!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Во Мали убиени двајца членови на делегација на ЕУ, потврди Могерини


Бамако, 19 јуни, 2017 - 19:35 (META) 

Високата претставничка за надворешна политика на Европската Унија, Федерика Могерини, потврди дека двајца членови на делегација на ЕУ се убиени во терористички напад во луксузно летувалиште во Мали.

– Едната жртва е наш колега од Португалија, кој беше дел од воената мисија на ЕУ во Бамако, а исто така убиена е и членка на делегацијата на ЕУ од Мали – изјави Могерини на конференција за новинари одржана по состанокот на министрите за надворешни работи на ЕУ и на Луксембург.

Нападот се случи во неделата во туристичкото одморалиште во Мали, кое е популарно помеѓу туристите од Западот.

Според последните информации, во нападот се убиени најмалку четири лица, а една личност се води како исчезната.

Безбедносните сили успеале да спасат 36 заложници, меѓу кои биле и 13 француски државјани.


Уапсени 12 лица под сомневање за поврзаност со терористичкиот напад во Лондон


Лондон, 4 јуни, 2017 - 18:59 (META) 

Бритаската полиција уапсила 12 лица поради сомнежи за повразност со синоќешниот терористички напад во кој загинаа седум лица, а 48 се повредени, пренесува „Би-би-си“.

Апсењата биле извршени во предградието Баркинг, во источен Лондон, а уследиле по претресот на стан, сопственост на еден од тројцата напаѓачи.

Терористичкиот напад се случи синоќа, околу 22 часот, кога бело комби прегази пешаци на Лондонскиот мост, по што тројца напаѓачи излегле надвор и со ножеви изболе неколку луѓе во близина на Бороу маркет.

Тројцата напаѓачи, кои носеле лажни појаси за експлозив, се убиени во интервенцијата на полицијата. Тие биле застрелани од осуммина полицајци кои испукале 50 куршуми. Во интевенцијата, како што соопшти лондонската полиција, бил погоден и случаен минувач, кој се нашол на местото. Тој бил веднаш хоспитализиран и останува во болница, но е надвор од животна опасност.

Според полицијата, вкупно 36 лица, повредени во терористичкиот напад, се наоѓаат во болница, од кои 21 лице се во критична состојба.


Иванов упати сочувство до кралицата Елизабета Втора и го осуди нападот во Лондон


Скопје, 4 јуни, 2017 - 17:31 (META) 

Претседателот на државата, Ѓорге Иванов, денеска упати сочувство до британската кралица Елизабета Втора по повод терористичкиот напад во Лондон, во кој загинаа седум лица, а 48 беа повредени.

„Со шок и со огорченост ја примив веста за терористичкиот напад во Лондон, во кој животот го загубија голем број невини лица и каде има голем број повредени. Во овие мигови на длабока тага, дозволете ми во име на граѓаните на Република Македонија, да изразам искрено сочувство и да Ве охрабрам во истрајноста и во решителноста во борбата со насилството и со злосторничките акти, без разлика од каде и од што се мотивирани. Сакам да Ве уверам дека Република Македонија најостро осудува секакви терористички напади, кои шират страв и од кои никој и никаде не е безбеден, и силно го поддржува Обединетото Кралство во решителната борба против тероризмот, како услов на патот кон мирот, стабилноста и напредокот. Ваше Величество, нашите мисли и молитви се со Вас и со семејствата на жртвите“, стои во телеграмата од претседател Иванов.

Телеграма со сочуство до премиерката на Велика Британија, Тереза Меј, упати и лидерот на ВМРО-ДПМНЕ, Никола Груевски.

„Би сакал да изразам најдлабоко сочувство до Вас, до семејствата на настраданите и до мирољубивиот народ на Англија. Нашите мисли и молитви се со Вас. Овој срамен чин кој се случи вчера ги вознемири и потресе македонските граѓани. Овој срамен чин вчера беше директен и брутален напад врз општеството и човечките вредности. Сите ние заедно сме исправени пред предизвикот наречен тероризам. Република Македонија и граѓаните одлучно се решени, заедно со цивилизираниот и демократскиот свет, да дејствуваат во борбата против тероризмот. Таа борба против тероризмот никогаш нема да запре, а ние никогаш не смееме да се откажеме“, стои во телеграмата од Груевски.


Заев до Меј: Македонија решително стои до Британија против насилството и тероризмот


Скопје, 4 јуни, 2017 - 15:05 (META) 

Премиерот на Македонија, Зоран Заев, денеска испрати телеграма со сочувство дo премиерката на Велика Британија, Тереза Меј, по синоќешниот терористички напад во Лондон, во кој животите ги загубија седум лица, а 48 се повредени.

