Телохранителот на Груевски предложен за сведок за крвавиот четврток


Скопје, 24 август, 2018 - 16:11 (META) 

Оливер Вуксановиќ, адвокатот на обвинетиот Александар Василевски-Нинџа, во воведниот говор за судењето рече дека одбраната ќе докаже оти некои од обвинетите воопшто не го познавале Нинџа, а не, пак, да му ги слушаат наредбите.

-Немало акт на насилство, ниту некој се заканувал, ниту обвинетиот имал умисла и намера да го изврши кривичното дело – рече Вуксановиќ.

Во воведниот говор адвокатот рече дека преку листинзи од базните станици ќе ја докажат траекторијата на движењето на Нинџа во времето за кое е обвинет со обвинителниот акт. Тој рече дека Нинџа не влегол и не бил во Собранието.

Адвокатот на обвинетиот Александар Василевски-Нинџа во воведниот говор рече дека го предложиле за сведок и Благоја Василевски, брат на обвинетиот и телохранител на експремиерот Никола Груевски.

Сите адвокати на обвинетите, освен бранителот на Горанче Ангечовски, дадоа воведен збор на судењето.


Загрозениот сведок во „Монструм“ кажа дека видел четири тела кај Смилковско езеро


Скопје, 24 август, 2018 - 12:20 (META) 

Во Кривичниот суд за време на сослушувањето на загрозениот сведок од предметот „Монструм“, тој кажа дека на 12 април 2012 година кај Смилковското езеро видел четири тела.

Претходно адвокатот Алмир Алиспахиќ се обиде да ја провери и оспори меморијата на загрозениот сведок прашувајќи го како на претходното рочиште биле облечени тој и неговиот колега Насер Рауфи.

Загрозениот сведок, кој исказот го дава од друга просторија со мутиран глас и засенчена слика, точно кажа како биле облечени адвокатите и обвинетите, за кои уште кажа дека ги препознал, дека биле на езерото непосредно пред да се случат убиствата.

Воедно тој појасни дека кај Смилковско езеро тој кобен 12 април, освен „голф 3“ видел уште две патнички возила, едно со сина боја, а второто со бела. Автомобилот „Голф 3“, со затемнети стакла, го гледал претходните четири дена, од 9 до 12 април, на различни локации.

Судијата Огнен Ставрев рече дека денеска добил писмо од министерката Рената Дескоска-Тренеска дека постапката за екстрадиција на двајцата избегани е во процедура.

На 12 април 2012 кај скопското Смилковско езеро беа убиени Филип Славковски, Александар Наќевски, Цветанчо Ацковски и Кире Тричковски (на возраст од 18 до 21 година), сите од Радишани, Скопје, и 45-годишниот рибар Борче Стевковски од Црешево.


Зекири во судница препозна двајца напаѓачи на Села, кои барале „албанска крв“


Скопје, 16 април, 2018 - 14:02 (META) 

Пратеникот на СДСМ, Мухамед Зекири, во сведочењето во Основен суд Скопје 1 за обидот за убиство на Зијадин Села што се случи на 27 април минатата година во Собранието, рече дека во обвинетите препознал двајца што го извлекле Села од групата пратеници.  Друг сведок пак рече дека од насилниците се слушало дека бараат „албанска крв“.

Закири рече дека човекот што го одвоил Села од другите пратеници е обвинетиот Александар Јанески – Тоста. Рече дека му помогнале уште двајца во извлекувањето на Села од толпата, опишувајќи ги по облеката, едниот со црно елече, а другиот со качулка. Тој со црното елече е меѓу присутните обвинети, рече Зеќири, покажувајќи кон обвинетиот Сашо Сенков – Сенко.

Зекири рече дека откако Села бил извлечен на страна, салата се преполовила, и притисокот врз останатите пратеници спласнал.

Претходно сведочеше полицаецот Абдулфетах Алими, кој рече оти слушнал дека насилниците барале „албанска крв“.

– Во салата во која се одржуваше прес-конференцијата видов бесни демонстранти кои со тврди предмети гаѓаа кон пратениците. Слушнав како велеа дека бараат албанска крв, меѓу кои и на Зијадин Села, Талат Џафери и Зоран Заев. Ние се обидовме да ги заштитиме, но ситуацијата излезе од контрола – изјави Алими, кој во моментов се наоѓа во притвор.


