Хан: Ги цениме напорите новата влада да допре до Грција и до Бугарија


Брисел, 8 јули, 2017 - 13:59 (META) 

Важно е да се пронајде согласно решение за спорот околу името и патот кој што ќе води напред и ЕУ е подготвена да го помогне овој процес кој се води во Обединетите нации и да ги олесни контактите ако е тоа потребно, изјави еврокомесарот за проширување и соседска политика Јоханес Хан.

Еврокомесарот Хан во интервју за „Јуропеан вестерн балканс“ (European Western Balkans) во пресрет на самитот на лидерите на Западен Балкан, кој следната недела ќе се одржи во Трст, вели дека новата влада мора да се фокусира на реформските приоритети.

– Испраќам група експерти за владеење на правото во Скопје за да го следат развојот на случувањата кои се однесуваат на препораката на државата од 2015 година и за да ја советуваат новата влада по системските прашања за владеење на правото. Првата посета се случи на 27 јуни, кога лидерот на тимот, Рајнхард Прибе, го посети Скопје. По неговата посета целиот тим ќе биде во Скопје од 17 до 21 јули – вели Хан.

Еврокомесарот во интервјуто вели дека ги ценат напорите на македонскиот премиер и на владата да допрат до нивните колеги во Грција и во Бугарија.

– Важно е да се пронајде заедничко решение за спорот околу името и патот кој ќе води напред. ЕУ е подготвена да го помогне овој процес кој се води во Обединети нации и да ги олесни контактите ако е потребно. Сега новата влада, заедно со опозицијата, мора да се фокусира на примена на реформските приоритети и на Договорот од Пржино, за да се врати земјата на нејзиниот евроатлански пат – додава Хан.


Јанева на „Фејсбук“ објави фотографија со целиот тим на СЈО


Скопје, 15 септември, 2016 - 21:21 (META) 

Специјалната јавна обвинителка, Катица Јанева, денеска на својот фејсбук-профил објави фотографија со целиот тим во новите простории во кои СЈО се пресели на почетокот на овој месец.

Јанева денеска го објави вториот шестмесечен извештај за работата на СЈО и ги поднесе до судот првите две обвиненија. Едното е за уништување на документација поврзана со опремата од нелегалното прислушување, а другото за насилствата пред Општина Центар во јуни 2013 година.

Денеска е годишнина од именувањето на Катица Јанева за специјална јавна обвинителка и од формирањето на СЈО.


СЈО: Од медиумите дознаваме за кривичната пријава против тројца наши обвинители


Скопје, 31 јануари, 2016 - 15:30 (META) 

Досега никој од тимот на Катица Јанева не бил повикан на разговор во Основното јавно обвнителство, велат од Специјалното јавно обвинителство (СЈО) за „24 Вести“.

Специјалното јавно обвинителство од медиумите дознало дека се поднесени кривични пријави против тројца обвинители од тимот на Јанева.

Тие се сомневаат дека некој се обидува да му наштети на новото обвинителство бидејќи од внатрешниот распит на обвинителите било утврдено дека никој од соработниците на Јанева не барал поткуп, ниту вршел притисоци на приватни лица, во корист на специјалното обвинителство.

„Сите наши обвинители беа прашани и во службената евиденција е забележано дека никој не постапил надвор од законските овластувања. Доколку тие кривични пријави се поднесени само паушално, без материјален доказ и се потпираат само на нечии изјави, тоа е лажно пријавување, ѝ штети и на институцијата, но и на личниот интегритет на обвинителите што работат таму“, велат од Специјалното јавно обвинителство.

Утре Катица Јанева пред комисијата во Советот на јавни обвинители ќе треба да образложи зошто обвинителките Лејла Кадриу и Марија Ѓорѓева беа исклучени од нејзиниот тим. Таа пред Советот на обвинители треба да образложи и дали е направен записник при примањето на материјалите од лидерот на СДСМ, Зоран Заев.


