!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Кумановското обвинителство поведе истрага против лицето што уби тинејџер на свадба


Куманово, 27 јули, 2017 - 13:04 (META) 

Основното јавно обвинителство Куманово поведе постапка против лицето кое застрела гостин на свадба завчера во кумановското село Липково.

Според соопштението, осомничениот на 25 јули во 22.45 минути, додека присуствувал на свадбена веселба, извадил од појас пиштол марка „смит и весон“ и со умисла истрелал еден куршум со кој го погодил сега починатиот 19-годишник Б.Х., државјанин на Република Германија.

Почната е истражна постапка против осомничениот, и тоа за убиство и за новластено  изработување, држење, посредување и тргување со оружје или распрскувачи материи.

Основен суд Куманово, по предлогот од јавниот обвинител, на осомничениот му изрекол притвор од 30 дена.


Момче убиено на свадба во Липково


Куманово, 26 јули, 2017 - 13:12 (META) 

На свадба во кумановското село Липково вчеравчер бил застрелан 19-годишен германски државјанин, кој од добиената повреда починал во Медицински центар Куманово, соопшти СВР Куманово. Момчето кое имало потекло од Прешево, Србија, било донесено околу 23.30 часот во кумановската болница, со прострелна рана на левата страна на градниот кош.

Со полицискиот увид било констатирано дека околу 22.45 часот, додека момчето и други сватови седеле во дворот од куќата сопственост на З.Ш. (51) од Липково, А.Ш. (63) од Липково извадил пиштол, кој го поседувал без дозвола, и истрелал три куршуми, од кои еден го погодил момчето.

По наредба на Основно јавно обвинителство – Куманово, телото е предадено на Институт за судска медицина за обдукција. А.Ш. е уапсен и задржан во полициската станица во Куманово.


Почнува „Галичка свадба 2017“, младенците се запознале во Галичник


Галичник, 15 јули, 2017 - 10:52 (META) 

Скопјаните Тања Чаловска и Бошко Лепчески, обајцата со потекло од Галичник, се младенците на „Галичка свадба 2017“ која ќе се одржува овој викенд. Триесет и едногодишниот правник и 28-годишната економистка се запознале пред седум години токму во Галичник, каде што утре ќе бидат и венчани во црквата „Св. Петар и Павле“.

По подолго време се случува на Галичка свадба двајцата младенци да имаат потекло од Галичник. Чаловска на свадбата ќе носи носија која е семејно наследство и е стара еден век, а необлечена повеќе од 50 години. Носијата сосе историски вредниот накит што ќе ги носи тежат околу 25 килограми.

Свадбата ќе почне вечерва во 19.30 часот, со китење, редење на бајракот и фрлање пушка, а утре наутро во 9 часот ќе продолжат обичаите меѓу кои централен настан ќе биде венчавката во црквата „Св. Петар и Павле“.

Посетителите своите возила ќе може да ги остават на фудбалското игралиште близу Галичник, а потоа со организиран превоз со комбиња ќе бидат превезени до влезот на Галичник.

Со Галичката свадба ќе биде отворено и годинашното Галичко културно лето, во чии рамки се 24. Галичка книжевна колонија во организација на Здружението „Галикул“, на која ќе учествуваат домашни и странски писатели, како и 28. Галичка ликовна колонија на која гости ќе бидат осум уметници од Израел, Индија, Босна и Херцеговина, Македонија, Словенија, Косово и од Бугарија.


Во самоубиствен напад на свадба во Ирак убиени 26 лица


Тикрит, 9 март, 2017 - 11:44 (META) 

Најмалку 26 лица загинаа во двојниот самоубиствен напад за време на свадба во село северно од Багдад, соопшти ирачкото министерство за одбрана.

Двајца бомбаши синоќа дошле на свадба во село во близина на градот Тикрит и ги активирале експлозивите.

Во нападот се ранети 25 лица, соопшти Министерството.

Никој засега не ја презеде одговорноста, но се сомнева дека зад нападот стои Исламска држава, која и претходно има изведувано слични напади.


Триесет и двајца мртви при напад на свадба во Сирија


Дамаск, 4 октомври, 2016 - 11:39 (META) 

Во самоубиствен напад на свадба на североистокот на Сирија се убиени 32 лица, а околу 100 се повредени, соопштија болнички извори.

Одговорноста за нападот во селото Тал Тавил, во близина на местото Хасака, ја презедоа припадниците на Исламска држава.

Опсерваторијата за човекови права соопшти дека нападот го извел бомбаш-самоубиец, за време на венчавка на припадник на курдската заедница и член на локалната курдска партијата.

Невестата и младоженецот не се повредени во нападот, се наведува во извештајот. Хасака, град кој е под контрола на курдски сили, често е мета на милитантите на ИД.


Најмалку 50 лицa загинаа, а 100 се ранети во терористички напад на свадба во Турција


Газиантеп, 21 август, 2016 - 0:44 (META) 

Бомбаш-самоубиец се разнесе за време на свадба во градот Газиантеп во јужниот дел на Турција и притоа уби 50, а рани 100 лица, пренесуваат светските медиуми.

Турскиот претседател Реџеп Таип Ердоган изјави дека, верува дека припадници на Исламска држава го извеле бомбашкиот напад чија што мета биле гости на свадба кои во знак на славење излегле низ улиците на градот. Според него, целта на овој напад е поделба меѓу етничките групи во Турција.

Гувернерот на Газиантеп, Али Јерликаја потврдил дека се работи за терористички напад.

Свадбената церемонија била на отворено, во центарот на градот каде што живеат најголем број на Курди.

