СДСМ: ВМРО-ДПМНЕ сака со нова политичка блокада да ги закочи реформите


Скопје, 27 јануари, 2018 - 17:50 (META) 

Најавата дека ВМРО-ДПМНЕ ќе се врати во Собранието само за да го блокира Законот за употреба на јазиците е уште еден доказ дека опозициската партија продолжува да работи спротивно на интересите на граѓаните и на државата и дека нејзина единствена цел е да создаде нова политичка блокада со која ќе го закочи реформскиот процес, реагираат од СДСМ.

Од владејачката партија велат оти е очигледно дека ВМРО-ДПМНЕ нема капацитет да ги напушти политиките на деструкција и блокади, коишто предизвикуваат политички тензии, поделби и раздор во општеството.

„Со таквото дејствување, ВМРО-ДПМНЕ е против европските вредности и против концептот на едно општество и уште еднаш докажува дека не се грижи за интересите и потребите на граѓаните, туку дека води ситни, провидни политикантски игри“, стои во соопштението на СДСМ.

Оттаму го повторуваат ставот дека Законот за употреба на јазиците е во согласност со Уставот и Амандманот 5 и дека законот не фаворизира и не дискриминира ниту еден јазик, туку ја унапредува употребата на јазиците на сите немнозински заедници што живеат во Македонија.

„Законот не го доведува во прашање унитарниот карактер на Македонија, а употребата на македонскиот јазик и неговото кирилско писмо и понатаму остануваат единствени официјални службен јазик и писмо на територија на Република Македонија, во меѓународните односи, одбраната, монетарната политика и централната полиција“, велат од владејачката партија.


Турција повика американски дипломат на итен разговор


Анкара, 9 октомври, 2017 - 15:05 (META) 

Турското министерство за надворешни работи го повика на разговор потсекретарот на амбасадата на САД и побара ставање крај на спорот меѓу двете земји.

Амбасадата на Турција во Вашингтон соопшти дека ќе престанат да издаваат неимигрантски визи на Американци, откако мисијата на САД во Турција престана да издава неимигрантски визи во своите американски дипломатски претставништва во Турција.

Мисијата на САД одлуката ја донесе откако властите на Анкара уапсија еден вработен во американски конзулат во Турција.
Според неименувани извори, на потсекретарот на американската амбасада му е речено дека суспензијата на издавањето визи предизвикала „непотребна тензија“ и дека таа одлука треба да биде повлечена.


Кина ја повика Северна Кореја да не лансира уште една ракета


Пекинг, 4 септември, 2017 - 20:53 (META) 

Кина ја предупреди Северна Кореја да не продолжува со наводните планови за лансирање нова балистичка ракета и го повика Пјонгјанг да не ја зголемува напнатоста.

Портпаролот на кинеското министерство за надворешни работи, Генг Шуанг, рече дека на Северна Кореја мора да ѝ биде јасно дека резолуцијата на Советот за безбедност на ОН забранува такви активности.

Генг во Пекинг изрази надеж дека сите страни, а особено Северна Кореја, ќе „вежбаат воздржаност од додатни ескалации на тензиите“.

Министерството за одбрана на Јужна Кореја претходно соопшти дека верува дека Северна Кореја се подготвува да лансира нова балистичка ракета.


Могерини: ЕУ на Балканот може многу да изгуби, но многу и да добие


Брисел, 29 август, 2017 - 10:48 (META) 

Балканот е еден од четирите приоритети на надворешната политика на Европската Унија, изјави синоќа високата претставничка за надворешна и за безбедноста политика на ЕУ, Федерика Могерини, на отворањето на конференцијата со амбасадорите на Унијата во Брисел, истакнувајќи дека „како што добро знаат, ЕУ (на Балканот) може многу да изгуби, но и многу да добие“.

Могерини на почетокот на дводневното советување со шефовите на дипломатските претставништа на ЕУ во светот нагласи дека на Балакнот оваа година „имаше загрижувачки тензии во повеќе земји, но дека партнерите на ЕУ во регионот секогаш успевале да ја потврдат желбата и способноста за напредок на европскиот пат“.

ЕУ, како што наведе Могерини, им помогнала на своите партнери, но и самите биле во состојба да го направат тоа, бидејќи „нивните, пред сè, млади граѓани, тоа го барале од своите лидери и тие лидери тоа многу добро го знаат“.

Таа додаде дека се лути кога некој ќе каже „Балканот е на патот кон Европа“, истакнувајќи дека „Балканот е во Европа“, а некој „заден двор“.