Талат Џафери во судница препозна петмина од напаѓачите на Села


Скопје, 10 април, 2018 - 13:49 (META) 

Претседателот на Собранието, Талат Џафери како сведок за обидот за убиство на Зијадин Села во парламентот на 27 април лани, препозна пет од 10-те обвинети, кои на денешното судење во Основниот суд Скопје 1 беа донесени од притвор.

Џафери ги посочи обвинетите Стојан Павлески, Андреј Мицов, Николче Димитриевски, Кире Ѓорѓиевски и Оливер Ошавковски.

-Тие беа првите кои влегоа во прес-салата на Собранието и меѓу првите кои почнаа да ги напаѓаат присутните. Ова го тврдам со целосна одговорност – рече Џафери на прашање на адвокатот на оштетениот Зијадин Села, Абедин Абдули.

Претходно, собранискиот спикер сведочеше што зборувале напаѓачите во Собранието.

-Додека зборував кратко на мобилниот со фамилијата, Села го снема. Не беше до мене. Во салата не забележав видливи повреди кај Села. Помислив обезбедувањето го извлекло. Но, набргу некој од напаѓачите рече: Со Села завршивме, редот е на вас. Сите ќе потпишете изјави дека нема да го прифатите новото парламентарно мнозинство – рече Џафери.


Рочиштето за „Тарифа“ прекинато, откако му се слоши на сведок, следното закажано за 1 март


Скопје, 13 февруари, 2018 - 14:50 (META) 

Судијката Софче Гаврилова Ефремова го прекина денешното рочиште за случајот „Тарифа“ на Специјалното јавно обвинителство, во кој првообвинет е поранешниот директор на ЕЛЕМ, Дејан Бошковски, откако на вториот сведок, Влатко Чакаровски, му се слоши во судницата додека даваше исказ.

Тој рече дека и вчера не се чувствувал добро и бил советуван од лекар да земе боледување. Следното рочиште судијката го закажа за 1 март.

Инаку, Чакаровски, кој е сведок и на СЈО и на одбраната, е вработен во ЕЛЕМ и бил член на работната група за имплементација на софтверскиот систем – ЕРП.

Пред него, два часа траеше испрашувањето на сведокот Жарко Миленковски, чија фирма учестувала како партнер во конзорциумот за набавка на софтверот за потребите на ЕЛЕМ.

Поранешниот директор на Електрани на Македонија, Дејан Бошковски, и уште две лица, се обвинети дека незаконски го набавиле софтверскиот систем, вреден околу четири милиони евра.

Обвинителите на СЈО рекоа дека ќе докажат оти тројцата обвинети се виновни за делото за кое се товарат, додека пак одбраната најави дека со 160 сведоци ќе го докажува спротивното.

Тројцата обвинети се изјаснија за невини.

Инаку, денешното рочиште во Кривичниот суд во Скопје го следеше и претставник на Амбасадата на САД во Скопје.


Рочиштето за Села ќе продолжи на 19 февруари, сведокот ја смени изјавата од истрагата


Скопје, 8 февруари, 2018 - 17:36 (META) 

Денешното судско рочиште на напаѓачите на лидерот на Алијанса за Албанците, Зијадин Села и обидот за негово убиство во Собранието на 27 април, траеше седум часа, а беа испрашани само двајца сведоци.

Адвокатот на Села рече дека лидерот на Алијансата за Албанците нема да дојде и да сведочи поради партиски обврски, но и затоа што расправата се оддолжи со распитот на првиот сведок. Следното рочиште е закажано за 19 февруари, кога треба да сведочи Села.

Првиот сведок во случајот, Орданче Соколовски, кој е вработен во фирмата што ги поставувала камерите во Собранието, рече дека ги вадел снимите од камерите на 28 април, во присуство на инспектори од МВР кои имале налог од ОЈО. Тој рече дека не ги гледале снимките, затоа што снимките ги зеле инспекторите од МВР.

Вториот сведок Игор Ивановски, според обвинителот Дарко Јакимовски на денешното рочиште ја сменил изјавата и дал спротивен исказ за тоа што видел во Собранието на 27 април, од исказот за време на истрагата, поради што, Јакимовски побара од судот исказот на сведокот даден во истрага да влезе како доказ.

Обвинителот Јакимовски по ова побара и доби дозвола од судот да го потсети сведокот што сведочел во истрагата.

Цитирајќи дел од записникот, обвинителот потсети на изјавата од истрагата според која додека лежел Села во бессознание околу него имало дваесетина лица, кои го удирале по глава, стомак, односно кој каде што ќе стигнал. Притоа, извикувале „Убиј го шиптарот“, „Убиј го кучето“, а слушнал извици  „Оставете го“ и „Готов е“. Дури и самиот сведок рекол „Што правите, го утепавте човекот“.

