!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ММФ ја намали прогнозата за пораст на економијата од 3,5 на 3,2 отсто


Вашингтон, 19 април, 2017 - 13:53 (META) 

Меѓународниот монетарен фонд ги намали проекциите за пораст на македонската економија за 2017 година.

Во најновата пролетна прогноза се предвидува пораст од 3,2 проценти, за разлика од есенската прогноза на ММФ која предвидуваше 3,5 отсто пораст.

За следната година, ММФ предвидува пораст на економијата од 3,4 проценти, а во 2021 година – 3,8 проценти.

Најновите економски прогнози за цел свет се објавени во документот „Светските економски перспективи“, кој содржи проекции на ММФ и на Светска банка, кои го одржаа традиционалното пролетно заседание.


СДСМ: Извештајот на Светска банка упатува дека е итно потребна новата влада


Скопје, 6 април, 2017 - 14:28 (META) 

„Извештајот на Светска банка потврдува зошто за економијата и за граѓаните е итно потребно да се овозможи избор на новата реформска влада. Светска банка проектира најнизок пораст на економијата за Македонија од земјите во регионот, од само 2,8 проценти во 2017 година“, се вели во соопштението на СДСМ, по повод извештајот на Светска банка за Македонија.

Во него се додава дека и Светска банка, како и другите меѓународни финансиски институции, посочува дека итно е потребна фискална консолидација и нормалзирање на нивото на јавниот долг.

„Ваквата влошена состојба во економијата, меѓу другото, е резултат на одолговлекувањето на политичката криза од страна на Ѓорѓе Иванов, кој одбива да ја исполни својата уставна обврска да го даде мандатот на декларираното мнозинство од 67 пратеници, како и од блокадата на Собранието со маратонските реплики и контрареплики на пратениците на ВМРО-ДПМНЕ, кои со ова се обидуваат да го заштитат Никола Груевски од оговорност за криминалот на директна штета на граѓаните и на целокупната економија“, се вели во соопштението.


Светска банка предвидува најмал економски пораст за Македонија во регионот


Скопје, 6 април, 2017 - 12:03 (META) 

Светска банка за Македонија предвидува економски пораст од 2,8 проценти, најмал од земјите во регионот, се вели во редовниот економски извештај за Западен Балкан.

Порастот, како што се наведува во извештајот, значително забави како последица на намалените инвестиции, кои беа погодени од политичката криза. Тој, во голема мера беше движен од градежништвото, главно преку јавните инвестиции (автопати).

Фискалниот дефицит се намали, но на сметка на намалените капитални инвестиции.

– Уделот на капитални инвестиции се намали, додека тој на тековните трошења се зголеми во 2016 година, а 30 проценти од вкупните трошоци на владата се за пензии – изјави економистот во канцеларијата на Светска банка во Македонија, Бојан Шимбов.

Светска банка нотира влошување на квалитот и на квантитетот на човечкиот капитал, што ги лимитира можностите за пораст и за квалитетни работни места.

– Повеќе од две третини од 15-годишниците не поседуваат функционална писменост, односно вештини во три клучни области: читање, математика и природни науки. Македонија има најниска стапка на запишани деца во основно и во средно образование во регионот, исклучувајќи ги Босна и Херцеговина и Косово – вели Шимбов.

Главни препораки за Македонија се фискална консолидација и структурни реформи, кои ќе бидат потребни за да се стабилизира јавниот долг.

– Подобрувањето на ефикасноста на трошењето бара реформи во управувањето со јавните финансии. Елиминирањето на пречките за порастот, вклучително и за бизнис-климата, образованието, инфраструктуарата и за правосудството, се главните пораки за Македонија – додаде Шимбов.

Вработувањата од страна на државата во последните две години значително учествува во нето-креирањето на работните места.

