!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Центар, Гази Баба и Карпош би можеле да добијат градоначалник во првиот круг


Скопје, 9 октомври, 2017 - 20:32 (META) 

Три скопски општини би можеле да добијат градоначалник уште во првиот круг на гласање, покажа анкетата што ја спроведе „М-проспект“ на барање на „Телма“ и на МЦМС, на примерок од 1.560 испитаници.

Општините Центар, Гази Баба и Карпош по гласањето на 15 октомври би можеле да добијат градоначалник. Според анкетата, кандидатот на СДСМ за Центар, Саша Богдановиќ, ќе го победи Дејан Јовановски од ВМРО-ДПМНЕ, а актуелниот градоначалник и кандидат на ВМРО-ДПМНЕ за Гази Баба, Тони Трајковски, ќе го порази Борче Георѓиевски. Стефан Богоев од СДСМ, според анкетата, ќе го победи Стевчо Јакимовски и ќе стане градоначалник на Карпош.

Сепак, поради премалиот примерок и големата маргина на грешка, која изнесува околу 6 отсто, не беа соопштени процентите, туку беа дадени само прогнози.

Според анкетата, тесна борба ќе се води во Аеродром, Чаир, Ѓорче Петров и во Кисела Вода.


Анкета: Трајановски и Шилегов најверојатно во втор круг во трката за градоначалник на Скопје


Скопје, 9 октомври, 2017 - 20:08 (META) 

Изборите за градоначалник на Скопје ќе бидат неизвесни, покажа телефонска анкета што во периодот од 23 септември до 2 октомври ја спроведе „М-проспект“ на барање на „Телма“ и на МЦМС, на примерок од 1.560 испитаници, со статистичка грешка од 2,5 отсто.

Според податоците, разликата меѓу двајцата кандидати за градоначалник на Скопје, на ВМРО-ДПМНЕ , Коце Трајановски, и на СДСМ, Петре Шилегов, е 2,5 отсто, односно мала е веројатноста дека победникот ќе се знае по првиот круг гласање.

Вкупно, 37,1 отсто од анкетираните би гласале за Шилегов, 34,6 отсто за Трајановски, 5,8 отсто за друг кандидат, додека 22,5 отсто не би гласале за ниту еден кандидат. Според етничката припадност на анкетираните, Трајановски најмногу поддршка има од Македонците, односно 42,3 отсто, додека за Шилегов би гласале 30,9 отсто Македонци. Кандидатот на СДСМ има поголема поддршка кај албанското гласачко тело, односно 58,6 отсто од Албанците би гласале за Шилегов, додека за Трајановски би гласале 4,8 отсто.

Слична е состојбата и со советничките листи за Град Скопје. Вкупно 33,8 отсто од анкетираните би гласале за советничката листа на СДСМ, 31,7 отсто својот глас би го дале за листата на ВМРО-ДПМНЕ, 4 отсто од анкетираните се изјасниле за листата на советници на ДУИ, 3,7 отсто за Беса, 0,7 отсто за Алијанса за Албанците, а 2 отсто за друга советничка листа. Сепак, 24 отсто од анкетираните рекле дека нема да гласаат за ниту една листа или, пак, не дале никаков одговор.

Анкетата, исто така, покажува дека три скопски општини – Центар, Гази Баба и Карпош – би можеле да добијат градоначалник уште во првиот круг на гласање.


Заев: Имаме асови во ракавот што не сме ги употребиле против Грција


Скопје, 15 септември, 2017 - 20:13 (META) 

„И ние имаме асови во ракавот што не сме ги употребиле, немојте да мислите дека ги немаме поради тоа што не ги употребуваме. Веројатно и Грција има такви адути, но тоа е нејзина работа“, рече премиерот Зоран Заев, одговарајќи на прашање за спорот за името со Грција во вечерашната емисија „Топ-тема“ на телевизијата „Телма“.

Премиерот Заев кажа дека новата власт бара помош од Грција и сака конструктивно да разговара, но не по секоја цена.


