!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

МНР: Нема повредени македонски државјани во инцидентите во Каталонија


Скопје, 1 октомври, 2017 - 16:52 (META) 

Македонското министерство за надворешни работи (МНР) до попладнево нема информации за повредени граѓани во судирите во Каталонија, каде се одржува референдум за независност, кој шпанската влада го прогласи за нелегален.

Како што соопшти МНР преку својот твитер-профил, досега ниту еден македонски државјанин не побарал помош од македонската амбасада во Шпанија. МНР е во редовен контакт со амбасадата, а сите македонски граѓани на кои им е потребна помош, може да се јават на телефонскиот број +34639255299.

Според неофицијални информации, во Шпанија има околу 1.000 македонски државјани кои престојуваат туристички или работат. Во Шпанија живеат и повеќе илјади бугарски државјани, а со оглед дека одреден број Македонци имаат бугарски пасош, можно е некои од нив при влез во земјата да го употребиле тој пасош.


Жестоки судири и десетици уапсени на неонацистички собир во Гетеборг


Гетеборг, 30 септември, 2017 - 19:37 (META) 

Неонацистички собир во Гетеборг, вториот по големина град во Шведска, заврши со тепачки меѓу учесниците и контрадемонстрантите со антифашистички убедувања, а полицијата уапси десетици лица.

Движењето Нордиски отпор (НМР) организираше марш по улиците на Гетеборг, при што полицијата интервенираше и дојде до пресметка кога учесниците се обиделе да излезат од најавената маршрута. Уапсени биле десетици лица, меѓу кои и водачот на движењето, но и контрадемонстранти, јавуваат шведските медиуми.
Долж маршрутата по која се движеле неколкуте стотици неонацисти биле неколкупати побројните антифашисти. Судирот со нив почнал кога учесниците во маршот почнале да ги гаѓаат со камења.

НМР, чие дејствување не е забрането во Шведска, се нарекува „национал-социјалистичко“, што е идеологијата на нацистите во Германија пред и во текот на Втората светска војна.


Еден загинат и 19 повредени во насилствата на протестот на ултрадесничарите во Вирџинија


Шарлотсвил, 13 август, 2017 - 10:48 (META) 

Најмалку едно лице загинало, а 19 се повредени во насилствата меѓу белите националисти и контра-демонстрантите што се случија синоќа во градот Шарлотсвил, во американската сојузна држава Вирџинија, јавуваат светските медиуми.

Од засега непознати причини вечера се урнал и хеликоптер на полицијата во Вирџинија, ангажиран за надгледување на судирите, при што загинале двајца полицајци.

Загината жена и повредените лица настрадале во моментот кога автомобил влета во група демонстранти, кои протестираа против маршот на ултрадесничарите. Дваесетгодишниот Џејмс Филдс од Охајо, кој е осомничен дека го управувал автомобилот, е притворен под сомнение за убиство од втор степен. Федералното истражно биро (ФБИ), како што пренесува „Би-би-си“, отворило истрага за случајот.

Неколку илјади бели расисти, неофашисти и други ултрадесничарски групи од сите делови на САД вчера се собраа во Шарлотсвил бесни поради одлуката на градските власти да се отстрани споменикот на генералот на конфедерацијата од американската граѓанска војна (1861 – 1865), Роберт Ли.

Американскиот претседател, Доналд Трамп ги повика граѓаните на САД да ја надминат омразата и нетрпеливоста и да спречат вакви насилни протести.

„Сите мораме да се обединиме против омразата. Во Амарика нема место за вакво насилство. Да бидеме сите како едно“, напиша Трамп на својот твитер-профил.

Гувернерот на Вирџинија, Тери Меколиф изјавил дека има само една порака до белите националисти кои донесоа хаос во Шарлотсвил – „да си заминат дома“.


Насилни судири во бегалски камп на Хиос


Атина, 23 март, 2017 - 12:03 (META) 

Насилни судири се случуваа ноќеска во бегалскиот камп Суда на островот Хиос во Грција. Според локалната информативна веб-страница „Политис Хиос“, група бегалци од Авганистан и од Алжир вчера вечерта се судриле физички, создавајќи нов хаос и немири за сите бегалци и мигранти во Суда.

Инцидентите почнале кога група бегалци од Авганистан од друг камп на Хиос влегле во Суда и почнале да напаѓаат бегалци од Алжир. Во судирите се напаѓале со дрва и со камења, создавајќи огромен инцидент во кампот, кој почнал да заличува на воено поле.

Инцидентите траеле околу половина час, а судирите се смириле по интервенција од грчката полиција. Во инцидентите се повредени жена и дете, а приведени биле три лица што учествувале во судирите.

Нетолеранцијата на бегалците по етничка основа често е причина за судири и за инциденти во бегалските кампови.