– Тие од една страна ја намалуваат невработеноста, но од друга, бидејќи за таквите вработувања има ослободувања, влијаат врз неодржливоста на пензискиот и на здравствениот систем и потребна е темелна анализа на одржливоста – нагласи Шимбов.

Според регионалниот директор за Западен Балкан, Елен Голдстин, приватниот сектор е воздржан од инвестиции, компаниите не преземаат чекори и ризици во средини со висок ризик и потребно е државата да интервенира.

Светска банка советува на среден рок да се стави акцент на инвестициите, а помалку на тековните трошоци и развојот да се потпира на приватниот сектор.


Задолжувањето да не се користи за политички цели, велат од Министерство за финансии


Скопје, 21 март, 2017 - 12:30 (META) 

Министерството за финансии води одговорна политика на управување со јавниот долг, која не е и не може да биде предмет на дневно-политички манипулации, се вели во реакцијата на Министерството за финансии на соопштението на СДСМ.

– Во согласност со Законот за јавен долг и максималниот износ за задолжување на домашниот пазар, објавениот календар за аукции, како и во согласност со понудата и со побарувачката на државните хартии од вредност од страна на инвеститорите, Министерството за финансии носи одлука за оптималниот износ – велат оттаму.

На соопштението на СДСМ реагираа и од ВМРО-ДПМНЕ, од каде што велат дека „државниот долг и аукциите на државни хартии од вредност станаа редовна пропагандна алатка на СДСМ“.

„Секогаш кога сакаат нешто да стават под тепих и да ја дефокусираат јавноста од политичките случувања, тие плетат заговори за „грчко сценарио“ и за банкрот. Иронијата да биде поголема, пред два дена кредитната агенција „Стандард и Пурс“ во својот извештај наведе дека долгот на државата е низок. Ова е само една од низа меѓународни институции како Светска банка, ММФ, кредитната агенција „Фич“ кои наведуваат дека државниот долг е низок“, велат од ВМРО-ДПМНЕ.

Од партијата додаваат дека издавањето на државни хартии од вредност секаде во светот е редовна постапка за финансирање на буџетот.


Светска банка ќе издвои 57 милијарди долари за Африка


Вашингтон, 20 март, 2017 - 12:35 (META) 

Светска банка соопшти дека ќе издвои околу 57 милијарди долари за инвестиции во следните три години во државите во Африка.

Најголем дел од тие средства, 45 милијарди долари, ќе ги издвои Агенцијата за меѓународен развој во рамките на Светска банка, која ќе дава бескаматни кредити на најсиромашните земји.

Претседателот на Светска банка, Џим Јонг Ким, оваа недела ќе ги посети Руанда и Танзанија каде што со властите ќе разговара за финансиската поддршка на тој дел на Африка.

Светска банка е одговорна за обезбедување финансии и за давање совети на земјите за да се засили нивниот економски развој и да се намали сиромаштијата, но и за да се сочуваат меѓународните инвестиции.


Грција побарала заем од Светската банка


Атина, 3 март, 2017 - 11:09 (META) 

Грција побарала заем од Светската банка, пренесува американскиот интернет-магазин „Политико“. Сумата засега не е јавно позната, а како што пишува „Политико“, извор од банката изјавил дека грчката влада побарала финансиска помош за да се справи со проблеми како долгогодишната невработеност и потребата за економски развој и социјална заштита.

Според „Политико“ и грчкиот весник „Катимерини“, грчката влада официјално не го потврдува барањето за заем, но преку последниот устен договор на состанокот на еврогрупата, на крајот на февруари наводно посочиле дека планираат да побараат заем од 3 милијарди евра за финансирање на програма за отворање 100.000 нови работни места.


Светска банка предвидува пораст на македонската економија од 3,3 проценти годинава


Вашингтон, 11 јануари, 2017 - 15:48 (META) 

Домашниот бруто-производ (БДП) на Македонија ќе се зголеми 3,3 проценти оваа година и 3,7 проценти следната година, предвидува Светска банка во јануарскиот извештај за глобалните перспективи.

