Заев телефонски ја информирал Меркел за подготовките за референдумот


Скопје, 23 август, 2018 - 9:28 (META) 

Во телефонски разговор вчера попладнето, премиерот Зоран Заев зборувал со канцеларката на Германија, Ангела Меркел за напорите за европски и атлантски перспективи на Македонија и за подготовките за референдумот, соопшти македонската влада.

Притоа, како што се вели во соопштението, Меркел ја истакнала поддршкта од Германија за Договорот на Македонија и Грција.

„Германската канцеларка, Меркел, даде поддршка на напорите на Владата и на општествено – политичката јавност во Македонија, за зајакнување на европските и атлантските перспективи на граѓаните на нашата држава. Канцеларката Меркел ја потврди поддршката на Германија за постигнатиот Договор меѓу Македонија и Грција, којшто го решава долгогодишниот спор, што беше главна пречка за членството на Република Македонија во ЕУ и во НАТО. Во таа насока заеднички е заклучено дека референдумот е врвен демократски чин и одраз на определбата на граѓаните за иднината на државата“, пренесува Владата.

Заев зборувал и за подготовките за референдумот, порачувајќи дека македонската влада „е силно посветена на организирањето фер, демократски и транспарентни услови за реализација на демократското изјаснување на граѓаните“.

Македонскиот премиер нагласил и дека владата продолжува со реформските зафати заради исполнување на условите од заклучоците на Европскиот совет во јуни 2018 година, особено во делот на владеењето на правото, борбата против корупцијата и криминалот, како и реформите во јавната администрација и разузнавачките служби.


Грчката влада објави промотивно видео со исечоци од телефонски разговори Заев – Ципрас


Атина, 13 јули, 2018 - 15:04 (META) 

Грчката влада на својот официјален „Јутјуб“ канал објави промотивно видео за потпишувањето на Договорот помеѓу Македонија и Грција во Преспа на 17 јуни.

Во видеото освен сцени од потпишувањето на Договорот во Преспа, има делови во кои се гледа како грчкиот премиер Алексис Ципрас телефонски се договара со македонскиот премиер Зоран Заев на англиски јазик.

За време на телефонскиот разговор Ципрас му вели на Заев „Зоран, дали го знаеш регионот на Преспа?“. Во друг момент тој му вели „ова е Балкан, ова е политика, ти ќе се соочиш со потешкотии, јас ќе се соочам со потешкотии, но мислам дека историјата ќе ја диктира нашата одлука“ на што Заев му одговара, „ова е историски момент, пријателе мој“.

Потоа Ципрас насмеан вели „среќен сум што ќе бидам првиот грчки премиер кој што ќе ја посети Северна Македонија“.


Пенс до Заев: Честитки за договорот со Грција – се отвораат вратите за ЕУ и за НАТО


Скопје, 6 јули, 2018 - 9:48 (META) 

Потпретседателот на САД, Мајк Пенс, во телефонски разговор со македонскиот премиер Зоран Заев, вчера го честитал постигнувањето на Договорот на Македонија со Грција за решавање на спорот за името и им честитал на Заев и на неговиот грчки колега Алексис Ципрас за покажаното лидерство, соопшти македонската влада.

„Според потпретседателот Пенс, договорот покажува јасен сигнал дека Република Македонија се доближува кон развиениот западен свет, што ќе биде јасно верификувано на самитот на НАТО во Брисел наредната недела. Поканата за влез во НАТО, како што рече Пенс, е јасен сигнал дека позитивниот резултат од референдумот ќе значи конечно полноправно членство на Македонија во Северно-атлантската алијанса“, стои во владиното соопштение.

Пенс порачал дека САД ќе бидат и понатаму вклучени и ќе ги поддржат процесите кои следуваат во наредниот период во Македонија, посебно за спроведување на реформите, како и за целосно спроведување на договорот со Грција. Тој посакал и  успешни преговори за членство во Европската Унија, известува Владата.

Пенс за телефонскиот разговор извести преку својот Твитер-профил, порачувајќи дека искажал поддршка за Договорот со Грција. Тој вели дека успешното спроведување на договорот ќе ја отвори вратата кон евроинтеграцијата и ќе ги засили просперитетот и стабилноста на регионот.

Потпретседателот на САД имал телефонски разговор и со грчкиот премиер Ципрас, кому му ја упатил истата порака за значењето на Договорот за напредокот на регионот.


Заев: Се надевам на договор, денеска ќе имаме уште еден суштествен разговор


Скопје, 12 јуни, 2018 - 11:26 (META) 

Премиерот Зоран Заев изјави дека очекува со денешниот телефонски разговор со неговиот грчки колега, Алексис Ципрас да бидат заокружени сите аспекти и да биде постигнат договор за долгогодишниот спор за името.

