Последното годишно обраќање на Иванов во Собранието на 28 декември


Скопје, 14 декември, 2018 - 9:48 (META) 

Претседателот на државата Ѓорге Иванов, в петок на 28 декември во 12 часот ќе му се обрати на Собранието.

Иванов го испратил барањето до претседателот на Собранието, Талат Џафери на 5 декември, неколку дена откако Џафери на брифинг со новинарите рече дека истекува време за поднесување барање доколку претседателот Иванов сака да го оствари своето право.

– Претходните години, порано добивавме барање од Иванов, оваа година сè уште не е пристигнато. Доколку сака да се обрати тој мора да побрза со доставување барање за да може да му се обезбеди термин. Ова на претседателот на државата му е право, а не обврска, што значи може да не сака оваа година да го искористи ова право – рече Џафери на брифингот одржан на 30 ноември.

Ова ќе биде последно годишно обраќање на Иванов како претседател на државата. Неговиот мандат истекува на 2 мај наредната година, а претседателските избори ќе бидат распишани најверојатно на крајот на јануари или почетокот на февруари.

Иванов 10 години е претседател на државата. Тој прв пат стапи на функцијата откако победи на претседателските избори во 2009, како кандидат на ВМРО-ДПМНЕ, а за втор мандат беше избран во 2014 година.


Џафери: Уставните измени ќе се гласаат на 15 јануари


Скопје, 10 декември, 2018 - 12:40 (META) 

Во понеделник на 17 декември ќе почне комисиската расправа за предлог амандманите на Уставот, изјави денеска собранискиот спикер Талат Џафери по средбата со неговиот албански колега Грамоз Ручи.

Пленарната собраниска седница е закажана за 9 јануари која се очекува да заврши за една недела и потоа на 15 јануари да се гласа за измените на Уставот. За крајното гласање повторно е потребно двотретинско мнозинство од вкупниот број на пратеници.

Од 17 декември започнува да тече и рокот за партиите да поднесуваат амандмани на амандманите.

Последните две јавни дебати за уставните измени ќе се одржат денеска во Штип и во Тетово.


Иванов сè уште не побарал термин за годишното обраќање во Собранието


Скопје, 30 ноември, 2018 - 13:30 (META) 

Нема најава од претседателот на државата, Ѓорге Иванов дека сака има годишно обраќање во Собранието, рече собранискиот спикер, Талат Џафери на брифинг за новинарите.

– Претходните години, порано добивавме барање од Иванов, оваа година сè уште не е пристигнато. Доколку сака да се обрати тој мора да побрза со доставување барање за да може да му се обезбеди термин. Ова на претседателот на државата му е право, а не обврска, што значи може да не сака оваа година да го искористи ова право – смета Џафери.

Мандатот на Иванов истекува на 2 мај наредната година, а претседателските избори ќе бидат распишани најверојатно на крајот на јануари или почетокот на февруари, информира Џафери.

Претседателот на законодавниот дом е категоричен дека на поранешниот премиер, Никола Груевски, кој е во бегство во Унгарија, мора да му биде исплаќана плата затоа што тој има уставно право на тоа.

– Јас сум должен да му пуштам плата додека тој има пратенички мандат. Таа ќе му биде намалена поради неоправдано отсуство. Ако има пристап до неговата банкарска сметка ќе си ја подигне платата. За да му се одземе мандатот мора да гласаат две третини од вкупниот број на пратеници. Пратеничкиот мандат е уставна категорија и не може да се смени само со промена на Деловникот – категоричен е Џафери.

Собраниската седница за утврдување на уставните амандмани за промена на Уставот согласно Договорот од Преспа почнува утре и може да трае најмногу 12 дена, но Џафери е убеден дека овој рок ќе биде пократок.

– Ако на собраниските комисии немаше ништо сензационално, не очекувам да има ни на седницата. Предлагачот, односно владата, потоа треба да организира јавна расправа и по завршувањето треба до Собранието да испрати извештај за да можат да течат следните рокови – вели собранискиот спикер.

Објавувањето на законот за јазици во Службен весник, вели Џафери, ќе чека соодветен момент и контекст во целокупната политичка ситуација.


Координација кај Џафери за формирањето на телото за помирување


Скопје, 6 ноември, 2018 - 10:49 (META) 

Претседателот на Собранието, Талат Џафери, денеска ќе одржи координација со потпретседателите на Собранието, координаторите на пратеничките групи и претставниците на политичките партии што не се организирани во пратенички групи. Тема на координацијата е формирањето интерпартиско парламентарно тело за помирување и интеграција, на барање на независната пратеничка група од ВМРО-ДПМНЕ и коалицијата.

Координацијата требаше да се одржи вчера, но на состанокот кај Џафери не присуствуваа подносителите на иницијативата, поради обврски поврзани со посетата на претседателот на австрискиот Национален совет на Австрија, Волфганг Соботка, кој вчера се обрати пред пратениците во Собранието.