Овие прогнози на Светска банка за македонската економија се пониски од јунската прогноза лани, кога се предвидуваше пораст на економијата од 4 проценти.

Светска банка за глобалната економија годинава предвидува пораст од 2,7 проценти, што е исто така намалување во однос на јунската прогноза, кога се предвидуваше дека економијата ќе се зголеми за 2,8 проценти.

Светска банка ја задржа својата прогноза за САД од јуни, за пораст на економијата од 2,2 отсто, а за Русија и за Бразил очекува да излезат од рецесија.


Московичи: Грција е подготвена да сврти нова страница


Скопје, 28 ноември, 2016 - 12:14 (META) 

Во тензична клима на несогласувања меѓу грчката влада и претставниците на Меѓународниот монетарен фонд, Светска банка и Еврпската централна банка и на неможност да се постигне договор на клучни теми, денеска во Атина пристигнува еврокомесарот за економски и финансиски прашања, Пјер Московичи.

Московичи ќе се сретне со грчкиот премиер, Алексис Ципрас, и со министерот за финансии, Евклидис Цакалотос.

Грција се надева на поддршка од Московичи по прашањето за олеснување на грчкиот долг. Надежта доаѓа по интервјуто на еврокомесарот за грчкиот весник „Етнос“, во кое тој вели дека Грција е подготвена да заврти нова страница.

„Созреани се условите да се разговара за олеснување на долгот на еврогрупата. Грците направија многу жртви последните неколку години и државата е конечно подготвена да заврти нова страница. Успешната приказна што ја пишуваме заедно значи нормализирање на работите со одржлива јавна финансиска политика и конкуретна економија, подготвена да создаде нови работни места кои им се неопходни на Грците“, изјави Московичи за „Етнос“.


Кристалина Георгиева: Не ја напуштам Европската комисија поради кампањата во ОН


Софија, 30 октомври, 2016 - 15:30 (META) 

Поранешната еврокомесарка Кристалина Георгиева во интервју за бугарското национално радио вели дека напуштањето на Комисијата не е поради кампањата за генерален секретар на Обединети нации. Како што вели, таа ја одобрила промената на кандидатите за генерален секретар на ОН.

– Моето учество во кампањата за Обединети нации беше поради тоа што одредени држави од Источна Европа му предложија на нашиот премиер да направиме последен обид Источна Европа да ја добие оваа позиција – рече Георгиева.

Таа позитивно го оцени потегот на премиерот на Бугарија, Бојко Борисов, и рече дека е многу благодарна на Бугарија што ѝ дала шанса седум години да биде  еврокомесар. Георгиева му заблагодари и на претседателот на Комисијата, Жан-Клод Јункер, за прекрасната соработка.

– Работев со прекрасни луѓе и имав добри колеги на кои сум многу горда. Работата што ми е понудена во Светска банка е шанса која се добива еднаш во животот. Навистина ми е жал што морам да си заминам, но оваа одлука е добра за мене, за Европа и за Бугарија – рече Георгиева.


Кристалина Георгиева е назначена за главен и извршен директор на Светска банка


Вашингтон, 28 октомври, 2016 - 17:55 (META) 

Поранешната еврокомесарка за хуманитарна помош и за вонредни ситуации, Кристалина Георгиевa, денеска е назначена за главен извршен директор на Светска банка.

– Европската комесарка за буџет на ЕУ и потпретседателката на Европската комисија, Кристалина Георгиева од Бугарија, поднесе оставка на таа функција во Брисел за да стане извршен директор на Светска банка – се наведува во соопштението на Комисијата, а пренесуваат светските агенции.

Претседателот на Европската комисија, Жан-Клод Јункер, изјавил дека со жалење ја прифатил одлуката на Георгиева да поднесе оставка во Европска комисија.

Георгиева беше и кандидат за генерален секретар на ОН.