!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Предизборен молк во Франција во пресрет на првиот круг од претседателските избори


Париз, 22 април, 2017 - 11:35 (META) 

Ноќеска на полноќ во Франција стапи на сила предизборниот молк во пресрет на утрешниот прв круг од претседателските избори во земјата. За функцијата претседател на Франција ќе се натпреваруваат 11 кандидати. Изборниот молк ќе трае до утре, до 20 часот, кога се затвораат избирачките места.

Речиси 47 милиони Французи имаат право на глас на претседателските избори, чиј исход е многу неизвесен поради тесната разлика во анкетите помеѓу центристот Емануел Микрон, екстремната десничарка Марин ле Пен, десничарот Франсоа Фијон и радикалниот левичар Жан Лук Меланшон.

Вкупно 66.646 изборачки места ќе бидат отворени утре во 8 часот. Изборите во прекуокеанските француски територии ќе се одржат денеска.

Досега ниту еден кандидат на претседателските избори во Франција не бил избран во првиот круг, туку во вториот, кој овојпат е закажан за 7 мај.

Изборите ќе ги обезбедуваат 50.000 полицајци и припадници на жандармеријата, како и 7.000 војници.

Претседателските избори во Франција првпат се одржуваат додека во земјата на сила е вонредна состојба, која беше воведена по терористичките напади во 2015 година. Во четвртокот оваа недела, во Париз се случи напад во кој загинаа еден полицаец и напаѓачот, а беа ранети три лица.

Инаугурацијата на новиот претседател треба да се одржи пред 14 мај, кога официјално му истекува мандатот на актуелниот претседател на Франција, Франсоа Оланд, кој не се кандидираше за нов мандат.


МВР ќе ги зајакне безбедносните мерки за време на празниците поради заканите од ИД


Скопје, 13 април, 2017 - 18:30 (META) 

Министерството за внатрешни работи наредните денови, за време на велигденските празници, ќе ги зајакне безбедносните мерки на целата територија на државата, поради глобалните терористички закани од страна на Исламска држава (ИД), чија цел се и земјите од Балканот, меѓу кои и Македонија, соопштија попладнево од МВР.

– Со оглед на глобалните терористички закани, во кои цели се и верски објекти (како што беа неодамнешните напади во Египет), потоа таргетирањето на земјите од Балканот, меѓу кои и Република Македонија, а вклучително и масовните собирања на граѓани, од страна на терористичката ИД, МВР ќе ги зајакне безбедносните мерки и активности во наредните денови на целата територија на државата – стои во соопштението на МВР.

Оттаму информираат дека заради непречено одвивање на претстојните велигденски празници, МВР ќе преземе „низа безбедносни мерки и активности, во согласност со оперативните планови за работа, во насока на заштита на јавниот ред и мир и за безбедноста на објектите и на граѓаните“.


Еден загинат и седум повредени при експлозија во станбена зграда во Брисел


Брисел, 19 март, 2017 - 10:17 (META) 

Едно лице загинало, а седум биле повредени, од кои тројца тешко, во експлозија што вчера се случила во станбена зграда во Брисел, најверојатно поради истекување на плин, соопштило белгиското државно обвинителство, пренесува ХРТ.

„Денеска (сабота) попладне, станарите на две згради беа жртви на експлозија, по која избувна пожар. Седум лица се пренесени во две болници. Тројца се тешко повредени, меѓу кои едно двегодишно дете и 15-годишник. Во текот на вечерта во урнатините е пронајдно тело на маж“, било наведено во соопштението на белгиското државно обвинителство.

Од општината Сент Жил, во која се случила несреќата, за белгиските телевизии РТЛ и РТБФ изјавиле дека „најверојанто станува збор за несреќен случај поврзан со истекување на плин“.

Белгиските безбедносни сили се постојано на готовс, а секој инцидент предизвикува големо интересирање кај медиумите, откако на 22 март минатата година Брисел беше цел на најголемиот терористички напад во својата историја, во кој 32 лица загинаа, а 320 беа ранети во метрото и на бриселскиот аеродром.


Во Франција уапсени три лица кои подготвувале терористички напад


Париз, 21 февруари, 2017 - 17:01 (META) 

Три лица се уапсени во Франција под сомневање дека подготвувале терористички напад, потврдија полициски извори за француските медиуми.