Новиот кординатор на ВМРПО ДПМНЕ Никола Мицевски пак рече оти нема да учествуваат во работата на ова тело бидејќи тоа само по себе ќе значи селективна правда, а најголемата опозициска партија тоа нема да го поддржи.

„Во координативното тело, ВМРО-ДПМНЕ нема да учествува, од причина што со истото ќе претседава човекот кој на срамен начин беше избран на местото во Собранието со кршење на деловникот и процедурите. Тоа координативно тело кое ќе работи на помирување доколку донесе одлуки и ставови, а тоа значи неселективна правда и можност за учество и праведност кон сите учесници и кои ќе бидат прифатливи за партијата, ќе ги подржи одлуките од истотот тело.“ – изјави Никола Мицески.

Формирањето на телото за помирување беше еден од условите на осумте опозициски пратеници да гласаат за отворање на Уставот. Нивните очекувања се дека сите пратенички групи ќе се вклучат во работата на интерпартиската комисија, која првенствено ќе се фокусира на настаните од 27 април, а не ја исклучуваат можноста да се продолжи мандатот и истото работно тело да функционира и во иднина за други политички прашања.


Милошоски: ВМРО-ДПМНЕ бара веднаш да се гласа за уставните измени


Скопје, 19 октомври, 2018 - 15:14 (META) 

Пратеникот на ВМРО-ДПМНЕ, Антонијо Милошоски од претседателот на Собранието, Талат Џафери побара без дополнително одлагање да ја стави точката за уставни измени за изјаснување, да има гласање, и владејачкото мнозинство да види дека нема мнозинство и дека нема мандат да покрене уставни измени.

– Гледаме дека власта одолговлекува со седницата. Деветнаесет дена се одолговлекува точката да се стави на дневен ред за гласање, затоа што владеачкото мнозинство е свесно дека за пратениците е поважно волјата на народот отколку притисиците на кои се изложени. Ние како пратеници ќе го кажеме нашиот став и ќе гласаме согласно волјата на народот, изразена преку пропаднатиот референдум и недевањето мандат за уставни измени – рече Милошоски.

Запрашан дали е точно дека седуммина нивни пратеници ќе гласаат за уставните измени Милошоски изјави дека владејачкото мнозинство треба да ја стави точката на гласање и самите ќе се уверат дека волјата на народот е погласна од притисоците врз пратениците да се изјаснат спротивно на волјата на народот.


ВМРО-ДПМНЕ побара Мицкоски да се обрати пред пратениците, Џафери не дозволи


Скопје, 16 октомври, 2018 - 13:19 (META) 

Координаторот на пратеничката група на ВМРО-ДПМНЕ, Драган Данев, во процедурална забелешка прочита писмо од пратеничката група до претседателот на Собранието Талат Џафери со барање нивниот лидер Христијан Мицкоски, кој не е пратеник, да има обраќање пред пратениците.

– Со оглед на ситуацијата во која се наоѓа Македонија, ние како пратеници и граѓаните, јас мислам и апелирам бидете на ниво на задачата која што ја извршувате и овозможете нашиот лидер Мицкоски да се обрати и пред Собранието и пред пратениците и пред македонските граѓани. Имало такви пракси во историјата на овој парламент – рече Данев.

Џафери, читајќи го член 72 од Деловникот на Собранието рече дека таква можност не е пропишана со Деловникот и го одби нивното барање.

– Немам основ по кој би го поканил Мицкоски да учествува во работата на Собранието. Не се работи за моја волја туку за Деловник. Јас немам никаков проблем со тоа, но немам деловнички можности да го овозможам  – рече Џафери.

Еве што пишува во Деловникот:

Член 72

(1) На седницата на Собранието можат да присуствуваат и во работата да учествуваат претседателот на Републиката, претседателот на Владата, министрите и овластениот претставник на предлагачот на закон поднесен од најмалку 10.000 избирачи.
(2) Претседателот на Собранието може да покани на седницата на Собранието да присуствуваат и во работата да учествуваат претставници и на други органи и организации кога се разгледуваат прашања од нивна надлежност.

Член 73

Претседателот на Собранието може да покани на седницата на Собранието да присуствуваат како гости и да одржат говор високи парламентарни и државни претставници на други држави и на меѓународни организации и други видни странски личности.


Почна седницата на Комисијата за уставни прашања, Заев ќе го образложи предлогот


Скопје, 10 октомври, 2018 - 12:43 (META) 

Почна првата седница на Комисијата за уставни прашања на Собранието, со единствена точка на дневен ред, предлог за пристапување кон измена на Уставот на Република Македонија.

Седницата ја води претседателот на Собранието, Талат Џафери кој истовремено е и претседател на Комисијата за уставни прашања. Премиерот Зоран Заев е претставникот на Владата кој ќе го образложи предлогот, а присутен е и министерот за надворешни работи, Никола Димитров.

