Свилановиќ: Повеќе од 70 лица во Западен Балкан се осудени за тероризам


Тирана, 30 мај, 2018 - 13:29 (META) 

Од 2016 година до денес судовите во регионот на Западен Балкан осудија и затворија повеќе од 70 лица за тероризам и за учество во странски боишта, со вкупни пресуди од над 380 години – изјави денеска во Тирана генералниот секретар на Регионалниот совет засоработка (РСС), Горан Свилановиќ.

Зборувајќи на работен состанок на претставници на полициски и правосудни органи од земјите на Западен Балкан и други меѓународни претставници, Свилановиќ предупреди дека се регистрирани и се формираат нови видови терористички активности, особено во кибернетичкиот простор и има радикализација преку интернет, со што се наметнува потреба за проширување на регионалната соработка.

Претставниците од регионот расправаат за правните и полициските практики во слуачите на тероризам и насилен екстремизам, за процедурите на класификација и декласификација на документите во судовите за ваквите случаи, како и за унапредување на соработката помеѓу полициските органи и правосудството, во прекуграничната борба против тероризмот.

Ден претходно, како што соопшти РСС, во Тирана се одржа 10-тиот состанок на експертскиот Форум на кој учествуваат шефовите на воено-разузнавачаките агенеции од Југоисточна Европа. Тие разговарале за безбедносната состојба во регионот и направиле проценка на податоците од отворени извори, собрани во документот наречен „Предизвиците во кибернетичката безбедност –критична инфраструктура во Југоисточна Европа“.

Денешниот собир во Тирана го организираат албанската влада и Регионалниот совет за соработка – интервладино тело на земјите членки на Процесот за соработка во ЈИЕ, чиј основач и полноправен член е и Република Македонија.


Османи предупреди за ризици ако не почнат преговори за зачленување со ЕУ


Скопје, 9 мај, 2018 - 13:15 (META) 

Вицепремиерот за европски прашања Бујар Османи на денешниот традиционален појадок што го организираше во Клубот на пратеници во Скопје, предупреди на ризици од раслојување и екстремизам во Македонија, ако наскоро не почнат преговори со ЕУ за зачленување.

– Губењето на надежта за ЕУ и НАТО членство ќе придонесе младите луѓе и натаму да продолжат да ја напуштаат земјата намалувајќи ја работната сила и можностите за развој и раст. Загубата на надежта, исто така, ќе предизвика силен замор од ЕУ и евроскептицизам и ќе ги зголеми анти-НАТО чувствата. Поделеноста на населението по етничка, религиозна и социјална основа ќе се продлабочи што ќе предизвика ранливост на демократските институции и нивниот капацитет да владеат, ќе го намали нивото на отпорност и ќе создаде плодна почва за вмешување и поголемо влијание на трети земји. Ќе отвори простор за навлегување на потенцијални насилни групи зголемувајќи го со тоа ризикот од тероризам, екстремизам и национализам – предупреди тој.

На настанот организиран од Секретаријатот за европски прашања по повод 9 мај, Денот на Европа, присуствуваа амбасадорите на земјите- членки на ЕУ во Македонија, поранешните вицепремиери за европски прашања, како и други претставници на странските претставништва во Македонија.

Османи исто така порача дека Македонија, иако тоа не е формализирано, е веќе дел од Европа.

– Ако ја земеме предвид нашата заедничка историја, заедничка географија, и најважно, нашите заеднички вредности и заеднички стратешки интереси, во политичка и економска смисла, заклучокот е едноставен: Ние веќе сме важен дел од Европа – рече вицепремиерот за европски прашања.

На крајот, Османи, посочувајќи го напредокот на Македонија, ги образложи пред амбасадорите и бројните причините зошто Македонија треба да добие поддршка во своите евроатлански аспирации, повикувајќи ги притоа амбасадорите на земјите членки да ги пренесат овие пораки онаму каде се носат одлуките, во нивните главни градови.

– На состанокот на Советот во јуни, нашето очекување е официјално да слушнеме датум за почеток на пристапните преговори, потврден од Европскиот совет. Ве уверувам дека Владата и администрацијата се подготвени да се справат со предизвиците на преговарачкиот процес – изјави Османи.


ВМРО-ДПМНЕ: Правдата ќе има кога судот ќе ги ослободи сите притворени за 27 април


Скопје, 22 февруари, 2018 - 11:13 (META) 

Правдата ќе биде задоволена само тогаш кога судот ќе ги ослободи и останатите неосновано притворени патриоти кои без никакви аргументи веќе трет месец се држат во затвор, велат од опозициската ВМРО-ДПМНЕ.

„Правната држава ќе почне да функционира само тогаш кога ќе бидат укинати и домашните притвори и кога ќе бидат отфрлени неоснованите обвиненија за тероризам. Судот мора да биде на висина на одговорноста што ја има и да утврди дека нема никаква правна основа да бидат задржани во истражен затвор и останатите притворени во врска со настаните од 27 април.‬ Притворените лица не се терористи, туку жртви на еден недемократски, политички монтиран случај“, стои во соопштението.

