!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Министерството за култура жали за одлуката на Лешоски и го брани решението за „Танец“


Скопје, 16 август, 2017 - 15:59 (META) 

Министерството за култура жали поради одлуката што ја донесе Дарко Лешоски да се повлече од функцијата претседател на Управниот одбор на Струшките вечери на поезијата, но порачува дека за тоа место ќе се избере некое слично решение. Во однос на назначувањето на новиот в.д. директор на националниот ансамбл „Танец“, во Министерството не гледаат ништо спорно и велат дека Стојанче Павловски е назначен законски.

– Навистина ни е жал што се повлече Дарко Лешоски. Нашата намера со промените во раководствата и во управните одбори на многу национални установи од областа на културата, беше да го прекинеме ланецот на можни злоупотреби, но и во овие институции и манифестации кои се одвиваат во децентрализиран амбиент, да внесеме луѓе кои подобро го разбираат локалниот контекст. Сметавме дека Лешоски кој доаѓа од тој крај, а освен тоа има еден автентичен и смел авторски поетски опус, ќе внесе една свежина и ќе и помогне на оваа манифестација да кореспондира повеќе со современите текови на овој ввид на уметничко изразување – изјави за „Мета“ Петрит Сарачини, советник во кабинетот на министерот за култура.

Тој вели дека Министерството при донесувањето на новото решение ќе ја земе предвид целата дебата што се случуваше во јавноста и врз основа на критиките и забелешките на јавноста, ќе донесе кадровско решение за позицијата на прв човек на Струшки вечери на поезијата.

– Ќе донесеме соодветно решение врз основа на нашите сознанија, но не откажувајќи се од нашите заложби за децентрализација на културата и за внесување на нов дух во нашата култура – нагласува Сарачини.

Одговарајќи на критиките од ВМРО-ДПМНЕ дека за в.д. директор на „Танец“ е назначен Стојанче Павловски, кој има завршено само средно градежно образование, Сарачини вели дека сè e според законот.

– Единствениот критериум што го пропишува законот за именување на в.д. диреетори е тие да доаѓаат од самиот колектив, од редот на вработените. Нема никаков критериум за формално образование. Инаку, Стојанче Павловски е 28 години член на ансамблот, го носи звањето „истакнат играч-солист од прв ред“, добитник е на многу признанија, автор на кореографија, бил заменик-раководител на овој ансамбл, изиграл стотици концерти низ цел свет и нашиот став е дека одговара на сите критериуми што некој би ги барал – вели Сарачини.

Тој нагласува дека кога станува збор за в.д. директорите, нивниот мандат ќе изнесува најмногу 6 месеци, а по изборите ќе има конкурси на кои ќе може да се пријават сите, вклучително и лица надвор од институциите.


ВМРО-ДПМНЕ: СДСМ за директор на „Танец“ постави човек со средно градежно училиште


Скопје, 15 август, 2017 - 11:31 (META) 

Алаѓозовски е поим за неспособност и деструкција. Тој е целосно неспособен и незаинтересиран за развојот на културата која секојдневно ја разорува. Поставувањето на Стојанче Павловски за в.д. директор на Националната установа за народни игри и песни ансамбл „Танец” е уште еден доказ за хаосот и партизацијата што ги создава СДС, рече денеска на прес-конференција Владимир Атанасов од ВМРО-ДПМНЕ.

Тој рече дека Павловски е човек со завршено средно градежно образование, „кој е поставен само затоа што е политички подобен за Заев и Алаѓозовски“.


Балкански фестивал на народни песни и игри во Охрид


Охрид, 7 јули, 2016 - 11:36 (META) 

Од денеска па сè до 10 јули, на отворената сцена Долни сарај во Охрид ќе се одржува јубилејното, 55. издание на Балканскиот фестивал на народни песни и игри.

Свеченото отворање ќе биде со настап на „Танец“, со почеток во 21 часот.

На 8 јули, настап ќе има ансамблот „Александар Трети Македонски“ од Мелбурн – Австралија, како и ансамблот „Гоце Делчев“ од Битола.

На 9 јули настап ќе имаат ансамбл од Турција, ансамблот „Китка“ од Истибање, Македонија, и ансамблот „Македонски бисери“ од Австралија.

Директорот на Ансамблот за народни песни и игри на Македонија „Танец“, Зоран Џорлев, вели дека годинава на фестивалот ќе бидат „вратени“ некои народни ора, кои публиката ги бара.

Затворањето на фестивалот ќе биде в недела, на 10 јули, со настапот на ансамблот „Пловдив“ од Бугарија, ансамблот „Искра“ од Црна Гора и на КУД „Отексфолк“ од Охрид.


Џорлев: „Танец“ не настапуваше на митингот на ВМРО-ДПМНЕ, луѓето си беа таму приватно


Скопје, 17 март, 2015 - 13:55 (META) 

Зоран Џорлев, директорот на Националната установа „Танец“ – Ансамбл за народни песни и игри на Македонија, вели дека се чувствува крајно разочаран затоа што многу новинари му се јавиле да го прашаат дали навистина „Танец“ настапувал на трибината на ВМРО-ДПМНЕ која во неделата се одржа во Спортскиот центар „Борис Трајковски“.

– Не, тоа не беше „Танец“. Јас не можам да им кажувам и да им забранам на луѓето што ќе прават во приватното време. Но, морам да ви кажам дека сум крајно разочаран од оваа ситуација. Минатата година имавме многу настапи, многу достигнувања, имавме и годишнина, но никој не се јави да ме праша за тоа. А сега, само затоа што виделе дека, наводно, „Танец“ настапувал на трибина на ВМРО, ми се јавија еден куп новинари – вели Џорлев.


Хуманитарен концерт на „Танец“ и на МОБ за настраданите од поплавите


Скопје, 4 март, 2015 - 14:02 (META) 

Ансамблот за народни песни и игри „Танец“, во соработка со Македонската опера и балет, вечерва организира хуманитарен концерт за поплавените подрачја во земјава.

Хуманитарниот концерт ќе се одржи во салонот на МОБ, со почеток во 20 часот. Цената на билетите е 200 денари.


Канческа-Милевска на промоција на монографија за „Танец“


Скопје, 29 јануари, 2015 - 10:52 (META) 

Денеска, на промоцијата на монографијата „Танец – душата на Македонија“, ќе се обрати министерката за култура, Елизабета Канческа-Милевска. Монографијата, која се издава по повод 65-годишнината од постоењето на Ансамблот за народни игри и песни „Танец“, е од авторите Родна Величковска и Марко Китевски.


Промовирано цеде по повод 65 години „Танец“


Скопје, 15 декември, 2014 - 15:05 (META) 

Денеска беше промовиран компилациски компакт-диск на националниот ансамбл за народни игри и песни на Македонија, „Танец“.

Промоцијата е по повод 65 години од постоењето на „Танец“.

Новото издание е компилација од 25 оригинални аудиоснимки и 120 минути видеоматеријал.