Аневски: Јанева разреши две обвинителки од својот тим


Скопје, 26 јануари, 2016 - 13:34 (META) 

Специјалната јавна обвинителка, Катица Јанева, разрешила две обвинителки од својот тим, соопшти денеска претседателот на Советот на јавни обвинители, Петар Аневски, по завршувањето на денешната седница.

Како што рече Аневски, Јанева на своја иницијатива ги отстранила обвинителките Лејла Кадриу и Марија Ѓорѓева и им рекла да ги вратат предметите и токените, да ги исчистат бироата, да ги напуштат канцелариите и да се сместат кај полицајците.

Двете обвинителки на 20 јануари за разрешувањето се пожалиле и го пријавиле случајот во Советот на јавни обвинители.

– Вчера добивме писмо од Специјалното јавно обвинителство дека двете обвинителки самите барале да заминат поради намалениот обем на работа. Вие знаете дека пред неколку месеци се расправавме токму за бројот на јавни обвинители, дали треба да бидат повеќе или помалку. Во врска со ова прашање, Советот формираше комисија од тројца членови кои треба да го испитаат овој случај. Сега треба да се донесе и одлука за намалување на бројот на обвинители. Деновиве ќе имаме состанок на кој, покрај двајцата разрешени обвинители, ќе биде поканета и Јанева за да даде свое објаснување за ситуацијата – изјави Аневски.

Во врска со материјалите од прислушуваните разговори, кои лидерот на СДСМ, Зоран Заев, ѝ ги предаде на специјалната обвинителка, Аневски рече дека на денешната седница била донесена одлука да се побараат од Специјалното јавно обвинителство податоци за бројот на примени предмети, дали е направен записник при примопредавањето и други статистички податоци.

– Според член 7, став 1 од Законот за специјалното јавно обвинителство, ова обвинителство одговара пред Советот на јавни обвинители и пред Собранието. Во ставот 3 од истиот член, се наведува дека јавниот обвинител за своето стручно постапување, одговара само пред Советот на јавни обвинители, поради што ние имаме право да ги побараме овие податоци – рече Аневски.

Тој рече дека наводите што се појавуваат во јавноста за кривични пријави за Катица Јанева се несериозни и дека тоа нема да се случи, но не прицизираше и не одговори какви санкции би следувале доколку се утврди дека е прекршен законот.


Тимот на Јанева комплетиран, со работа ќе почне в понеделник


Скопје, 5 ноември, 2015 - 12:09 (META) 

Дванаесеттемина избрани обвинители од тимот на Катица Јанева денеска во Советот на јавни обвинители дадоа свечена заклетва, со што и официјално од понеделник ќе почнат со работа по наводите што произлегуваат од содржината на прислушуваните разговори.

На свечената седница, обвинителите се заколнаа дека ќе работат одговорно и чесно, во согласност со Уставот, законите и со ратификуваните меѓународни договори, а претседателот на Советот на јавни обвинители, Петар Аневски, им го честиташе изборот и им посака успех во работата.

Специјалната обвинителка, Катица Јанева, му се заблагодари на Советот на јавни обвинители и истакна дека одлуката за избор на нејзиниот тим била донесена по консултации и по состаноци со Советот на јавни обвнинители, на кои постигнале согласнот околу изборот на 12 помошници-обвинители.

Јанева рече дека Специјалното обвинителство со работа ќе почне в понеделник, дека финансиите што пред неколку дена ѝ ги одобри Собранието треба да легнат на сметката на новоформираното обвинителство и дека во тек е опремувањето и на просториите што ѝ се дадени за работа.

Специјалната обвинителка денеска не сакаше да ја коментира вчерашната одлука на Кривичниот совет на Основниот суд Скопје 1, со која се предвидува дека „бомбите“ нема да можат да се користат како доказен материјал. Исто така, не сакаше да го коментира ниту најавеното преиспитување на уставноста на Специјалното јавно обвинителство.

Јанева потврди дека во Специјалното обвинителство пристигнуваат материјали кои не се дел од 28-те предмети, а на новинарско прашање дали лица се пријавуваат за заштитени сведоци, таа не сакаше конкретно да одговори и рече дека тоа е во процедура.

