!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

МОН: На државните универзитети годинава упис на 26.105 студенти


Скопје, 17 јуни, 2017 - 15:27 (META) 

Министерството за образование и наука (МОН) извести дека вчера Владата донела одлука за распишување конкурс за упис на студенти на државните универзитети, за кои ќе има 26.105 места. Од нив 13.953 места се за редовни студенти во државна квота, 8.367 места се за редовни студенти со кофинансирање и 3.785 места се за вонредни студенти.

„Со тоа обезбедени се доволно места за упис на сите заинтересирани матуранти, како и за други лица заинтересирани за студирање на државните универзитети. При утврдување на бројките за упис на студенти се водеше сметка за потребите на пазарот на трудот во Република Македонија, дефицитарноста на струките и за расположливите можности за вработување, бројот на студенти за кои се акредитирани факултетите, како и за показателите за интересот на средношколците за упис на одредени факултети изминативе години“, се вели во соопштението од министерството.


БАН го „поправа“ Путин: Јазикот на Охридската школа е бугарски


Софија, 26 мај, 2017 - 16:05 (META) 

Откако вчера бугарскиот премиер Бојко Борисов, но и историчарот Божидар Димитров и претседателот на ВМРО-БНД реагираа на изјавата на рускиот претседател Владимир Путин дека словенската писменост излегла од „македонската земја“, се огласи и Бугарската академија на науките (БАН) со свое толкување за словенската писменост.

Во него воопшто не се споменуваат зборовите „македонска“, „македонски“ или „Македонија“.

„Во врска со засилениот јавен интерес во последниве дни за делото на Кирил и Методиј, Бугарската академија на науките напоменува дека во втората половина на 9. век бугарската држава, претставувана од цар Борис Први прави две судбоносни работи: прво, христијанството е прифатено како државна религија; второ, прогонетите ученици на Св.св. Кирил и Методиј се примени во Бугарија и им се создадени услови да го продолжат делото на своите учители. Како резултат на таа поддршка во Бугарија никнуваат две книжевни школи – Охридската и Преславската. Кирилската азбука создадена во нив се распространува нашироко во славјанскиот свет“, стои во обраќањето на БАН до јавноста.

Академијата потсетува на академска дискусија која се случила во Софија во 1985 година, помеѓу раководствата на БАН и на Академијата на науките на СССР, и по која е подготвен официјален протокол во кој се вели дека „народната основа на јазикот на Кирило-Методиевските преводи е солунскиот дијалек на бугарскиот јазик во 9. век“, како и дека „Јазикот на  преводите во делата на Преславската и Охридската школа е старобугарскиот литературен јазик“ и дека „Јазикот на Кирило-Методиевските споменици изиграл огромна улога во културниот живот на другите словенски народи и при формриањето на нивните литературни јазици“.


Македонците од Албанија го славеа делото на светите браќа Кирил и Методиј


Пустец, 26 мај, 2017 - 12:27 (META) 

Денот на сесловенските просветители, светите браќа Кирил и Методиј, со повеќе манифестации, повеќе денови и во неколку населени места, го одбележаа и етничките Македонци во Албанија.

Во општина Пустец, единствената како таква што преживеа со новата територијална кројка во Албанија, во селото Долна Горица, настанот беше одбележан како Ден на писменоста и просветата.

Од овој крај, потекнува учителот Никола Беровски, авторот на првиот буквар на македонски јазик во Албанија.

Пред младите беше одржан историски час и беа рецитирани ученички песнички за светите солунски браќа, рамноапостолите Кирил и Методиј.

Присутните ги поздрави градоначалникот на општина Пустец, Едмонд Темелко, а за ликот и делото на македонските и сесловенските просветители светите солунски браќа Кирил и Методиј Македонците, зборуваше писателот Спасе Мазенковски.

Песни за Светите Кирил и Методиј, рецитираа ученици од основните училишта во седумте села на општината, како и од гимназијата во Пустец.


Иванов денеска и утре во посета на Рим и на средба со папата Франциск


Рим, 25 мај, 2017 - 10:05 (META) 

Претседателот Ѓорге Иванов, денеска и утре ќе престојува во посета на Италија и на Ватикан, по повод манифестацијата „Македонија во чест на Св. Кирил“.

