!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Полицијата во Лондон се повлекува, немало докази за пукање


Лондон, 24 ноември, 2017 - 20:05 (META) 

По големата паника што го зафати Лондон, под сериозни сомнежи за терористички напад со пукање во метро-станицата Оксфорд сиркус, специјалните полициски сили се повлечени, а станицата е повторно отворена. Повторно е отворена и станицата Бонд стрит, која беше затворена за да не се случи огромна маса луѓе во паника да влезе во неа, обидувајќи се да се евакуираат.

Според „Би-би-си“, полицијата не дошла до докази дека имало пукотници, а нема ни осомничени за нападот, па веројатно станува збор за паника која се создала поради гласини. Британската транспортна полиција соопшти дека во паниката една жена добила повреда при бегањето од Оксфорд сиркус. Лондонската полиција, пак, соопшти дека добиле бројни извештаи за пукотници на улицата Оксфорд и во метро-станицата Оксфорд сиркус околу 16.30 часот по локално време. Веднаш на терен се испратени специјални полициски сили, бидејќи во тој момент инцидентот се третирал како терористички напад.

„Полицијците што работеа заедно со нивните колеги од Британската транспортна полиција итно направија пребарување на областа. Полицијата не утврди жртви, докази за пукање ниту, пак, наидовме на осомничени“, соопшти лондонската полиција.

Сепак, поради чувството на сигурност на лондончани, одреден број полицајци ќе останат на улиците во Вест енд.

Кога во метро-станицата се случила паниката, дел од патниците објавуваа на социјалните мрежи дека виделе чад и слушнале истрели. Во рестораните близу станицата имало преплашени луѓе, од кои дел и плачеле.

Евакуацијата и паниката во центарот на Лондон се случи точно во време на најголемиот метеж поради купувачката треска за т.н. „црн петок“. Улицата Оксфорд е една од најголемите улици со продавници на светот.


Бројот на загинати во Египет се зголеми на 235 лица, претседателот најави „брутален“ одговор


Каиро, 24 ноември, 2017 - 19:04 (META) 

Египетскиот претседател Абдел Фатах ал-Сиси денеска најави „брутален“ одговор по нападот врз џамијата во Синај, во кој, според новите сознанија, животите ги загубиле 235 луѓе.

– Вооружените сили и полицијата ќе ги одмаздат нашите маченици и набргу со сила ќе ги вратат безбедноста и стабилноста – рече Сиси во телевизиското обраќање.

Египетската војска почна со воздушни напади на подрачјето на Синај, концентрирајќи се на планинското подрачје околу џамијата, каде, како што се верува, се кријат напаѓачите.

Вооружените напаѓачи упаднале во џамијата за време на молитвата на припадници на безбедносните сили. Очевидци велат дека прво се слушнала експлозија во близина на џамијата, а потоа напаѓачите, кои пристигнале со четири теренски возила, упаднале во џамијата и отвориле оган.


Во Германија уапсени шест лица што планирале терористички напади


Хановер, 21 ноември, 2017 - 12:43 (META) 

Во голема операција спроведена во неколку градови во Германија, полицијата уапсила шестмина Сиријци под сомнение за тероризам, јави германскиот весник „Франкфуртер алгемајне цајтунг“.

Уапсените се на возраст од 20 до 28 година и се членови на терористичката група Исламска држава, а планирале терористички напад на Германија.

Апсењата се извршени во Касел, Хановер, Есен и во Лајпциг. Четворица од уапсените влегле во Германија во декември 2014 година, барајќи азил. Другите дошле во август и во септември 2015 година.


Осум жртви и 11 повредени во терористички напад во Њујорк


Њујорк, 1 ноември, 2017 - 9:59 (META) 

Осум лица загинаа, а 11 се повредени откако маж со камион влета на велосипедска патека на Менхетан, соопшти полицијата.
Инцидентот се случил неколку блокови од споменикот на жртвите на терористичкиот напад на Светскиот трговски центар, а напаѓачот е идентификуван како Сајфуло Саипов, 29-годишник од Узбекистан.

