По втор пат одложен почетокот на судењето за смртта на малата Тамара


Скопје, 4 јули, 2018 - 11:20 (META) 

По втор пат, во Кривичниот суд, не успеа обидот да започне судењето за смртта на малата Тамара, која во 2015 година почина додека чекаше средства за операција во странство.

За овој предмет, има материјални докази на 10.000 страници, поради што судијата ги замоли адвокатите самите да се снајдат и да си ги ископираат доказите, бидејќи во судот имало еден фотокопир па не можеле да постигнат.

Наредното рочиште е закажано за 17 септември.

За смртта на Тамара, односно за несовесно работење во службата, обвинети се 12 лица, повеќето лекари, а на денешното рочиште не присуствуваше Александар Стојановиќ, за кој судијата Марин Станевски истакна дека не примил уредна покана.

Во судница денес присуствуваа обвинетите Аспазија Софијанова, како член на второстепената комисија, поранешните директори на Фондот за здравство, Маја Парнаџиева -Змејковска и Џемаиали Мехазуии, како и членовите на првостепената комисија Владимир Поповски, Александар Чапароски, Лилјана Тозија, Нааталија Долненец- Банева и Никола Граматиковски, како и членовите на второстепената комисија Шабан Мемети, Ристе Симеонов и Елена Трпковска.


Во Кривичен суд продолжува судењето за смртта на малата Тамара


Скопје, 4 јули, 2018 - 9:53 (META) 

Во Кривичниот суд Скопје денеска на обвинителна клупа треба да седнат 12 лица во врска со смртта на малата Тамара Димовска од Велес, која во 2015 година почина чекајќи операција на рбетот во странство.

Со обвинение за „несовесно работење во службата“ Основното јавно обвинителство поднесе кривични пријави против поранешната директорка на Детската клиника Аспазија Софијанова како член на второстепената комисија и поранешните директори на Фондот за здравствено осигурување на Република Македонија (ФЗОМ), Маја Парнарџиева – Змејкова и Џемали Мехази.

Кривични пријави се поднесени и против членовите на првостепената лекарска комисија, односно Владимир Поповски, Александар Чапароски, Лилјана Тозија, Наталија Долненец Банева и Никола Граматиковски, како и против членовите на второстепената комисија, Александар Стојановиќ, Шабан Мемети, Ристе Симеонов и Елена Трпковска.

На претходното рочиште судењето беше одложено поради отсуство на повеќе обвинети.


Една година затвор за поседување оружје за дедото на малата Тамара


Скопје, 27 јуни, 2018 - 10:44 (META) 

Апелациониот суд ја преиначи пресудата за дедото на малата Тамара од Велес, кој беше осуден на условна казна затвор за поседување оружје по признанието на вина. Одлуката следува по жалбата на Обвинителството. Љупчо Стојановски со одлуката на второстепениот суд е осуден на ефективна казна затвор од 1 година.

На 11 јули се закажани завршните зборови за второто кривично дело „обид за убиство“. Адвокатката Павлина Зефиќ рече дека ќе ги вложат сите правни лекови за да ја оспорат пресудата.

Стојановски на 1 јуни минатата година пукаше во поранешниот министер за здравство, Никола Тодоров. Тој се товареше за две кривични дела – обид за убиство и недозволено изработување, држење и тргување со оружје или распрскувачки материи.

Според она што го кажал пред полицијата, тој дошол утрината сам во Скопје. Кај себе имал повратен билет за Велес. Кажал дека тој најпрвин го чекал Тодоров дома, но ексминистерот не се појавил. Потоа дошол пред Министерството за здравство и веднаш кога му се појавил пред очи, почнал да пука кон него. Тодоров не беше повреден.


Тамара почина чекајќи милост од власта


Скопје, 10 февруари, 2018 - 19:02 (META) 

Тамара Димовска, 10-годишното девојче од Велес што почина точно пред три години и покрај ветувањата за соодветен третман од страна на тогашниот министер Никола Тодоров и раководство на Фондот за здравство, стана симбол за здравствените политики на тогашната власт. Нејзината смрт додека чекаше операција во Турција беше повод за големи протести пред Министерството за здравство.

