!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Препродавачите на билети за Супер купот се спогодиле со ОЈО да платат казни по 500 евра


Скопје, 9 август, 2017 - 18:01 (META) 

Петмината препродавачи на билети за Супер купот, за кои МВР поднесе кривични пријави, денеска се спогодиле со Основното јавно обвинителство Скопје, да платат парични казни во висина од 500 евра, информираат од таму.

„Еден од осомничените е државјанин на Република Србија, двајца се државјани на Велика Британија, додека двајца имаат двојно државјанство и на Република Македонија и на САД. Со сите нив, надлежните обвинители постигнаа спогодби за одмерување на видот и на висината на кривичната санкција, со кои секое од лицата прифати да плати парична казна во висина од 500 евра. Дополнително, за лицата кои немаат македонско државјанство е предвидена и мерка протерување од земјата за време од една година“, се вели во соопштението на ОЈО.

Предлог-спогодбите со осомничените се доставени до судија на претходна постапка.

„Лицата беа осомничени дека го извршиле делото санкционирано со последните измени на Кривичниот законик, а со кои се санкционира нелегално препродавање билети за спортски натпревари. Согласно законот, за ова кривично дело е предвидена парична казна или казна затвор до една година“, се додава во соопштението.


Реал Мадрид го освои Супер купот во Скопје – Манчестер jунајтед поразен со 2:1


Скопје, 8 август, 2017 - 23:08 (META) 

Екипата на Реал Мадрид вечерва во Скопје го освои Супер купот, победувајќи го Манчестер jунајтед со 2:1 на градскиот стадион „Филип Втори“ во Скопје.

„Кралевите“ по четврти пат ќе го однесат трофејот во Супер купот во Мадрид.

Првото полувреме заврши со резултат 1:0 за „кралевите“, откако Касемиро ја затресе мрежата на „црвените ѓаволи“ во 24. минута од натпреварот.

Реал Мадрид го зголеми водството на 2:0 во второто полувреме, со погодокот на Иско Аларкон во 52. минута.

„Црвените ѓаволи“ успеаја да го намалат водството на „Реал Мадрид“ во 62. минута, со погодокот на Ромелу Лукаку, кој им даде надеж на своите навивачи на стадионот дека, сепак, не е сè завршено и дека сè уште има шанса да изедначат.

Сепак, играчите на Манчестер јунајтер, и покрај тоа што во текот на натпреварот почесто ја имаа топката, не успеаја своите фантастични акции да ги крунисаат со гол.

Ѕвездата на Реал, Кристијано Роналдо, влезе во игра дури во 83. минута и дополнително ја вжешти атмосферата на стадионот „Филип Втори“, но не успеа да постигне гол, ниту во 97. минута кога беше непрецизен при изведувањето слободен удар.


Полицијата привела двајца Англичани и двајца Украинци за препродавање билети за Супер купот


Скопје, 8 август, 2017 - 20:27 (META) 

Полицијата денеска привела четири странски државјани поради недозволено препродавање билети за Супер купот.

Како што соопшти МВР, во 17.40 часот на плоштадот Македонија фатени се и приведени двајца англиски државјани, кои им препродале билети на двајца украински државјани.

При извршен преглед кај украинските државјани се пронајдени вкупно пет билети без наведени лични податоци, додека кај еден од англиските државјани се пронајдени шест пликоа со по еден билет на различни имиња. При извршениот разговор, еден од украинските државјани изјавил дека еден или два билети купил од Англичаните.

За настанот известен е јавен обвинител и по брза постапка ќе биде поднесена соодветна пријава за недозволена трговија.


Груевски се шетал низ Скопје и се радувал оти го овозможил Супер купот


Скопје, 8 август, 2017 - 13:19 (META) 

Поранешниот премиер, преку статус на својот фејсбук-профил, заслугите за Супер купот, кој се одржува денеска во Скопје, си ги припиша себеси и на ВМРО-ДПМНЕ и ја обвини сегашната власт дека сакала да го саботира тоа.