ВМРО-ДПМНЕ: Ајде да ги расчистиме дилемите на предвремени парламентарни избори


Скопје, 13 септември, 2017 - 21:40 (META) 

Во врска со анкетата што „Телма“ ја објави во соработка со „М-Проспект“ и со МЦМС, ВМРО-ДПМНЕ сака да ги повика СДСМ и Зоран Заев да се охрабрат и да излезат и на предвремени парламентарни избори, на кои граѓаните ќе кажат што мислат за расипничкото и неодговорно владеење на СДСМ, се вели во реакцијата на опозициската партија.

Од ВМРО-ДПМНЕ велат дека само на тој начин ќе се расчистат дилемите, бидејќи, според партијата, денеска била објавена истата анкета која пред „само еден месец покажала сосема други резултати“.

„Според анкетата од крајот на јули, резултатите од МЦМС покажале дека ВМРО-ДПМНЕ e со стабилна предност пред СДСМ. Имено, на прашањето доколку утре се одржат избори за која партија би гласале, 27,1 отсто од испитаниците се одлучиле за ВМРО-ДПМНЕ, додека за СДСМ биле 22,7 отсто. Народот најдобро ќе каже дали се случило нешто во последните 30 дена за така драстично да се смени мислењето, односно дали Законот за двојазичност, Договорот со Бугарија, укинувањето на планираното зголемување на пензиите или тендерите кои Кочо Анѓушев си ги доделува себеси придонеле за зголемување на рејтингот на Зоран Заев“, стои во соопштението на ВМРО-ДПМНЕ.


Анкета: 58,9 отсто од граѓаните задоволни од Владата, СДСМ води пред ВМРО-ДПМНЕ


Скопје, 13 септември, 2017 - 20:15 (META) 

Речиси 60 отсто од граѓаните на Македонија се задоволни од работата на новата влада во првите 100 дена, покажува анкетата спроведена од Македонскиот центар за меѓународна соработка (МЦМС) и од телевизијата „Телма“.

Резултатите од анкетата покажуваат дека 58,9 од испитаниците се изјасниле дека се задволни од Владата во првите 100 дена, 34,9 отсто рекле дека се незадоволни, а 6,2 отсто не знаат или одбиле да одговорат.

Според етничката припадност, 54,35 отсто од Македонците се задоволни од првите 100 дена на Владата, 40,22 отсто се незадоволни, додека кај Албанците 71,36 се задоволни, а незадоволни се 21,11 отсто.

На прашањето во која област најмногу сработила Владата во првите 100 дена, 38,5 отсто рекле дека тоа била надворешната политика, 7,4 отсто се изјасниле за социјалната заштита, за 3,2 отсто тоа бил економскиот развој, 20 отсто се определиле за некоја друга област (здравство, правосудство, странски и домашни инвестиции и земјоделство), а 19 отсто рекле дека не знаат или одбиле да одговорат.

За тоа на која област треба најмногу да посвети внимание Владата, 34,2 отсто одговориле дека тоа треба да биде зголемувањето на работните места, 18,4 отсто сметат дека предност треба да му се даде на економскиот развој, за 8,6 осто најважна е интеграцијата во ЕУ и во НАТО, за 10,4 приоритетно е здравството, за 7,4 отсто – социјалната заштита, за 17,1 отсто – други области и 3, 9 отсто рекле дека не знаат или одбиле да одговорат.

Инаку, во вечерашното издание на емисијата „Топ-тема“, на која беа презентирани овие резултати, беше соопштено дека анкетата на МЦМС и на „Телма“ покажува дека СДСМ има за три отсто повисок рејтинг од ВМРО-ДПМНЕ, првпат по 10 години.

Конкретните бројки и проценти од овој дел од анеката ќе бидат соопштени во утрешното издание на емисијата.


