!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Габриел: Ердоган бара непријател за да ја прикаже Турција понижена, а Западот – арогантен


Берлин, 18 март, 2017 - 13:18 (META) 

Шефот на германската дипломатија, Зигмар Габриел, денеска им порача на турските функционери дека Германија ќе им забрани да учествуваат на собири за поддршка на турскиот референдум на нејзина територија.

„Тој што ја преминува границата во однесувањето не смее да мисли дека може да ги шири своите ставови и кај нас“, вели Габриел за германскиот неделеник „Шпигел“.

Тој вели дека нема само Турција право да биде почитувана, туку дека истото право го има и Германија, додавајќи дека постојат и ограничувања, одредени од германските закони.

Тензиите помеѓу Турција и неколку европски земји почнаа пред неколку недели, откако Германија, во која живеат голем број Турци, забрани три собири за промоција на референдумот во Турција за јакнење на власта на претседателот на земјата, Реџеп Таип Ердоган.

Турскиот претседател оттогаш изразува незадоволство и упатува тешки вербални обвинувања на сметка на европските земји, а за Германија изјави дека продолжува со „нацистичката практика“.

Габриел вели дека Германија нема намера да одговори на турските провокации, бидејќи тоа би било во интерес на Ердоган.

„Нему му е потребен непријател за време на кампањата, за да ја прикаже Турција како понижена земја, а Западот како арогантен“, вели министерот за надворешни работи на Германија.

Референдумот за воведување на претседателски систем во Турција, со кој се зголемуваат овластувањата на Ердоган, е закажан за 16 април оваа година.


Иванов – Нишани: Потребно е намалување на тензиите и внимателна реторика


Баку, 16 март, 2017 - 21:01 (META) 

Претседателот на државата, Ѓорге Иванов, денеска имал средба со својот албански колега, Бујар Нишани, во Баку, Азербејџан, на која го повторил ставот дека „начинот на кој се донесе пост-изборната платформа на партиите од албанскиот политички блок и изјавите кои следеа од страна на високи функционери на Република Албанија претставуваат мешање во внатрешните работи на Република Македонија“.

– Ваквото мешање во внатрешните работи на Република Македонија е поттик за реализирање на големо-националистички идеи, тензии и претставува негативен пример не само на Балканот, туку и пошироко. Потребно е намалување на тензиите во регионот и внимателна реторика – порачал македонскиот претседател, стои во соопштението од неговиот кабинет за средбата.

Иванов посочил дека Албанија е пријател и ќе остане пријател на Република Македонија и за таа цел потребни се понатамошни конкретни заемни чекори за нормализирање и за унапредување на билатералните односи.

– Македонското национално малцинство во Република Албанија и албанската етничка заедница во Република Македонија треба да бидат фактори на зближување и на збогатување на соработката, а не извор на тензичност – рекол Иванов, додавајќи дека само со дијалог можат да се бараат решенија и да се надминуваат разликите за одредени прашања.

Претседателот на Албанија на средбата истакнал дека обидите за префрлање на кризата од политичко на етничко ниво, може да има сериозни последици за сите, соопштиле од прес-службата на Нишани, јавува дописникот на „Мета“ од Тирана.

Нишани на состанокот го уверил Иванов дека Албанија никогаш не се мешала, ниту се меша во внатрешни работи на други држави. Сепак, тој додал дека Албанците кои живеат во Македонија се составен дел на земјата и дека Албанија ќе ги поддржи нивните „легитимни барања за целосно почитување и за имплементација на Охридскиот рамковен договор“.

Средбата на двајцата претседатели била реализирана на маргините на петтиот Глобален форум во Баку на тема „Иднината на меѓународните односи: Моќ и интереси“.


Иванов ја одложи посетата на Австралија


Скопје, 16 март, 2017 - 13:20 (META) 

Претседателот на Република Македонија, Ѓорге Иванов, донел одлука за одложување на посетата на Австралија, соопштиле од неговиот кабинет за државната новинска агенција МИА.

