи се уште се чека Апелација да одлучи за барањето на адвокатите за изземање на Судскиот совет од овој процес.

Во овој случај на СЈО, првообвинет е Никола Груевски, а покрај него обвинети се и екс-министрите Миле Јанакиевски и Гордана Јанкулоска, пратеникот Илија Димовски, градоначалникот на Пустец, Едмонд Темелко и уште 16 други лица.

Груевски кажа дека рочишта за „Титаник“ има секогаш кога се преговара за името меѓу Македонија и Грција.

-И денеска како што можевте да забележите на електронските агрегати тема број еден е „Титаник“, а тема број два е името. Минатиот пат кога имавме „Титаник“, имаше преговори за името во Виена, денеска има преговори во Охрид – изјави Груевски денеска пред судот.

На новинарско прашање дали од сите случаи ќе бараат иземање на Судскиот совет, Груевски рече дека се што прават е во консултација со адвокатите.

Претходно, адвокатите на Груевски побараа изземање и на судиите во предметите „Тенк“ и „ТНТ“ со истото образложение.


Груевски негира дека од Виена дал налог за упад во Собранието


Скопје, 2 април, 2018 - 12:44 (META) 

По одложувањето на расправата за случајот „Титаник“ во Кривичниот суд, поранешниот премиер Никола Груевски рече дека „интензивниот распоред на судења за случаите на Специјалното јавно обвинителство (СЈО) е одраз на силен притисок, за да се дефокусира јавноста од актуелните теми во државата како што е спорот за името.“

– Како што можевте и денеска да видите, денеска се чувствуваше  притисокот којшто го имаат судиите по секоја цена, со кршење на правата на обвинетите да ги тераат случаите и да ги завршат што е можно побрзо. Имено, што се однесува до мене, ми беше кажано дека имам само еден ден, и тоа не цел, три часа во тој ден, да прочитам десетици илјади страници што ги испратило СЈО. На тоа судијата немаше одговор и кажа дека тоа е неговата одлука без да даде аргумент, бидејќи очигледно тој е под жесток притисок. Под притисок во овој период да се зборува за ова, наместо за клучните теми. На иста линија е и трендот на обвинување за се и сешто кон мене. Сега е модерно, во тренд е за сè да бидам јас обвинет. Дневно по 2-3 работи смислуваат за да се зборува за тоа, а да не се зборува за реалните проблеми и реалните апсурни од страна на владата со кои се соочува државата – истакна Груевски.

Прашан дали, телефонски дал налог за настаните во Собранието на 27 април, Груевски негираше дека од Виена тој или неговиот телохранител дале налог да почне упадот во Собранието.

– Да имаше „д“ од доказ против мене, јас одамна немаше да бидам тука. Што не значи дека тие што ги уапсија се виновни. И тие не се виновни и го понесоа товарот на тој случај. Што се однесува до обвинување на членот на моето обезбедување, јас разговарав со него и тој ми рече дека како и секој, разговарал само кратко со сопругата и со неговиот брат, исто така семејни разговори и тоа е се. И во обвинението немаше дека мој телохранител нарачал инцидент. Да имаа докази, работите немаше да бидат вакви. Јас ги повикувам, ако имаат некакви докази против мене, веднаш нека ги објават. И јас не сум дал таков налог – одговори Груевски на новинарско прашање.

Груевски порача дека, очигледно некој сака јавноста да се занимава со него, за да се одвлече вниманието од јавните прашања, а како доказ за тоа, наведе дека постои тенденција него да го вмешаат во се и сешто.


Одложена расправата за „Титаник“, адвокатите бараат време за увид во доказите


Скопје, 2 април, 2018 - 12:16 (META) 

По речиси два часа изнесување на приговори од адвокатите на обвинитетите, пред почетокот на главната расправа за случајот „Титаник“, судијата Осман Шабани го одложи рочиштето за 12 април, за да им даде на бранителите дополнтелно време за увид во доказниот материјал од Специјалното јавно обвинителство (СЈО).

Четворица од адвокатите приговорија на листите на доказите доставени со цедињата заедно со обвинителниот акт. Тие приговараа дека во тие цедиња имало нови докази или пак недостасувале докази кои им биле приложени во текот на истражната постапка.

На таквите наводи реагираше обвинителката Лиле Стефанова од СЈО која кажа дека поголем дел од адвокатите веќе ги добиле уредно доказите и дека новите приговори се неосновани.

Дополнително, Боро Тасевски, адвокат на дел од обвинитите, меѓу кои и на градоначалникот на Пустец, Едмонд Темелко, побара јавно објавените прислушувани разговори да бидат изземени од доказите, а во прилог на тоа го наведе решението на Кривичниот совет за оценка на обвинителен акт при Основен суд Скопје 1, од ноември 2015 година.

Тој рече дека неговиот клиент Темелко кој за судењата патува од домашен притвор во Ресен, не може да издржи долго време да седи во судницата, поради неговата здравствена состојба.

Судијата Осман Шабани рече дека Судскиот совет тоа го има предвид, и дека секогаш кога на обвинетиот ќе му биде лошо, соодветно ќе реагира.


Во новата зграда на Кривичен суд почна првото рочиште за „Титаник“


Скопје, 2 април, 2018 - 10:36 (META) 

Во новата зграда на Основен суд Скопје 1 пристигнаа обвинетите во случајот на СЈО „Титаник“, во кој, на поранешни високи државни и функционери на ВМРО-ДПМНЕ им се суди за изборни нерегуларности и влијание врз волјата на гласачите.

Со денешното рочиште почнува да функционира новата зграда на Кривичниот суд. Прв од обвинетите пристигна пратеникот на ВМРО-ДПМНЕ, Илија Димовски, а потоа и поранешната министерка за внатрешни работи, Гордана Јанкулоска и градоначалникот на Пустец, Едмонд Темелко кој тешко се движеше.

Последен, но овој пат точно на време, во 10 часот, пристигна и поранешниот премиер и екс-лидер на ВМРО-ДПМНЕ, Никола Груевски.

Помеѓу обвинетите се и Мартин Протуѓер, Кирил Божиновски и Миле Јанакиески.

Тие се осомничени од СЈО за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања во 2012 година.


Со „Титаник“ в понеделник се отвора новата зграда на Основен суд Скопје 1


Скопје, 30 март, 2018 - 16:04 (META) 

Основен суд Скопје 1 в понеделник ќе почне со работа во новата зграда, која е во близина на сегашниот објект, пред зградата на МРТ, извести претседателот на судот, Иван Џолев, на денешниот брифинг со новинарите.

Првиот судски процес ќе биде „Титаник“, против поранешниот премиер Никола Груевски и другите обвинети.

Официјалното пуштање во употреба ќе се случи утре напладне, откако претходно ќе почне селидбата.

Новиот објект на Кривичниот суд има 25 судници и многу подобри услови за работа. Изградбата почна во мај 2010 година.