!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Куршумите на терористот не можат да ја убијат предноста на соперникот на Ле Пен


Париз, 21 април, 2017 - 15:25 (META) 

По синоќешниот напад на булеварот Шанзелизе, срцето на Париз, кој, веројатно е терористички напад, куршумите на терористот освен што убија еден полицаец и ранија двајца, можеби и ќе „ја убијат“ предноста на поранешниот министер за економија, Емануел Макрон, кој е на првата позиција на ранг-листите пред десничарката Марин ле Пен, која е втора, шпекулираат некои од светските медиуми.

Нападот во кој „неутрализираниот“, односно убиениот терорист не нападна граѓани, туку пукаше во полицајци, некаде на половина пат помеѓу Триумфалната капија и плоштадот Конкорд, се случи во време кога течеше ТВ-дебата на сите 11 кандидати за функцијата претседател.

Изборите се в недела, а не случајно е избран ваков момент за нападот, оти екстремистите сакале да повлијаат на тонот на дебатата, анализира британскиот весник „Дејли телеграф“.

Доколку тоа било целта, забележан е успех, оти лидерката на крајно десната партија Национален фронт, Марин ле Пен, и конзервативецот Франсоа Фијон ги откажаа своите средби со избирачи на ден пред изборнот молк. Кога веста ги затекна сред дебатата, сите кандидати си ги сменија завршните зборови. „Доволно со лабавоста, доволно со наивноста“, рече Ле Пен.

Нејзиниот соперник Франсоа Фијон, пак, порача дека борбата против тероризмот мора да биде апсолутен приоритет на следниот претседател.

Но, иако најновите анкети сè уште ја позиционираат ултадесничкарката на втората позиција, изгледа дека предноста на Ле Пен полека се топи. Според денеска објавената анкета на „Елаб“, Макрон останува цврсто на 24 отсто, додека Ле Пен има 21,5 отсто поддршка, односно 0,5 проценти помалку отколку пред три дена.

Така, иако денеска некои политички аналитичари велат дека е можно нејзиниот рејтинг да се зголеми, други предупредуваат дека и досегашните терористички напади не создале посериозен напредок на рејтингот на крајната десница.


Повеќе од 500 лица испитани во полиција за нападот во Стокхолм


Стокхолм, 9 април, 2017 - 14:58 (META) 

Шведското јавно обвинителство соопшти дека има уште еден притворен за терористичкиот напад во петокот во центарот на Стокхолм, во кој загинаа четири лица, а 15 беа повредени.

Досега повеќе од 500 луѓе се испитани во врска со нападите.

Осомничениот во меѓувреме доби и службен бранител.

Сите жртви на нападот се идентификувани. Двајца се Швеѓани, еден е Британец, а еден Белгиец. Полицијата соопшти дека во моментот нема сознанија за можност за нови напади.

Осомничениот за нападот, 39-годишен Узбекистанец, барал постојан престој во Шведска во 2014 година, но молбата му била отфрлена и требало да биде депортиран. Полицијата вели дека имал симпатии кон терористички организации,  меѓу кои и Исламска држава.


Терористот од Стокхолм бил на нишан на властите во 2015 година


Стокхолм, 8 април, 2017 - 15:46 (META) 

Шведска можела уште пред една или две години да ја избегне вчерашната трагедија, кога терорист со украден камион влета во стоковна куќа во центарот на Стокхолм и уби четири лица, а повреди уште 15. На денешната прес-конференција на шведската полиција беше кажано дека уапсениот за нападот, 39-годишниот Узбекистанец, двапати го предизвикал вниманието на безбедносните сили.

Во 2015 година тој и група негови сонародници биле следени од финансиската полиција поради измами со фалсификати фактури и исплатници по добиена информација дека парите доаѓаат од Исламска држава. Но, иследниците не успеале да откријат врска помеѓу Узбекистанците и терористичката организација. Така, имало судење за обична финансиска измама, по што пресуди имало за тројца од петтемина, а другите двајца биле ослободени. Тие живееле на иста адреса со напаѓачот.

Минатата година полицијата добила дојава дека треба да се испита 39-годишниот Узбекистанец, но ни тогаш не била докажана врска помеѓу него и Исламска држава.

