Борисов ја стави под мраз „Џи-Пи Груп“, која градеше во Прилеп и се спомнуваше со убиената новинарка од Русе


Софија, 12 октомври, 2018 - 17:56 (META) 

Бугарскиот премиер Бојко Борисов попладнево соопшти дека наложил големата бугарска компанија „Џи-Пи Груп“, која работела или уште работи на многу инфраструктурни проекти во Бугарија, да биде отстранета од државните проекти и проектите финансирани со европски пари, јави бугарскиот „Медиапул“.

„Џи-Пи Груп“, како што наведе бугарски „Банкер“, исто така ја заврши и пречистителната станица за отпадни води во Прилеп, која беше пуштена во употреба на почетокот на јули годинава.

„Џи-Пи Груп“ беше темата на последната телевизиска емисија на убиената ТВ водителка Викторија Маринова, во која таа разговараше со новинари што истражувале злоупотреби поврзани со оваа групација која во последните години зеде многу големи проекти. Иако првично се сметаше дека станува збор за ликвидација на новинар, потоа се покажа дека убиството го извршил млад маж во пијана состојба, кој по убиството избегал во Германија.

„Џи-Пи Груп“ во последните неколку месеци е во центарот на „Џи-Пи-гејт“, поради лоша изведба на капитални проекти.

– Му наложив на претседателот на агенцијата „Патна инфраструктура“, Светослав Глосов, почитувајќи го законот, да најде начин уште денеска за „Џи-Пи Груп“ да се отстрани од проектите финансирани од државата и од ЕУ – рече Борисов денеска во Асеновград.

Големата градежна група во моментот ја следат два големи скандали. Едната е за ремонтот на улицата Граф Игнатиев во строгиот центар на Софија, а вториот поради истражувањето на сајтот „Бивол“ за махинации за победување на тендери за проекти со европски пари.

Поради истражување за уништување документација за овој случај беа уапсени новинарите Димитар Стојанов и неговиот колега од Романија, Атила Биро, кои по реакција на европската јавност беа ослободени. Стојанов и Биро беа последните гости во емисија на убиената водителка Маринова.

По случајот со Стојанов и Биро, бугарското Јавно обвинителство отвори истрага и нареди запирање на исплатата на 14 милиони евра на „Џи-Пи Груп“, компанија која се поврзува со Валентин Златев, директорот на „Лукоил Бугарија“. Тој го негира тоа, а Џи-Пи Груп, инаку, изградила повеќе од 100 објекти на „Лукоил“ во Бугарија и врши нивно одржување, меѓу кои и новото седиште во центарот на Софија.

„Џи-Пи Груп“ го доби и тендерот за изградба на најдолгиот тунел во Бугарија, „Железница“ на новиот автопат „Струма“ во близина на Симитли, за сума од 185 милиони лева, односно 92,5 милиони евра.

Според бугарски „Банкер“ сегашниот гигант „Џи-Пи Груп“ полека стана најчестиот победник на државните и општинските тендери за изградба на патишта, инфраструктура, пречистителни станици“, а работи и на третата линија на софиското метро.

Во 2017 година имала  приходи од 185 милиони лева,3,6 отсто повеќе од годината претходно, а профитот изнесувал 27 милиони лева, што е 45 отсто повеќе од профитот во 2016 година.

„Џи-Пи Груп“ на почетокот на август годинава победи на тендерот за најдолгиот тунел во Бугарија, по што две странски компании – грчката „Актор“ и италијанската „Тодини“ поднесоа жалби. „Актор“ го градеше новиот автопат Демир Капија – Смоквица.

За реконструкцијата на централната софиска улица Граф Игнатиев, Џи-Пи Груп победи со понуда од 24 милиони лева (околу 12 милиони евра).

Компанијата со други компании ќе дели и  92 милиони лева (околу 46 милиони евра) за изградба на шест метро станици и 4,3 километри тунел на новата, трета линија на софиското метро. За изградба на две станици и тунел од 2,3 километри Џи-Пи Груп е во конзорциум со уште три компании, а за два километри тунел и четири метро станици направила конзорциум со друга компанија.

