Владата ќе ги олесни критериумите во третиот јавен повик за нискобуџетна авиокомпанија


Скопје, 7 ноември, 2018 - 13:29 (META) 

Владата на вчерашната седница одлучила да биде објавен трет јавен повик за субвенции за нискобуџетни авиокомпании со олеснети критериуми, по неуспешните два огласи.

-Да, ова е трет јавен повик за избор на авиокомпанија која ќе добие финансиска поддршка. Овој пат ги олеснивме условите, така што авиокомпанијата треба да воспостави две нови авиолинии од Скопскиот и две од Охридскиот аеродром до 26 март 2019 година. Претходниот рок беше 10 јануари. Првите два повика беа неуспешни поради неисполнување на условите од тендерската постапка. Очекуваме овој трет повикот да биде успешен во интерес на граѓаните и тие ќе можат целосно да ги користат бенефитите од нискобуџетните летови – информираше владиниот портпарол Миле Бошњаковски.

Останува непроменет условот субвенционираната авиокомпанија да воведе уште два нови лета од Охридскиот аеродром во рок од една година од потпишување на договорот.

Од Министерството за транспорт и врски најавуваат дека јавниот повик ќе биде објавен наредната недела.

Новата тригодишна помош ќе изнесува пет милиони евра. Унгарскиот авиопревозник „Виз ер“, во два циклуса од по три години, доби финансиска помош од 9,5 милиони евра и воспостави 30 линии до 14 земји.


Министерство за здравство распиша тендер за инсулин за две години


Скопје, 15 август, 2018 - 13:46 (META) 

Министерството за здравство соопшти дека денеска е почната постапката за јавна набавка на инсулин, глукагон, инсулински игли и ленти за мерење шеќер и инсулински пумпи со потрошен материјал, за периодот септември 2018 – септември 2020 година.

„Постапката и процедурите се соодветно испланирани, согласно бројот и потребите на пациентите и населението кое директно или индиректно ги користат именуваните медицински препрати, уреди и потрошни материјали“, соопштија од министерството.

Пред распишувањето на тендерите биле консултирани граѓанските здруженија, а бил вклучена и Националната комисија за дијабетес.

Од Здравство се пофалија дека првпат по шест години ќе се воведат нови инсулини и ампуларна терапија. Истовремено, уверуваат дека во сите инсулински аптеки ќе има доволно инсулин се до потпишувањето на договорите со веледрогериите што ќе победат на тендерите.


Сугарески најави нов тендер за субвенционирање на нискобуџетни авиокомпании


Велес, 13 август, 2018 - 15:54 (META) 

Новиот јавен повик за субвенционирање на нискобуџетски авиокомпании ќе биде објавен деновиве, најави денеска министерот за транспорт и врски Горан Сугарески, одговарајќи во Велес на новинарско прашање поврзано со укинувањето на неколку авиолинии од страна на унгарската „Визер“, која беше единствено пријавена компанија на тендерот што Владата го поништи минатата седмица.

– Минатата недела беше поништена постапката во делот на нискобуџетните компании, бидејќи имаше пристигнато една понуда и комисијата, врз база на пропусти, понуди решение со кое постапката е поништена. Наредните денови со информација на Влада и сите активности коишто треба да ги преземе Министерството за транспорт и врски ќе биде распишан нов јавен повик. Државата има предвидено пари за нискобуџетни компании, така што стојам зад она што го кажав, дека согласно владината програма оваа мерка продолжува и државата ќе субвенционира нискобуџетни компании – рече Сугарески при увидот во изградбата на водоводната линија на населените места Превалец и Оризари.

На официјалната веб страница на авиокомпанија „Визер“ повеќе не може да се резервираат билети за летови од октомври од Скопје до Барселона и од Охрид до Лондон. Билети не можат да се купат и за летовите од скопскиот аеродром до Ваксјо во Шведска за летови по 16 септември.


Обвинителство почна предистражна проверка на тендерот за биореагенси


Скопје, 10 август, 2018 - 9:59 (META) 

Основното јавно обвинителство за гонење на организиран криминал и корупција почнало проверка за тендерот за лабораториски реагенси што предизвика бројни реакции и повици за оставка на министерот за здравство, Венко Филипче.

Тоа се прави поради на индиции за повреда на законот при постапки на доделување на договори за јавни набавки во Министерството за здравство, но сепак не станува збор за отворање предмет. Обвинителството и претходно од јавноста и од партиите беше обвинето дека молчи за овој случај.

