По тепачката на Роберт Димитров во дискотека, полицијата и обвинителството почнаа истрага


Штип, 22 октомври, 2018 - 13:39 (META) 

Во исчекување на првичните наоди од истрагата на Основното јавно обвинителство за инцидентот вчера ноќта во дискотеката „Клик“ од Штип, полицијата излезе со официјална потврда на настанот, во кој учествувал основачот на „Телекабел“, Роберт Димитров. Во инцидентот со тешки телесни повреди во болница заврши сопственикот на кафулето „Илужн“, Ацо Панов.

Според соопштението на СВР Штип, настанот се случил во неделата, 21 октомври, во 2:55 часот, кога „Р.Д. (45) држејќи стаклено шише се доближил до масата на која седеле А.П.(34), заедно со М.К. (26), С.С. (22) и Ѓ.Ш. (35), сите од Штип, при што во еден момент Р.Д. неколку пати го удрил А.П. со шишето во пределот на главата, по што му се придружиле С.З. (28), Ф.З. (23) и Ж.К. (38), кои продолжиле со чаши и шишиња да го удираат А.П. по главата и телото. Потоа напаѓачите ја напуштиле дискотеката, а А.П. е пренесен во Клиничката болница во Штип“, соопшти СВР Штип.

Со оглед на констатираните тешки телесни повреди, на инцидентот работи и Основното јавно обвинителство од Штип.

Од Клиничката болница потврдија дека Панов има поголема расеченица на главата и повреди по ‘рбетот и телото.

Во текот на вчерашниот ден се сослушуваа учесниците и сведоците во инцидентот. Остана непотврдена информацијата дека Роберт Димитров ја напуштил државата и заминал во Грција, каде има свој бизнис.

„Мета“ се обиде телефонски да контактира со Роберт Димитров, но телефонот му беше исклучен. Контактиравме и со адвокат на Димитров, но тој посочи дека во оваа фаза не може да даде каква било изјава.

Повредениот Ацо Панов, во изјава за „Канал 77“ го посочи Димитров како иницијатор на тепачката.

– Седев со друштвото во дискотека „Клик“, кога одеднаш Роберт Димитров без никаква причина ме нападна, земајќи го шишето од масата и удирајќи ме по главата. Оттука му се приклучија од неговото друштво, кои што беа со него, поранешниот затвореник Здравко Коцев, неговото обезбедување и некои негови другари, кои беа таму со него. Ме нападнаа и фрла со чаши, со шишиња, со сè што имаше по масата – вели Панов.

На ова претходи инцидент од пред два месеци, во кој биле вмешани Панов и момчето на внуката на Роберт Димитров.  Расправијата во кафулето на Панов, продолжила на улица, кога дошло и до физичка пресметка. На случајот работеа полицијата и обинителството.


Приведени 15 малолетници кои учествувале во тепачка и каменувале автобус на ЈСП во Ченто


Скопје, 1 февруари, 2018 - 22:38 (META) 

Петнаесет малолетници вечерва се приведени поради учество во тепачка меѓу две групи на улицата Алија Авдовиќ во скопската населба Ченто, потврди Министерството за внатрешни работи.

Едната група, која учествувала во тепачката каменувала автобус на Јавното сообраќајно претпројатие „Скопје“ број 65 б, кој сообраќал на релација Транспортен центар – Брњарци, при што се искршени четири стакла од автобусот.

Случајот во полиција го пријавил возачот на автобусот околу 19.30 часот.

Полициски екипи веднаш излегле на терен и во полициската станица Гази Баба привеле петнаесетина лица од двете групи за целосно расчистување на случајот.


Неколкучасовна масовна тепачка во мигрантски камп на Лезбос


Атина, 20 декември, 2017 - 11:30 (META) 

Најмалку седум мигранти се повредени во тепачка во прифатен центар за мигранти на островот Лезбос, соопштија денеска властите.

Полицијата соопшти дека масовната тепачка меѓу Арапи и Курди во кампот Морија се случила викендов, ноќта меѓу сабота и недела. Инцидентот траел неколку часа, при што неколку шатори во кампот се запалени.