– Рековте дека не сте чуле ништо – го праша обвинителот сведокот Ивановски, кој потврди дека така рекол денеска и дека тоа било „негова грешка“.

Меѓудругото, обвинителот наведе дека сведокот Игор Ивановски и еден од обвинитите Сашо Сенков се братучеди од трето колено.

Судијката Славица Андреевска го одби предлогот на обвинителот со образложение дека такво нешто не е предвидено во Законот за кривична постапка.

Инаку на приговор на одбраната, кој беше прифатен од судот, не беше дозволено да бидат покажани снимките од мобилниот телефон на Ивановски на денешното рочиште бидејќи постапката се уште не е во таква фаза.


Врховен ја укина пресудата против Костовски за шпионажа, а ја потврди за прислушувањето


Скопје, 15 декември, 2017 - 16:45 (META) 

Врховниот суд ја укина пресудата на Основниот суд Скопје 1 со која Звонко Костовски беше осуден за шпионажа во случајот „Пуч“ и предметот во овој дел го враќа на повторно судење во првостепениот суд. Истовремено Врховниот суд ја потврдил одлуката на Кривичниот суд за делото неовластено прислушување и тонско снимање, за што Костовски доби една година затвор.

Костовски, кој е поранешен главен опретивен техничар во Управата за безбедност и контраразузнавање (УБК)  беше единствениот осуден во случајот „Пуч“ од 2015 година, каде меѓу обвинетите беа поранешниот директор на УБК, Зоран Верушевски и актуелниот премиер Зоран Заев, тогашен лидер на опозицијата.

Тој беше осуден на три години затвор, откако ги призна делата и склучи спогодба со Основното јавно обвинителство.

Пресудата Врховниот суд ја донел на почетокот на месецов, а се однесува на барањето за заштита на законитоста што го поднесе Специјалното јавно обвинителство за што кон средината на септември, оваа година беше одржана и седница во судот, на која обвинителките на СЈО Фатиме Фетаи и Ленче Ристоска ги образложија аргументите зошто бараат укинување на пресудата на Костовски.

Врховен утврдил дека  пресудата на Кривичниот суд  против Костовски за шпионажа е нејасна и противречна, бидејќи тој бил осуден дека му помагал на Зоран Верушевски во шпионирањето, без претходно да има правосилна пресуда против Верушевски дека го сторил кривичното дело.

„Во конкретниот случај обвинетиот З.В. не бил огласен виновен за кривично дело – шпионажа што е предуслов за утврдување на кривичната одговорност на обвинетиот З.К., како помагач во извршувањето на кривичното дело. Во време на донесување на оспорената пресуда, предметот против обвинетиот З.В. за кривичното дело – шпионажа бил во фаза на истрага, што согласно начелото на пресумпција на невиност подразбира дека тој е невин се додека неговата вина не биде утврдена со правосилна судска пресуда. Од изнесените причини, Врховниот суд на Република Македонија најде дека со пресудата на Основниот суд Скопје I Скопје од 25.02.2015 година, сторена е повреда на законот… поради што ги уважи наводите изнесени во барањето за заштита на законитоста со кои се оспорува кривичната одговорност на обвинетиот за ова кривично дело“, стои во пресудата на Врховниот суд, објавена вчера на веб-страницата „Суд.мк“.

За кривичното дело „неовластено прислушување и тонско снимање“ Врховниот суд не нашол дека е направена повреда на Законот за кривична постапка.

Во пресудата како дополнителен аргумент во овој контекст се наведува дека на седницата одржана по барањето за заштита на законистоста од СЈО, јавниот обвинител истакнал дека има дволно докази дека Костовски бил дел од „злосторничкото здружение“ што го вршело незаконското прислушување, но не бил гонет од СЈО бидејќи е сведок во постапката против останатите членови од групата.

„На седницата одржана по повод поднесеното барање за заштита на законитоста, јавниот обвинител истакна дека има доволно докази дека обвинетиот З.К. бил припадник на злосторничкото здружение, детално опишувајќи ги неговите дејствија и неговата улога и придонес во целокупниот процес на прислушкување. Дека тој како главен оперативен техничар во Управата за безбедност и контраразузнавање, со своето техничко знаење им овозможил на останатите припадници на злосторничкото здружение да пристапат кон незаконско следење на комуникациите и на лица кои не се маркирачи им овозможил да маркираат телефонски броеви и креирал паралелна структура во која биле складирани сите незаконски следени комуникации. Причината поради која не е кривично гонет од страна на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите за ваквите незаконски дејствија, е затоа што тој добил својство на сведок во постапката, бидејќи неговиот исказ бил од особено значење за откривање на останатите сторители на кривичните дела“, стои во пресудата на Врховниот суд.