Во по малку „поетскиот“ статус, лидерот на опозициската ВМРО-ДПМНЕ, објаснува како тоа се случило „…Вчеравечер испешачив низ центарот на градот… Десетици илјади туристи, навивачи се забавуваат, уживаат во прошетките, се фотографираат пред секој атрактивен објект, пејат, играат, се веселат, а со нив и илјадници наши сограѓани го прават истото… Освен од Шпанија и од Англија, сретнав луѓе од многу земји…“, раскажува поранешниот премиер, за на крајот да напише: „Си заминав дома со мислата колку би било убаво…“

„Според правилата на УЕФА, Владата што ја предводев заедно со ФФМ официјално поднесе кандидатура, заедно лобиравме и убедувавме, заедно ветивме дека ќе се исполнат сите услови и заедно ги исполнивме. Националната арена „Филип Втори Македонски“, која пред една деценија беше половичен фудбалски стадион само со јужна трибина, денес, наспроти скептиците и политичарите кои го убедуваа народот дека ќе се урне и новите трибини ќе паднат, е оформен и целосно компатибилен атрактивен конкурентен и модерен спортски комплекс кој ќе биде домаќин на големото фудбалско доживување“, пишува Груевски.

Лидерот на опозицијата вели дека Скопје има со што да се пофали пред илјадниците туристи кои деновиве се во посета на градот. Тој нагласува дека Скопје има модернизиран аеродром, како и градби и знаменитости „кои Скопје го вбројуваат на туристичките мапи“. Тој вели дека Скопје пред 10 години бил град „без големи впечатоци, атрактивни и препознатливи градби“.

„Сето она што го направивме во изминатата деценија, со политиките кои ги водевме беше предмет на огромни напади кон нас, манипулации, хајки и лаги од страна на политичките опоненти и тоа исклучиво поради политички причини, целосно запоставувајќи ја и потценувајќи ја употребата и трајната вредност на градбите“, вели Груевски.

Тој ја обвини сегашната власт дека се обидела да прикаже дека стадионот не е доволно подготвен за Супер купот, што се покажало за неточно откако УЕФА го објавила рекламниот спот за Супер купот во Скопје.

„Како што се разобличи оваа лага за стадионот, ќе се демаскираат и сите други. Останува да се памети изграденото, создаденото и реализираното, а сè друго е политичка магла која како ќе паѓа, така ќе останува јасната слика на делата и на резултатите. Си заминав дома со мислата колку би било убаво секоја наредна влада по нас да се потруди да изгради и да создаде повеќе од нас, поубаво од нас, повпечатливо и покорисно истовремено, наместо како сегашната, да не прави ништо и целата енергија да ја впери во девалвирање на она што нивните опоненти го направиле и во кочење на крупните проекти што сме ги почнале“, додава Груевски.


Поради Супер купот на УЕФА од денеска ќе има изменет сообраќаен режим


Скопје, 7 август, 2017 - 10:03 (META) 

Поради Супер купот на УЕФА од денеска ќе биде воведен посебен сообраќаен и пешачки режим за сообраќајниците во непосредна близина на стадионот.

Министерството за внатрешни работи соопшти дека од осум часот денеска до завршување на натпреварот, односно до 9 август, на потегот од крстосниците на улиците Аминта Трети (поранешна Ленинова) и Јордан Хаџи Константинов-Џинот ќе се пропуштаат исклучиво лица и возила кои имаат соодветна акредитација од организаторот на мечот, УЕФА.

На денот на натпреварот, зависно од интензитетот на сообраќајот, не е исклучена можноста од затворање за сообраќај и на булеварот Илинден на потегот од објектот на Владата до крстосницата со улицата Рузвелтова.

Градоначалникот на Град Скопје, Коце Трајановски, информираше дека Град Скопје е подготвен да ги пречека илјадниците навивачи од сите страни на светот за претстојниот натпревар меѓу двата најтрофејни клубови во Европа, „Реал Мадрид“ и „Манчестер јунајтед“.

За навивчите е подготвена т.н неутрална зона во согласност со стандардите на УЕФА, која ќе биде отворена во 11 часот.

– Во неутралната зона за обожаватели, сите ќе можат да играат фудбал, фудбалски тенис, да шутираат пенали, а и да си ги испробаат своите способности. Во оваа зона е предвидена богата музичка програма на познати македонски диџеи и музичари, кои ќе ги забавуваат посетителите на 7 и 8 август од 11 до 19 часот – рече Трајановски.