Денеска Иванов ќе ја посети базиликата „Свети Климент“, каде ќе биде положен венец на гробот на Св. Кирил. Иванов ќе ја посети и базиликата „Санта Марија Маџоре“, а во текот на денот ќе ја посети и базиликата „Св.Павле“, каде ќе положи цвеќе на гробот на Св. Павле. Во вечерните часови Иванов ќе присуствува на концерт на етно групата „Баклава“.

Утре Иванов заедно со министерот за надворешни работи Никола Попоски ќе има аудиенција кај Поглаварот на Римокатоличката црква, Неговата светост Папата Франциск, а ќе оствари средба и со државниот секретар на Ватикан, кардиналот Пјетро Паролин.


Попоски положи цвеќе на гробот на Св. Кирил во Рим


Рим, 24 мај, 2017 - 16:21 (META) 

Во рамките на манифестацијата „Македонија во чест на Св. Кирил“, министерот за надворешни работи во заминување, Никола Попоски, денеска, во Рим, ја предводеше државно црковната делегација на молебенот на гробот на Св. Кирил во базиликата „Сан Клементе“.

Во присуство на бројни гости, со молебенот, на гробот на Светителот, чиноначалствуваа митрополитот дебарско – кичевски Тимотеј и митрополитот Европски Пимен. Традиционалната манифестација „Македонија во чест на Св. Кирил“ на 25 мај годинава ќе биде збогатена со настап на музичката група Баклава, која во Рим ќе ја претстави македонската изворна музичка традиција.

Министерот Никола Попоски, на 26 мај, како дел од државно – црковната делегацијапредводена од претседателот Ѓорге Иванов, ќе присуствува на аудиенцијата кај Папата Франциск, а веднаш потоа ќе го придружува претседателот Иванов на средбата со Државниот секретар на Светата Столица, кардиналот Пиетро Паролин, во Апостолската Палата.


Иванов, Груевски и Заев го честитаа Денот на сесловенските просветители


Скопје, 24 мај, 2017 - 11:08 (META) 

Претседателот на државата Ѓорге Иванов, поранешниот премиер и лидер на ВМРО-ДПМНЕ, Никола Груевски и лидерот на СДСМ и мандатар за состав на новата влада, Зоран Заев испратија честитки по повод Денот на сесловенските просветители Св. Кирил и Методиј.

Во честитката на Иванов се вели дека, за важноста и за суштината на просветителската мисија на двајцата браќа, кои внеле нов импулс во верата и во културата на сите словенски народи, говори и фактот што денеска тие се патрони на Европа.

„Темел на културолошкиот процес било создавањето на словенската азбука – глаголица. Но, нивната мисија и нивното сфаќање за развојот и за ширењето на словенската цивилизациска свест се најдобро изразени преку просветителскиот континуитет на Кирилометодиевите ученици, големите дејци свети Климент и свети Наум“, вели Иванов во честитката.

Треба да бидеме бескрајно среќни и горди како народ, бидејќи Светите браќа Кирил и Методиј, кои од страна на неговата светост, Папата Јован Павле Втори се прогласени за заштитници на Европа, не вбројуваат меѓу народите кои дале огромен придонес кон светската наука и култура, вели Груевски во честитката.

„Тие со своето делување и работење овозможија поголема рамноправност на народите во своето време, спротивставувајќи се на дотогаш ограниченото сфаќање дека знаењето и науката треба да се пренесуваат на само неколку тогашни јазици, тие ја проширија писменоста во до тогаш невидени размери и простори и допринесоа за унапредување на науката во целост“, пишува во честитката упатена од Груевски.

Лидерот на СДСМ, Заев во честитката вели дека браќата Кирил и Методиј ја означиле Македонија на светската карта како лулка на словенската култура и писменост.

„Она на што сакам да повикам, е пред нас да е примерот на широкоградата мисионерска дејност на светите браќа Кирил и Методиј, сега кога почнуваме да го обновуваме нашето општество. Јас лично и Социјалдемократскиот сојуз на Македонија, како партија што ја доби честа и одговорноста да ја предводи новата реформска Влада даваме збор дека ќе се грижиме за Македонскиот јазик и националниот идентитет, но и дека низ почитување на богатството различности во нашата држава, ќе градиме просперитетно општество на сите граѓани во нашата држава“, стои во честитката на Заев.