„Џи-Пи Груп“ стои и зад голем број други објекти изградени во последната деценија, меѓу кои и луксузни хотели и спортски сали, како и новото седиште на „Лукоил“ во Софија. Формирана е во 2004 година.


ВМРО-ДПМНЕ: СДСМ ги правда криминалот и промената на името, со лажни заложби за ЕУ


Скопје, 24 септември, 2018 - 10:04 (META) 

На власт се политичари и нивни ученици, кои во 90 -те не убедуваа дека само да ја  прифатиме привремената референца ФИРОМ и државата ќе тргне на подобро, па да го смениме знамето, па Уставот, па да го прифатиме Рамковниот, па територијалната поделба, се прифативме и не само што не тргна на подобро, туку е полошо, се вели во соопштението на ВМРО-ДПМНЕ.

Во него се додава дека „животите на генерации Mакедонци од 91 – та до денес поминаа во тага, безнадежност и безперспективност.“

„И додека штетните политики ги правдаат со декларативните заложби за ЕУ и НАТО интеграцијата на  земјата, во  реалноста прават невиден криминал, се делат  милионски тендери на партиски луѓе, ќерка директор дава тендер на татко бизнисмен и што ли уште не. Народот пати и не гледа како со ваков криминал државата може воопшто да функционира, а не пак да влезе во ЕУ“, се додава во соопштението.


„Тендери“ се одложи за 25 септември поради болест на судијата Шабани


Скопје, 13 јули, 2018 - 10:53 (META) 

Поради болест на судијата Осман Шабани денеска во Кривичниот суд во Скопје не се одржа рочиштето за предметот на СЈО „Тендери“, во кој првообвинета е поранешната министерка за култура Елизабета Канческа Милевска, во врска со тендерот за извршување градежни работи во Музејот на македонската борба за државност и самостојност од проектот „Скопје 2014“.

Новото рочиште е закажано за 25 септември, кога ќе бидат сослушани сведоците на обвинителството и одбраната. Втор, резервен термин за ново рочиште е утврден за 4 октомври.

Во овој случај обвинети се уште двајца членови на Комисијата за јавни набавки.

Според обвинението дел од градежните работи во Музејот се вршени во корист на правното лице „Бетон“ од Штип. Пред да се објави оглас за доделување договор за јавна набавка и пред да се спроведе постапката, спротивно на Законот за јавните набавки, Канческа-Милевска преку разговори со генералниот директор на градежното претпријатие „Бетон“ од Штип наложила да се продолжи со работа на Музејот, каде што се изведувале градежни работи по претходно склучен договор за јавна набавка.


Владата формира работна група за тендер за избор на универзален снабдувач со струја


Скопје, 23 мај, 2018 - 9:54 (META) 

На вчерашната 69. седница, министрите ја разгледаа и ја усвоија информацијата во врска со формирање на работна група која ќе подготви тендерска документација за спроведување на тендерска постапка за избор на универзален снабдувач со електрична енергија и снабдувач во краен случај со електрична енергија.

„Кабинетот на заменик-претседателот на Владата задолжен на економски прашања е задолжен во рок од 7 дена да формира работна група составена од претставници од кабинетот на вицепремиерот за економски прашања, Министерството за економија и Регулаторната комисија за енергетика. Предлог за членови и заменици членови во работната група до кабинетот на вицепремиерот, треба да достават Министерството за економија и Регулаторната комисија за енергетика. Потоа оваа работна група, во соработка со секретаријатот на Енергетската заедница, во рок од 60 дена треба да ја подготви тендерската документација за спроведување на тендерска постапка по пат на јавен повик согласно прописите со кои се уредува набавка на јавна услуга за избор на универзален снабдувач со електрична енергија и снабдувач во краен случај со електрична енергија и да ја достави до Владата“, информираат од Влада.

Вчера, Законот за енергетика, кој предвидува избор на универзален снабдувач со струја, беше изгласан за Собранието.