„Во име на граѓаните на Република Македонија, на Владата на Република Македонија и во мое лично име изразувам длабоко сочувство до семејствата на загинатите во ужасниот напад во Лондон, до Владата на Велика Британија и до граѓаните на Британија. Најостро го осудуваме овој кукавички напад врз невини жители на Лондон, на Лондонскиот мост и во околните ресторани, меѓу кои има и посетители на Лондон“, се наведува во телеграмата.

Секој акт на загрозување човечки животи, каде и да се случи, се нагласува во телеграмата, е загрозување на слободата и на спокојот на целото човештво.

„Се солидаризираме со граѓаните на Велика Британија и цврсто и решително застануваме на страната на Британија. Потребно е да се дејствува мудро и внимателно во интерес на мирот во Велика Британија и во светот. Уверени сме дека истрагата ќе ги расветли докрај мотивите за нападот и нарачателите, а инволвираните ќе се соочат со правдата. Република Македонија е подготвена да помогне и да дејствува обединето со демократскиот цивилизиран свет во справувањето со сите облици на насилство и тероризам. Нашите мисли и молитви се со граѓаните на Велика Британија“, напиша премиерот Заев во телеграмата до британската премиерка Меј.


МНР: Нема загинати или повредени македонски државјани во нападот во Лондон


Скопје, 4 јуни, 2017 - 14:49 (META) 

Во терористичкиот напад што синоќа се случи во Лондон, според досегашните информации, меѓу жртвите и повредените нема македонски државјани, соопшти македонското Министерство за надворешни работи.

„Министерството за надворешни работи на Република Македонија силно го осудува синоќешниот терористички напад во Лондон, во кој, според досегашните информации, животот го загубија 7 лица, а 48 се повредени. Министерството за надворешни работи е во постојана комуникација со Амбасадата на Република Македонија во Лондон. МНР ја известува јавноста дека Амбасадата стапи во контакт со Метрополитен полицијата и потврдува дека засега меѓу жртвите и повредените не се евидентирани македонски државјани“, стои во соопштението на МНР.

Оттаму информираат дека за прашања поврзани со безбедноста на македонските граѓани кои во моментот се наоѓаат во Лондон, заинтересираните може да се обратат во македонската амбасада во Лондон и во Министерството за надворешни работи.


Меј најави ревизија на британската стратегија за борба против тероризмот


Лондон, 4 јуни, 2017 - 13:48 (META) 

Премиерката на Велика Британија, Тереза Меј, осудувајќи го терористичкиот напад во кој загинаа седум лица, а 48 беа повредени, рече дека „е време да се каже доста е“, пренесува „Би-би-си“.

Меј, како што наведува британскиот национален сервис, најавила ревизија на стратегијата на земјата за борба против тероризмот.

Терористичкиот напад се случи синоќа, околу 22 часот, кога бело комби прегази пешаци на Лондонскиот мост, по што тројца напаѓачи излегле надвор и со ножеви изболе неколку луѓе во близина на Бороу маркет.

Тројцата напаѓачи, кои носеле лажни појаси за експлозив, се убиени во интервенцијата на полицијата.

Станува збор за трет терористички напад во Велика Британија за три месеци, кој следи по нападот со автомобил и со нож во Вестминистер во март, во кој загинаа пет лица, и бомбашкиот напад за време на концерт во Манчестер, пред околу две недели, кога загинаа 22 лица.

Синоќешниот напад се случува пет дена пред предвремените парламентарни избори во Велика Британија кои треба да се одржат в четврток.

Најголем дел од политичките партии ги прекинаа своите изборни кампањи, по синоќешниот напад. Сепак, премиерката Меј изјави дека кампањите ќе продолжат утре и дека изборите ќе се одржат в четврток, како што е планирано.

„Не смее да му се дозволи на насилството да го наруши демократскиот процес“, истакнала Меј, пренесува „Би-би-си“.


Египет како одговор на масакрот бомбардираше кампови на терористите


Каиро, 26 мај, 2017 - 23:34 (META) 

Египетски борбени авиони ги нападнаа камповите на терористите по масакрот на коптски христијани во Египет, соопшти претседателот Абдел Фатах Сиси. Нападите се извршени во источниот дел на Либија.

Претседателот на Египет вети дека ќе продолжи да ги напаѓа базите користени за обука на милитанти што вршат терористички напади во неговата земја, без оглед на чија територија се наоѓаат.

Сиси нагласи дека дека земјите што ги финансираат, обучуваат и вооружуваат терористите не треба да поминат неказнето.

Египет изврши шест воздушни напади во Дерна во источниот дел на Либија, јави египетската државна телевизија.

Денеска вооружени напаѓачи пукале на автобус кој превезувал коптски христијани во провинцијата Миња, при што загинале 28 лица, а 24 се повредени Нападот се случил додека коптите патувале од провинцијата Бени Суеф до манастирот Анба Самуел, во близина на Миња.