Македонска делегација во Рим во чест на свети Кирил


Скопје, 24 мај, 2017 - 10:37 (META) 

Државно-црковна делегација од Република Македонија денеска ќе се поклони на гробот на свети Кирил во Рим, во рамки на традиционалната манифестација „Македонија во чест на свети Кирил“. Делегацијата ќе ја предводи министерот за надворешни работи во заминување Никола Попоски, а со молебенот на гробот на светителот ќе чиноначалствуваат митрополитот дебарско-кичевски Тимотеј и митрополитот европски Пимен.

Претседателот на државата Ѓорге Иванов во Рим ќе престојува во петок и ќе ја предводи државно-црковната делегација на аудиенцијата кај папата Франциск. Иванов заедно со Попоски во петок во Апостолската палата ќе има средба и со државниот секретар на Светата столица, кардиналот Пиетро Паролин.

Традиционалната манифестација „Македонија во чест на Св. Кирил“ на 25 мај годинава ќе биде збогатена со настап на музичката група Баклава, која во Рим ќе ја претстави македонската изворна музичка традиција.

Користејќи го говорот на македонските Словени од околината на неговиот роден Солун, кој го знаел од детството, Константин ја составил првата словенска азбука – глаголица со 38 букви. Говорот на македонските Словени го издигнал на ниво на прв книжевен јазик.

Во 11 век Црквата го прогласила 24 мај (11 мај по стар стил) за ден на светите просветители Кирил и Методиј. Денот во Македонија првпат бил одбележан на 11 мај 1860 година во црквата Св. Богородица во Скопје.


Положени цвеќиња пред споменикот на сесловенските просветители


Скопје, 24 мај, 2016 - 15:55 (META) 

Градоначалникот на Град Скопје, Коце Трајановски и делегација на Советот на Град Скопје, денеска по повод државниот празник 24 Мај – Денот на сесловенските просветители Кирил и Методиј, положија цвеќиња пред Споменикот на браќата на плоштадот Филип Втори.

Цвеќиња положија и делегација од Владата на Република Македонија, делегација од Собранието на Република Македонија, делегации на политички партии, Армијата на Република Македонија, локални самоуправи и здруженија на граѓани.


Иванов, Вељаноски, Заев и ВМРО-ДПМНЕ го честитаа Денот на сесловенските просветители


Скопје, 24 мај, 2016 - 13:40 (META) 

Претседателот на Република Македонија, Ѓорге Иванов, упати честитка по повод одбележувањето на 24 Мај – Денот на сесловенските просветители, светите браќа Кирил и Методиј.

„Одбележувајќи го големиот празник 24 мај, ја славиме историската и епохална мисија на солунските браќа. Големите просветители ја составија првата словенска азбука – глаголицата. Со помош на глаголицата тие ја препеаја Библијата на старословенски насочувајќи дека секој народ има право на проповед за делата Божји на својот мајчин јазик. Преку писмото, на идните генерации на автентичен начин им го пренесуваме она што сме го наследиле од нашите предци. Делата на светите браќа не учат дека сите луѓе се еднакви пред Бога, а јазикот на кој се молат на Бога му е еднакво мил“, стои во честитката.
Иванов наведува дека Македонија ја слави цивилизаторската мисија на големите сесловенските апостоли кои прифаќајќи ја светлината на знаењето на верата придонесоа кон втемелување на правото на еднаквост, јазик и култура.
Честитки до граѓаните, по повод празникот упатија и претседателот на Собранието, Трајко Вељаноски, владејачката партија ВМРО-ДПМНЕ, како и лидерот на СДСМ, Зоран Заев.

Вељаноски вели дека со оддавањето на почит и празнување на Светите браќа Кирил и Методиј го уважуваме едно од најзначајните дела за македонскиот народ и останатите народи да можат на свој разбирлив јазик да ги примат и шират христијанските вредности.

„Нивниот траен белег е врежан во севкупниот европски цивилизациски подем, а преку нивната упорност и макотрпна работа докажаа дека не постои јазик што не е доволно свет и достоен за славење на Бога. Светите браќа Кирил и Методиј преку својата делотворна работа и мисионерски походи просветлија многу народи и го надградија нивниот духовен и културен развој“, вели Вељаноски и додава дека наша заедничка цел е да продолжиме да го чуваме се она што е создадено како трајна вредност и да сме полни со верба дека имаме сила да ги победиме сите предизвици.