– Мислам дека можеме да си го поставиме како наша цел, до крајот на овој мандат, да видиме суштински чекори напред кај секој од нашите партнери на Балканот на нивниот пат кон членство во Европската Унија – истакна шефицата на Европката служба за надворешни работи.


Кина бара од Вашингтон и од Пјонгјанг да се воздржат од запалива реторика и акции


Пекинг, 12 август, 2017 - 15:19 (META) 

Кинескиот претседател Кси Џинпинг денеска ги повика Вашингтон и Пјонгјанг да се воздржат од „запаливата реторика и акции“ кои можат да ги зголемат тензиите на Корејскиот полуостров, јавуваат светските медиумите.

Кси Џинпинг во телефонски разговор со американскиот претседател Доналд Трамп рекол дека Пекинг и Вашингтон се заинтересирани за запирање на нуклеарната програма на Северна Кореја.

„Релеватните страни мора да се воздржат и да избегнуваат зборови и дела кои водат кон засилување на тензиите на Корејскиот полуостров“, навел кинескиот претседател.

Трамп, како што јавуваат агенциите, барал од Кина да изврши притисок на Пјонјанг поради нуклеарната програма која би можела да биде насочена кон САД.

Кина е најголемиот трговски партнер и извор на помош на Северна Кореја, но кинеските официјални претставници тврдат дека не можат да ги натераат властите во Пјонгјанг да прекинат со нуклеарните и ракетни програми.

Американскиот претседател Доналд Трамп синоќа најавил дека ќе го прекине својот одмор во Њу Џерси и дека в понеделник ќе одржи прес-конференција во Вашингтон во врска со тензиите со Северна Кореја.


Вучиќ: Односите на Балканот се напнати, но проблемите не се туркаат под тепих


Белград, 30 мај, 2017 - 14:47 (META) 

Српскиот премиер во заминување, Александар Вучиќ, денеска изјави дека на Балканот има многу тензии и дека е потребно да се вложат многу напори за да се подобрат односите, но дека сега проблемите „не се туркаат под тепих“ и „не се лажеме едни со други“.

Говорејќи за односите во регионот, на последната прес-конференција во улога на премиер, Вучиќ рече дека донекаде изградил доверба со Босна и Херцеговина, дека односите со Црна Гора и со Македонија се „далеку од лоши“, а дека најкомплицирани се односите со Приштина, но дека секогаш е подобро да се разговара.

Тој додаде дека како претседател на Србија ќе настојува да ги унапреди односите во регионот.


Курц и Заниер најостро ги осудија упадот во Собранието и нападот на пратениците


Виена, 28 април, 2017 - 10:09 (META) 

Претседавачот на ОБСЕ и австриски министер за надворешни работи, Себастијан Курц, и генералниот секретар на ОБСЕ, Лaмберто Заниер, најостро го осудуваат вчерашниот упад во Собранието на Македонија во Скопје.

Тие сметаат дека насилството не може да биде замена за политичките решенија и дека таквите решенија треба да се бараат во рамките на демократските процеси на одговорен начин.

„Нападите на неколку членови на Собранието, упадот во зградата на парламентот – срцето на демократијата на земјата, се шокантни. Ова е акт на заплашување, напад на претставниците на народот, кој јас категорично го осудувам. Смиреноста и редот мора веднаш повторно да се воспостават. Ги повикувам сите страни да се воздржат од понатамошна ескалација на тензии или насилство“, рече Курц.

Генералниот секретар Заниер рече дека за насилството нема место во политичкиот процес.

„Насилството мора веднаш да престане. Органите за спроведување на законот мора да обезбедат безбедност на пратениците и да ги изведат сторителите пред лицето на правдата“, изјави Заниер.

Претседавачот на ОБСЕ и генералниот секретар ги повикуваат политичките чинители повторно да го воспостават дијалогот во Собранието и да ги почитуваат демократските принципи, како и резултатите од декемвриските избори.


Иванов апелира за смирување на тензиите и повика на лидерска средба во неговиот кабинет


Скопје, 27 април, 2017 - 22:41 (META) 

Претседателот Ѓорге Иванов во своето обраќање до граѓаните вечерва упати апел за смирување на тензиите и на ненасилство и ги повика лидерите на парламентарните партии на лидерска средба утре во неговиот кабинет.