Анкета на „Телма“: Граѓаните веруваат дека зад упадот во Собранието стои ВМРО-ДПМНЕ


Скопје, 17 мај, 2017 - 21:52 (META) 

Во најновата анкета на телевизија „Телма“ и на МЦМС, направена од 10 до 15 мај, на прашањето кој стои зад нападот во Собранието, 40,5 проценти изјавиле дека тоа е ВМРО-ДПМНЕ, 20 проценти изјавиле дека толпата влегла спонтано, 8,7 проценти сметаат дека упадот бил спроведен од странски служби, 4,6 проценти – СДСМ, а 25,4 проценти одговориле дека не знаат.

Високи 81,3 проценти од испитаниците не го оправдуваат насилството врз пратениците што се случи во Собранието, а 6,1 отсто одговориле дека насилството врз пратениците е оправдано.

На прашањето дали полицијата овозможила ескалација или смирување на ситуацијата, 57 проценти од испитаниците одговориле дека полицијата овозможила ситуацијата да ескалира, 27,6 проценти одговориле дека таа овозможила намалување на насилствата, а 16,3 проценти одбиле да одговорат.

62,2 проценти од испитаниците одговориле дека очекуваат правна разврска и фер судење за настаните во Собранието, а 28,9 проценти не очекуваат.

На прашањето дали постапките на претседателот Ѓорге Иванов придонесуваат за смирување или влошување на политичката криза, 48,6 проценти одговориле дека тој ја влошува политичката криза, 38 отсто сметаат дека неговото однесување придонесува кон смирување на кризата, а 13,3 проценти одбиле да одговорат.

Изборот на Талат Џафери за претседател на Собранието, 50,3 проценти од испитаниците не го одобруваат, а 49,1 отсто го сметаат за нелегитимен неговиот избор.


ВМРО-ДПМНЕ: Да веруваше Заев во анкетата на „Телма“ ќе излезеше на нови избори


Скопје, 14 февруари, 2017 - 14:45 (META) 

СДСМ загуби на изборите, а народот му порача на аболираниот криминалец Зоран Заев дека нема да дозволи такви ликови да ја водат државата, реагираат од ВМРО-ДПМНЕ на вчерашната анкета која ја објави телевизија „Телма“.

„Секогаш кога СДСМ е во паника прибегнува кон истите методи на лаги и манипулации. Доколку Заев барем малку веруваше во анкетите на ’Телма’ и во порастот на довербата во СДСМ, ќе се согласеше да излезе на нови, брзи предвремени избори со кои што би се скратила сегашната криза. Наместо тоа, Заев одлучи да бега, да се крие и да нуди гаранции и отстапки по цена на националните интереси, само за да дојде на власт и да ја заобиколи волјата на граѓаните без избори“, стои во соопштението.

Од партијата велат дека ако Заев се обиде да турка платформи и агенди спротивно на волјата на мнозинството граѓани, ВМРО-ДПМНЕ ќе стори се за да ги одбрани националните интереси.

Најновата анкета на агенцијата „М-проспект“ направена по нарачка на телевизија „Телма“ покажа дека ако утре се одржат избори, ВМРО-ДПМНЕ и СДСМ ќе бидат речиси изедначени, а единствено промена би имало кај партиите на Албанците.


Се топи разликата, но ВМРО-ДПМНЕ сè уште води пред СДСМ, покажа анкетата на „Телма“


Скопје, 5 декември, 2016 - 21:43 (META) 

Разликата меѓу ВМРО-ДПМНЕ и СДСМ е 3,9 отсто во корист на владејачката партија, покажа анкетата што ја нарача телевизија „Телма“, а ја спроведоа Институтот за демократија „Социетас цивилис“ и МЦМС, преку агенцијата „М проспект“. Истата анкета, кај албанскиот блок констатирала 3,3 отсто предност во полза на ДУИ, во однос на ДПА.

Новата анкета, која е направена според изборни единици и на национално ниво, покажува намалување на разликата меѓу ВМРО-ДПМНЕ и СДСМ, која во споредба со претходната анкета на „Телма“ е намалена за 0,9 отсто.