На денешната свечена седница, не присуствуваше републичкиот јавен обвинител, Марко Зврлевски.

Прашана за коментар околу тоа и дали има нешто да му порача на Зврлевски, Јанева рече дека го поздравува и го почитува Марко Зврлевски како републички јавен обвинител.


Јанева доставила предлог со намален број обвинители


Скопје, 4 ноември, 2015 - 16:26 (META) 

Специјалната обвинителка, Катица Јанева, до Советот на обвинители доставила нов предлог со помал број помошници-обвинители од претходно побараните 14. Ова неофицијално го потврдија од Советот пред почетокот на седницата, на која ќе се расправа за изборот на тимот на Јанева.

Од Советот на обвинители не кажуваат за колку обвинители станува збор, а претседателот Петар Аневски, кратко, пред почетокот на седница, рече дека за околу еден час ќе биде донесена одлука и ќе ѝ биде соопштена на јавноста.


Советот на обвинители закажа итна седница за тимот на Јанева


Скопје, 4 ноември, 2015 - 14:51 (META) 

Советот на јавни обвинители за денеска, во 16 часот, закажа седница на која точка на дневен ред ќе биде тимот на специјалната обвинителка, Катица Јанева, дознава „Мета“.

Според наши извори, обвинителите на Јанева ќе бидат единствена точка на дневен ред на седницата.

Дали членовите на Советот ќе расправаат за избор на другите седум обвинители од тимот на Јанева или, пак, ќе се бара некое компромисно решение, засега не е извесно.


ДУИ го претстави тимот за изборите догодина


Скопје, 18 октомври, 2015 - 17:32 (META) 

Демократската унија за интергација (ДУИ) денеска на Скопски саем ги претстави членовите на партијата што ќе ја водат кампањата на ДУИ на предвремените параламентарни избори закажани за април следната година.

Пред околку 1.200 членови на партијата, се обрати претседателот на ДУИ, Али Ахмети, кој го претстави актуелниот министер за економија, Беким Незири, за шеф на изборниот штаб.

„Македонија е во многу тешка криза. Ние во ДУИ ја гледаме како можност за создавање подобра иднина. Македонија е во момент на пресврт, кој може да донесе решенија за големите проблеми што ја мачат државата. Нашата партија од случувањата оваа година излезе посилна. Создадовме доверба кај младите дека и во Македонија е можна иднина и благосостојба и не мора да ја бараат среќата надвор“, пренесува „Телма“ дел од обраќањето на Ахмети.

Иницијативи, транспарентност, оптимизам, резултати и ентузијазам се главните принципи на ДУИ, што денеска ги истакна шефот на изборниот штаб и кои, според него, треба да донесат решенија за подобра иднина.

„Шест месеци пред изборите, потврдуваме дека ДУИ е модерна европска партија со силна структура и со организациски капацитети за остварување на стратегиските интереси на граѓаните“, рече Незири.

На собирот, како што пренесува „Телма“, беа претставени и шефовите на 34 општински изборни штабови со повеќе од илјада членови, меѓу кои и градоначалникот на Гостивар, Невзат Бејта, и актуелниот пратеник во Собранието, Џевад Адеми.


Политичките партии во Клубот на пратеници ја решаваат новата криза


Скопје, 16 октомври, 2015 - 14:24 (META) 

Во 14 часот, во Клубот на пратеници во Скопје, почна средбата на претставниците на политичките партии со надеж дека ќе го решат застојот во преговорите за изборниот законик.

Изјава даде само претставникот на СДСМ, Дамјан Манчевски, кој рече дека на средбата нема да разговараат за ништо друго додека не го решат прашањето со изборот на тимот на специјалната јавна обвинителка, Катица Јанева.

– Со неизборот на целиот тим на специјалната обвинителка, се крши Договорот од Пржино. Бараме Советот на јавни обвинители целосно да го испочитува законот за специјално обвинителство. Додека не се реши тоа, Договорот од Пржино за нас е неактивен – изјави Манчевски.