Мажите се уапсени во Марсеј, Клермон-Феран, како и на подрачјето на Париз.

По серијата терористички напади во последните неколку години, Франција е во состојба на висок степен на готовност.

Полициски извор соопштил дека тројцата осомничени се уапсени во рамки на прелиминарната истрага почната во јануари, поради сомневање дека планираат да заминат во Сирија или да извршат терористички напад во Франција.


Превентивни апсења во Франција поради страв од терористички напади


Париз, 22 декември, 2016 - 9:56 (META) 

Француската полиција спроведува „превентивни апсења“ и поставува бетонски бариери на божиќните базари, стравувајќи од терористички напади во земјата, слични на неодамнешниот напад во Берлин.

Портпаролот на француската влада рече дека се контактирани божиќните базари за да се спроведат сите безбедносни мерки, вклучувајќи проверка на багаж.

Во Франција во напади на исламистите во изминатите две години беа убиени повеќе од 230 лица, а повеќе од една година на сила е вонредна состојба во земјата.


Во Франција уапсени седум лица кои поготвувале терористички напади


Марсеј, 21 ноември, 2016 - 16:18 (META) 

Француската полиција во Стразбур и во Марсеј уапси седум лица за време на викендот и спречи, како што рече министерот за внатрешни работи, Бернард Казнев, потенцијален нов терористички напад.

Казнев рече дека шест од седумте уапсени не им биле познати на службите за безбедност. Тој додаде дека со апсењето е спречен „терористички напад кој бил подготвуван многу долго“.

Сепак, тој не откри што требало да биде мета на планираниот напад.

Еден од најстарите и најголемите светски божиќни саеми би требало да се отвори в петок во Стразбур. Саемот привлекува огромен број туристи од Европа и беше мета на неуспешен терористички напад во 2000 година.

Казнев рече дека само во ноември се уапсени 40 лица, во рамките на антитерористичката операција која следуваше по смртоносните напади на Исламска држава во Франција во последните две години.


Закани за напад на Обама за време на посетата на Атина


Атина, 12 ноември, 2016 - 12:44 (META) 

Грчката полиција презема силни мерки поради можен напад врз американскиот претседател Барак Обама, кој во вторник и во среда ќе ја посети Атина. Зголемената претпазливост на грчките власти доаѓа по заканата од терористичка организација Огнени јадра за напад за време на посетата на Обама во грчката престолнина.

Само еден ден по нападот на француската амбасада во Атина, за кој сè уште никој нема преземено одговорност, Огнени јадра излегоа со соопштение во кое повикуваат на напади за време на посетата на Обама за да се саботира посетата и да се „расипе забавата“ на политичарите.

„Забавата на властите ќе ја трансформира Атина во град под воена опсада, со илјадници полицајци на улиците кои ќе ја наметнат моќта на естаблишментот. Ние анархистите, како единствен внатрешен непријател на власта, можеме да станеме катализатор на судирите и да им ја расипеме прославата. Меѓутоа, организацијата на напади и судири за време на посетата на американскиот претседател не сакаме да се ограничи на само привремено ослободување. Саботажата на посетата на американскиот претседател може да биде почеток на формирањето организирано анархистичко движење за напади и за уништување на државата и моќта“, се вели во соопштението на Огнени јадра.

Организацијата пред само неколку недели постави бомба пред зградата на една грчка јавна обвинителка и најави дека сето ова е дел од нејзиниот план „Немесис“ за напади на грчки политичари, полицајци, судии и бизнисмени.

Поради нападот на француската амбасада и заканата од Огнени јадра, грчката полиција планира значително да ги засили безбедносните мерки. За време на посетата на Обама центарот на Атина ќе го штитат повеќе од 5.000 полицајци и специјалци, се очекуваат 500 агенти на ЦИА, ќе се користат дронови за да се внимава да не се забележи сомнителна активност. Целата опрема, возила, технологија на американското обезбедување ќе биде пренесено авионски во Атина во следните денови.

Половина час пред транспортот на Обама од аеродромот кон центарот, улиците ќе бидат целосно затворени. Точната програма кога пристига Обама и во колку часот ќе има средби со грчкиот државен врв, како и хотелот каде ќе престојува, сè уште не се соопштени.