Според новото истражување, доколку утре се одржат избори, 23,3 отсто од гласачите би гласале за ВМРО­ ДПМНЕ, 19,4 отсто за СДСМ, 6,6 отсто за ДУИ, 3,3 отсто за ДПА, 2,7 отсто за Беса, 2,5 отсто за Коалиција ВМРО за Македонија, 1,9 отсто за Алијанса за Албанците, 1,2 отсто за Левица, 0,9 отсто за Коалиција за промени и правда и 0,1 отсто за Либерална партија. Од анкетираните, високи 15,1 отсто се изјасниле како неопределени, 17,6 отсто одбиле да се изјаснат, а 5,5 отсто не се изјасниле за ниту една партија.

Гледано според изборни единици, СДСМ има предност од 2,3 отсто пред ВМРО-ДПМНЕ во првата изборна единици, односно 24,2 отсто од анкетираните од првата изборна единица би гласале за коалицијата на СДСМ, 21,9 отсто за коалицијата предводена од ВМРО-­ДПМНЕ, 7,6 отсто за ДУИ, 5 отсто за Беса, 3,6 отсто за Левица, 3 отсто за коалицијата ВМРО за Македонија, 3 отсто за Алијанса за Албанците, 2,6 за ДПА и 1,7 отсто за Коалиција за промени и правда. Либерална партија не се појавува во овој примерок. Од оваа изборна единица, 13,9 отсто од анкетираните не сакале да кажат за кого ќе гласат, 16,2 отсто изјавиле дека сè уште не одлучиле, а 5 отсто се изјасниле дека не поддржуваат ниту една партија.

Во втората или скопско-кумановската изборна единица, владејачката ВМРО-ДПМНЕ ѝ бега на СДСМ за 1,4 отсто, односно 19,3 отсто се изјасниле за ВМРО-ДПМНЕ, 17,9 за СДСМ, 8,1 отсто за ДУИ, 4,1 отсто за ДПА, 2,6 отсто за Беса, 1,7 отсто за Алијанса за Албанците. По 1,7 отсто поддршка имаат и Коалиција за промени и правда и коалицијата ВМРО за Македонија, додека за ЛП би гласале 0,3 отсто од анкетираните. Левица не е присутна во одговорите. Сепак, во втората изборна единица најголем е бројот на анкетирани кои одбиле да кажат за кого гласаат, односно 22,3 отсто. Според анкетата, 13,2 отсто сè уште не одлучиле за кого ќе гласаат, а 5,4 отсто нема да гласаат за ниту една партија.

Во третата изборна единица, ВМРО-ДПМНЕ убедливо води пред својот политички опонент – СДСМ, со 9,5 отсто. Така, доколку утре се гласа, ВМРО-­ДПМНЕ би добила 35,6 отсто од гласовите, СДСМ – 26,1 отсто, а за коалицијата ВМРО за Македонија би гласале 5,3  отсто. Неопределени во оваа изборна единица се 9,9 отсто од анкетираните, а 14,9 отсто одбиле да се изјаснат за кого ќе гласаат. Слично како и во претходните две изборни единици, тука 5,3 отсто одговориле дека нема да гласаат за ниту една партија.

Во таканаречената лидерска, односно четвртата изборна единица, каде носители на листите се лидерите на ВМРО-­ДПМНЕ, Никола Груевски, и на СДСМ, Зоран Заев, анкетата покажува дека владејачката коалиција има водство од 2,3 отсто, односно дека 28,3 отсто се изјасниле за коалицијата што ја предводи Никола Груевски, а 26 отсто за коалицијата предводена од Заев.  За коалицијата ВМРО за Македонија би гласале 2,7 отсто, а Коалицијата за промени и правда, како и Левица би добиле по 0,7 отсто од гласовите. Според резултатите, 21 отсто одбиле да кажат за кого ќе гласаат, а 15 отсто сè уште не одлучиле за кого ќе гласаат.