Куршумите на терористот не можат да ја убијат предноста на соперникот на Ле Пен


Париз, 21 април, 2017 - 15:25 (META) 

По синоќешниот напад на булеварот Шанзелизе, срцето на Париз, кој, веројатно е терористички напад, куршумите на терористот освен што убија еден полицаец и ранија двајца, можеби и ќе „ја убијат“ предноста на поранешниот министер за економија, Емануел Макрон, кој е на првата позиција на ранг-листите пред десничарката Марин ле Пен, која е втора, шпекулираат некои од светските медиуми.

Нападот во кој „неутрализираниот“, односно убиениот терорист не нападна граѓани, туку пукаше во полицајци, некаде на половина пат помеѓу Триумфалната капија и плоштадот Конкорд, се случи во време кога течеше ТВ-дебата на сите 11 кандидати за функцијата претседател.

Изборите се в недела, а не случајно е избран ваков момент за нападот, оти екстремистите сакале да повлијаат на тонот на дебатата, анализира британскиот весник „Дејли телеграф“.

Доколку тоа било целта, забележан е успех, оти лидерката на крајно десната партија Национален фронт, Марин ле Пен, и конзервативецот Франсоа Фијон ги откажаа своите средби со избирачи на ден пред изборнот молк. Кога веста ги затекна сред дебатата, сите кандидати си ги сменија завршните зборови. „Доволно со лабавоста, доволно со наивноста“, рече Ле Пен.

Нејзиниот соперник Франсоа Фијон, пак, порача дека борбата против тероризмот мора да биде апсолутен приоритет на следниот претседател.

Но, иако најновите анкети сè уште ја позиционираат ултадесничкарката на втората позиција, изгледа дека предноста на Ле Пен полека се топи. Според денеска објавената анкета на „Елаб“, Макрон останува цврсто на 24 отсто, додека Ле Пен има 21,5 отсто поддршка, односно 0,5 проценти помалку отколку пред три дена.

Така, иако денеска некои политички аналитичари велат дека е можно нејзиниот рејтинг да се зголеми, други предупредуваат дека и досегашните терористички напади не создале посериозен напредок на рејтингот на крајната десница.


Повеќе од 500 лица испитани во полиција за нападот во Стокхолм


Стокхолм, 9 април, 2017 - 14:58 (META) 

Шведското јавно обвинителство соопшти дека има уште еден притворен за терористичкиот напад во петокот во центарот на Стокхолм, во кој загинаа четири лица, а 15 беа повредени.

Досега повеќе од 500 луѓе се испитани во врска со нападите.

Осомничениот во меѓувреме доби и службен бранител.

Сите жртви на нападот се идентификувани. Двајца се Швеѓани, еден е Британец, а еден Белгиец. Полицијата соопшти дека во моментот нема сознанија за можност за нови напади.

Осомничениот за нападот, 39-годишен Узбекистанец, барал постојан престој во Шведска во 2014 година, но молбата му била отфрлена и требало да биде депортиран. Полицијата вели дека имал симпатии кон терористички организации,  меѓу кои и Исламска држава.


Терористот од Стокхолм бил на нишан на властите во 2015 година


Стокхолм, 8 април, 2017 - 15:46 (META) 

Шведска можела уште пред една или две години да ја избегне вчерашната трагедија, кога терорист со украден камион влета во стоковна куќа во центарот на Стокхолм и уби четири лица, а повреди уште 15. На денешната прес-конференција на шведската полиција беше кажано дека уапсениот за нападот, 39-годишниот Узбекистанец, двапати го предизвикал вниманието на безбедносните сили.

Во 2015 година тој и група негови сонародници биле следени од финансиската полиција поради измами со фалсификати фактури и исплатници по добиена информација дека парите доаѓаат од Исламска држава. Но, иследниците не успеале да откријат врска помеѓу Узбекистанците и терористичката организација. Така, имало судење за обична финансиска измама, по што пресуди имало за тројца од петтемина, а другите двајца биле ослободени. Тие живееле на иста адреса со напаѓачот.

Минатата година полицијата добила дојава дека треба да се испита 39-годишниот Узбекистанец, но ни тогаш не била докажана врска помеѓу него и Исламска држава.

– Но, во оваа фаза, доказите против него стануваат уште посилни. Не исклучуваме дека има вклучени повеќе луѓе. Не можеме да кажеме колку луѓе сакал да убие, но со сигурност имал злобни намери – рече Дан Елиасон, шефот на националната полиција на Шведска.

Тој кажа дека во камионот имало експлозивна направа.

Узбекистанецот во меѓувреме доби и адвокат. Според медиумите, станува збор за еден од најпознатите бранители по службена должност во Шведска, Јохан Ериксон.