– Вчера имавме навистина квалитетно унапредување на разговорите. Се надевам дека денеска ќе можеме нешто убаво да и соопштиме на јавноста. Реков дека сум оптимист и оти е возможно да се постигне договор, но денеска имаме уште еден суштествен разговор, за мене многу важен. Се надевам дека ќе ги заокружиме сите аспекти за да го исполниме очекувањето на двете страни – рече Заев, одговарајќи на новинарско прашање по отворањето на Бизнис форумот-инвестициски проекти и можности во секторите транспорт, енергетика и животна средина во Македонија.

Заев посочи дека двајцата премиери, двајцата министри за надворешни работи, двете Влади и огромно мнозинство на граѓани на двете земји се заинтересирани за конечно решавање на овој долгогодишен проблем.

– Ако денеска се случи, дај Боже договор, ние веднаш тоа ќе го соопштиме со сите детали, а верувам ако има договор тогаш би требало да правиме агенди. За Преспа знаеме заради тоа што беше желба уште многу одамна дури во преговарачкиот процес да се направи една средба. Но, во секој случај јас би почекал, да одиме чекор по чекор, да видиме прво дали ќе има договор, а ако има договор веднаш ќе ги договориме и агендите, агендите на соопштување и информирање дома на сите политички чинители на граѓаните, но и делот на евентуалното потпишување – рече Заев, прашан за пишувањата во грчките медиуми дека евентуалниот договор може да биде потпишан претстојниот викенд во Преспа.

Во врска со имињата што се спомнуваат во јавноста како можно решение, Заев рече дека јавноста ќе биде запознаена со сите детали веднаш штом биде постигнат договор.

– Северна, Горна, Нова, Вардарска, многу имиња беа во опција, ги знаете и предлозите на Нимиц, јас би почекал до самиот крај да соопштам заради тоа што навистина се уште немаме договор. Јас се надевам дека можеби ќе имаме или многу брзо ќе имаме. Но, штом ќе го имаме, веднаш ќе ги соопштиме сите детали од договорот – изјави премиерот.


Заев и Ципрас телефонски разговарале еден час, утре повторно ќе се слушнат


Скопје, 11 јуни, 2018 - 16:35 (META) 

Премиерите на Македонија и на Грција Зоран Заев и Алексис Ципрас денеска го имале телефонскиот разговор што го најавија пред 10 дена како своевидна завршница на договорот за името.

Како што информираат од Владата, Заев и Ципрас се слушнале во 14 и 15 минути по македонско време и разговарале околу еден час.

„За време на разговорот се дискутираше за преостанатите прашања и беа разгледани неколку идеи за решенија. Во текот на утрешното претпладне ќе следува уште еден телефонски разговор“, се вели во краткото соопштение.

Денешниот телефонски разговор Заев – Ципрас, попладнето го најави грчкиот шеф на дипломатијата Никос Коѕиас, по вонредната средба што ја имаше со грчкиот премиер.


Заев се надева на решение на спорот со името пред Самитот на ЕУ


Скопје, 11 јуни, 2018 - 13:13 (META) 

Премиерот Зоран Заев изрази надеж дека многу брзо ќе биде постигнато решение за спорот за името меѓу Македонија и Грција и оти тоа би можело да се случи пред Самитот на ЕУ закажан за 28 и 29 јуни.

Тој денеска во Арачиново, каде што беше означен почетокот на проектот за изградба на нова општинска зграда, истакна дека брзото решавање на спорот е врзано, како што кажа, со нашата желба да има решение пред Самитот на ЕУ и пред Советот на ЕУ закажан за 25 и 26 јуни, нагласувајќи дека деновите се броени.

Потенцираше дека е битно да се постигне квалитетно решение кое што ќе биде правно поткрепено, ќе биде достоинствено и ќе го зачува идентитетот, поради тоа што понатаму тоа решение треба да има и позитивен одѕив кај граѓаните на земјава кои за него треба да на крај да се изјаснат на референдум.

Заев истакна дека постојано се одржува комуникација на сите нивоа во Владата во однос на прашањето за името и оти се разгледуваат различни стратегии завршување на овој 25 годишен спор. Додаде дека веднаш откако ќе има телефонски разговор со грчкиот премиер Алексис Цирпас, ќе ја информира јавноста.

– Се работи за последните моменти во обидите да се приближиме околу ставовите и кога тоа ќе се случи заеднички ќе ја соопштиме среќната вест и за граѓаните на Република Македонија и за граѓаните на Република Грција – рече Заев.

Нагласи оти секако тоа би бил договор најпрво меѓу претседателите на двете влади, меѓу министрите за надворешни работи, а кога тоа ќе се случи веднаш ќе бидат информирани шефот на државата, шефот на опозицијата, другите политички лидери и граѓаните.

За името кое што ќе биде постигнато како можно решение не сакаше да шпекулира ниту сакаше да одговори на новинарско прашање дали Република Северна Македонија како најчесто споменувано во грчките медиуми е можната прифатлива опција.

Заев додаде дека прашањето се решава на ниво на билатерална комуникација меѓу Грција и Македонија, а дека поддршката што ја даваат ЕУ, САД и сите меѓународни чинители е мошне важна во целиот процес.


