МВР му даде отказ на Ален Зекиров, поранешниот телохранител на Мијалков


Скопје, 27 јануари, 2018 - 19:24 (META) 

Ален Зекиров, поранешен телохранител на екс директорот на Управата за безбедност и контраразузнавање (УБК), Сашо Мијалков добил отказ од Министерството за внатрешни работи.

Зекиров отказното решение го добил пред три дена од УБК, каде од 2015 година работи во одделот за антитероризам.

Од МВР ја потврдија информацијата.

„По спроведената постапка за утврдување на дисциплинска одговорност поради кршење на работниот ред и дисциплина, на предлог на Комисијата за утврдување дисциплинска одговорност во Управата за безбедност и контраразузнавање, од страна на министерот за внатрешни работи е донесено решение со кое на А.З. му е откажан договорот за вработување во министерството за внатрешни работи“, велат од МВР.

Дел од медиумите наведуваат дека Зекиров отказот го добил поради учеството во насилствата во Собранието од 27 април, минатата година, но од МВР нема официјална потврда на овие информации.


Дваесет и една година од атентатот на поранешниот претседател Глигоров


Скопје, 3 октомври, 2016 - 10:39 (META) 

Пред 21 година, на денешен ден беше извршен неуспешен атентат врз поранешниот претседател Киро Глигоров.

Во атентатот загина возачот на Глигоров, Александар Спировски, a повреден беше и неговиот телохранител Илчо Теовски.

Глигоров имаше тешки повреди на главата.

Атентатот беше извршен со автомобил-бомба пред хотелот „Бристол“ на улица Македонија.

Истражната постапка против непознат сторител е сè уште отворена.

Глигоров почина на 1 јануари 2014 година.


Дејан Митровски – Урко доби кривична пријава за сообраќајката кај скопска Рампа


Скопје, 4 август, 2016 - 15:56 (META) 

Kривична пријава против Дејан Митровски – Урко, поранешниот шеф на обезбедувањето на експремиерот Никола Груевски, денеска поднесе МВР до Основното јавно обвинителство. Митровски се товари за тешки дела против безбедноста на луѓето и имотот во сообраќајот, пренесе „Нова ТВ“.

„Пријавата е земена во работа и истата се разгледува од страна на надлежниот јавен обвинител, по што ќе биде донесена мериторна јавнообвинителска одлука за која јавноста ќе биде навремено информирана“, пишува во одговорот од ОЈО Скопје, информира порталот „Нова“.

Од обвинителството соопштиле и дека според добиениот наод од алкотест кај двајцата учесници, жртвата и Митровски, не е пронајден алкохол во крвта.

Од записникот може да се види дека сообраќајката се случила 30 минути по полноќ на 27 јули, кај крстосницата од булеварот Борис Трајаковски и улицата Невена Ѓеоргиева Дуња.

Во несреќата беше повреден Стојанчо Андонов, роден 1994 година, чиј мотоцикл, марка „хонда цбр 900“, без регистарски ознаки, како што стои во записникот, излегол десно од коловозот и преминувајќи го тротоарот удрил во прозорско стакло и во алуминиумски рам од месарницата „Солета“, а возачот со телото удрил во билборд поставен на тротоарот.

По неколку дена Андонов почина.

Дејан Митревски – Урко беше разрешен од обезбедувањето на Груевски во септември 2014 година, а причините не беа официјално соопштени.

Неговото име се споменува и во дел од прислушуваните материјали што минатата година ги објави лидерот на опозицискиот СДСМ.


СДСМ: Има обид да се сокрие сообраќајката на поранешниот телохранител на Груевски


Скопје, 27 јули, 2016 - 18:27 (META) 

Ужасен е инцидентот во кој поранешниот главен телохранител на Никола Груевски прегази 22-годишно момче, кое, според информациите, е во исклучително тешка здравствена состојба, реагираат денеска од СДСМ.

Оттаму велат дека ова е уште еден многу сериозен и трагичен доказ кому сè во полицијата му биле давани раководни позиции и до каде тие луѓе ги опијанила виртуелната реалност дека сè им е дозволено.