Во петтата изборна единица, за ВМРО­-ДМНЕ се изјасниле 29,5 отсто од анкетираните, за СДСМ 8 процентни поени помалку, односно 21,5 отсто, за ДУИ се изјасниле 6,7 отсто. Коалицијата Алијанса на Албанците и движењето Беса имаат по 1,3 отсто, додека за ДПА се изјасниле 1 отсто. Сепак, 17,8 отсто во оваа изборна единица одбиле да кажат за кого ќе гласаат, 2,4 отсто сè уште не одлучиле, а 6 отсто не се изјасниле за ниту една партија.

Во шестата изборна единица, каде силите ќе ги одмерат лидерите на политичките партии од албанскиот блок, убедливо води ДУИ. Според анкетата најмногу гласови ќе однесе ДУИ, односно 18,9 отсто од гласовите, ДПА и Беса би освоиле по 10 отсто, додека за Алијансата за иднината на Албанците ќе гласаат 4,3 отсто.

Од партиите од македонскиот блок, ВМРО-ДПМНЕ има за 3,3 отсто поголема поддршка од СДСМ, односно поддршка добиле од 8 отсто од анкетираните, додека СДСМ ја поддржале 5,3 отсто. Коалицијата за промени и правда има поддршка кај 3 отсто. Во шестата изборна единица, сепак, има голем број неодлучни, односно 20,3 отсто, но и 16,9 отсто кои одбиле да кажат за кого ќе гласаат. Како и во другите изборни единици, и тука 5 отсто нема да гласаат за ниту една партија.


Разликата меѓу ВМРО-ДПМНЕ и СДСМ е 4,8 отсто, покажа анкетата на „Телма“


Скопје, 25 ноември, 2016 - 21:13 (META) 

Разликата меѓу најголемите македонски политички партии изнесува 4,8 отсто, покажа анкетата што ја нарача телевизија „Телма“, а ја спроведоа Институтот за демократија „Социетас цивилис“ и МЦМС.

Доколку утре се одржат избори, за ВМРО-ДПМНЕ би гласале 23,7 отсто од гласачите, за СДСМ – 18,9 отсто, за ДУИ – 6,2 отсто, за ДПА – 3,3 отсто, за Беса – 1,2 отсто, додека за други партии би гласале 4,9 отсто.

Од албанскиот електорат, 6,3 проценти се изјасниле дека ќе гласаат за СДСМ, а 1,3 отсто за ВМРО-ДПМНЕ.

Во анализата на анкетата се наведува дека дури 18,2 проценти од гласачкото тело кое се изјаснило дека ќе гласа на изборите не сакало да одговори за кого ќе гласа. Од нив, 14,3 отсто работат во јавниот сектор, 16,4 проценти се од приватниот сектор, 17,7 проценти се невработени.

Податоците од анкетата покажуваат дека 14,9 отсто од електоратот сè уште се неопределени, а 8,5 отсто нема да излезат на изборите.

Анкетата е направена лице в лице во периодот од 6 ноември до 20 ноември, односно пред почетокот на изборната кампања, кога сè уште немаше кандидатски листи и не беа направени коалициите.


Новинар на „Телма“ нападнат пред зградата на МВР


Скопје, 20 октомври, 2016 - 23:11 (META) 

Новинарот на телевизијата „Телма“, Павле Беловски, вечерва бил физички нападнат од непознато лице пред зградата на Министерството за внатрешни работи (МВР), непосредно пред да се вклучи во живо во последното издание на вестите, јави телевизијата.

Напаѓачот му се доближил на новинарот и почнал да го удира со тупаници. Новинарот не бил повреден, а неколкумина полицајци кои биле во близина, веднаш притрчале и го привеле напаѓачот.

Телевизијата најави дека ќе поднесе пријава за напад на новинар во момент додека ја извршувал својата професионална задача.

Засега нема информации за причините и за мотивите за физичкиот напад.