На седницата присутни се неколкумина пратеници на ВМРО-ДПМНЕ помеѓу кои Трајко Вељаноски, Димитар Стевананџија и Невенка Стаменковска кои се членови на Комисијата, но и  Илија Димовски, Антонио Милошоски и Јохан Тарчуловски, кои не се ниту членови, ниту заменици.

Предлогот за пристапување кон измена на Уставот, пристигна од Владата, која во понеделникот го усвои на владина седница. Истата точка е на дневен ред на 61. седница на Собранието на Република Македонија, свикана за понеделник 15 октомври со почеток во 11 часот.

Седницата за Уставни прашања може да заседава најмногу 10 дена, а исто толку дена Предлогот ќе биде ставен за расправа и на пленарна собраниска седница. Потоа пратениците, за да помине Предлогот, треба да го изгласаат со двотретинско мнозинство, од вкупниот број на пратеници.


Собранието на 15 октомври ќе одржи седница за расправа за уставните промени


Скопје, 9 октомври, 2018 - 16:05 (META) 

Според веб-страницата на Собранието, претседателот на законодавниот дом Талат Џафери в понеделник, 15 октомври во 11 часот ја закажа седницата на која на дневен ред ќе биде Предлогот за пристапување кон уставни измени. Се очекува истиот ден да биде свикана и Комисијата за уставни прашања на која би почнал претресот по предлогот.

Комисијата за Предлогот за пристапување кон уставни измени може да расправа 10 дена, по што Извештајот од неа повторно треба да се најде на пленарна седница.

Предлагач е Владата, а на предлогот потпишани се премиерот Зоран Заев, вицепремиерот за европски прашања Бујар Османи и министерот за надворешни работи Никола Димитров.


ДИК: На референдумот гласале 666.743 граѓани од кои 91,46 отсто „за“, а 5,65 „против“


Скопје, 1 октомври, 2018 - 14:54 (META) 

Државната изборна комисија (ДИК) ги објави официјалните резултати од гласањето на референдумот според кои, од 1.806.336 граѓани запишани на Избирачкиот список гласале 666.743 или 36,91 проценти. Од нив, 609.713 биле „за“ (91,46 проценти), а 37.700 биле против (5,65 отсто).

„Одлуката на референдумот не е усвоена, бидејќи не гласале повеќе од половината од вкупниот број на граѓани запишани во Избирачкиотм список“, рече претседателот на ДИК, Оливер Дерковски.

Во однос на одредени забелешки за работата на Општинските изборни комисии, тој додаде дека ако постојат докази, ќе има и одговорност во зависност од типот на повредата на постапките.

Прашан за неможноста претседателот на Собранието, Талат Џафери да го оствари правото на глас, Дерковски појасни дека тој, како и сите други граѓани требал да го искористи правото на увид во Избирачкиот список, а ДИК апелирале тоа да се направи од 9 до 23 септември.

„Господинот Талат Џафери гласал на претходните избори, но менувал документи и затоа не се нашол на списокот. Ако менувате лични документи и не сте на избирачки список, барате увид за да запишете“, додаде Дерковски.

Тој потенцираше дека неусогласеноста на законското решение за референдумот и Изборниот законик им правел проблеми на органите во спроведување на процесот, но со заеднички сили на надлежните биле надминати, и на крај имало успешно организиран референдум.

„Вчерашниот ден помина во најдобар ред, Македонија има демократски капацитет за организирање на вакви настани“, рече Дерковски.


Џафери: Референдумот ќе биде основа за идните процеси во институциите


Скопје, 30 септември, 2018 - 20:48 (META) 

Граѓаните денеска ги поставија темелите на идната Македонија. Се надевам дека вердиктот на сувереноста ќе придонесе за подобра иднина на сите граѓани и ќе биде основа за идните процеси кои што не очекуваат во следниот период во институциите на системот, рече претседателот на Собранието, Талат Џафери на прес-конференција.

– Им честитам на сите граѓани за овој значаен ден на кој се одлучуваше за иднината на граѓаните, но и за иднината на следните генерации – рече Џафери.

Тој кажа дека не гласал на денешниот референдум, бидејќи неговото име го немало во избирачкиот список.

– Да, точно е, не гласав. Не можев да го искористам демократското право, бидејќи моето име не беше на избирачкиот список. Но, се надевам дека се работи за изолиран случај – изјави Џафери.

Во однос на двотретинското мнозинство Собранието, собранискот спикер рече дека ќе има напори да се обезбеди конесензус по ова прашање и потсети дека не се работи за теснопартиски интереси туку за интересите на државата односно за интересите на граѓаните.

На прашањето за можните предвремени парламентарни избори, кои ги најави Заев, Џафери рече дека таа одлука е на политичките партии кои ако обезбедат соодветно мнозинство во соодветна процедура, тогаш тој како претседател на Собранието ќе одговори на барањата на пратенциите.