Џафери: Разговорите во процесот „Жан Моне“ се одвиваат во конструктивна атмосфера


Охрид, 18 мај, 2018 - 13:58 (META) 

Разговорите во рамки на процесот „Жан Моне“ се одвиваат во конструктивна, работна атмосфера, со консензуален став на учесниците за потребата од регулирање, односно дорегулирање на односите во Законодавниот дом, рече претседателот на Собранието Талат Џафери од Охрид, каде во тек се разговорите на претставници на парламентарните партии во македонското Собрание во рамки на процесот „Дијалог Жан Моне“ инициран од европратениците Иво Вајгл, Кнут Флекенштајн и Едуард Кукан.

– Темите на дискусија се најавените – потребата од измени и дополнувања на Деловникот и носењето на етички кодекс, со додадени прашања на она што во други форми веќе е разговарано, а тоа е поголема самостојност и независност на Собранието. Претпладнево имавме плодна дебата за Кодексот и мислам дека таа е завршена по однос текстот изготвен со поддршка на ЕУ и очекувам да резултира со консензуално негово донесување како водилка во однос на однесувањето на пратениците во и надвор од Собранието – рече Џафери нагласувајќи го тоа прашање од особена важност за враќањето на довербата во институцијата пратеник.

Дијалогот во Охрид е предвидено да биде заокружен со заклучоци што ќе бидат презентирани на вечерата на која е најавено присуство и на лидерите на парламентарните политички партии, премиерот и лидер на СДСМ Зоран Заев, лидерот на ВМРО-ДПМНЕ Христијан Мицкоски, лидерот на ДУИ Али Ахмети, на ДПА Мендух Тачи, Зијадин Села од Алијансата на Албанците и од Беса Билал Касами. Пред нив е предвидено да се обрати и Сергеи Станишев, претседател на партијата Европски социјалисти.

Како вовед во дијалогот синоќа се одржа и вечера за учесниците во разговорите, на која европратеникот Иво Вајгл рече дека средбите се со цел во отворена атмосфера без присуство на јавноста да се разговара за сите проблеми за кои можеби не е постигнат консензус.


ВМРО-ДПМНЕ: Заев го „приватизира“ правосудството


Скопје, 9 мај, 2018 - 10:33 (META) 

Опозициската ВМРО-ДПМНЕ обвини дека власта ја продолжува партизацијата на судството, што, како што вели, го признал и премиерот Зоран Заев.

„Судот е заробен, а Специјалното јавно обвинителство работи по политичка нарачка на Зоран Заев. Цената на послушноста ја откри самиот Заев. Шефот за човечки ресурси во Основен суд Скопје 1, кој е и десна рака на претседателот на судот Иван Џолев, Горан Стаменковски е назначен за советник на Заев. Ќе зема пари кабинетот на премиерот за да биде линк помеѓу Заев и Џолев. Изгледа не беше доволно тоа што претседателот на судот стоеше во став мирно пред Заев кој е обвинет за тежок криминал и му се суди во Кривичниот суд“, порача ВМРО-ДПМНЕ.

Партијата обвинува и дека Специјалното јавно обвинителство е под контрола на власта, како и дека институциите се користат за враќање на долговите на Зоран Заев кон поединци и групи.

„Заев ја држи државата во грч. Непотизмот и вработувањето по партиски клуч се начинот на кој функционира картелот. Веднаш по доаѓањето на власт видовме како градоначалниците на Битола, Неготино и Берово си ги вработија своите сопружници. АД ЕЛЕМ го претворија во место за згрижување на децата на функционерите, на државна плата во ова претпријатие картелот ги вдоми децата на Мирослав Грчев и Талат Џафери, како и сопругот на Магдалена Несторовска. Функција доби и синот на Љубомир Фрчкоски, кој беше именуван за раководител во АД за Стопанисување со станбен и деловен простор. Зарем ова е професионализацијата која ја ветуваше СДСМ? Ова не е професионализација ова е непотизам и партизација“, порачува ВМРО-ДПМНЕ.


Кворумот и „проблеми со струјата“ ја прекинаа работата на Собранието


Скопје, 2 мај, 2018 - 16:20 (META) 

Поради одредени проблеми со струјата во делови на Скопје, а и ние имаме проблеми, со работата на оваа седница ќе продолжиме утре, рече претседателот на Собранието, Талат Џафери по паузата за ручек, прекинувајќи ја денешната 45-пленарна седница. Инаку, салата беше нормално осветлена, а работеше и разгласот.