Завршни зборови за „Тенк“, продолжуваат судењата за „Тендери“ и „Тотал“


Скопје, 14 мај, 2018 - 10:18 (META) 

Во Основниот суд Скопје 1 денеска ќе се одржат три судски рочишта за случаите на Специјалното јавно обвинителство, од кои за еден ќе се изнесуваат завршните зборови.

Во судењето за случајот „Тенк“, во кој, за набавката на прескапиот блиндиран „мерцедес“ вреден близу 600.000 евра, на поранешниот премиер Никола Груевски и поранешниот помошник министер во МВР Ѓоко Поповски, треба да бидат изнесени завршните зборови на одбраната. Во овој случај обвинета е и поранешната министерката за внатрешни работи Гордана Јанкулоска, но постапката за неа беше издвоена поради „ризична бременост“.

Во Кривичниот суд покрај овој процес, денеска ќе има рочишта и за  случаите „Тендери“ и „Тотал“. Во првиот случај и се суди на поранешната министерка за култура Елизабета Канческа – Милевска, за тендерот за завршни работи во Музејот на македонската борба за државност и самостојност од проектот „Скопје 2014“. Во овој случај обвинети се уште двајца членови на Комисијата за јавни набавки.

Во случајот „Тотал“, му се суди на новинарот Драган Павловиќ-Латас, кој не присуствуваше на претходните три рочишта поради здравствени, односно семејни причини. Латас се товари дека давал лажни податоци во завршните сметки и даночните пријави при што преку неговите фирми затаил данок во износ од 7.466.981 денар или 121.414 евра, а лично тој затаил 3.876.471 денар или 63.032 евра.


Канческа-Милевска: Илија ме нервира, не можам органски да го поднесам


Скопје, 13 април, 2018 - 14:02 (META) 

Со преслушување на пет телефонски разговори во присуство на јавноста, Кривичниот ја продолжи работата по предметот „Тендери“. Од разговорите, четири се направени во 2011 година и во нив најчесто разговараат поранешната министерка за култура Елизабета Канческа-Милевска и поранешниот министер за транспорт и врски Миле Јанакиески, а петтиот разговор е од 2013 година меѓу Канческа-Милевска и поранешната министерка за внатрешни работи Гордана Јанкулоска, објави „МКД.мк“.

На првиот разговор што беше презентиран, покрај Канческа-Милевска и Јанакиески, учествува и директорот на ГП „Бетон“ од Штип, Илија Бреслиски. Во разговорот Канческа-Милевска ги информира Јанакиески и Престилски дека „утре ќе биде објавен тендер“, но, како што посочува, „во него е наведено сѐ за да го добие Бетон“. Наведува дека ќе ја тераат работата да нема застој и дека дента му биле префрлени 48 до 49 милиони денари. Му вели „терајте си ја работата како да е сѐ во ред“, а претходно му кажува дека ќе треба да се објави нов тендер, бидејќи е сѐ исцрпено со анексот.

Во вториот разговор меѓу Канческа-Милевска и Јанакиески таа го информира дека нема денар за да им плати и дека треба со ребалансот да се обезбедат средства, а на тоа Јанакиески ѝ вика „да ги продадеме твоите алишта за да им помогнеме“.

Во третиот разговор меѓу Канческа-Милевска и Јанакиески, таа го информира колку ја нервирал Илија кого, како што вели, не можела органски да го поднесе: „ми иде ножот да му го ркнам до крај, а Ице ми иде во Вардар да го удавам“. Го информира дека сѐ уште не се излезени од, како што вели, „страната што се гледа од кај тебе“, а Јанакиески ѝ вели дека „утре ќе излезат, а ако не ќе им го турне скелето“.

Во четвртиот разговор повторно меѓу Канческа-Милевска и Јанакиески, поранешната министерка за култура му кажува на Јанакиески дека „Илија е мрднат и мисли дека таа му викнала полиција, му вели дека не може органски да го поднесе“. Посочува дека му платила 50 милиони, а за останатите 20 милиони ќе треба да се снајде, бидејќи ги нема парите и ќе треба да ја почека уште еден месец. На тоа Јанакиески ѝ одговара дека ќе треба да ја почека.