Чекајќи операција заради деформацијата на `рбетот –  во Турција, оти во Македонија не профункционира Спиналниот центар – Тамара почина во својот дом во Велес на 9 февруари 2015 година. Во тоа време тогашната власт на ВМРО-ДПМНЕ уште трошеше милиони евра на проектите од „Скопје 2014.

Сумата од 100.000 евра не изгледа дека била некаков проблем. Доказ за тоа е на пример само за колонадата пред Македонска опера и балет (МОБ), во тоа време на владеење на коалицијата ВМРО-ДПМНЕ и ДУИ, се потрошени, како што наведе Призма, 1,4 милиони евра – за спас на 14 Тамари.

Два и пол месеци пред тоа, во ноември 2014, граѓаните уште организираа акции за собирање пари за нејзиното лекување во странство. Една година претходно вградената шипка во нејзиниот рбет била отстранета оти била премала за тогашната висина. Граѓаните порачуваа дека се потребни 30.000 евра за соодветен зафат во Хрватска, а 100.000 евра за операција во Турција или во САД.

Но,  Тамара не ги доби потребните документи за лекување во странство, а Фондот и Министерството за здравство ја одолговлекуваа процедурата за нејзина операција.

Како што подоцна ќе се открие, имало злоупотреби на случајот на Тамара заради промоција на Спиналниот центар, односно таа не била испратена во странство на товар на Фондот за здравствено осигурување на Македонија (ФЗОМ) со цел да биде оперирана во новиот центар и така да се создаде публицитет за тој проект.

ФЗОМ на 8 октомври 2014 година испратил допис со кој препорачува пациентите што боледуваат од сколиоза, кифоза или кифосколиоза да не бидат упатувани на лекување во странство бидејќи „се работи за заболувања при кои не постои итност за оперативно лекување“.

Дописот бил испратен до директорот на Клиниката за трауматологија, ортопедски болести, анестезија, реанимација, интензивно лекување и ургентен центар, како и до раководителите на Клиниката за трауматологија, Клиниката за ортопедски болести, Клиниката за анестезија, реанимација и интензивно лекување и на Ургентниот центар. Ова известување било упатено и до првостепената и до второстепената лекарска комисија кои одлучувале за случаите

На 1 јуни лани, десетина минути пред Тодоров да му ја предаде функцијата на новиот министер, Арбен Таравари, кон него пукаше дедото на Тамара.


Судењето за дедото на Тамара одложено за 14 февруари


Скопје, 22 јануари, 2018 - 11:04 (META) 

Денешното рочиште за Љупчо Стојановски, дедото на малата Тамара од Велес, кој се обиде да го убие поранешниот министер за здравство, Никола Тодоров, е одложено бидејќи Апелацискиот суд ја прифатил жалбата на обвинителството за издвојување на психијатриските вештачења на Стојановски.

Судот до наредното рочиште, кое ќе се одржи на 14 февруари, од Министерството за правда треба да добие документ кој ќе потврди дали лиценците на вештаците се нови или се продолжени.

Судењето почна од почеток поради промена на судискиот состав. Адвокатката на обвинетиот, Павлина Зефиќ, рече дека останува на приговорот дека дедото на Тамара го вештачеле лица со истечени лиценци.

Стојановски на 1 јуни 2017 година пукаше во поранешниот министер за здравство, Никола Тодоров. Дедото на Тамара е обвинет за две кривични дела – обид за убиство и недозволено изработување, држење и тргување со оружје или распрскувачки материи. Судот му определи притвор на Стојановски поради постоење опасност од бегство и опасност од повторување на истото кривично дело, a мерката му е продолжувана неколкупати досега.


Поднесено обвинение за дедото на Тамара кој пукаше во Никола Тодоров


Скопје, 28 септември, 2017 - 17:24 (META) 

Обвинение за убиство во обид и за недозволено изработување, држење и тргување со оружје или распрскувачки материи е поднесено против Љупчо Стојановски, дедото на малата Тамара, кој пукаше во поранешниот министер за здравство Никола Тодоров на 1 јуни годинава, пред примопредавањето на министерската функција.