– Во овие моменти на општа загриженост околу настаните во Собранието на Република Македонија, ве повикувам да бидете смирени. Ве повикувам да останете присебни и да не подлегнувате на разни провокации, лажни вести и на манипулации. Повикувам на смирување на тензиите и на ненасилство. Повикувам на разумно и одговорно однесување – рече Иванов.

Тој ги повика на одговорно однесување сите надлежни институции, кои мора да ги почитуваат Уставот и законите на Република Македонија.

– Пратениците се најодговорни за враќање на состојбата во согласност со Уставот, законите и со деловникот на Собранието на Република Македонија, кои денеска беа прекршени. Секој треба да биде одговорен за своите постапки и свесен за последиците што произлегуваат од нив – рече Иванов.

Тој истакна дека оваа состојба може да се надмине преку почитување на правниот поредок на државата и дека нема прашање за кое не може да се најде решение преку дијалог, со согласност со македонскиот Устав и законите.

– Затоа, ги повикувам лидерите на парламентарните партии утре да дојдат во мојот кабинет на лидерска средба за да ја разгледаме новонастанатата состојба. На лидерска средба да ги разгледаме сите опции за смирување и за наоѓање излез од новонастанатата состојба. Лидерите ја добиле довербата од граѓаните и се најодговорни за наоѓање решенија во согласност со Уставот, законите и со деловникот за работа на Собранието – рече Иванов, додавајќи дека „никој друг однадвор нема да ни ги реши проблемите ако самите ние не ги решиме, во согласност со државните интереси на Република Македонија“.


Носачот на авиони на САД наскоро ќе пристигне во Јапонското Mоре, најави Пенс


Сиднеј, 22 април, 2017 - 13:15 (META) 

Американскиот носач на авиони „Карл Винсон“ за неколку дена ќе пристигне во Јапонското Mоре, изјавил денеска во Сиднеј, потпретседателот на САД, Мајк Пенс, пренесуваат светските агенции.

Вашингтон, на почетокот на овој месец, најави дека носачот на авиони и неговата флота ќе тргнат кон Корејскиот Полуостров, што беше протолкувано како демонстрација на сила на администрацијата на претседателот на САД, Доналд Трамп.

„Очекуваме носачот на авиони да пристигне во Јапонското Море за неколку дена, а до крајот на овој месец“, изјавил Пенс во Сиднеј.

Американскиот потпретседател истакнал дека режимот во Северна Кореја не треба да се сомнева дека САД имаат ресурси, персонал и присуство во тој дел од светот.

Тензиите помеѓу САД и Северна Кореја добија интензитет по ракетните тестови на Пјонгјанг, но и поради стравот од подготовките за нова нуклеарна проба, шеста по ред.


СЕММ: Медиумите не смеат да се злоупотребуваат за кревање тензија


Скопје, 10 април, 2017 - 12:32 (META) 

Советот за етика во медиумите (СЕММ) со голема загриженост реагира на зачестените случаи на злоупотреба на одредени медиуми, особено во контекст на сегашната политичка ситуација, за ширење шпекулации, пропагандизам и невистини, кои би можеле да ги засилат тензиите и да доведат до потенцијални немири во општеството.

Од СЕММ додаваат дека веќе подолго време реагираат на ваквите случаи, но во последните неколку дена тие се зачестени до загрижувачки нивоа.

„Особено загрижувачки е начинот на информирање на медиумите во кои се забележуваат новинарски извештаи со еднострано информирање и информации што ги подгреваат стравувањата за можни немири во општеството, содржејќи повици за мобилизација на граѓаните во служба на одбрана на интересите на определени политички партии“, стои во соопштението од Советот за етика во медиумите.

Оттаму потсетуваат дека медиумите не смеат да бидат злоупотребени за пренесување повици за обединување на поединци и на групи за радикално однесување и за постапки кои го загрозуваат јавниот ред и мир, а особено на членот 10 од Кодексот на новинарите кој вели дека „новинарот нема да поттикнува на насилство и дискриминација по која било основа“.

„Медиумите мора да го почитуваат Етичкиот кодекс, бидејќи во спротивно последиците од непридржувањето кон неговите одредби би можеле да бидат фатални. Медиумите имаат особено важна улога во заштитата на граѓаните од појавата на нетолеранција и недоверба и нивна изложеност на ризик од насилство“, нагласуваат од Советот.

Оттаму ги повикуваат и другите институции, вклучувајќи ја Агенцијата за аудио и аудиовизуелни медиумски услиги и Јавното обвинителство, да реагираат на ваквиот хушкачки и потпалувачки говор, како и да ги преземат неопходните законски мерки.