Саипов, кој дошол во САД во 2010 година и оттогаш живее во Флорида, со камионет влетал на велосипедската патека, газејќи пешаци и велосипедисти, а потоа во улицата Чемберс се судрил со училиштен автобус, при што повредени се двајца возрасни и две деца. По судирот, Сиапов излегол од возилото носејќи в раце нешто што наликувало на два пиштола, по што полицаец го застрелал во пределот на стомакот. Полицијата потоа кај него пронашла лажен пиштол и пиштол за игра.

Нападот се третира како терористички чин, а полицијата засега смета дека Узбекистанецот дејствувал сам.
Гувернерот на Њујорк, Ендрју Куомо, изјави дека нема докази дека станува збор за заговор од пошироки размери.


Спречен терористички напад во Германија


Берлин, 31 октомври, 2017 - 20:03 (META) 

Германскиот министер за внатрешни работи, Томас де Мајзире, соопшти дека спречиле голем терористички напад апсејќи 19-годишен Сириец.

– Денеска германските служби за безбедност успешно спречиле голем терористички напад во Германија. Операцијата е изведена во вистински момент, навреме и за да се обезбедат доволно докази и за да се спречи каква било опасност – рече де Мајзире.

Уапсениот Јамен А., кој себеси се идентификува како „војник на калифатот“, сакал да изврши терористички напад и да убие што повеќе луѓе, соопшти портпаролката на Федералното обвинителство, Фрауке Коехлер.

– Осомничениот преку социјалните мрежи имал контакт со лице кое себеси се нарекува војник на калифатот, војник на таканаречената Исламска држава. Во моментов не знаеме кое е лицето. Не знаеме ни како тоа контакт лице го охрабрувал или дури го поддржувал осомничениот на таков акт – рече Коехлер.

Специјалните сили во акцијата која била изведена во раните утрински часови во населба во градот Шеверин, главен град на покраината Мекленбург-Форпомерн, уапсиле 19-годишен исламист.

Како што е соопштено, тој од јули подготвувал бомбашки напад. Полицијата истражува дали сам го подготвувал нападот или постоела мрежа соучесници.

Истражителите соопштиле дека постои „основано сомнение“ дека момчето планирало да изведе „терористички напад“, но дека во моментов не постои опасност.


Терорист уби две жени на железничка станица во Марсеј


Марсеј, 1 октомври, 2017 - 16:37 (META) 

Две жени денеска беа убиени со нож од напаѓач кој на железничката станица во Марсеј извикувал „Алах е голем“. Тој потоа бил погоден и убиен од војниците кои интервенирале.

Полицијата вели дека според досегашните сознанија, станува збор за терористички напад.

Во моментов кај станицата и пошироко се спроведува голема безбедносна операција.

Марсеј во август искуси два слични напади, а во изминативе две години имаше десетици жртви во терористички напади.

Сличен напад вчеравечер се случил во канадскиот град Едмонтон.


Терорист со камион повреди петмина во Канада


Едмонтон, 1 октомври, 2017 - 14:01 (META) 

Пет луѓе се повредени од 30-годишник кој вчеравечер во канадскиот град Едмонтон првин со нож избодел полицаец, а потоа со изнајмен камион од фирмата „У хаул“ удрил пешаци додека бегал од полицијата. Откако ги повредил луѓето, камионот се превртел и напаѓачот е уапсен.

Според канадските медиуми, во кабината било пронајдено знаме на терористичката мрежа Исламска држава. Полицијата го испрашува уапсениот, а според досегашните информации, дејствувал сам.

Инцидентот се случил пред стадионот „Комонвелт“, околу 20 часот по локално време вчера. Првин камионот со голема брзина удрил во барикада на сообраќајната полиција, по што еден полицаец летнал неколку метри. Потоа возачот излегол и неколкупати со нож го избодел паднатиот полицаец, па избегал со камионот.