Вчера, Апелацискиот суд потврди дека ги прифатил жалбите на организаторите на протестите на „За заедничка Македонија, Борис Дамовски и Богдан Илиевски и на пратеникот Љубен Арнаудов, и дека мерката притвор во истражен затвор им ја заменил со куќен притвор и одземање на пасошите. Покрај нив тројца, Апелација им одреди куќен притвор и одземање на пасошите и на Јане Ченто, Иван Цветановски и на Оливер Радулов.

Во истовреме, Апелацискиот суд одлучила поранешниот министер за внатрешни работи, Митко Чавков да остане во притвор, пратеникот Јохан Тарчуловски во домашен притвор, а отфрлени се жалбите и на Горан Ангеловски, Илија Славевски, Сашо Марковски и Вилијам Михајловски.

Според најавите, Апелацискиот суд денеска на јавна седница треба да одлучува по жалбите за продолжените притвори на пратеникот Крсто Мукоски, актерот Владо Јовановски и на разузнавачот Мунир Пепиќ.


Папата и Ердоган сметаат дека не треба да се менува статусот на Ерусалим


Ватикан, 5 февруари, 2018 - 19:28 (META) 

Тероризмот не може да се доведува во врска со религиите, а борбата против ксенофобијата и исламофобијата треба да продолжи со заеднички сили, оцениле папата Франциск и турскиот претседател Реџеп Таип Ердоган на нивната денешна средба во Ватикан, јави турската новинска агенција „Анадолија“.

Неименуван извор од канцеларијата на Ердоган за агенцијата изјавил дека папата и турскиот претседател разговарале за повеќе важни прашања, вклучувајќи ја и ситуацијата околу Ерусалим.

Папата Франциск и Ердоган ја нагласиле важноста од задржување на статусот на Ерусалим во согласност со резолуцијата на Обединетите нации и почитувањето на меѓународното право.

Ердоган е првиот турски претседател кој по 59 години е во посета на Ватикан.


Ќе зајакне соработката помеѓу Македонија и Албанија во борбата против тероризмот


Охрид, 3 февруари, 2018 - 15:55 (META) 

Министрите за внатрешни работи на Македонија, Оливер Спасовски и на Албанија, Фатмир Џафај денеска во Охрид потпишаа протокол за соработка во областа на тероризмот, информираа од МВР.

„Целта на протоколот е зајакнување на полициската соработка во борбата против тероризмот и финансирањето тероризам, првенствено преку размена на информации за поединци и групи вклучени во вакви активности, како и спроведување на заеднички операции во спроведување на истите“, се вели во соопштението на МВР.

Министерот Спасовски истакнал дека „особено е важно што се потпишал овој протокол, бидејќи тероризмот е глобална закана која што бара да има соработка помеѓу државите и размена на информации“.

„Исто така разговаравме како да ја зајакнеме соработката во борбата против трговијата со дрога, оружје и луѓе. Разговаравме и околу иницијативата, која што ја покрена министерот за внатрешни работи на Албанија, за формирање на регионален центар за полициска соработка за земјите од Западниот Балкан, што со задоволство ја прифаќаме. Се договоривме и да подготвиме заеднички проекти за прекугранична соработка со кои што ќе аплицираме за средства од Европската унија“, рече Спасовски.

Министерот Џафај рекол дека односот помеѓу двете министерства може да служи како модел во регионот и ја очекува посетата од министерот Спасовски во Тирана или Поградец.


Турскиот суд го ослободи од притвор активистот на „Амнести интернешенл“


Анкара, 31 јануари, 2018 - 14:22 (META) 

Турскиот суд нареди да биде ослободен од притвор претседателот на турскиот огранок на меѓународната организација за заштита на човековите права „Амнести интернешенл“, Танер Килич, јавуваат светските агенции.

Ова денеска го соопшти адвокатот на Килич, Мурат Динчер, додавајќи дека судењето на активистот продолжува.

Килич беше во затвор од јуни, минатата година, кога беше уапсен во Измир под обвинение за тероризам.

Обвинителството го товари за користење на апликацијата „БајЛок“, која, како што се тврди, ја користат приврзаниците на имамот Фетулах Ѓулен, кој е во егзил во САД, а кого турските власти го обвинуваат дека стои зад неуспешниот обид за воен удар на 15 јули, 2016 година.

Турските власти се под остри критики од Западот, кој ја обвинува Анкара дека го користи државниот удар како параван за пресметка со критичарите на власта.

Повеќе од десет илјади лица се уапсени во Турција под обвинение за тероризам, а повеќе од 100.000 лица се отпуштени од работа.


Макрон: ЕУ мора да спроведе реформи за да се натпреварува со САД и Кина


Давос, 25 јануари, 2018 - 9:37 (META) 

Европската Унија мора годинава да спроведе реформи за да може да се натпреварува со светските сили како што се Кина и САД, изјави францускиот претседател Емануел Макрон за време на говорот на Светскиот економски форум во Давос.

Тој додаде дека на амбициозните земји, ЕУ мора да им овозможи напредок кон европската интеграција, дури и ако другите земји не сакаат да се придружат.