Од безбедносни причини, говорот на Обама кој требаше да се одржи на ридот Филопапу, спроти Акропол, е преместен во новиот културен центар „Ставрос Ниархос“.


25 лица приведени во Турција поради сомневање дека соработувале со ИД


Анкара, 17 септември, 2016 - 12:48 (META) 

Турската полиција приведе 25 лица во две одвоени акции во Истанбул и Анкара под сомневање дека се поврзани со џихадистичката група Исламска држава (ИД).

Турските медиуми пишуваат дека меѓу уапсените има и сириски државјанин за кој се верува дека е организатор на неколку терористички напади во Турција.

Како што информирале од полицијата, Сириецот, е идентификуван како Али ал Агал и е осомничен дека ги координирал и организирал нападите што припадници на ИД ги извршија последнава година во Турција. Ал Агал, познат под псевдонимот Ажов, е уапсен во Анкара.

Во друга полициска акција спроведена во Истанбул, се приведени 24 лица под сомнеж дека се поврзани со ИД.


Осомничениот за нападите во Париз и понатаму се брани со молчење пред судот


Париз, 8 септември, 2016 - 17:14 (META) 

Салах Абдеслам (26), единствениот преживеан осомничен член на групата што ги изврши терористичките напади во Париз во ноември минатата година, денеска повторно беше изведен пред суд, но и третпат одби да одговара на прашањата на судијата, јавуваат светските агенции.

„Тој го искористи своето право на молчење“, изјавил пред новинарите адвокатот на одбраната, Франк Бертон, додавајќи дека е оптимист во врска со тоа дека Абдеслам на крајот, сепак, ќе почне да соработува со истрагата.

Абдеслам со месеци беше еден од најбараните лица во Европа, пред да биде уапсен на 18 март во предградието на Брисел, Моленбек.

Тој, под силни безбедносни мерки, беше екстрадиран од Белгија во Франција на 27 април и оттогаш се наоѓа во затвор во јужниот дел на Париз.

Според истрагата, Абдеслам ги довезол тројцата бомбаши-самоубијци до стадионот „Стад де Франс“ во северниот дел на Париз, каде тие потоа го активирале експлозивот.

Абдеслам се откажал од извршувањето на самоубиствениот напад и го фрлил својот појас со експлозив во јужниот дел на градот. Тој подоцна побегнал во Белгија со помош на двајца пријатели.

Во терористичките напади во Париз животите ги загубија 130 лица.


Напаѓачите од Германија добивале инструкции од членови на ИД во Саудиска Арабија


Берлин, 6 август, 2016 - 13:02 (META) 

Напаѓачите кои во јули изведоа терористички напади во Германија преку интернет добивале упатства од членови на Исламска држава, кои се наоѓале, меѓу други земји, и во Саудиска Арабија, јавуваат германските медиуми, повикувајќи се на извори од Сојузната канцеларија за борба против криминалот.

Двајцата напаѓачи, 17-годишниот мигрант од Авганистан кој на 18 јули во воз во Баварија со нож и секира тешко повреди неколку патници, пред да биде убиен од полицијата, како и 27-годишниот сириски мигрант кој се разнесе со бомба пред концерт во Ансбах, исто така во Баварија, кратко пред нападите преку интернет-комуникација добивале инструкции од лица од Блискиот Исток, пред се од Саудиска Арабија.

Напаѓачот од возот од непознато лице, за кое се претпоставува дека е припадник на ИД, добило инструкции нападот да го изврши со автомобил, на тој начин што ќе влета во маса на луѓе. На ова, младиот мигрант одговорил дека не знае да управува автомобил и дека се решил нападот да го изврши со нож и секира во воз.

Според оваа комуникација, како што јавува „Шпигел Онлајн“, 27-годишниот сириец пак требало експлозивната направа да ја остави меѓу публиката на концертот, а тој, заради пропагадни цели на ИД, целиот напад да го снима со камера.

Наводно, според информациите на германските медиуми, бомбата во ранецот на сириецот детонирала случајно, додека тој сè уште ја носел со себе.

Како што пренесува „Шпигел“, Саудиска Арабија им понудила помош на германските власти за откривање на лицата кои комуницирале со напаѓачите во Баварија.