По четири часа, полицијата му сигнализирала на камионот да застане на друга барикада, но возачот избегал и почнала полициска потера. Таа завршила така што терористот возејќи удрил четворица пешаци, а потоа камионот се превртел.


Уапсен шести осомничен за нападот во лондонското метро


Лондон, 21 септември, 2017 - 16:20 (META) 

Британската полиција уапси 17-годишно момче поради поврзаност со минатонеделниот терористички напад во лондонското метро, пренесуваат британските медиумите.

Тинејџерот е шестиот уапсен во врска со бомбашкиот напад, кој се случи на 15. септември во близина на метро-станицата Парсонс грин, а во кој беа повредени 30 лица, јавува „Би-би-си“.

Сите шестмина уапсени се задржани и остануваат во притвор во полициска станица во јужен Лондон.

Началникот на одделот за борба против тероризмот во Скотланд јард, Дин Хајден изјавил дека истрагата се одвива многу брзо.

„Досега се уапсени шест лица, а продолжуваат претресите на уште пет локации. Инспекторите се обидуваат да ги утврдат сите детали и сите факти поврзни со нападот“, изјавил Хајден.


Лондон со остри критики до Трамп поради „твитовите“ за терористичкиот напад


Лондон, 17 септември, 2017 - 14:53 (META) 

Високиот британски функционер Демијан Грин денеска го критикуваше претседателот на САД, Доналд Трамп, поради неговите пораки на „Твитер“ во врска со полициската истрага за терористичкиот напад во метро-станицата во Лондон.

Грин, кој ја има почесната титула прв државен секретар, за „Скај њуз“ изјавил дека „твитот“ на Трамп за полициската истрага не бил од помош. Тој ѝ се придружи на британската премиерка Тереза Меј која во петокот, исто така, го критикуваше Трамп за истата порака.

Американскиот претседател во петокот, по бомбашкиот напад во кој беа повредени 29 лица, на „Твитер“ напиша дека извршителите ѝ биле познати на британската полиција. Тој во неколку твитови експлозијата во Лондон ја оцени како напад на „терористи – губитници“ и алудираше дека лондонската полиција пропуштила да ги спречи.

Грин ги замолил сите, од претседателот на САД, па натаму, да не пишуваат пораки на „Твитер“ додека трае полициската истрага за терористичкиот напад.

Тој додал дека разузнавачка соработка меѓу САД и Велика Британија постои и дека таа помага граѓаните да бидат безбедни.


Убиен главниот осомничен за нападот во Барселона, потврди полицијата


Барселона, 21 август, 2017 - 19:17 (META) 

Шпанската полиција потврди дека го убила 22-годишниот Јунес Абујакуб, главниот осомничен за терористичкиот напад во центарот на Барселона, во кој загинаа 13 лица, а над 100 беа повредени, јавуваат светските агенции.

Абујакуб е осомничен дека го возел белото комби кое влета во маса луѓе на улицата Ла Рамбла.

Претходно, полицијата соопшти дека застрелала едно лице кое носело појас со експлозив, во областа Субиратс, оддалечено околу 40 километри од Барселона.

Шпанските медиуми јавуваат дека Абујакуб пред да биде застрелан, извикал „Алаху Акбар“ (Господ е голем).

Специјалната противдиверзантска едница на полицијата користела робот за да го симне појасот од телото на убиениот.

Јунес Абујакуб по бегството од местото на нападот во четвртокот, убил возач на автомобил, кој го искористил за да побегне, потврди полицијата.

Во нападот во центарот на Барселона во четвртокот загинаа 13 лица, додека 130 беа повредени, кога комби влета во пешаци на улицата Ла Рамбла.

Неколку часа по овој напад, едно лице беше убиено, а шестмина беа ранети во напад со автомобил на шеталиште во Камбрилс, околу 120 километри јужно од Барселона.

Одговорноста за нападите ја презеде терористичката организација Исламска држава.