!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Со нож нападнат адвокат во неговата канцеларија во центарот на Тетово


Тетово, 18 април, 2017 - 17:15 (META) 

Со нож бил нападнат 51-годишниот адвокат Бујар Сабриу. Нападот се случил во неговата адвокатска канцеларија, сместена на првиот кат од градскиот трговски центар во Тетово. Осомничен за нападот е 72-годишниот В.А.

– Осомничениот напаѓач околу 12 часот влегол во канцеларијата каде работел адвокатот. Меѓу нив првин почнала вербална расправија. Во еден момент напаѓачот извадил нож и го прободел адвокатот во прстот од левата рака, a потоа го удрил со столче. Адвокатот некако успеал да се извлече од канцеларијата и се упатил кон тетовскиот Oсновен суд, каде се сокрил. Додека бегал кон тетовскиот суд, напаѓачот трчал по него со ножот. Напаѓачот е приведен – изјави портпаролот на СВР Тетово, Марјан Јосифоски.

Адвокатот е во добра здравствена состојба, а по лекарската интервенција е пуштен на домашно лекување.

Полицијата и Основното јавно обвинителство Тетово извршиле увид и работат на целосно расветлување на случајот.

Неофицијално, според извори на „Мета“, инцидентот настанал како резултат на нерасчистени односи меѓу двајцата околу сопственоста на адвокатската канцеларија каде се случил нападот.


Кучиња скитници и необезбеден коловоз, причина за сообраќајќи на автопатот Гостивар-Тетово-Скопје


Тетово, 20 февруари, 2017 - 12:52 (META) 

Кучиња скитници изминативе два дена предизвикаа две сообраќајки на автопатот Гостивар – Тетово – Скопје. Утринава околу 6 часот, кај Карпалак, поради необезбедениот автопат, патничко возило со гостиварски таблички, што го управувала 34-годишна гостиварка, удрило во куче скитник, кое се движело по коловозот. Од ударот, во возилото немало повредени лица, а причинета е материјална штета која се проценува на 30.000 денари.

На истиот автопат, во непосредна близина на Добарскиот надвозник, куче скитник предизвикало сообраќајна несреќа и вчера околу 1 часот. Во кучето удрил автомобил што го управувал 27-годишник од Кичево. Во несреќата нема повредени лица, а причинетата материјална штета била проценета на 5.000 денари.

Минатата година на подрачјето на Секторот за внатрешни работи Тетово регистрирани се вкупно 118 сообраќајни несреќи, поради необезбедени услови на патот. Најголемиот број се регистрирани на автопатот Гостивар – Тетово – Скопје. Поголемиот број биле предизвикани од животни, пред сè од кучиња скитници, кои поради отсуството на заштитни огради, од околните ниви и планини слободно преминуваат на автопатот.


Блокиран патот Тетово – Јажинце, отсечени неколку села од Мавровско-реканскиот крај


Тетово, 6 јануари, 2017 - 11:06 (META) 

Голем снежен нанос синоќа по полноќ го затрупа патот Тетово – Јажинце, на само 200 метри од граничниот премин Јажинце. Повеќе возила на ова место се заглавени, а патниците се згрижени на граничниот премин и во селото Јажинце, информира портпаролот на СВР Тетово, Марјан Јосифоски.

Од Јавното претпријатите „Македонија пат“ – секција Тетово, велат дека нивни екипи со специјална механизација се тргнати кон граничниот премин, заради расчистување на патот и слободен протек на возила. Оттаму се надеваат дека во текот на денот, целиот снежен нанос кој се спуштил од Шар Планина на патот, ќе биде остранет.

Поголеми проблеми од големите снежни врнежи во Западна Македонија се јавија во Мавровско-реканскиот крај. Дел од селата од овој регион ноќеска снемаа струја, но сега состојбата со напојување на електрична енргија е стабилизирана.

Од Секторот за внатрешни работи Тетово информираат дека селата Сенце, Нистрофо и Дуф се отсечени поради блокираните патишта што водат до нив.