„Предистражната постапка е како резултат на објавените написи од страна на повеќе медиуми во Република Македонија во врска со неправилностите при спроведување на постапките за јавни набавки во Министерството за здравство. Предметот се однесува на постапката за јавна набавка за биореагенси и тестови на крв во износ од 35 милиони евра и за набавка на лекови од веледрогерија за потребите на јавните здравствени установи без тендерска постапка во износ од 24,6 милиони денари“, соопштија од Обвинителство.


Филипче: Министерството за здравство го поништи тендерот за набавка на реагенси


Скопје, 23 јули, 2018 - 11:01 (META) 

Министерот за здравство Венко Филипче денеска изјави дека на тендерот за набавка на тестови и реагенси за биохемиски, имунолошки, хематолошки, коагулациони и гасни анализи со отстапување на потребната опрема (анализатори) на бесплатно користење за потребите на Јавните здравствени установи, се јавил само еден економски оператор кој има недостатоци во поднесената документација.

– Интензивно работевме на евалуација на понудата од моментот на нејзиното отварање. Првичната евалуација укажува на недостатоци во поднесените документи од страна на економскиот оператор. Токму затоа Министерството за здравство донесе одлука дека тендерот треба да се поништи. Истовремено сметаме дека во овој случај и за овој тендер е некоректно да се склучи договор, иако Законот за јавни набавки дозволува да се склучи договор со една фирма понудувач – рече Филипче.

Тој ги  повикува компаниите кои работат во оваа сфера, да работат на намалување на цените на реагенсите и до 15-20 проценти колку што е пазарната вредност.

Од ВМРО-ДПМНЕ реагираа дека „десетици милиони евра се делат на фирма формирана пред четири месеци, која како прва зделка добива тригодишен монопол на лабораториските испитувања“.


„Комунална хигиена“ ќе го преземе чистењето на Клинички центар


Скопје, 13 јули, 2018 - 12:59 (META) 

Екипи на јавното претпријатие „Комунална хигиена – Скопје“ утрово спроведоа чистење на Клиничкиот центар „Мајка Тереза“, а како што велат од Град Скопје, планирано е ова претпријатие да го преземе чистењето на болничкиот комплекс. Но за тоа да се случи ќе треба да „ги решиме правните аспекти на набавката“, велат од Град Скопје, апелирајќи граѓаните повеќе да внимаат на тоа како фрлаат отпадоци.

„Повеќедецениската негрижа за хигиената во Клинички центар досега резултираше со неколку акции за расчистување на отпадот. Град Скопје цени што граѓаните волонтираат во чистењето на Клинички центар во овој преоден период и придонесуваат да се ублажи настанатиот проблем“, порачаа од градската управа, заблагодарувајќи се на волонтерите што утрово се појавија на акцијата за расчистување.


Tендерот за субвенционирање на нискобуџетски авиокомпании, до крај на месецот


Охрид, 19 јуни, 2018 - 14:33 (META) 

Тендерот за субвенционирање на нискобуџетните авиокомпании ќе биде распишан до крајот на месецот, информираше денеска министерот за транспорт и врски, Горан Сугарески.

Тој додаде дека субвенционирањето продолжува и оти заложбата е што повеќе летови да бидат насочени кон Охридскиот аеродром.

– Ќе може да се пријават сите компании кои се заинтересирани, што значи дека продолжуваме со субвенцирање на нискобуџетските компании со насочување кон Охридскиот аеродром – истакна Сугарески.

Во врска со критериумите во тендерот очекува да бидат направени подобрувања на моделот за субвенционирање.

Овој месец истекува договорот за субвенционирање потпишан со нискобуџетската авиокомпанија „Виз ер“.


ЕЛЕМ: Условите во тендерот за ископ на јаглен бараат само сериозни фирми


Скопје, 13 април, 2018 - 16:00 (META) 

АД ЕЛЕМ, државниот производител на струја, кој од генералниот секретар на ВМРО-ДПМНЕ, Игор Јанушев, денеска беше обвинет дека ги мести условите за учество на новиот тендер на РЕК Битола вреден 320 милиони денари за да победи фирма блиска до врвот на СДСМ, ги отфрли обвинувањата.

Во соопштение, АД ЕЛЕМ порачува дека условите во тендерот за ископ на јаглен во РЕК Битола гласат „Економскиот оператор во последните 3 години да има извршено ископ на најмалку 900 илјади тони јаглен или 1 милион кубни метри јаловина (земјени или карпести маси) или руда”, од каков било вид.