„Слушнавме и од „Вистината за Македонија“ како под раководство на истиот тој поранешен шеф на обезбедувањето на Груевски, со денови се молчело за деталите за убиството на Мартин Нешкоски на плоштадот Македонија.  И за тешкиот инцидент по полноќ, иако Јанкулоска и Мијалков не се во МВР и во УБК, МВРО раководено од наследникот Чавков, како што може да се прочита, не дава прецизни информации на јавноста, што упатува на тоа дека има обид нешто да се скрие. Очигледно, многу работа ја чека оваа држава и нас граѓаните да ги поставиме моралните и професионалните стандарди каде што им е местото“, се наведува во соопштението.


Убиството на Асани – одмазда за убиениот телохранотел на Села


Скопје, 26 јули, 2015 - 15:40 (META) 

Полицијата соопшти дека го уапсила братот на убиениот телохранител и возач на струшкиот градоначалник Зијадин Села за убиството на заменик-директорот на УЈП, Аргетим Асани.

Вчера на социјалните мрежи, а потоа и во изјава за медиумите, таткото на приведениот Абудлај Купа рече дека неговиот син се одмаздил за киднапирањето и за убиството на неговиот брат Купа.


Од петокот по полноќ, ниту трага од исчезаниот Уран Купа, телохранител на струшкиот градоначалник


Струга, 9 февруари, 2015 - 10:47 (META) 

Полициската станица од Струга во саботата, на 7 февруари, извести дека претходната ноќ, околу 1:15 часот, во станица, 50-годишниот Б.К. од селото Велешта пријавил дека бил исчезнат неговиот син, 27-годишниот Уран Купа.

Оттогаш на исчезнатиот, за кого подоцна се дозна дека бил вработен во Општина Струга како шеф на обезбедувањето на градоначалникот, му се губи секаква трага. Од СВР во Охрид информираа дека полицијата интензивно работи на решавање на случајот од моментот на пријавувањето.

Портпарполот Стефан Димоски вели дека во интерес на СВР од Охрид и на ПС од Струга е случајот да се реши што поскоро.

– Сите наши сили и активности се насочени кон пронаоѓање на исчезнатото лице – додава Димоски.

Во меѓувреме, семејството на исчезнатиот Купа упати апел до граѓаните да помогнат во неговото пронаоѓање.

– Апелираме до сите граѓани што ја читаат оваа порака да ни помогнат во пронаоѓањето на лицето Уран Купа, на возраст од 27 години, од село Велешта, Струга, за кого немаме никаква информација каде може да биде. Лицето е исчезнато од 6 февруари, а последен контакт со фамилијата имал околу 19 часот истиот ден. Сите кои можеби имаат информации во врска со исчезнувањето на лицето, да се јаваат на телефонскиот број 072-747-400 или во најблиската полициска станица (192) – стои во апелот на семејството на исчезнатиот Уран Купа.

Уран Купа (27), жител на Велешта, вработен во Општина Струга како лично обезбедување на градоначалникот Зијадин Села, се води за исчезнат од 6 февруари, кога последен пат бил виден во јавност. Тој попладнето излегол од својот дом со автомобил „ауди а4“ на прошетка, а последен пат бил виден околу 19 часот на улица Ристо Крле, по што му се губи секаква трага. Случајот во полицијата го пријавил неговиот татко во 1.15 часот на 7 февруари.

Градоначалникот на Струга, Зијадин Села, смета дека неговиот вработен е киднапиран и упати апел до граѓаните да пријават доколку имаат каква било информација која може да помогне да се пронајде Уран Купа и побара од надлежните институции одговор за случајот.

Од полицијата не сакаат да ги коментираат изјавите на градоначалникот Зијадин Села и го повикуваат да соработува со полицијата за побргу да се расветли овој случај.

– Вечерта кога се случил настанот, во Струга имало полициски службеници во цивил од други места кои вршеле легитимирање без знаење на ПС во Струга. Тоа е индикативно и ни става на знаење дека органите за безбедност треба да имаат некакви информации, но, за жал, нема трага од нашиот вработен, што е доказ дека киднапирањето е извршено од професионалци – вели Села.

Градоначалникот Села изрази сомнеж дека вработениот кој се води за исчезнат можеби е предмет на полициска истрага.

– Ако е притворен, бараме да ни се каже. Доколку некој го прекршил законот, треба да одговара, но нема да се толерираат повеќе вакви работи во Струга затоа што не е првпат на ваков начин да исчезнуваат луѓе од нашиот град – обвинува Села.

За случајот се информирани претставници на меѓународната заедница во земјата.