„Помалку амбициозните не треба да ги блокираат амбициозните“ изјави Макрон.

Тој додаде дека земјите на ЕУ треба да ја контролираат даночната политика и додаде дека Франција ќе издвои 10 милијарди евра за финансирање на иновации и истражувања.

Макрон повика на поголема европска и меѓународна соработка поврзана со воведување на данок на компаниите во земјите во кои заработуваат.

Тој повика и на соработка во борбата против тероризмот ширум светот.


Тероризмот повеќе не е во безбедносниот фокус на САД, туку Русија и Кина


Вашингтон, 19 јануари, 2018 - 22:10 (META) 

Министерот за одбрана на САД, Џејмс Матис денеска изјави дека натпреварот помеѓу големите сили, а не тероризмот, е сега во фокусот на американската одбранбена стратегија, пренесува „Би-би-си“.

Зборувајќи во Вашингтон, Матис рече дека САД се соочуваат со „растечки закани од ревизионистичките сили, како што се Кина и Русија“, кои сакаат да „создадат свет во склад со нивните авторитарни модели“.

– Ќе ја продолжиме кампањата против терористите, но натпреварот меѓу големите сили, а не тероризмот, сега е во фокусот на американската национална стратегија – рече Матис, претставувајќи ја новата одбранбена стратегија на САД.

Тој, исто така, апелираше до Конгресот соодветно да ја финансира војската и да се воздржи од кратења во федералниот буџет на САД.

Заменик-помошникот на министерот за одбрана, Елдриџ Колби изјавил дека Русија е многу подрска од Кина во користењето на воена моќ, пред се со анексијата на Крим во 2014 година и со помошта што ја дава на сирискиот претседател, Башар ал Асад.

Сепак, Москва има ограничени економски ресурси, додал Колби, додека Кина, од друга страна, ја опишал како сила која е во подем и економски и воено.


ВМРО-ДПМНЕ: Притворените се лишени од основните права, целиот процес е конструкција


Скопје, 5 јануари, 2018 - 10:08 (META) 

Апсурдноста на делото „тероризам“ кои им се става на товар на десетици македонски патриоти во врска со настаните од 27 април е вон секоја правна логика. Целиот процес е конструкција и не и служи на правдата, туку на политиката, велат од ВМРО-ДПМНЕ.

„Судот како орган кој ја донесува одлуката, не смее да остане нем на прекршувањата во постапката кои ги нотираше Народниот правобранител. Судот не смее да ги занемари ни фактите дека притворените се лишени од основните права кои им се гарантираат со закон, како што неколкукратно информираа медиумите. Република Македонија во 21 век ја живее новата инквизиција. Декларативните заложби на власта за демократизација и владеење на правото, се само празни флоскули, кои го затскриваат кршењето на законите, Уставот и меѓународните конвенции“, се вели во партиското соопштение.

Од ВМРО-ДПМНЕ додаваат дека Република Македонија нема да тргне ни чекор кон ЕУ и НАТО се додека институциите се користат за пресметка со политичкиот противник.


Иванов: Мора да има одговорност за 27 април, но и да се почитуваат човековите права


Скопје, 28 ноември, 2017 - 19:42 (META) 

Претседателот Ѓорге Иванов во вечерашното обраќање порача дека мора да има одговорност за насилните настани од 27 април годинава, но дека при тоа мора да се почитуваат човековите права и презумцијата на невиност.

Иванов повтори дека како и претходно, и сега ја поддржува иницијативата „За заедничка Македонија“, која, како што рече, е „сочинета од граѓани кои се сплотиле зад идејата за заштита на државата“.

Тој истакна дека овие граѓани не може да бидат третирани како терористи.

Претседателот рече дека секојдневно добива информации за политички и партиски реваншизам и оти е загрижен поради ваквата појава, која води кон создавање тензии и нестабилност.

Тој повика дека во следниот период, кога треба да се исполнат неопходните реформи, потребен е национален консензус и дијалог за исполнување на реформите.

– Со реваншизам се поларизира состојбата во општеството. Ги повикувам надлежните институции да ги почитуваат Уставот и правниот поредокот на Македонија – рече Иванов.

Тој истакна дека граѓаните очекуваат решенија, а не проблеми и оти сите политички субјекти треба да служат во интерес на сите граѓаните.

Иванов рече дека „нема ништо потрагично и поопасно од меѓумакедонски судир“, истакнувајќи дека низ историјата, секогаш во такви моменти ни било нанесувано зло.

Обраќањето на Иванов доаѓа откако МВР, по налог на Основното јавно обвинителство, денеска приведе 36 лица за насилствата во Собранието од 27 април годинава, меѓу кои и пратениците Крсто Мукоски, Јохан Тарчулоски, Жаклина Пешевска, Љубен Арнаудов и поранешниот директор на Бирото за јавна безбедност и поранешен министер за внатрешни работи, Митко Чавков, како и дел од организаторите на иницијативата „За заедничка Македонија“, Владо Јовановски, Борис Дамовски, Игор Дурловски и Богдан Илиевски.