Антонио Милошоски, преставникот на ВМРО-ДПМНЕ на разговорите, пред да влезе во Клубот на пратеници, само кусо рече дека ќе се разговара за сите спорни прашања, а олеснувачот Питер ван Хојте немаше коментар и само потврди дека денешната средба ќе се одржи.


Адвокатите и судиите поделени околу тимот на Катица Јанева


Скопје, 1 октомври, 2015 - 11:16 (META) 

Тимот кој специјалната обвинителка, Катица Јанева, го избра да работи со неа на материјалите што произлегуваат од прислушуваните разговори, предизвика различни реакции кај адвокатите и кај поранешните обвинители.

Дел од нив се резервирани, а дел задоволни од изборот и очекуваат резултати.

– Одличен е тимот, тоа се луѓе кои работеле на помали случаи и поради (партиска) неисполнителност не им било дозволено да одат напред – вели познат скопски адвокат.

На прашањето што мисли за тоа што и Лиле Стефанова е во тимот на Јанева, тој вели дека иако е позната по политички монтирани случаи, сепак „мора да се шара малку“.

Според адвокатот Оливер Вуксановиќ, новите обвинители се врвни стручњаци.

– Сите колеги се одлични, големи стручњаци и верувам дека ќе направат одлична работа. Јас имам доверба во нив – вели Вуксановиќ.

Поранешниот судија во Уставниот суд, Трендафил Ивановски, за „24Вести“, пак, изјави дека нема големи очекувања.

Вели дека тимот на Јанева, прво, е многуброен и, второ и поважно, составен од обвинители што и досега имале можност да се докажат како борци против криминалот и корупцијата.

Со оцената на Јанева дека станува збор за истакнати професионалци кои уживаат доверба и висока репутација, се согласува Костадин Кизов, поранешен претседател на Советот на обвинители, пренесе „Дојче веле“.

– Сите се избрани во периодот меѓу 2010 и 2014 година, кога јас бев претседател на Советот на обвинители. Речиси сите се со завршена академија за судии и за обинители, сите поминале обука за новиот закон за кривична постапка, сите биле на соодветни стручни обуки во земји на ЕУ. Сите се релативно млади и верувам дека ќе одговорат на предизвикот. Со оглед дека обвинителката има обврска по шест месеци да достави извешај за нивната работа, точно ќе знаеме дали ја оправдале укажаната доверба. Инаку, досега сме немале претставки од граѓани за нивната работа во обвинителствата каде што биле избрани – вели Кизов.

Адвокатот од Битола, Васко Ѓеоргиев, вели дека не ги познава сите, но ако треба да го изгради првичниот впечаток според оние што ги познава, тогаш е оптимист.

– Дел од предложените обвинители добро ги познавам. На пример, Снежана Бундалевска е искусен обвинител и верувам дека ќе постапува строго професионално. Слично мислење имам и за Артан Ајран и Трајче Пеливанов и очекувам сериозно да одговорат на функцијата. Не треба да се шири некаков песимизам поради нечија младост или помало искуство. И не треба да се заборави дека најголем дел од работата ќе ја вршат истражителите. Тие ќе ги „хранат“ обвинителите со материјални докази, по кои обвинителите ќе бидат должни да постапат. Исто така, сметам дека ќе бидат целосно исклучени некакви изигрувања на законот, бидејќи нивната работа ќе биде под силен странски и домашен надзор – вели Ѓеоргиев.

За разлика од него, адвокатот Александар Тортевски не е оптимист во однос на предложениот тим, но ќе биде многу среќен ако го демантираат.

– Според предлогот, изгледа дека четирите партии еднакво партиципирале со свои кандидати. Кога јас би требало да избирам, од тој тим би избрал само тројца. Иако не сакам тоа да се случи, стравувам дека ќе има страшно протекување на информации, токму поради партиското „делегирање“ кадри. Се плашам дека некои од нив ќе бидат повеќе лојални на партијата отколку на институцијата. Генерално, тимот не ми влева надеж, но – да им дадеме шанса. Ќе бидам многу среќен ако ме демантираат и во таков случај подготвен сум јавно да им се извинам – вели Тортевски.