ВМРО-ДПМНЕ во честитката наведува дека светите браќа Кирил и Методиј, како неизмерно значајни личности од нашата историја и нашето културно, етничко и духовно постоење како народ и нација.

„Со создавањето на Глаголицата, многу народи, меѓу кои и македонскиот народ, добија можност да ги примат и шират христијанските вредности, да творат и да напредуваат на свој близок и разбирлив јазик. Ваквиот потфат, целокупната просветителска и мисионерска улога на Кирил и Методиј, како и големиот број нивни ученици кои ја продолжија нивната епохална дејност во Македонија и во светот, претставува дело кое е тешко замисливо, а уште потешко остварливо од било кој современик во Македонија. Сепак, тоа е подвиг кој инспирира, подвиг кој потврдува дека со љубов, со труд, со постојаност, секој човек и секоја генерација може да остави дела за паметење, дела кои ќе го надживеат и ќе останат долго да се паметат и да им служат на генерациите кои доаѓаат“, стои во честитката.

Лидерот на опозициската партија, Заев во честитката во наведува дека сесловенските просветители, браќата Кирил и Методиј дадоа огромен цивилизациски придонес не само за македонскиот, туку и за сите словенски народи.

„Благодарни сме што го поставија темелот на писменоста, како наше основно културно и национално обележје. Придобивките коишто ги жнееме денеска, почитувајќи го јазикот, писмото и културата, се огромен влог со којшто нè задолжија сите нас. Преку својата благородна и просветителска дејност на овие простори, браќата Кирил и Методиј ја направија Македонија лулка на словенската култура и писменост, испишувајќи со тоа светли страници од македонската културна самобитност“, стои во честитката од Заев.


Зденек Опатрил: Словенските народи исправени пред сериозен предизвик за својот опстанок


Охрид, 24 мај, 2016 - 13:20 (META) 

Во Охрид, се одржува меѓународна конференција на тема „Тајните на словенската писменост“, посветена на словенските просветители Кирил и Методиј и 1.100-годишнината од упокојувањето на Св. Климент Охридски.

Учествуваат педесетина професори, експерти и слависти од Македонија, Русија, Украина, Чешка, Полска, Словачка и Бугарија, додека собирот е во организација на Сеславјанскиот комитет.

На научниот собир се расправа за последиците од глобалните процеси врз вредностите на словенските народи.

– Метафизичкото значење на словенската писменост како придобивка за човечката цивилизација воопшто ќе биде обединувачка нишка на овој научен собир во Охрид. – вели Јордан Ѓорчев, претседател на Сесловенскиот комитет во Македонија.

Претседателот на Меѓународниот сеславјански комитет, професор Зденек Опатрил од Чешка, изнесе став дека словенските народи се исправени пред сериозен предизвик да го зачуваат својот идентитет и пред се својот јазик врз кој се темели културата и посебноста на една нација.

Според него словенските народи се поинтензивно се изложени на „оикофобија“, своевидна пропаганда на светските центри на моќ кои пласираат разни теории за преиспитување на потеклото на словенските народи, нивната посебност и особеностите.

– Охрид е свето место за сите словенски народи и оттука треба да се брани Словенството од се поизразените обиди за асимилација и негативните влијанија врз нашите заеднички вредности. Нашата традиција и култура е исправена пред опасности кои се кријат во принципите на мултикултурализмот, кој ни се сервира како нова вредност. Особено загрозен е јазикот со претераната употреба на интернационализми. Јазикот е главна особеност на секој народ. Доколку не го зачуваме ќе исчезнеме како народи – додава професор Опатрил.

Претседателот на Рускиот фонд за образование Сергеј Комков потенцираше дека актуелните случувања во Европа во крајна линија неповолно влијаат на словенските држави, особено на помалите. Оттаму, смета тој, на словенските народи денес им треба обединување повеќе од било кога.

-Тоа не подразбира обединување во некаков „котел“ кој ќе ги стопи малите нации, бидејќи и најмалиот народ треба да биде сочуван и да ги зачува своите традиции и култура. Тоа значи дека треба да се навратиме кон нашите заеднички корени, пред се духовните, а главен обединувачки корен треба да биде православието – напоменува Комков.