„Условите во тендерот овозможуваат поголема можност за пријавување на што повеќе економски оператори, а од друга страна, условите се и натаму доволно ригорозни да овозможат пријавување само на фирми кои имаат технички и кадровски капацитет и референци за изведување на одговорна задача, како што е ископот на јаглен во РЕК Битола, од што зависи стабилноста на производствениот процес на електрична енергија за потребите на Р.Македонија. Сакаме да нагласиме дека ВМРО ДПМНЕ неколку дена и дава на јавноста неточни информации и лажни конструкции во врска со јавни набавки во РЕК Битола, кои се демантираат со документацијата која АД ЕЛЕМ и вчера и денеска ја става на увид на целата јавност и исто така на опозицијата“, гласи соопштението од ЕЛЕМ.


Јанушев: ЕЛЕМ го мести тендерот за РЕК Битола за фирма блиска до врвот на СДСМ


Скопје, 13 април, 2018 - 14:04 (META) 

Постои сомнеж дека државниот производител на струја АД ЕЛЕМ ги мести условите за учество на новиот тендер на РЕК Битола вреден 320 милиони денари за да победи фирма блиска до врвот на СДСМ, обвини денеска Игор Јанушев, генерален секретар на ВМРО-ДПМНЕ.

– Согласно тендерската документација – економскиот оператор во последните 3 години треба да има ископано 900.000 тони јаглен, а таква фирма во Република Македонија според информациите со кои што располагаме има само една, тоа е фирмата која важи за блиска до врвот на СДСМ – „Пелистер“ ДОО Битола. Ако тоа е така, другите компании кои се занимаваат со оваа дејност од старт се елиминирани, а со тоа однапред се знае кој ќе го добие тендерот.  Сомнежот е дека oваа тендерска постапка е однапред договорена работа – рече генералниот секретар на најголемата опозициска партија.

ВМРО-ДПМНЕ бара тендерската постапка да биде поништена и да биде распишан нов оглас, со еднакви услови за учество. Јанушев обвини дека власта сакајќи да овозможи простор за нелегални активности смислено го укинала Советот за јавни набавки.

– На површина излегоа причините поради кои беше укинат Советот за јавни набавки, кој беше гарант за законитоста и чувар на јавниот интерес при постапките за јавни набавки. Советот за јавни набавки беше трн во очите на власта, пречка за сите коруптивни шеми, и затоа беше укинат. Цената на неговото укинување сега ја плаќаат граѓаните, од чии пари се полнат сметките на фирми блиски до оваа криминална власт – рече генералниот секретар на ВМРО-ДПМНЕ, напоменувајќи дека вчера партијата обелоденила дека фирмата „Пелистер“ со склучен договор во четири очи во изминатиот период вршеше ископ на јаглен за потребите на РЕК Битола „по цени двојно поголеми од првично предвидените, со што државата плати 1 милион евра повеќе“.


ЕЛЕМ објави тендер за купување на механизација за РЕК Битола


Скопје, 26 март, 2018 - 16:47 (META) 

ЕЛЕМ денеска објави тендер за купување на помошна механизација за РЕК Битола, бидејќи ангажирањето механизација при ископот е еден од главните трошоци на компанијата, информираат од таму.

– За таа услуга ЕЛЕМ постојано им плаќа на надворешни фирми, бидејќи сопствена механизација нема. Планираме за 41 милион евра да ја купиме целата потребна механизација и да копаат нашите работници. Со тоа ќе се изврши заштеда, а таа заштеда ќе се одрази на производствената цена на електричната енергија – изјави директорот Драган Миновски.

За ископ на јаглен, преку ангажирање на надворешни фирми ЕЛЕМ последните пет години платиле 212 милиони евра.

Доколку тендерската постапка се одвива во предвидените рокови, машините треба да бидат испорачани до крајот на годината. Со тоа, во 2019 година помошна механизација од надворешни фирми во РЕК Битола нема повеќе да се користи.

Од ВМРО-ДПМНЕ реагираа на пресот на Миновски и во соопштението велат дека „управувањето на ЕЛЕМ од страна на СДСМ го чинело претпријатието осум месеци без сопствена опрема.“

„Откако СДСМ ја поништи набавката отпочнато во време на ВМРО-ДПМНЕ, набавка која во целост ги задоволуваше потребите на РЕК  Битола, сега распиша парцијален оглас за опрема, која не може во целост да ги покрие потребите на претпријатието“, реагираат од ВМРО-ДПМНЕ.