Петтиот разговор е меѓу Гордана Јанкулоска и Канческа-Милевска од 2013 година во кој поранешната министерка за култура ја информира Јанкулоска дека се јавил некој Николче Цветановски од СВР Битола кој ѝ ги барал документите за изградбата на Музејот на ВМРО. Во меѓусебниот разговор се информира дали треба веднаш да му ги даде доколку дојде, или, пак, треба да му каже дека треба да почека да ги собере, а во меѓувреме барала од тогашната министерка за внатрешни работи да провери за кого станува збор и дали е „некој комуњар“. Тогашната министерка за внатрешни работи ја советува доколку го добие налогот да му каже дека ѝ треба време да ги собере документите и да не му ги дава веднаш на Николче Цветановски, а во меѓувреме, како што вели, „ќе провери кој е тој и за што се работи“.

По презентирањето на аудио материјалите судечкиот совет даде пауза од половна час по што треба да продолжи судењето.


Градежниците ќе одговорат на офанзивната градба на патишта, ако се знаат условите


Скопје, 30 март, 2018 - 14:08 (META) 

Градежните компании ќе може да ја следат динамиката на офанзивата за изградба на патишта во државата, ако има добар план и организација, одговори на новинарско прашање претседателот на  Градежната комора на Македонија при Сојузот на стопански комори на Македонија (ССК), Ивица Јаќимовски.

– Компаниите имаа капацитет да го спроведат овој план ако има добра организација, основен проект и континуитет во извршувањето. Потребно е да биде обезбедена динамика на реализација, редовно сервисирање на обврските и плаќања, поставување на рокови. Но, релизацијата на изградбата на патната инфраструктура ќе зависи и од временските услови – рече Јаќимовски.

Министерот за транспорт и врски, Горан Сугарески, рече дека планот за изградба на патната инфраструктура е јасен и не гледа проблеми во изведбата, бидејќи средствата се обезбедени.

– На тендерите на Јавното претпријатие за државни патишта може да се јават сите заинтересирани домашни компании, бидејќи постапките ќе бидат транспарентни. Најголем дел од компаниите кои ги градат автопатиштата се домашни, а тие се и главни подизведувачи. Така што нашите градежни фирми се максимално вклучени во изградбата на инфраструктурата-  рече Сугарески.

Денеска во Сојузот на стопански комори на Македонија (ССК) компaниите разговараа со Сугарески за можностите за стимулирање и развој на секторот, актуелната состојба, законската регулатива, како и за предизвиците со кои се соочуваат во секојдневното работење.

Согласно најавениот буџет и инвестиции, Градежната комора на Македонија очекува стабилизирање и подобрување на состојбата во градежништвото .

Јаќимовски апелираше до властите да се носат поквалитетни детални урбанистички планови, затоа што за непланското градење, вината не ја гледа во инвеститорите, туку во локалната самоуправа.

 


Канческа Милевска не се чувствува виновна во случајот „Тендери“ за Музејот на ВМРО


Скопје, 13 март, 2018 - 11:34 (META) 

Поранешната министерка за култура Елизабета Канческа Милевска рече дека не се чувствува виновна за кривичното дело што и се става на товар во случајот „Тендери“ на СЈО во кој таа е првообвинета.

Канческа Мислевска на денешното рочиште кажа дека го разбира обвинението како текст, но не разбира на кој начин постои злоупотреба.

– Го разбирам тоа што е напишано, но не можам никаде да најдам каде има злоупотреба во обвинението – рече Канческа Милевска пред Судискиот совет.

Таа тврди дека заедно со останатите две обвинети, кои биле вработени во Министерството, работеле според сите законски прописи и процедури. Тие исто така на денешното рочиште рекоа дека го разбираат обвинението и дека не чувствуваат вина.