Инаку, во собраниската сала имаше недоволно пратеници за кворум, а Џафери првин почека неколку минути во надеж дека ќе дојдат уште пратеници.

Покрај партерот во кој седат пратениците на ВМРО-ДПМНЕ, каде имаше десетина пратеници, пред очекуваниот почеток на второто продолжение на седницата, многу празни фотелји имаше и во партерите на владејачката коалиција.

Во првото продолжение Собранието работеше експресно и речиси без расправа, усвојувајќи дваесетина закони. Беа усвоени Законот за високото образование и измените и дополнувањата на законите за судовите, за Судскиот совет, за оружјето и за безбедност на сообраќајот на патиштата, како и за НБРМ, за класифицирани информации, за оружје и за ловство, како и други закони.


Заев за 27 април: Во нивните очи се гледаше чисто зло и намера за одземање човечки живот


Скопје, 27 април, 2018 - 16:54 (META) 

Денеска, после една година од упадот во Собранието на 27 април, се уште не можам да прифатам дека некои од тие насилници биле подготвени и за ликвидација на некои од членовите на Собранието, рече премиерот Зоран Заев на заедничка прес-конференција во Собранието заедно со претседателот на законодавниот дом Талат Џафери.

Тој рече дека дел од пратениците наместо да ги отворат вратите на правната држава и реформите тие ги отвориле вратите на насилството. Тоа што се случи тој ден, вели Заев, се очајнички постапки на насилство.

-Во нивните очи се гледаше чисто зло и намера за одземање човечки живот. Тоа што се случи тој ден се постапки на очај и алчност на оние кои беа подготвени да се задржат на власт по секоја цена. Тоа не беше напад против нас туку против секој граѓанин. Нивните постапки не беа само криминал туку беа предавство – рече Заев и додаде дека на овој ден стои гордо исправено во домот на граѓаните.

За да не се случи голема трагедија, вели Заев, помогнале разумот и храброста на дел од пратениците. Тој во тие моменти рече дека видел силна желба за живот на пратениците, новинарите, на членовите на полицијата, но и гордост, верба и одлучност да се оттурне злото.

-За да не ескалира насилството помогна и присебноста на поголем дел од граѓаните на Македонија затоа што во такви моменти малку треба да се поттикне реакција и да се судрат брат со брат. Како ваш брат, пријател, татко и другар ја почувствував вашата грижа, се боревме и го надминавме стравот. Не можевме да си дозволиме да бидеме кукавици пред лицето на насилството. Денеска сите вложуваме напор оваа траума да ја оставиме зад нас, но катарзата мора да помине низ правосудниот систем. Тоа е единствениот начин да ја дознаеме целата вистина. Инспираторите, организаторите и насилниците треба да се соочат со правдата. Така ќе направиме единствената слика за овој настан да биде сликата за слободата. Нека 27 април биде сликата за Македонија која се бори за својата слобода – вели Заев.

Според него, тие што го организирале и извршиле насилството не биле ни свесни дека всушност со тоа го забрзале доаѓањето на слободата во земјата.

-Во зрела демократија насилството никогаш не може да биде одговор. Омразата и насилството никогаш повеќе да не се повторат. Наша заедничка вредност е да се почитуваме едни со други. Како премиер ве повикувам да се ослободиме од болката од минатите години и да градиме заедничка иднина и живот за сите – додаде Заев.

Спикерот Џафери рече дека може да им прости на сите кои биле вмешани во упадот но дека никогаш нема да дозволи такво нешто да се повтори.

-Нема да се дозволам такво нешто да се повтори. За разлика од тогаш кога вратите насилно се отворија, денеска после година дена, вратите на собранието се физички отворено за оние добронамерници кои што имаат намера да го посетат. Им благодарам на оние припадници на МВР кои што беа со нас, беа присебни и професионални за да ги заштитат нашите животи.


Мицкоски: Објавувањето на Законот за јазици без потпис на Иванов е ново кривично дело


Скопје, 27 април, 2018 - 16:17 (META) 

По изјавите на претседателот на Собранието Талат Џафери дека Законот за јазици ќе го објави во Службен весник, преку социјалните мрежи се огласи лидерот на ВМРО-ДПМНЕ Христијан Мицкоски кој вели дека објавување на Закон за јазици без потпис од претседателот на државата претставува ново кривично дело за кое доколку се случи сега или подоцна, одговорност мора да има.