Автопатиштата и регионалните патни правци во Западна Макеодонија се проодни. Забраната за тешки товарни возила кон скијачкиот центар Попова Шапка и кон планинскиот превој Стража сè уште е на сила.


Во СВР Тетово пријавен поткуп при избори и гласање


Тетово, 25 декември, 2016 - 13:40 (META) 

Министерството за внатрешни работи соопшти дека вчера во 18.15 часот во полициската станица во Тетово, е пријавено кривично дело поткуп при избори и гласање. МВР информира дека од страна на СВР Тетово се работи на целосно расчистување на случајот.

Во Теарце денеска има силно полициско обезбедување, за да се овозможи непречено гласање.

Според невладината „Цивил“, вчера биле приведени две лица под сомневање дека вршеле паричен поткуп на гласачи. Од невладината информираат дека дошле до сознанија дека одредени лица поткупувале гласачи со пари. Сумите се движеле од 3.000 до 6.000 денари, за возврат им биле земани личните карти како гаранција дека овие граѓани денеска нема да излезат на гласање.


Спасовски во СВР Тетово: Притисоците врз избирачите да се пријават во МВР


Тетово, 8 ноември, 2016 - 15:37 (META) 

Министерот за внатрешни работи, Оливер Спасовски, при денешната посета на Секторот за внатрешни работи Тетово, апелираше секој притисок што се врши врз гласачите од страна на државните службеници во пресрет на престојните избори, навремено да се пријави во Министерството за внатрешни работи.

– Истакнав дека ниту еден полициски службеник не смее да се вклучува во политички кампањи, не смее да се злоупотребуваат ниту човечки ресурси, ниту материјални средства за престојната кампања на која било од политичките партии. Апелирам до избирачите од Полошкиот Регион, ако имаат каков било притисок или закана од полициски службеници од раководни структури во МВР или притисок од кој било, на пример, директори на центри за социјални работи, сето тоа да го пријават во Министерствотото за внатрешни работи, за да бидат преземени соодветни санкции – изјави министерот Спасовски.

Тој оцени дека безбедносната состојба во Полошкиот Регион е стабилна. Спасовски не сакаше да го коментира барањето за негова остаква од страна на дополнителниот заменик-министер во МВР, Оливер Андонов.


Андонов најавува нова прес-конференција во МВР во 15 часот


Тетово, 20 октомври, 2016 - 13:44 (META) 

„Ова е една од моите редовни посети во секторите за внатрешни работи и денеска сум во СВР Тетово без разлика на вчерашните и денешните ад хок случувања што ги прави СЈО“, рече дополнителниот заменик-министер за внатрешни работи, Оливер Андонов, при денешната посета на СВР Тетово.

Подетални информации за тоа какви биле тие „ад хок случувања на СЈО“, Андонов најави дека ќе даде на прес-конференцијата што ќе ја одржи во МВР во 15 часот.

Андонов во Тетово го пречекаа началникот на СВР Тетово и неговите соработници. Средбата траеше околу еден час.


Петнаесетина сообраќајни несреќи за викендот во Полошко


Тетово, 10 октомври, 2016 - 12:38 (META) 

Тринаесетгодишен велосипедист од гостиварско Чегране во сообраќајна несреќа добил тешки телесни повреди. Сообраќајката се случила синоќа околу 20 часот, на крстосницата на локалните патишта за Чегране и за Форино.

Според СВР Тетово, велосипедистот се судрил со автомобил „нисан“ со гостиварски таблички, управуван од 54-годишник од село Форино. Од удирањето малолетникот добил фрактура на левата подлактица и веднаш е префрлен во гостиварската болница. По укажаната помош, тој е препратен на скопските клиники.

Причина за сообраќајката е грешка на велосипедистот, а материјалната штета се проценува на 15.000 денари.

На крстосницата на регионалниот пат Тетово – Брвеница со булеварот Илинден во Тетово, патничко возило „БМВ“ со тетовски регистарски таблички, управувано од 21-годишник од Челопек, поради неприлагодена брзина и алкохол, вчеравечер околу 22 часот загубило контрола и излетало од коловозот, удрило и оштетило метален столб од семафор, метално сандаче и метална ограда од објект. Од излетувањето нема повредени, додека причинетата материјална штета се проценува на 60.000 денари.