Тој додаде дека заедно со УЕФА и со ФФМ, на оваа локација ќе се постават и трите трофеи на УЕФА, трофејот на Лигата на шампионите, трофејот на Лига Европа и Супер купот.

Навивачите на „Реал Мадрид“ и на „Манчестер јунајтед“, пред самиот натпревар ќе се соберат на плоштадот „Филип Втори“ и пред платото на спомен-куќата на „Мајка Тереза“, од каде ќе тргнат кон националната арена „Филип Втори“.


Поради Супер купот на 7, 8 и 9 август патниците на аеродром да дојдат 4 часа порано


Скопје, 4 август, 2017 - 15:53 (META) 

Поради Супер купот на УЕФА, сите патници што на 7, 8 и 9 август ќе патуваат од скопскиот аеродром треба да пристигнат на аеродромот три до четири часа пред полетувањето.

„Сите патници што имаат летови од скопскиот аеродром „Александар Велики“, на 7, 8 и 9 август 2017 година, треба да пристигнат на аеродромот три до четири часа порано од времето на полетување, поради дополнителните безбедносни мерки кои ќе бидат применети на аеродромот по повод одржувањето на Супер купот на УЕФА“, информираат од „ТАВ Македонија“.

Супер купот помеѓу „Реал Мадрид“ и „Манчестер јунајтед“ ќе се игра на 8 август на скопската арена „Филип Втори“.

Се очекува да стигнат илјадници обожаватели на двата фудбалски клубови, како и највисоките претставници на УЕФА. На „Александар Велики“ досега се најавени 17 вонредни летови, на 7 и на 8 август, а дел од гостите ќе пристигнат со патнички и со мали бизнис-авиони.


Поради Супер купот, препродавањето билети ќе биде кривично дело


Скопје, 28 јули, 2017 - 15:49 (META) 

Во Собранието по попладневната пауза експресно беше закажана и се одржа 10. седница, со единствена точка на дневен ред – донесување предлог-закон за изменување и за дополнување на Законот за кривична постапка во скратена постапка, со кој рекламирањето билети за препродажба и нивната препродажба ќе станат кривично дело.

Ваквата препродажба досега воопшто не беше опфатена со законите, рече Томислав Тунтев, координаторот на пратеничката група на СДСМ. Тој предлогот на четирите најголеми партии во Собранието, ВМРО-ДПМНЕ, СДСМ, ДУИ и Беса, го образложи со барањата на УЕФА за одржувањето на Супер купот, а со тој закон ќе се овозможи на Фудбалската федерација на Македонија да ги исполни барањата на Европската федерација.

Откако предлогот беше прифатен, претседателот на Собранието, Талат Џафери, побара матичната комисија и Законодавно-правна комисија да го известат кога ќе ја продолжат процедурата за измената на Кривичниот законик и потоа ја прекина седницата и прогласи дека Собранието ќе продолжи со работа на точката од петтата седница, но набргу даде пауза за да овозможи комисиите да се координираат.


Спотот на ФФМ за Суперкупот на УЕФА како реклама за „Скопје 2014“


Скопје, 3 јули, 2017 - 14:01 (META) 

Натпреварот од Суперкупот на УЕФА, кој на 8 август во Скопје ќе го играат „Реал Мадрид“ и „Манчестер јунајтед“, повторно ја подгреа страста кај вљубениците во фудбалот, откако медиумите информираа дека „УЕФА го објавила“ промотивниот видеозапис.

На јутјуб-каналот на УЕФА, пак, како и на нејзината веб-страница нема тако нешто. Последната информација на веб-страницата на Унијата е објавена на 17 јуни, а вели дека во Скопје ќе се игра натпреварот меѓу „Реал Мадрид“ и „Манчестер јунајтед“, но – видеозаписот го нема.

Тој е објавен од Фудбалската федерација на Македонија, која, иако членка на УЕФА, сепак не ја претставува целата европска фудбалска федерација.

Видеозаписот, инаку, е во манирот на класичните промоции за телевизиската публика веќе видени во изминатава деценија, кога се промовираше Македонија како туристичка дестинација или винските ресурси на Македонија, но за разлика од тие спотови, овојпат доминираат градбите од „Скопје 2014“.