– Но, во оваа фаза, доказите против него стануваат уште посилни. Не исклучуваме дека има вклучени повеќе луѓе. Не можеме да кажеме колку луѓе сакал да убие, но со сигурност имал злобни намери – рече Дан Елиасон, шефот на националната полиција на Шведска.

Тој кажа дека во камионот имало експлозивна направа.

Узбекистанецот во меѓувреме доби и адвокат. Според медиумите, станува збор за еден од најпознатите бранители по службена должност во Шведска, Јохан Ериксон.


Уапсениот вчера во Стокхолм е најверојатно терористот


Стокхолм, 8 април, 2017 - 10:28 (META) 

Човекот што вчера беше уапсен во Стокхолм, според портпарол на полицијата во Стокхолм, е најверојатно возачот на камионот кој влета во толпа луѓе и уби 4 лица.  Тој бил уапсен вчера, откако полицијата објави негова снимка од безбедносните камери.

– Се сомневаме дека уапсениот е извршител на терористичкиот напад. Можеби има и други луѓе поврзани со него, но тоа во овој момент не го знаеме – изјави полицискиот портпарол Ларс Бистром.

Обвинителството претходно соопшти дека приведеното лице е под сомнение за „извршено убиство преку терористички чин“.

Едно лице со украден камион за пиво вчера влета во стоковна куќа во центарот на Стокхолм.

Шведските безбедносни структури не го соопштија идентитетот на човекот кој беше снимен од камерите за надзор и чија фотографија беше објавена во јавноста. Шведскиот весник „Афтонбладет“ пишува дека станува збор за 39-годишен Узбекистанец, симпатизер на терористичката милиција Исламска држава.
Доцна синоќа беше објавено и дека има уште еден уапсен во врска со нападот во кој загинаа четиримина, 15 се повредени, од кои 9 тешко. Но полицијата не го потврди тоа.


Еден уапсен за терористичкиот напад во Стокхолм


Стокхолм, 7 април, 2017 - 20:49 (META) 

Еден маж кој признал одговорност за нападот во Стокхолм е уапсен во северен Стокхолм, јави локален шведски весник.

Полицијата го потврди тоа, но кажа дека уште не е утврдено дали е тоа сторителот. Инаку, според официјалните информации бројката на загинати е четворица, 15 луѓе се повредени, од кои девет се со тешки повреди.

Во секој момент се очекува да проработи и метрото во Стокхолм, кое беше затворено во рамките на големата безбедносна операција.

Едно лице со украден камион за пиво денеска влета во стоковна куќа во центарот на Стокхолм.

Покрај мртвите, има и многу повредени, а на улицата Дротнингатан во делот на Стокхолм познат по продавници, има и траги на крв.


Во Стокхолм се трага по напаѓачот кој влета со камион во стоковна куќа


Стокхолм, 7 април, 2017 - 19:19 (META) 

Полицијата уште трага по возачот на украдениот камион за пиво кој денеска влета во стоковна куќа во центарот на Стокхолм и уби тројца. Откако шведскиот премиер Стефан Лотфен нападот го оквалификува како „најверојатно терористички напад“, центарот на Стокхолм беше затворен.

Шведската полиција попладнево рече дека возачот очигледно избегал по нападот, иако претходно премиерот Лотфен рече дека тој бил уапсен. Полицијата објави фотографија од маж со качулка, кого го бара во врска со нападот.

Во моментов се одвиваа потрага, а во Стокхолм силно наоружани полицајци патролираат по улиците, а над градот летаат полициски хеликоптери.

Покрај мртвите, има и многу повредени, а на улицата Дротнингатан во делот на Стокхолм познат по продавници, има и траги на крв.

Според очевидци, камионот, чија кабина по ударот се запалила, удрил и детска количка со дете во неа.

– Се свртев и видов камион како оди накај мене. Вртеше лево-десно. Не изгледаше дека возачот загубил контрола, се гледаше дека се обидува да удира луѓе. Удри и детска количка со дете во неа, ја здроби – вели очевидецот Глен Форан, Австралиец кој бил во туристичка посета на Стокхолм.

Друг сведок раскажува дека глетката била ужасна, многу луѓе бегале во паника, а некои доаѓале да им помогнат на повредените. На една жена и било отсечено стапалото.