Изминатиот викенд на поширокото полошко подрачје, имаше повеќе сообраќајни несреќи, пред сè поради непочитување на сообраќајните правила и прописи. Во трите денови на викендот, на ова подрачје регистрирани се петнаесетина несреќи, со повеќе повредени лица и со значителна материјална штета. Од овие причини, Секторот за внатрешни работи Тетово повторно апелира до возачите да ја прилагодат брзината според условите на патот, дотолку повеќе што коловозите деновиве се влажни, особено наутро и навечер, а намалена е и видливоста на одредени места.


Непознато лице пукало во полициска екипа во селото Чифлик, Тетовско


Тетово, 10 септември, 2016 - 15:44 (META) 

Непознато лице синоќа пукало во полициска екипа во селото Чифлик, која дошла да изврши проверка по претходна пријава дека во селото има две сомнителни возила, информираат од МВР.

Според полицијата, околу 23.30 часот, на влезот во селото биле паркирани две возила, едното „опел вектра“ со гостиварски регистарски ознаки, во кое имало едно непознато лице, а другото, марка „ауди а3“ со скопски таблички, во кое имало четири лица.

Кога се доближиле полицајците, лицето од „опелот“ истрелало неколку куршуми од огнено оружје кон нив, на што тие веднаш возвратиле. Лицето по пукањето успеало да побегне, а другите четворица од другото возило биле приведени во СВР Тетово и по извршениот разговор се пуштени.

Во инцидентот нема повредени, велат од МВР, а по извршениот увид на местото, во тек се мерки за пронаоѓање на сторителот и за целосно расчистување на случајот.


Гостиварец ја претепал сопругата со сукало


Гостивар, 6 септември, 2016 - 14:27 (META) 

Дваесет и шестгодишна гостиварка вчера пријавила семејно насилство, кое дента, околу 14.30 минути, во заедничкиот дом во Гостивар, го извршил нејзиниот една година помлад сопруг. Според пријавата во СВР Тетово, двајцата најпрвин почнале да се расправаат. Во еден момент, сопругот зел дрвено сукало и повеќепати ја удрил по рацете и по телото, нанесувајќи ѝ притоа видливи повреди.

Според гостиварката, сопругот досега повеќепати психички и физички ја малтретирал и затоа побарала кривичен прогон. Гостиварецот е приведен, а откако ќе се расчистат сите поединости поврзани со овој случај, ќе следува соодветен поднесок.

Според портпаролот на Секторот за внатрешни работи, Марјан Јосифоски, во изминатите седум месеци од оваа година, во Полошкиот Регион поднесени се 70 кривични пријави за случаи на семејно насилство со нанесување телесни повреди, загрозување на сигурноста и со присила, а во кои вкупно биле инволвирани 40 сторители.

Најчести сторители во овој период се сопрузи, а најчести „жртви“ на ваквиот вид насилство се сопруги и поранешни невенчани сопруги. Минатата година во истиот период биле поднесени 31 кривична пријава.

Како најчести причини за семејно насилство, според СВР Тетово, се наведуваат финансиски тешкотии, психички растројства и меѓугенерациски недоразбирања.

Но, најчесто, случаите на семејното насилство не го добиваат правниот епилог. Според тетовската полиција, пријавителите на семејното насилство пред да почне судскиот процес се премислуваат и го повлекуваат кривичниот прогон за ова кривично дело, откако ќе ја сфатат сериозноста на можните тешки законски последици врз нивните најблиски.


Починато момче пронајдено на скијачка патека на Попова Шапка


Тетово, 3 јули, 2016 - 13:16 (META) 

Починато момче, М.Ј. (29), било пронајдено вчера на Попова Шапка, на скијачката патека Церипашина, во месноста Казани.

Увидна екипа од СВР-Тетово извршила увид, а по наредба на јавен обвинител телото на починатиот било предадено на семејството.