Оттаму посочиле дека политичката состојба во земјава и тензиите меѓу Европската Унија и Турција за прекин на договорот за мигрантите се причините поради кои Иванив нема да ја реализира посетата на Австралија, каде, како што велат од неговиот кабинет, тој требало да има средби со државниот врв на земјата, со претставници на македонско-австралиската група за пријателство во парламентот на Австралија, како и со претставници на македонската заедница.

Иванов сега е во дводневна посета на Азербејџан, каде учествува на петтиот Глобален форум во Баку.

Отсуството на Иванов од земјава, во момент на тензична атмосфера и на институционална блокада, наиде на критики во јавноста. СДСМ го обвини претседателот Иванов дека опасно си игра со безбедноста и со стабилноста на државата, бидејќи во време кога Македонија се соочува со една од најголемите политички и институционални кризи, тој решил да замине од земјата.


ВМРО-ДПМНЕ: Договорот зад затворени врати предизвикува сомнеж и тензии


Скопје, 2 март, 2017 - 9:19 (META) 

Прифаќањето платформи на туѓи држави како основа за преговори и за формирање коалиции е процес кој води кон разградување и кон редефинирање на државата, се вели во соопштението на ВМРО-ДПМНЕ.

Оттаму велат дека извршниот комитет на ВМРО-ДПМНЕ на вчерашната седница ја анализирал политичката состојба по постигнувањето договор меѓу СДСМ и ДУИ, со кој биле обезбедени потписи за барање мандат за составување на идната владина коалиција.

– Нетранспарентноста на целата постапка и криењето на договорот, остава огромен сомнеж за ризиците што ги содржи истиот. Според ИК, постигнувањето договор со кој се одлучува за иднината на унитарна, суверена и мултиетничка Македонија зад затворени врати, креира тензии во земјата и го буди гневот меѓу граѓаните. Штетите предизвикани од ваквото постапување може да бидат огромни и далекусежни – велат од партијата.

ИК на ВМРО-ДПМНЕ ја реафирмирал позицијата и ставот на партијата дека во конкретниов случај, „помала е цената да се удоволи на желбата на СДСМ кој сака да се дограби до власт и покрај поразот што го доживеа на минатите избори“.

– ВМРО-ДПМНЕ би ја поддржала идната нивна влада, само доколку се откажат од уцените и целосно ја отфрлат платформата од Тирана. Реализацијата на платформата од Тирана ќе значи целосно редефинирање на Македонија, нејзино претворање од мултиетничка во бинационална држава, која во подоцнежните фази ќе се федерализира, кантонизира и ќе се подели – велат од партијата.


Столтенберг: Тензиите на Западен Балкан мора да се намалат за да се избегнат судири


Белград, 12 февруари, 2017 - 14:41 (META) 

Генералниот секретар на НАТО, Јенс Столтенберг во интервју за српската новинска агенција „Бета“ оценува дека е неопходно да се намалат актуелните тензии во регионот на Западен Балкан за да не дојде до инциденти и судири. Тој нагласува дека НАТО го остварува својот дел од „изградбата на безбедноста со регионалните партнери“.

„НАТО го цени партнерството со Србија и јас сум горд на своите силни пријателски врски со вашата земја“, вели Столтенберг, нагласувајќи дека сака да ја продлабочи соработката со Србија, со почитување на нејзината неутралност.

Столтенберг истакнува дека НАТО силно го поддржува дијалогот меѓу Белград и Приштина и ги повикува сите страни да бидат воздржани и да учествуваат во дијалогот на конструктивен начин.

„Дијалогот меѓу Белград и Приштина е патот кон трајно решение на отворените прашања, со взаемно почитување и разбирање од страна на сите заедници“, вели генералниот секретар на НАТО.

Тој додава дека неодамнешните средби на високо ниво во рамките на дијалогот Белград – Приштина покажуваат дека Србија е посветена на изградбата на односи на соработка со Приштина и подобрување на безбедноста и стабилноста во целиот регион.

