!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Закројувањето на лозјата ги доведе амбасадорите во „Стоби“ и во „Тиквеш“


Кавадарци, 14 февруари, 2017 - 16:16 (META) 

Стотици гости меѓу кои и холандскиот амбасадор Ваутер Пломп, италијанскиот амбасадор Карло Романо и унгарскиот амбасадор Виорел Станила присуствуваа на свечената прослава на празникот Св.Трифун во винарницата „Стоби“.

На денешниот настан гостин беше и претставникот од холандската компанија „Шермер“, која воедно е првата дистрибутерска фирма со која „Стоби“ има потпишано договор.

Закројување на лозјето според сите обичаи имаше и во винарската визба „Тиквеш“. На чинот на закројување освен членовите на управниот одбор, менаџментот и вработените на „Тиквеш“ присуствуваа претставници на дипломатскиот кор, на државните институции и на голем број партнери, соработници и пријатели на винарницата.

 


„Тиквеш“ ја заокружи инвестицијата од 30 милиони евра во производство на сортно вино


Кавадарци, 11 февруари, 2016 - 10:21 (META) 

Винарската визба „Тиквеш“ ја заокружи десетгодишната инвестиција од 30 милиони евра за производство на сортно вино.

– Изминатите години во континуитет инвестиравме во подобрување на квалитетот на врвните вина. Го зголемивме и го осовременивме капацитетот на производство, инвестиравме во технологии, во лозови насади и во човечки ресурси – изјави директорот на винарницата „Тиквеш“, Игор Илиевски.

И покрај тешките околности за бизнисот, тој најави 700.000 евра инвестиции и годинава, за уште поголем пласман на квалитетно вино на странските пазари, што е стратешка определба на фирмата.


Лозарите ќе бидат исплатени денеска


Кавадарци, 29 април, 2015 - 10:49 (META) 

Денеска истекува законски утврдениот рок за исплата на ланското грозје што винарската визба „Тиквеш“ го откупила од лозарите. Годинава, „Тиквеш“ планира да откупи поголемо количество грозје, односно 20 проценти повеќе од лани.

– Минатата година ја завршивме со 18 милиони килограми грозје, а за оваа плановите се откуп на 22 милиони килограми. Сè уште е рано да се оценува каква ќе биде бербата, но според состојбата на терен и редовните средби со кооперантите, почетоците се добри – изјави генералниот директор на „Тиквеш“, Игор Илиевски.

Од „Тиквеш“ најавија и нова инвестиција од 1,5 милион евра од ИПАРД-програмата за осовременување на процесот за производство на висококвалитетно вино. Во таа насока е и континуираното вложување во технологија и во луѓе за осовременување на производните капацитети и за продукција на висококвалитетни вина.

Освен во регионот, „Тиквеш“ најмногу извезува во САД, Кина и во Велика Британија.