Судијата Осман Шабани соопшти дека не го прифаќа барањето на адвокатите на обвинетите да им бидат доставени „бомбите“ врз основа на кои СЈО го темели обвинителниот акт. Тој рече дека станува збор за пет аудио материјали кои обвинетите можеле да ги преслушаат во просториите на СЈО, поради што предлогот го одби како неоснован.

Случајот „Тендери“ се однесува на изградбата на Музејот на ВМРО. Според обвинението, градежната компанија „Бетон“ од Штип била фаворизирана и по барање на тогашната министерка за култура фирмата почнала со изведување градежни работи уште пред да биде потпишан договорот за јавна набавка.


Адвокатите на Канческа – Милевска ги спорат вештачењата на СЈО, следното рочиште на 13 март


Скопје, 21 февруари, 2018 - 13:02 (META) 

Со приговори на одбраната околу вештачењето на доказите и за надлежноста на Специјалното јавно обвинителство помина првото рочиште од судскиот процес за случајот „Тендери“, во кој првообвинета е поранешната министерка за култура, Елизабета Канческа – Милевска.

Претседателот на судечкиот совет на Кривичниот суд во Скопје, Осман Шабани, го прекина рочиштето и следното го закажа за 13 март, кога ќе треба да се произнесе по приговорите на одбраната.

Адвокатите Сашо Дуковски и Еленко Миланов, на почетокот на денешното рочиште, реагираат до судот околу вештачењето на „ЕОС консалтинг“, кое го оценија како неообјективно. Според нив, станува збор за вештачење на поддржуница на италијанска, односно странска компанија, која не може да врши вештачења. Тие ја оспорија и лиценцата на потписникот на вештачењето, Страхил Глигоровски, која важела до 17 април 2017 година, а вештачењето било изготвено на 30 мај, истата година. Лиценцата на Глигоровски му била продолжена кон средината на јули 2017 година. Поради ова адвокатите бараат изземање на вештачењето и негово издвојување од другите материјали во предметот.

Адвокатката Сања Алексиќ рече дека барале од СЈО да им бидат предадени аудио-материјалите кои се дел од доказите, но, оти тоа не било направено, поради што сега бараат копии од нив. Алексиќ рече дека преку вештаци, кои ќе ангажираат, ќе бараат да се утврди дали прислушуваните разговори се монтирани и дали се целосни или се прекинати.

Адвокатите бараат и да се провери надлежноста на СЈО, односно дали тоа може да постапува во овој случај.

На приговорите на одбраната реагираше обвинителот на СЈО, Стевчо Донев, кој рече дека дел од нив биле изнесени и при поднесувањето на обвинението, но Советот за оценка на обвинителен акт ги одбил како неосновани. Во врска со приговорот за вештачењето, тој наведе дека кога била дадена наредбата за вештачење двајцата вештаци имале важечки лиценци.


Почнува судењето на Канческа – Милевска за случајот „Тендери“ на СЈО


Скопје, 21 февруари, 2018 - 10:01 (META) 

Денеска во Кривичниот суд во Скопје треба да почне судскиот процес против поранешната министерка за култура, Елизабета Канческа – Милевска, обвинета во случајот „Тендери“ на Специјалното јавно обвинителство.

Канческа-Милевска е обвинета во предметот „Тендери“ за злоупотреби со тендерот за извршување градежни работи во Музејот на ВМРО, од проектот „Скопје 2014“, со што буџетот, според СЈО, бил оштетен за речиси 54 милиони денари (околу 880.000 евра).

Апелацискиот суд Скопје ја прифати жалбата на Специјалното јавно обвинителство и одлучи прислушуваните разговори да се користат како доказ во судскиот процес против поранешната министерка за култура.

Денеска треба да продолжи и судењето за случајот „Транспортер“ на СЈО, во кој првообвинет е поранешниот градоначалник на Битола, Владимир Талески и уште давесетина лица. Тие се товарат за малверзации со превозот на ученици во Битола, тешки околу 300.000 евра.