Коѕиас потврди дека Заев и Ципрас ќе имаат телефонски разговор денеска


Атина, 11 јуни, 2018 - 13:03 (META) 

Грчкиот министер за надворешни работи Никос Коѕиас по заминувањето од премиерскиот кабинет кусо потврди дека премиерите Алексис Ципрас и Зоран Заев денеска ќе се слушнат на телефон.

Коѕиас не сакаше да даде изјава за медиуми, но на новинарско прашање дали Ципрас и Заев ќе разговараат денеска, кусо рече: „Ќе го направат тоа“. Но, не одговори што ќе си кажат, изјавувајќи дека премиерите сами ќе соопштат, пренесува „Иефимерида“.

Грчките медиуми претходно објавија дека шефот на грчката дипломатија бил на вонредна средба со грчкиот премиер Алексис Ципрас во премиерската палата.


Владата без прецизен одговор за најавениот разговор помеѓу Заев и Ципрас


Скопје, 6 јуни, 2018 - 13:13 (META) 

Портпаролот на Владата, Миле Бошњаковски денеска на прес-конференција во Владата не прецизираше до каде се преговорите и дали е можна средба или телефонски разговор на премиерите на Грција и Македонија до крајот на неделава.

Бошњаковски не сакаше да даде ниту коментар на „Фејсбук“ статусот на Антонио Милошоски од ВМРО-ДПМНЕ кој напиша дека во четврток или петок ќе се случи средбата помеѓу Зоран Заев и Алексис Ципрас во Мала Преспа.

– Имаме официјална прес-конференција во Владата на РМ. Не си дозволувале да коментираме неофицијални информации без разлика од какви извори доаѓаат, сè додека немаат кредибилитет и легитимитет – рече Бошњаковски.

И на прашањето дали до крајот на неделата се очекува разговор или средба Заев-Ципрас, рече дека Владата останува на претходно кажаните ставови дека не навлегува во сферите на шпекулациите.

– Сметаме дека ова прашање е исклучително важно и тоа што претходно го најави премиерот останува како владин став и денеска – рече владиниот портпарол.

Премиерот Заев вчера изјави дека во прашање се денови кога ќе се случи телефонскиот разговор меѓу него и Ципрас и додаде дека во моментот сè уште се создаваат околностите тоа да се случи.

Македонскиот премиер не сакаше да шпекулира за прифатливите предлози околу името, ниту за тие содржани во пакетот на медијаторот Метју Нимиц. Процесот, според него е на самиот крај и изрази верување дека крајот ќе биде успешен.


Ангела Меркел телефонски разговарала со Заев и со Ципрас


Скопје, 22 мај, 2018 - 13:54 (META) 

Германската канцеларка вчера телефонски разговарала со македонскиот и со грчкиот премиер, Зоран Заев и Алексис Ципрас, потврдиле за „Дојче Веле“ од прес-службата на германската канцеларка.

Од Берлин доаѓа само потврда дека канцеларката Ангела Меркел телефонски разговарала и со македонскиот и со грчкиот премиер. Темите и други детали не се соопштуваат, но разговорите се реализираат само два дена откако македонскиот премиер Заев на македонската јавност ѝ соопшти дека предлог-решението за името е „Република Илинденска Македонија“ и откако веднаш потоа стигна студениот туш од Атина преку соопштение на грчката влада – дека треба да се најде име што ќе има географска или временска одредница.

Германската канцеларка Меркел на маргините на самитот ЕУ-Западен Балкан во Софија имаше одвоени средби со Зоран Заев и со Алексис Ципрас, по што порача дека се радува што слуша дека „добро напредуваат разговорите меѓу Македонија и Грција”.

– Обете земји сторија многу во правец на значителен напредок, иако сѐ уште не се на целта – рече таа минатиот четврток.


Ципрас и Меркел телефонски разговарале за прашањето за името


Атина/Берлин, 20 февруари, 2018 - 13:16 (META) 

Грчкиот премиер, Алексис Ципрас и германската канцеларка Ангела Меркел имале телефонски разговор, во кој една од темите било и прашањето за името, соопштиле од кабинетот на Ципрас, пренесува Македонската информативна агенција (МИА).

Инаку, телефонскиот разговор меѓу Ципрас и Меркел доаѓа еден ден пред официјалната посета на македонскиот премиер Зоран Заев на Берлин, во рамките на која е предвидена и средба со германската канцеларка.

„Двајцата лидери разговараа за текот на разговорите за прашањето за името на ПЈРМ, провокативната воздухопловна активност на Турција во Егејското море и евро-турските односи“, се наведува во кусото соопштение од кабинетот на грчкиот премиер.

Грчката телевизија „Скај“, повикувајќи се на свои извори, објави дека „Ципрас на Меркел и ја потенцирал потребата за конечно решение во спорот, со промена на уставното име на соседната земја“.

Според истите извори, грчкиот премиер и германската канцеларка се договориле да се сретнат во петок во Брисел на неформалниот состанок на лидерите на Европската Унија.