Инаку, СЈО неколку месеци откако ја презеде надлежноста го повлече обвинителниот акт за случајот „Пуч“ бидејќи „фактичката состојба прикажана во обвинителниот акт е во спротивност со доказите со кои тие располагаат“ и со наодите на обвинителството во истражните постапки „Таргет“ и „Тврдина“.

На 29 јуни, оваа година СЈО подигна обвиненија за овие два случаи, во кои првообвинетите за незаконското прислушување и за уништување на опремата од прислушувањето се поранешниот директор на УБК, Сашо Мијалков и екс началникот на петтата управа, Горан Грујовски.


Рочиштето за „Сопот“ одложено – сведокот немал важечка лична карта


Скопје, 23 ноември, 2017 - 10:48 (META) 

Денешното рочиште за случајот „Сопот“ во Основен суд Скопје 1 беше одложено, откако судот не можеше да го утврди идентитетот на сведокот Рамадан Бајрами. Следното рочиште, како што кажа судијката Дијана Груевска-Илиевска, ќе се одржи на 20 декември.

Денешното рочиште требаше да почне со сведочењето на Бајрами, но кога тој требаше да се идентификува, покажа стара лична карта, со сини корици, издадена во 2002 година.

Тоа беше причина судијката со поротниците да се повлече на консултација, по што Илиевска рече дека судот не може да утврди идентификација и побара Бајрами на следното рочиште, на 20 декември, да дојде со важечка биометриска лична карта или со пасош.

Рамадани потоа објасни дека имал биометриски пасош, ама го оставил дома.

Предметот „Сопот“ се однесува на случајот од 2003 година кога двајца полски војници и еден македонски државјанин загинаа откако теренско возило на НАТО нагази мина. Во овој случај десет лица се осудени за тероризам, под обвинение дека ја подметнале експлозивната направа на локалниот пат Сушево – Сопот.

„Сопот“ беше повторно отворен годинава откако Основното јавно обвинителство за гонење организиран криминал и корупција во јули годинава му го предаде предметот на СЈО, затоа што во јавноста беа објавени разговори на владини функционери поврзани со овој случај.


Адвокатот Додевски повикан како сведок во СЈО за случајот „Талир“


Скопје, 10 јуни, 2017 - 13:12 (META) 

Aдвокатот Никола Додевски ќе биде повикан како сведок во Специјалното јавно обвинителство за случајот „Талир“ и тој нема да може да биде адвокат на лидерот на ВМРО-ДПМНЕ и поранешен премиер, Никола Груевски, за овој случај, кој е првоосомничен пишува порталот „Сакам да кажам“ (www. sdk.mk).

Од Специјалното јавното обвинителство ја потврдиле информацијата, но не кажале повеќе детали во врска со случајот.

Инаку, вчера за случајот „Талир“ во СЈО се појавија генералниот секретар на ВМРО-ДПМНЕ и поранешен технички премиер, Емил Димитриев, поранешниот министер за транспорт и врски, Миле Јанакиески, пратеничката на ВМРО-ДПМНЕ, Даниела Рангелова, како и пратеничката на СДСМ, Фросина Ташевска-Ременски.

За понеделник се очекуваат првоосомничениот Груевски, Илија Димовски и Кирил Божиновски. СЈО испратило покани до сите 11 осомничени да дадат исказ за „Талир“.

Инаку, адвокатот Никола Додевски ги застапува поголемиот дел од осомничените во случаите што ги води СЈО.


Сослушан сведок, расправа за „Маѓар Телеком“ одложена за 10 јули


Скопје, 23 мај, 2017 - 15:28 (META) 

На главната расправа на судењето за случајот „Маѓар Телеком“, во кој обвинетите Атила Сендреи, Ролф Плат и Золтан Кишјакус, се товарат за злоупотреба на службената положба, денеска беше сослушан еден сведок, по што беше одложена за 10 јули, соопштија од Основниот суд Скопје 1.

Обвинетите поранешни раководни лица од „Маѓар Телеком“ кои држеа клучни позиции во Македонски телеком се шест години недостапни за органите на прогонот.

За следното продолжување на главната расправа на 10 јули ќе бидат испратени покани за другите предложени сведоци, извести судот.