Таксист загинал во судир со камион на патот Градско – Прилеп


Кавадарци, 28 февруари, 2018 - 14:39 (META) 

Во тешка сообраќајна несреќа што се случила денеска во 10.10 часот на магистралниот пат Градско – Прилеп, загинал таксист кој управувал со автомобил „мерцедес“ со скопски таблички.

Како што извести полицијата, се судриле „волво“ камион со приколка управуван од Ј.Г.(30) од Велес и такси возилото со кое управувал К.Л.(35) од Скопје. Таксистот го загубил животот веднаш, додека сопатничките во возилото, М.И.(64) и А.И.(31), двете од Битола, биле повредени и биле пренесени во болницата во Кавадарци. По укажаната прва помош се пренесени во Клиничкиот центар „Мајка Тереза“ во Скопје.

Возачот на камионот и неговиот сопатник не биле повредени.


Ограбен таксист во Скопје


Скопје, 3 јануари, 2016 - 13:49 (META) 

Утринава, околу 5 часот во Скопје, 39-годишниот К.Ѓ. пријавил дека непознато лице го ограбило.

Крадецот побарал такси услуга од ТЦ „Капитол“ до населбата Чаир и кога стигнале на улицата 159, тој со закана со пиштол од возачот одзел сума пари од околу 3000 денари, по што го напуштил местото на настанот.

Полицијата презема мерки за целосно расчистување на случајот.


Прилепски таксист доби спор против Македонија во Стразбур


Прилеп, 27 септември, 2015 - 16:04 (META) 

Таксист од Прилеп, кој не знаел дека превезува албански државјани кои нелегално ја преминале границата, ја доби правдата пред Европскиот суд за човекови права во Стразбур, во врска со конфискувањето на неговото возило од марката „мерцедес“.

Државата треба во рок од три месеци од денот на правосилноста на пресудата да му го врати возилото, кое судот му го конфискувал пред осум години поради повреда на членот 1 од протоколот 1 од Европската конвенција за заштита на човековите права.

Доколку не постои таква реституција, државата треба да му плати 10.000 евра, во рамките на истиот период од три месеци. На таксистот, исто така, треба да му се исплатат 3.000 евра нематеријална штета, како и судски трошоци.


Таксистот од Кочани пуштен од полициската станица во Поликастро


Солун, 11 декември, 2014 - 12:58 (META) 

Таксистот од Кочани кој беше зафатен од поплавите кај Кукуш е ослободен од грчките полициски органи и ќе се врати во Македонија.

Кочанeцот вчера беше дел од човечка трагедија во Грција кога, поради лошите времески услови, возилото со кое управуваше и пренесуваше грчки државјанин од Македонија кон Грција, падна во канал за наводнување меѓу Поликастро и Кукуш. Таксистот успеа да се извлече од возилото, меѓуоа неговиот патник не успеа да се спаси и загина во поплавата.

Кочанецот изутринава беше повикан во полициската станица во Поликастро за да даде изјава за несреќниот случај пред полициските органи. На испитот присуствуваше адвокат за помош при изјавата и при преводот. По изјавата таксистот беше пуштен на слобода и ги чека претставниците на такси-компанијата од Кочани за да се врати во Македонија. Возилото ќе може да се земе и врати во Македонија штом се смират временските непогоди и штом се исуши земјата кај каналот.

За случајот беше известен македонскиот конзулат во Солун, кој помагаше и беше постојано во контакт со 42-годишниот кочанец од првиот момент кога беше повикан во полициската станица во Поликастро сè до неговото ослободување.

Несреќата се случила вчера, на дел меѓу Кукуш и Поликастро. Такси-возилото со македонски регистарски таблички го пренесувало грчкиот граѓанин од Кочани кон Кукуш. Според информациите во грчките медиуми, при движењето по селски пат и при обид да се сврти, возилото паднало во канал за наводнување кој бил зафатен од обилните дождови и поплави кај Кукуш и кај Поликастро.

Таксистот успеал да се извлече од возилото, но неговиот патник не успеал да излезе. Таксистот веднаш повикал помош и ја алармирал полицијата, која за кратко време стигнала на местото на настанот. Цела ноќ се барало возилото и патникот, а телото и автомобилот биле најдени дури изутринава.

Загинатиот патник е еден од двете жртви на невремето што ја зафати Северна Грција вчера. Во Солун, поради поплавите, животот го изгуби 50-годишен маж, чие тело беше најдено во река во населбата Неа Филаделфија во Солун.

M.П.


Таксист од Кочани се спасил од поплавите во Северна Грција


Атина, 11 декември, 2014 - 11:55 (META) 

Две лица загинаа во поплавите и во невремето што ја зафатија Северна Грција. Како што соопшти грчката полиција, едниот од загинатите е грчки државјанин кој патувал од Македонија кон Грција, а втората жртва на невремето е 50-годишен маж, чие тело било најдено во надојдена река во населбата Неа Филаделфија во Солун.
Телото на загинатиот кој патувал од Македонија кон Грција било најдено утринава во канал во областа на селото Аспро, во близина на Кукуш и на Поликастро.

Загинатиот доаѓал од Македонија во Грција со такси со македонски регистарски таблички. Според информациите во грчките медиуми, возилото вчера паднало во поплавен канал за надводнување во обидот на таксистот да помине преку патот низ селото. Таксистот, 42-годишен македонски државјанин од Кочани, кога се случила несреќата, успеал да го напушти возилото и да се спаси, меѓутоа неговиот грчки патник не успеал да се извлече. Таксистот веднаш побарал помош и ја алармирал полицијата за да се почне истрага за неговиот патник. Истрагата траела цела ноќ, но телото било најдено дури изутринава.

Како што дознаваме во моментов, возачот кој управувал со таксито е во полицијатa во Поликастро и се очекува да даде изјава за несреќниот случај пред полициските органи во Грција. Таксистот е во добра здравствена состојба, а со него има и адвокат, кој ќе му помогне при преводот за изјавата. Во Поликастро се очекува да пристигне и претставник на такси-компанијата од Кочани.

М.П.