Активистите за заштита на човековите права и властите на Лезбос веќе подолго предупредуваат на лошите услови во кампот за мигранти, кој веќе со месеци нема капацитет да ги задоволи потребите на стационираните.

Според договорот ЕУ – Турција, за запирање на нелегалната миграција, мигрантите кои доаѓаат на грчките острови остануваа се додека не се разгледаат нивните барања за азил.


За дивеењето на Бит-пазар, во полиција повикани малолетници и тројца возрасни


Скопје, 20 октомври, 2017 - 15:59 (META) 

Заради расчистување на вчерашното дивеење на булеварот Крсте Мисирков во Скопје, близу Битпазар, полицијата повикала седум малолетници и тројца возрасни на разговор во полициската станица „Битпазар“.

Како што соопштува МВР, во инцидентот во кој повреди добиле три лица, кои побарале лекарска помош во Ургентен центар и по интервенцијата биле пуштени на домашно лекување, учествувале голем број лица. Во полициска станица се повикани 10 лица, од кои седум малолетници и тројца возрасни, меѓу кои и возачот на двокатниот автобус кој соообраќал на линијата 50.


Тепачка на гласачко место во Бутел


Скопје, 15 октомври, 2017 - 11:18 (META) 

На гласачко место во основното училиште „Петар Здравковски Пенко“ во Скопје утрово во 10 часот се степале двајца гласачи. Гласачите се отстранети од местото и гласањето продолжило непречено.

Тепачката се случила во училиштето, по што реагирало полициското обезбедување, кое не ги привело, туку само направило записник.

Двајцата гласачи се поткачиле на разминување и почнале да се туркаат, по што си размениле и тупаници.

Училиштето се наоѓа меѓу општините Бутел и Чаир и таму гласаат жителите од двете општини.


Амди Бајрам ќе бара оставка од Спасовски поради прекршочната пријава за син му


Скопје, 5 октомври, 2017 - 15:14 (META) 

Одлуката на министерот за внатрешни работи е партиски донесена и монтирана, вели пратеникот Амди Бајрам за одлуката на МВР за физичката пресметка во Шуто Оризари да поднесе прекршочни пријави за осум лица, меѓу кои и градоначалникот на општината Елвис Бајрам.

– Го обвинува градоначалникот на Шуто Оризари, Елвис Бајрам, и шест луѓе дека предизвикале општа тепачка, а всушност станува збор за обид за убиство со секири и со прачки. Министерот вети дека нема да се гледа политичка страна, но тоа не се случи. Тој е министер на сите граѓани, а не само на СДСМ. Лага е дека Елвис Бајрам со шест луѓе извршил напад. Истрагата не е добро спроведена и случајот е монтиран. Не нападнал Елвис. Министерот не си ја знае својата должност и, според мене, целото сценарио е негово. Излегува и обвинува дека Елвис предизвикал општа тепачка, а тој бил нападнат со секири и со прачки – смета Амди Бајрам.

Според пратеникот, на вчерашниот митинг на СДСМ во Шуто Оризари, луѓето што го нападнале син му стоеле зад Зоран Заев, Петре Шилегов, Курто Дудуш и зад Самка Ибраимовски.

– За оваа работа ќе барам оставка од министерот во Собрание – додаде Бајрам.


Прекршочни пријави за Елвис Бајрам и за уште 7 лица за тепачката во Шуто Оризари


Скопје, 4 октомври, 2017 - 15:47 (META) 

Министерството за внатрешни работи поднесе прекршочни пријави против актуелниот градоначалник на Шуто Оризари и кандидат на претстојните локални избори, Елвис Бајрам, и уште седум лица за тепачката што се случи во понеделникот во Шуто Оризари.

Министерот за внатрешни работи, Оливер Спасовски, денеска на прес-конференција соопшти дека МВР го расчистило инцидентот.

Целокупниот материјал, како што рече Спасовски, е доставен до Основното јавно обвинителство Скопје.

Сега надлежното обвинителство треба да се произнесе околу понатамошното постапување по овој случај.