Столтенберг вели дека на властите во Приштина им предочил дека НАТО го поддржува трансформирањето на косовските безбедносни сили во рамките на постојниот мандат, и оти смета дека иднината на целиот Западен Балкан е во членството во Европската Унија и НАТО.


Нова вознемиреност во Грција поради барањата на кредиторите за нови мерки


Атина, 11 февруари, 2017 - 11:44 (META) 

Нова тензија владее меѓу грчката влада и европските кредитори поради барањата за нови мерки од 3,6 милијарди евра. Грчките медиуми коментираат дека и покрај малиот напредок во разговорите меѓу грчкиот министер за финансии Евклидис Цакалотос и европските партнери, сè уште постои голем јаз меѓу позициите на двете страни и нема договор на повидок.

Проценките во медиумите се дека кредиторите ја уценуваат Грција со инсистирање да се усвојат нови мерки, нешто на кое силно се опира грчката влада, а премиерот Алексис Ципрас испраќа јасна порака дека државата веќе нема намера да усвои ниту еден нов цент од дополнителни мерки. Ваквата ситуација на нови притисоци врз владата за дополнителни мерки се проценува дека може да ја втурне земјата во нова политичка неизвесност, слично како во јуни 2015 година, кога Ципрас за прв пат дојде на власт.

Кредиторите бараат да се усвојат нови мерки за да може да се финализира втората фаза од проценката на сработеното на грчката влада во однос на договорените мерки и реформи. Меѓународните кредитори се закануваат дека доколку грчката влада не ги усвои новите мерки, нема да може да се заврши проценката и Грција ќе се најде во независна позиција.

Иако претставниците на кредиторите се враќаат во Атина следната недела, сепак проценките во Грција се дека двете страни сè уште се многу далеку од напредок до 20 февруари, кога е рокот за да се заврши втората фаза од проценката.

Извори од грчката влада коментираат дека иако има напредок во разговорите, сепак Меѓународниот монетарен фонд (ММФ) останува на своите, како што велат, нереални барања поради кои нема услови да се продолжат преговорите.


СДСМ: ВМРО-ДПМНЕ да престане да врши притисок и да ги прејудицира одлуките на ДИК


Скопје, 15 декември, 2016 - 12:24 (META) 

Социјалдемократскиот сојуз на Македонија нема да врши никаков притисок врз Државната изборна комисија (ДИК) и ќе остави да се испочитуваат процедурите и комисијата да ја заврши работата во согласност со законите, се вели во соопштението на опозициската партија. Од СДСМ апелираат ВМРО-ДПМНЕ да престане со „злоупотреби на локалната и на државната администрација, со носење на протести и на контрапротести и така да врши притисок и да ги прејудицира одлуките на ДИК“.

„Токму оваа практика ги доведе до пораз, но, за жал, поразот не ги освести и продолжуваат да го прават истото. Граѓаните да бидат внимателни и воздржани и да ги следат работата на ДИК и нејзините одлуки“, се вели во соопштението на СДСМ.

Од партијата додаваат дека граѓаните јасно се определиле против режимот и дека нема никаква причина „да се одговара на обидите на ВМРО-ДПМНЕ да испровоцира тензија меѓу граѓаните“.

„Во врска со информациите објавени на некои портали дека се случило физичко насилство мотивирано од политички антагонизам, доколку тоа навистина се случило, порачуваме оштетените веднаш да пријават во полиција, а МВР да направи истрага и во согласност со законите да постапи против насилниците“, велат од СДСМ, во врска со информациите што денеска ги објавија дел од провладините медиумите дека активисти на СДСМ наводно претепале 68-годишен скопјанец.


Намалување на тензиите меѓу Европа и Русија, главна тема на состанокот на ОБСЕ во Хамбург


Хамбург, 8 декември, 2016 - 10:35 (META) 

Министрите за надворешни работи на земјите членки на Организацијата за безбедност и соработка во Европа (ОБСЕ) денеска во Хамбург го почнаа дводневниот годишен состанок, на кој ќе се разговара за проблемите на безбедноста во Европа, Брексит, како и за победата на Доналд Трамп на претседателските избори во САД. Ситуацијата во Украина, исто така, ќе биде ставена на врвот на агендата. На состанокот учествува и шефот на македонската дипломатија, Никола Попоски.