Како што соопшти Основното јавно обвинителство – Скопје, истрагата против Љ.С. е завршена, обвинението е поднесено, а за него е побарано продолжување на притворот.

Дедото на Тамара е речиси четири месеци во притвор. Неговата 9-годишна внука Тамара Димовска почина на 9 февруари 2015 година, додека чекаше да биде одобрено да и се изврши операција на ‘рбетот во странство. Нејзиниот дедо рече дека пукал во министерот бидејќи го смета за виновен за смртта на неговата внука.


ФЗОМ експресно одговори: Ханита в петок да дојде на преглед на Клиниката за ортопедија


Скопје, 9 февруари, 2016 - 14:48 (META) 

По протестот по повод едногодишнината од смртта на малата Тамара Димовска од Велес, каде што говореше и Садула Салиу, татко на 11-годишната Ханита, која има иста дијагноза како и починатото девојче, експресно реагираше Фондот за здравствено осигурување.

Оттаму во соопштение велат дека „Фондот презема активности и стапи во контакт со родителите, при што утврди дека нема конзилијарно мислење од соодветна македонска здравствена клиника, нема поднесено барање за лекување во странство и поради тоа закажа преглед на Универзитетската клиника за ортопедија в петок, каде лекарите ќе го дадат својот наод и стручно мислење. Доколку биде поднесено барање за лекување во странство, Фондот во законски утврдените рамки ќе донесе одлука“.

Салиу на протестот рече дека тој за неговата ќерка Ханита двапати побарал помош од државата, но биле одбиени со образложение дека маната била вродена.

– Случајот на Ханита е ист како тој на Тамара. Таа има искривување на пршлените и ако оваа година не добие помош, количка не ѝ бега. Досега четирипати сме биле во Анкара и сè е на наш трошок. Повеќе немаме сили. Операцијата, колку што знам, чини 20.000 евра. Испративме барања до фондот, но двапати нè одбија – изјави Салиу.

Од Фондот, исто така, информираа дека ги контактирале и родителите на И.П. и утврдиле дека сè уште немаат добиено конзилијарно мислење, ниту, пак, имаат доставено барање до Фондот.

„Поради тоа, закажан е преглед в петок на Универзитетската клиника за ортопедија, за да можат лекарите да дадат наод и стручно мислење. Фондот ќе излезе во пресрет и ќе одговори на барањето за лекување во странство за осигурените лица, доколку е конзилијарно потврдено од соодветните клиники и во согласност со законските прописи“, стои во соопштението.


Убијците на Тамара не се „непознати сторители“, порачаа граѓаните


Скопје, 9 февруари, 2016 - 13:46 (META) 

„Убијци“, „Правда за Тамара“, „Оставка“ скандираа граѓаните што денеска пред зградата на Јавното обвинителство излегоа да искажат револт зашто и по една година Обвинителството сè уште не ги нашло виновниците за смртта на малата Тамара Димовска од Велес.

Присутните побараа за смртта на девојчето да одговара и министерот за здравство, Никола Тодоров.

– Помина една година откако почина Тамара Димовска, а Јавното обвинителство сè уште се нема изјаснето по кривичните пријави против одговорните за нејзината смрт. Одговорот дека се води истрага не е доволен, особено во случај како овој, во кој сите осомничени им се познати на органите на прогонот. Јавниот обвинител уште еднаш покажа дека правдата што ја спроведува не е еднаква за сите граѓани – рече активистот и новинар Огнен Јаневски.

Мајката на Тамара, Жаклина Димовска, во јавното обраќање пред Обвинителството, низ солзи порача дека Обвинителството не треба да се крие зад паролата „непознати сторители“, бидејќи сите точно знаат кој е одговорен за смртта на нејзината ќерка.

– Тодоров е највиновен за смртта на Тамара, толку ли ви е страв од него што една година ништо не смеете да му направите додека си седи сè уште во фотелја? – праша мајката на Тамара.

На протестот присуствуваше и Садула Салиу, со својата 11-годишна ќерка, која има иста дијагоноза како Тамара, но не добива помош од државата.

Саилиу и неговата ќерка Ханита двапати побарале помош од државата, но биле одбиени со образложение дека маната била вродена.