– Во Македонија веќе се воспоставува пракса на владеење со преседани, кои ја подриваат правната држава и владеењето на правото. Не ни треба нов преседан кој ќе стане пракса. Исто така подеднакво важна е и дилемата зошто повторно се актуелизира од страна на власта ова прашање….Етничките теми, каде се манипулира со чувствата на граѓаните, било тоа да е законот за јазици или пак случајот Монструм се димната завеса кои треба да го отргнат вниманието од реалните теми каде има вистински хаос. Па преку овие измислени прашања ќе ловат виновници, ќе создаваат поделби, а себе си ќе се прикажуваат за спасители, напредни политичари и реформисти, а за сите конфликти и поделби за свесно сервираните прашања кои создаваат етнички поделби и разлики треба повторно да биде виновно ВМРО – вели Мицкоски.

Според претседателот на ВМРО-ДПМНЕ сега се води битка за спас на власта поради бенефитите кои таа ги носи, а не поради доброто на државата и граѓаните, битка која е за спас на политичката кариера на Зоран Заев. Мицкоски повторно побара законот за јазици да се повлече.

-Наместо да трошат време на тоа како да го заобиколат законот, нека го повлечат законот за јазици и преку опширна анализа, низ транспарентна постапка и широка вклученост на стручната јавност, заеднички да го направиме законот уставен и применлив. Од вакво нешто никој нема да загуби – вели лидерот на ВМРО-ДПМНЕ.


Џафери: Упадот на 27 април е најлошото нешто што му се случило на Собранието


Скопје, 27 април, 2018 - 14:12 (META) 

Не сум оптоварен временски кога ќе го пуштам законот за јазиците во Службен весник без потписот на претседателот на државата Ѓорге Иванов. Кога ќе оценам дека треба да се пушти, ќе го пуштам, рече претседателот на Собранието, Талат Џафери на денешниот брифинг со новинарите.

– Доколку законот стапи во сила без потписот на Иванов, тоа нема да значи дека тој е истуркан на сила. Тоа е уставна процедура и нема да го прекршам Уставот ако тој стапи на сила без претседателскиот потпис. Тој има суспензивно право првиот пат да го врати законот, но по второто гласање во Собранието, тој има обврска, должност, да го потпише законот, а со непотпишувањето тој го крши Уставот и ја блокира работата на Собранието затоа што ја доведува во дилема оваа институција дали да носи други закони или не – вели Џафери.

Тој напомена дека за прекршување на Уставот, Деловникот предвидува можност за импичмент на претседателот, но и дека Иванов може да одговара за злоупотреба на службената должност според Кривичниот законик, дело кое што не застарува.

Прашан дали тој, доколку го пушти законот без потпис на Иванов, исто така ќе биде подлежен на кривична одговорност, Џафери рече дека тоа би било случај само доколку тој стави потпис на местото на Иванов.

– Јас би направил кривично дело само доколку ставам потпис на местото каде што пишува Ѓорге Иванов, а јас тоа нема да го направам – додаде Џафери.

За упадот во Собранието на 27 април минатата година кога беа повредени повеќе пратеници и новинари, рече дека е најлошото нешто што и се случило на оваа институција.

– Да се запамети, да не се повтори и да одиме напред. Не беше мој избор да бидам избран за претседател на законодавниот дом на таков начин – кратко рече Џафери.

Тој не сакаше да го коментира судскиот процес за настаните од 27 април затоа што рече дека не сака да се меша во судската власт како што нема да допушти никој да му се меша во законодавната власт.

Џафери информираше дека владејачкото мнозинство и опозицијата постигнале согласност за преостанатите три реформски закони, меѓу кои и законот за судови и дека тие ќе се најдат на дневен ред на пленарна седница на Собранието на 3 мај.


Џафери до Димовски: Јас не познавам поим страв, вие од ВМРО-ДПМНЕ тоа добро го знаете


Скопје, 26 април, 2018 - 11:44 (META) 

Јас не познавам поим страв. Тоа вие од ВМРО-ДПМНЕ многу добро го знаете. Јас немам од што да се плашам, му рече претседателот на Собранието, Талат Џафери на пратеникот од ВМРО-ДПМНЕ Илија Димовски на почетокот на седницата за пратенички прашања.

Илија Димовски бараше процедурално да говори, но Џафери не му дозволи затоа што партијата ВМРО-ДПМНЕ известила дека тој повеќе не е координатор. Откако Димовски инсистираше и не сакаше да замине од говорницата, Џафери му дозволи и рече дека граѓаните се тие кои ќе ги ценат постапките на пратениците.

– Барам список на поставени, а неодговорени прашања, да се објави на веб-страницата на Собранието и да се испрати до медиуми заради транспарентност. Барам да констатирате кои членови на владата се присутни тука. Не може со пола влада тука да си играме пратенички прашања и да глумиме транспарентност и отчетност. Тоа е непочитување. Јас знам дека се плашите кога ќе излезам јас на процедурално, но ова мора да се одговори – рече Димовски.