Германија, која годинава претседава со организацијата, за време на средбата планира да наметне воспоставување нов договор за контрола на вооружувањето со Русија, за да се спречи трката со вооружување во Европа поради случувањата на Крим и во Украина, но и да го отвори прашањето за зајакнување на улогата на ОБСЕ во решавањето на конфликтите.

– Потребна ни е силна ОБСЕ повеќе од кога и да е, за да ја обезбеди Европа – изјави шефот на германската дипломатија, Франк Валтер Штајнмаер, на почетокот на прес-конференцијата.

На средбата учествува и рускиот министер за надворешни работи, Сергеј Лавров. Официјална Москва ја смета министерската средба за платформа „за политички дијалог на високо министерско ниво, можност за отворена дискусија за загриженоста и за заедничките предизвици за враќање на довербата меѓу земјите“.

Штајнмаер вчера имаше средба со Лавров, на која побарал поголема соработка од Москва во намалувањето на тензиите во Европа, како и „итен хуманитарен прекин на огнот во Сирија“.
За време на дводневниот состанок, министрите ќе одржат и серија билатерални средби.


Тензично пред СПУКМ, полицијата ги турка студентите од „Студентски пленум“


Скопје, 30 јуни, 2016 - 23:36 (META) 

Припадници на Единицата за брзо распоредување и оклопни возила се распоредени пред седиштето на СПУКМ, каде што членовите на Студентскиот парламент ги заклучија кутиите од денешното гласање за избор на претседател на Студентскиот парламент.

Специјалците ги туркаат студентите за да го ослободат просторот пред СПУКМ каде што членовите на „Студентски пленум“ веќе неколку часови чекаат да се изнесат кутиите во кои се наоѓаат ливчињата од денешното гласање. Членовите на пленумот извикуваат „Стоп за полициската бруталност“.

Претходно, додека сè уште траеше гласањето на факултетите, „Студентски пленум“ ја оспори регуларноста на изборите за претседател на Студентски парламент.

На гласањето немаше избирачки список, печати на гласачките ливчиња, паравани за тајно гласање, а избирачките кутии беа обложени со бели листови. Непосредно по завршувањето на гласањето на студентските избори, гласачката кутија од Правниот факултет „Јустинијан Први“ беше насилно однесена од лица за кои „Студентски пленум“ обвинува дека немаат никаква поврзаност со УКИМ, по што настанаа турканици.


Уставниот суд повторно ја одложи расправата за крстот во Бутел


Скопје, 22 јуни, 2016 - 11:19 (META) 

Уставниот суд повторно ја одложи расправата по иницијативата за оценка на уставноста и на законитоста на одлуката за поставување на 55-метарскиот крст во општина Бутел, која предизвика тензии кон крајот на февруари и на почетокот на март годинава.

Предлогот за одложување на расправата за некоја од следните седници била на судијата Сали Мурати, кој не присуствувал на денешната седница. Уставните судии со осум гласа „за“ одлучиле да ја тргнат оваа точка од дневниот ред на седницата.

Ова е вторпат уставните судии да ја одложат расправата за оваа иницијатива, која до судот во март ја поднел струшкиот градоначалник Зијадин Села, според кого, одлуката за поставување на крстот не била во согласност со Бадинтеровиот принцип.

Претходно, за крстот во Бутел уставните судии требаше да расправаат на седницата што се одржа на 31 мај, но тогаш точката беше повлечена од дневниот ред од судијата известител Владимир Стојановски, кој без посебно образложение рекол дека таа ќе се разгледува на некоја од следните седници.

Поставувањето на крстот, кој е донација на Светскиот македонски конгрес (СМК), предизвика тензии откако членови на ДУИ и нивни поддржувачи поставија камп и протестираа против изградба, на што со контрапротести одговори СМК, чиј претседател Тодор Петров беше и физички нападнат дента по свеченоста за осветување на камен-темелникот.