– Случајот на Ханита е ист како тој на Тамара. Таа има искривување на пршлените и ако оваа година не добие помош, количка не ѝ бега. Досега четирипати сме биле во Анкара и сè е на наш трошок. Повеќе немаме сили. Операцијата, колку што знам, чини 20.000 евра. Испративме барања до фондот, но двапати нè одбија – изјави Салиу.

Мајката на Тамара, Жаклина Димовска, рече дека ќе направи сè што е во нејзина моќ да му се помогне на ова девојче, да ја нема истата судбина како Тамара. Таа се надева дека Обвинителството ќе го расветли случајот со нејзината ќерка.

Основното јавно обвинителство вчера преку соопштение информираше дека по допрен глас за случајот на Тамара Димовска од Велес, оформило предмет, спровело низа дејства, при што како осомничени се јавуваат повеќе лица за несовесно работење во службата, од чл. 353-в од Кривичниот законик.

Тие се повикани да дадат изјави пред надлежниот јавен обвинител. Истрагата продолжува во насока на целосно расветлување на случајот, а по завршување на сослушувањето ќе биде донесена мериторна јавно-обвинителска одлука за која јавноста ќе биде навремено известена, велат од Јавното обвинителство.

Тамара Димовска почина пред една година, чекајќи Фондот и Министерството за здравство да се договорат каде ќе се лекува девојчето. Таа боледуваше од сколиоза, но како непосредна причина за смртта од Судска медицина ја наведоа бронхопневмонијата.


Денеска напладне пред Обвинителство, протест по повод годишнината од смртта на Тамара


Скопје, 9 февруари, 2016 - 9:49 (META) 

Денеска напладне, пред Јавното обвинителство во Скопје ќе се одржи протест по повод едногодишнината од смртта на деветгодишната Тамара Димовска од Велес. Организаторите бараат јавниот обвинител итно да покрене обвинение против одговорните за нејзината смрт.

Откако настанот беше инициран на социјалната мрежа „Фејсбук“, Јавното обвинителство соопшти дека за овој случај се осомничени повеќе лица.

Деветгодишната Тамара Димовска од Велес, која имаше искривување на ’рбетот, почина лани на 9 февруари, откако претходно без знаци на живот била пренесена во велешката болница. Битката на девојчето со надлежните институции траеше цели три месеци, при што министерот за здравство, Никола Тодоров, изјави дека операцијата ќе биде на сметка на државата.


Софијанова, Парнаџиева-Змејкова и Тодоров не биле на сослушување за Тамара


Скопје, 8 февруари, 2016 - 17:34 (META) 

Ниту директорката на Клиниката за детски болести, Аспазија Софијанова, ниту, пак, поранешната директорка на Фондот за здравствено осигурување, Маја Парнаџиева-Змејкова, не биле повикани на разговор во Обвинителството за случајот со смртта на Тамара Димовска од Велес.

Софијанова во телефонски разговор ни одговори дека не била во Обвинителството за случај кој се води за смртта на Тамара, а истото телефонски ни го потврди и Парнаџиева-Змејкова.

Директорката на детската клиника кон крајот на минатата година во емисијата „Топ-тема“ рече дека сите членови на комисијата што донесе одлука Тамара да не се испрати во странство биле повикани на сослушување.

„Телма“ денеска објави дека добиле потврда од Обвинителството дека делото злоупотреба на службената положба, за кое, всушност, се товари Тодоров, засега не е предмет за обвинение.

Мајката на Тамара во изјава за „24 Вести“ смета  дека соопштението од Обвинителство е само поради најавениот протест, кој утре треба да се одржи пред зградата на Основното јавно обвинителство во Скопје.

„Ги сослушуваат осомничните за несовесно работење, а нема никој осомничен за злоупотреба на функција, што би се однесувало на министерот за здравство, Никола Тодоров, кој јавно вети помош за мојата Тамара. Дали тоа значи дека министерот е изземен од случајот поради неговата министерска функција. Мислам дека реакцијата на Обвинителството е поради најавениот протест, кој треба утре да се одржи пред нивните врати – вели мајката на Тамара, Жаклина Димовска.