„Независно кој од која политичка партија доаѓа, кој чиј симпатизер е, во ваквите и слични случаи за МВР единствено примарно ќе биде почитувањето на законите, што мора и ќе важи за сите еднакво – рече Спасовски.

Тој нагласи дека секаков обид, од кого било, да се злоупотреби полицијата како „наша“ или „ваша“ ќе биде законски санкциониран.

– Ја користам можноста да ја изразам нашата категорична осуда на чинот од 2 септември, како и на сите обиди изборниот процес да се компромитира, а кај граѓаните да се создаде претстава за несигурност. Затоа МВР уште еднаш апелира до сите актери на претстојните избори да ги почитуваат демократските и нормативни стандарди. Македонската полиција нема да дозволи какво било загрозување на правото на граѓаните да го дадат својот глас на мирни, фер и демократски избори – рече Спасовски.


Пет лица повикани во полиција за нападот на Елвис Бајрам


Скопје, 3 октомври, 2017 - 15:05 (META) 

Пет лица се идентификувани и се повикани на разговор во полиција поради учество во вчерашната тепачка во општина Шуто Оризари, во која беше повреден Елвис Бајрам, актуелен градоначалник на општината и кандидат за градоначалник од коалицијата предводена од ВМРО-ДПМНЕ за претстојните локални избори.

Од Министерството за внатрешни работи додаваат дека во тек е прибирањето на доказите за понатамошна постапка.

Оттаму ги осудуваат сите облици на насилство, особено за време на изборната кампања.

„Изборниот процес е наменет за претставување на кандидатите и на нивните програми и Министерството смета дека тоа е единствениот начин преку кој граѓаните треба да бидат запознаени со учесниците во изборниот процес. Секаков обид за нарушување на демократскиот изборен процес и за загрозување на безбедноста на граѓаните ќе биде соодветно санкциониран“, стои во соопштението на МВР.

Инцидентот се случи вчера, околу 18 часот, кога Елвис Бајрам и Аднан Мемет, кој е дел од неговиот изборен штаб, првин биле соборени на земја со тупаници, а потоа биле удирани со клоци и со метални и дрвени прачки.

Бајрам беше хоспитализиран во болницата „8 Септември“, каде му беа санирани повредите.


Косовски пратеници се степаа во дебатна емисија


Приштина, 29 септември, 2017 - 21:02 (META) 

Политичката спротивставеност во Косово денеска ескалираше, откако во телевизиска дебата во живо се степаа двајца пратеници.

Во емисијата „Инфо Локале“, Фрашер Красниќи пратеник на „Самоопределување“ и Милаим Зека, пратеник на „Иницијатива“ најпрво почнаа жестока расправија, а набргу и започнаа со навреди, по што во еден момент Красниќи фрли вода кон Зека. На тоа, тој одговори со фрлање предмети, па следуваше физичка пресметка во која Красниќи со неколку тупаници го удри Зека по главата.

Водителот потоа ја прекина емисијата.


Маж тешко ранет во ресторан во скопско Батинци


Скопје, 9 септември, 2017 - 14:16 (META) 

Крвава пресметка се случила вчера во скопското село Батинци, при што еден жител на селото е тешко ранет, а полицијата трага по неговите напаѓачи.

Како што соопшти полицијата, рано попладнето дошло до тепачка во ресторан во селото, по што противниците излегле надвор и таму продолжиле да се пресметуваат. Во еден момент било стрелани кон 35-годишниот Р.А. од Батинци, при што добил прострелни рани во нозете. Потоа напаѓачите избегале со автомобил „ауди А8“.

Ранетиот бил префрлен во Градска општа болница „8 Септември“, каде му била направена операција.
По добиената информација, тим од единицата „Алфа“ го пронашол возилото на кое биле забележани оштетувања од огнено оружје. На местото на настанот било пронајдено и патничко возило „пежо“, сопственост на С.А. од селото Батинци.

СВР Скопје известува дека се работи на пронаоѓање на сторителот и на целосно расчистување на случајот.