Центарот на Стокхолм затворен за сообраќај, евакуирани владините објекти


Стокхолм, 7 април, 2017 - 17:08 (META) 

Три лица загинаа, а повеќе се повредени откако камион влета во пешачка улица во Стокхолм, пред да удри во продавница, потврди полицијата.

Шведскиот премиер Штефан Лофвен изјави дека сите детали од инцидентот посочуваат дека станува збор за терористички напад.

Иако премиерот соопшти дека осомничениот е приведен, полицијата вели дека засега не може да потврди дека некој е уапсен.

Шведската полиција издаде предупредување да се избегнува центарот на Стокхолм. Сите метро-станици и трамваи се запрени, а централната железничка станица е евакуирана.

Сите владини институции се затворени по нападот, а министрите се однесени на безбедно место.


Руски државјанин роден во Киргистан осомничен за нападот во Санкт Петербург


Санкт Петербург, 4 април, 2017 - 11:04 (META) 

Руски државјанин, роден во Киргистан е осомничен за бомбашкиот напад во воз, во метрото во Санкт Петербург во кој, вчера загинаа 14 лица, а 49 беа повредени, јавуваат руските агенции, повикувајќи се на службите за безбедност во земјата.

Киргистанските безбедносни служби, како што пренесува „Би-би-си“, го идентификувале напаѓачот како Акбарзон Јалилов, кој, според информациите, бил роден во градот Ош во 1995 година.

Инаку, претходно осомничен беше маж со брада, кој беше снимен од безбедносните камери, но тој, според информациите на медиумите, сам се пријавил во полиција, по што било утврдено дека не е поврзан со нападот.

Рускиот претседател Владимир Путин, кој беше во посета на Санкт Петербуг кога се случи нападот, синоќа го посетил местото на експлозијата каде положил букет цвеќе на влезот од метрото.

Советот за безбедност на Обединетите нации го осуди „варварскиот и кукавички терористички напад“ во Санкт Петербург и повикал сторителите на злосторството да бидат изведени пред лицето на правдата.

Американскиот претседател Доналд Трамп, како што соопшти Белата куќа, телефонски разговарал со рускиот претседател Владимир Путин, при што му изразил сочуство и му дал целосна поддршка во борбата против тероризмот.

„Претседателот Трамп и претседателот Путин се сложија дека е потребно тероризмот дефинитивно и брзо да биде совладан. Претседателот Трамп ја понуди целосната поддршка на американската влада во одговорот кој Москва ќе го даде по убиствениот напад во метрото во Санкт Петербург и ќе пружи помош одговорните да се изведат пред суд“, било наведно во соопштението од Белата куќа, пренесуваат светските агенции.


Лондон: Уапсени осум лица кои подготвувале терористички напад


Лондон, 23 март, 2017 - 20:59 (META) 

Британската полиција привела осум лица по вчерашниот напад во Лондон, под сомнение дека подготвувале терористички напад, јавуваат британските медиуми.

Како што соопшти лондонската полиција, седум луѓе се уапсени во Бирминген, а еден во Лондон.

Во меѓувреме, продолжуваат полициските операции во Брајтон, во источен Лондон, во Кармартаншар и во Велс. Извршени се претреси во неколку домови.

Во вчерашниот напад во Лондон загинаа пет лица, а 40 се повредени. Меѓу нив има еден полицаец, тројца цивили и напаѓачот, кого полицијата го уби.


Во терористичкиот напад во Лондон има четворица загинати и 20 повредени


Лондон, 22 март, 2017 - 19:49 (META) 

Четири лица загинаа, а 20 се повредени во Лондон, при истрелите од огнено оружје пред британскиот парламент во Вестминстер, кои се случија денеска попладне.

Британската полиција овој напад го оквалификува како терористички.

Според пишувањата на британските медиуми, напаѓачот најпрво со автомобил се втурнал во група пешаци на мостот што води до парламентот, а потоа со нож прободел полицаец пред Вестминстер. Напаѓачот потоа бил застрелан од полицијата.

Поради инцидентот, парламентот беше затворен, а засега никој не ја презеде одговорноста за нападот.