Младенците била по потекло од Сирт каде што се водат борби меѓу припадниците на Работничката партија на Курдистан и силите на режимот, поради што венчавката ја организирале во друг град. Тие во нападот се ранети, но не се во животна опасност.

Градот Газиантеп се наоѓа во јужниот дел на Турција, во близина на границата со Сирија.


СДСМ: Секретарката на началник во СВР Битола пукала од пушка на својата свадба


Скопје, 19 јули, 2016 - 16:32 (META) 

Потпретседателот на Социјалдемократската младина на Македонија (СДММ), Дарко Каевски, денеска на прес-конференција објави фотографии од невеста со автоматска пушка, за која тврди дека е нововработената секретарка на началникот на униформираната полиција во СВР Битола, Марија Ристовска-Калешковска, како пука на својата свадба.

– Ќе беше спорно за која било невеста да се весели на сопствената свадба со пушка. Но, овде уште станува збор за вработена во СВР Битола! Од оваа фотографија може да се види дека Марија Ристовска-Калешковска, по потекло од селото Долно Српци, Битолско, не само што се фотографирала со пушка, туку со помош на татко ѝ, таа на веселбата и рафално пука – рече Каевски.

Тој посочи дека, според нивните информации, станува збор за формациско оружје на полицијата и на војската, за кое граѓаните не можат да добијат дозвола за поседување и за носење.

– Но, тоа очигледно не важи за нововработената секретарка на началникот на униформираната полиција во СВР Битола, Зоран Дуковски, Марија. Според информациите што ги имаме, Марија Ристовска-Калешковска е неодамна вработена, а пред извесно време добила и решение за работа во СВР Битола, веднаш по завршувањето на средното економско училиште. Таткото на невестата, кој ѝ ја придржува пушката, е еден од главните координатори на ВМРО-ДПМНЕ за битолскиот регион и многу близок соработник на Никола Груевски. Свадбата на вработената во МВР, Марија Ристовска-Калешковска, на којашто таа пука со оружје на полицијата и на војската, се случила минатиот месец – рече Каевски.

Тој од МВР и од СВР Битола побара да објаснат од каде таква пушка се нашла на свадба на вработена во полицијата.


Млад пар од Сирија се венча во Идомени


Атина, 4 мај, 2016 - 11:57 (META) 

Во малиот бегалски град на македонско-грчката граница се случи и првата свадба. Иако Идомени последниве два месеци се поврзува само со трагедијата на бегалската криза, илјадниците бегалци во кампот успеваат во своето секојдневие да најдат и светли моменти.

По првите бебиња што се родија во кампот, вчера се венча двојка од Сирија.

Младиот пар, 27-годишно момче и 20-годишна девојка од Сирија, ја напуштиле родната земја со идеја да почнат заеднички живот и да се венчаат во Германија. Меѓутоа, поради затворените граници, последниве два месеци живеат во Идомени. Поради неизвесноста, одлучиле веќе да не чекаат и вчера во друштво на голем број бегалци и волонтери во кампот на границата, ја имаа својата мала прослава.

Овој чин е само уште еден показател дека за 10.000 бегалци во кампот во Идомени, нивите преполни шатори се дом во кој се одвива секојдневието. Тие се место каде децата успеват да најдат простор и да си играт, каде се развиваат пријателства, каде оние со занает, како берберите, успеваат и да заработат по некое евро.

Во Идомени, според официјалните бројки, има 10.172 бегалци, од вкупно 53.731 мигрант во цела Грција. Грчката влада најави дека се работи на уредување на нови бегалски центри во стари индустриски простори на периферијата на Солун, каде се надеваат дека следните две недели ќе префрлат околу 4.500 бегалци и со тоа ќе почнат со празнење на кампот и со релокација на луѓето на места со подобри услови за живот.

Весникот „Етнос“ пренесува дека минатиот четврток заминале 200 бегалци кон организираните центри, а според информациите од полицијата, многумина други изразиле интерес да си одат и во следните денови ќе бидат пренесени во новите привремени прифатни простори.

Целиот камп последните два дена е претворен во огромно калливо мочуриште поради поројните врнежи од дожд. И шаторите и алиштата се покиснати и се чекаат подобри денови за луѓето да се стоплат и да се исушат. Временските услови и понатаму се еден од најголемите непријатели и страв на бегалците, бидејќи времето се движи од студено, ветровито и дождливо кон неподносливо топло, поради што и грчките власти стравуваат дека може да донесе до нови болести и инфекции во кампот.


Јемен: 23 мртви во воздушен напад


Сана, 8 октомври, 2015 - 9:56 (META) 

Во воздушен напад на воената коалиција предводена од Саудиска Арабија, загинаа 23 лица, кои биле на свадба во Јемен.
Ова е втор воздушен напад изминатите седум дена во кој настрадале сватови во Јемен.

Инцидентот се случил вчера во покраината Дамар, околу 80 километри јужно од главниот град Сана.

Вкупниот број на загинатите би можел да се зголеми бидејќи се претпоставува дека има уште тела под урнатините на куќата во која се одржувала церемонијата на венчавката, соопшти началникот на итната служба во болницата во Дамар, Сафван ал Анси.


Саудиска Арабија негира дека ја бомбардирала свадбата


Ријад, 30 септември, 2015 - 13:46 (META) 

Официјален Ријад денеска ги отфрли обвинувањата на јеменските власти дека нејзините воздухопловни сили се одговорни за завчерашното убиство на 130 цивили на свадба во jугозападниот дел на Јемен.

Саудиска Арабија тврди дека за време на инцидентот, нивните воздухопловни сили, како и силите на членките на меѓународната сунитска коалиција, не учествувале во никакви воени операции во Јемен.

Јеменските медиуми јавуваат дека жртви биле гости на свадба на близок човек до бунтовничките Хути.