Претходно, дел од пратениците на ВМРО-ДПМНЕ на почетокот на седницата пуштаа музика од своите мобилни телефони, а координаторот на пратеничката група Драган Данев рече дека тоа било продолжение на општата забавна атмосфера во државата.

– Веселби во тунели, веселби на секој чекор, на секое ќоше за граѓаните да заборават на предизборните ветувањата за поголеми плати и пензии, за откривање коруптивни зделки во владата. Наместо одговори на реалните проблеми, ние имаме само забави. И Могерини рече дека пола час е доволно за славење за ваков извештај за кој што треба уште многу да се прави. Да завршите со забавите и да почнете да работите – порача Данев.


Грабар-Китаровиќ во посета на Македонија


Скопје, 26 април, 2018 - 9:52 (META) 

Претседателката на Република Хрватска, Колинда Грабар-Китаровиќ, денеска ќе престојува во официјална посета на Република Македонија.

Хрватската претседателка ќе биде пречекана со највисоки државни и воени почести од македонскиот претседател Ѓорге Иванов, на платото пред вилата „Водно“.

Грабар-Китаровиќ и Иванов ќе имаат тет-а-тет средба, а предвиден е и пленарен состанок на официјалните делегации на Република Македонија и на Република Хрватска, по што двајцата претседатели ќе имаат заедничка прес-конференција.

Претседателката Грабар-Китаровиќ ќе се сретне и со претседателот на Собранието, Талат Џафери.


Ердоган на средбата со Џафери го потврдил ставот за употребата на уставното име


Анкара, 20 април, 2018 - 10:07 (META) 

Претседателот на Собранието, Талат Џафери, во рамките на официјалната посета на Турција, се сретнал со претседателот Реџеп Таип Ердоган во Анкара.

Ердоган ја нагласил поддршката на Турција за интеграција на Македонија во НАТО, како и принципиелниот став во однос на употребата на уставното име на Република Македонија.

„Тој подвлече дека Турција беше една од првите држави што ја призна нашата земја под нејзиното уставно име, таа прва отвори амбасада и назначи амбасадор во земјата. Истовремено, турскиот претседател се осврна на потребата за интензивирање на економската соработка, реафирмирајќи ја заложбата годишната трговска размена меѓу Турција и Македонија да се искачи на една милијарда долари“, информираат од кабинетот на Џафери.

На средбата, меѓудругото, станало збор и за потребата од интензивирање на соработката во борбата против тероризмот, при што било нагласено дека Македонија го осудила обидот за државен удар во Турција и ги поддржува демократски избраните институции.

„На крајот од средбата, заеднички беше нагласено значењето на меѓупарламентарната соработка и парламентарната дипломатија за билатералните и мултилатералните односи, во однос на унапредувањето на политичкиот дијалог и зголемувањето на динамиката на севкупната соработка меѓу земјите“, се додава во соопштението.


Џафери: Следува период за имплементација на законите и политички дијалог


Скопје, 18 април, 2018 - 13:43 (META) 

Извештајот е позитивен, безусловен, со препорака за определување датум за почнување преговори за членство во ЕУ. Ова е достигнување на сите во Република Македонија, а посебно на граѓаните, кои стрпливо дадоа поддршка за сите напори кои беа преземани од политичките партии, Собранието и Владата, истакна претседателот на Парламентот Талат Џафери по средбата со еврокомесарот Јоханес Хан, кој нему и на координаторите и потпретседателите на Собранието им го предаде извештајот за напредокот на земјата.

Џафери по средбата потенцира дека ова е добар почеток за враќање на европската агенда, но посочи дека во следните два до три месеци ќе треба да се реализира практичната примена на реформскиот пакет закони и до Самитот на ЕУ во мај во Софија и следниот во јуни, за да може да се дојде до определување на датум за почеток на преговори.

Ова е еден од извештаите во кои нема забелешки за Парламентот, вели Џафери, но упатува на имплементација на донесените закони.

– Она што нè очекува сега е процесот Жан Моне, кој ќе следи во Охрид. Нè охрабрија дека треба да продолжиме со дебатата и дијалогот меѓу политичките патии внатре во Собранието и со тоа да покажеме уште еднаш дека сме ги сфатиле сите оние пораки од минатото и дека дијалогот треба да се одвива овде и дека меѓупартиски треба да ги решаваме работите – рече првиот парламентарец.