Во видеозаписот е претставена и Националната арена „Филип Втори“, каде би требало да се игра натпреварот, ама претежно се гледаат Матка, Скопје од Водно, но и споменикот на Филип Втори, Владата, Милениумскиот крст, црквата „Свети Спас“, кадри од центарот на градот… Во втората половина следува поопсежно претставување на стадионот, испресечено со кадри од Порта Македонија, Археолошкиот музеј, и т.н. сува фонтана на плоштадот Македонија.


Владата ќе им помогне на овоштарите и ќе ги стопира парите за невладините


Скопје, 23 јуни, 2017 - 9:22 (META) 

Владата на вчерашната осма седница донела две одлуки, за помош на производителите на праски кои протестираа против ниските цени на откупот, како и за укинување на одлуката на претходниот состав на владата за доделување пари на невладините организации.

„Владата на Република Македонија донесе одлука за дополнителна финансиска поддршка на земјоделците – прозводители на праски со слаб квалитет. Станува збор за финансиска поддршка на производителите на праски, со откупна цена до  5 денари, што во периодот од 12 јуни до 30 јуни ќе се искористат во преработувачките капацитети. За да им помогне на овие земјоделци, Владата одлучи да обезбеди дополнителна финансиска поддршка за произведувачите на праските со ниска цена поради лошиот квалитет, од 6 денари по килограм“, се вели во соопштението.

Истовремено, на седницата вчера била дискутирана одлуката на Генералниот секретаријат на Владата од претходниот состав за финансирање здруженија и фондации со средства од буџетот во висина од околу 50 милиони денари или 850.000 евра. Бил задолжен  Генералниот секретаријат да ги преземе сите потребни чекори за запирање на постапката за распределба средства од буџетот на овие здруженија и фондации.

„Одлучено е да се извести Државниот завод за ревизија да ја преиспита претходната одлука за доделувањето на овие средства, а доколку постои основа за сомнеж за сторени злоупотреби, да се отвори истрага за обид за ненаменско трошење буџетски пари“, соопшти Владата.

Донесени се и одлуки за новиот тендер на ЕЛЕМ во вредност од 34 милиони евра, при што е наложено тој да се поништи. Станува збор за тендер за набавка на опрема за ископ на јаловина, а Владата му наложила на надзорниот одбор на ЕЛЕМ да ја поништи одлуката за распишаната јавна набавка и за тоа да биде известена.

Исто така, на осмата седница на Владата вчера констатирани се сериозни пропусти од страна на Акционерското друштво за стопанисување со станбен и деловен простор и на претходата Влада, во реализацијата на преземената обврска за одржување на УЕФА Супер купот 2017 на Арената „Филип 2“, со оглед дека стадионот не е подготвен согласно бараните стандарди на УЕФА. Задолжен е Генералниот секретаријат на Владата на Република Македонија, во соработка со другите надлежни министерства да ги преземе сите потребни мерки во рок од три дена и да најдат начин за одржување на УЕФА Супер купот, за што, како што е најавено претставници на УЕФА ќе дојдат во Скопје на 21 јули да ги проверат условите за одржување на натпреварот меѓу „Манчестер јунајтед“ и „Реал Мадрид“.

Истовремено, министрите биле задолжени да ги декласифицираат сите информации за службени патувања и репрезентации што претходните нивни колеги ги воделе како класифицирани, како и отсега тие информации да бидат јавни, освен ако не станува збор за информации што мора да останат заштитени по сила на закон.


Спасовски се сретна со претставници на УЕФА


Скопје, 10 јуни, 2017 - 16:33 (META) 

Министерот за внатрешни работи, Оливер Спасовски, денеска одржал работна средба со Жељко Павлица и со Франк Вијнвелд, претставниците на Европската фудбалска федерација (УЕФА), кои се вклучени во организацијата на претстојниот Супер куп на УЕФА, што треба да се одигра на 8 август во Скопје, помеѓу екипите на „Реал Мадрид“ и на „Манчестер јунајтед“.

Спасовски на претставниците на УЕФА им соопштил дека сите капацитети на МВР ќе бидат ставени на располагање за успешна организација на овој настан.

Претставниците на УЕФА го нагласиле огромното значење на МВР за организација на овој натпревар.