На островот Хиос има околу 4.000 бегалци, а вкупно на грчките острови има повеќе од 14.000 бегалци. Последниве денови се забележува зголемување на бројот на бегалците на островите. Според информациите од грчката влада, до утрово на островите пристигнале 118 нови лица.


Столтенберг: Тензиите на Западен Балкан мора да се намалат за да се избегнат судири


Белград, 12 февруари, 2017 - 14:41 (META) 

Генералниот секретар на НАТО, Јенс Столтенберг во интервју за српската новинска агенција „Бета“ оценува дека е неопходно да се намалат актуелните тензии во регионот на Западен Балкан за да не дојде до инциденти и судири. Тој нагласува дека НАТО го остварува својот дел од „изградбата на безбедноста со регионалните партнери“.

„НАТО го цени партнерството со Србија и јас сум горд на своите силни пријателски врски со вашата земја“, вели Столтенберг, нагласувајќи дека сака да ја продлабочи соработката со Србија, со почитување на нејзината неутралност.

Столтенберг истакнува дека НАТО силно го поддржува дијалогот меѓу Белград и Приштина и ги повикува сите страни да бидат воздржани и да учествуваат во дијалогот на конструктивен начин.

„Дијалогот меѓу Белград и Приштина е патот кон трајно решение на отворените прашања, со взаемно почитување и разбирање од страна на сите заедници“, вели генералниот секретар на НАТО.

Тој додава дека неодамнешните средби на високо ниво во рамките на дијалогот Белград – Приштина покажуваат дека Србија е посветена на изградбата на односи на соработка со Приштина и подобрување на безбедноста и стабилноста во целиот регион.

Столтенберг вели дека на властите во Приштина им предочил дека НАТО го поддржува трансформирањето на косовските безбедносни сили во рамките на постојниот мандат, и оти смета дека иднината на целиот Западен Балкан е во членството во Европската Унија и НАТО.


Околу 15.000 Курди во Стразбур побараа ослободување на Абдула Очалан


Стразбур, 11 февруари, 2017 - 17:04 (META) 

Околу 15.000 луѓе денеска се собраа во Стразбур на годишниот собир на Курдите во Европа, на кој демонстрантите побараа автономен статус за Курдистан и ослободување на нивниот лидер Абдула Очалан, јавуваат агенциите.

Полицијата во Стразбур навела дека на собирот имало меѓу 12 и 15 илјади луѓе. Демонстрантите во Стразбур пристигнале од Германија, како и од делови на Франција, Белгија и Луксембург.

Курдите што живеат во Европа веќе 18 години се собираат во Стразбур каде бараат ослободување на нивниот историски водач Абдула Очалан, кој се наоѓа во затвор во турција, како и решавање на статусот на Курдистан.

Генералниот конзулат на Турција во Стразбур побарал собирот да биде забранет со оценка дека тој претставува поддршка за терористите, бидејќи Анкара Работничката партија на Курдистан (ПКК) ја смета за терористичка организација.

По двегодишен прекин на огнот, судирите меѓу Кудрите и Турција продолжија во 2015 година, по прекинот на мировните преговори меѓу двете страни.


Инциденти и судири на Крит помеѓу грчки земјоделци и вработени на пристаништето


Ираклио, 10 декември, 2016 - 9:59 (META) 

Голема група грчки земјоделци се судрија со вработени на пристаништето на Крит, гневни поради еднонеделниот штрајк на вработените во поморските служби.

Поради штрајкот, веќе една недела нема ниту еден брод од и кон островите во Грција што создава големи проблеми за снабдувањето на островите, но и за земјоделските производи кои треба да се пренесат кон копно.

Групата земјоделци се собра на пристаништето уште рано вечерта со барање да се стави крај на штрајкот и нивните производи да се натоварат и да се пренесат кон Атина. Одбивањето да се прекине штрајкот предизвика насилни физички судири помеѓу двете страни.

Дел од земјоделците се обидоа да одврзат еден брод, почнаа да фрлаат со пиротехника кон бродот и вработените на пристаништето, кои, пак, за да ги избркаат земјоделците почнаа да ги прскаат со вода од бродот. Земјоделците запалија неколку билетарници и подметнаа пожар во канцелариите на една компанија за поморски превоз на пристаништето.

Штрајкот на бродовите создава големи проблеми и за снабдувањето со лекови и со медицински материјали за болниците на островите, но и за патниците и за туристите кои и во зимскиот период сакаат да ги посетат островите. Голем дел од островите почнуваат да пренесуваат од и кон Атина или меѓусебно производи преку помали бродови, бидејќи веќе има големи недостатоци од основни работи, како млечни производи.

Грчкото министерство за поморство апелира да се стави крај на штрајкот во најскоро време и се заканува дека во спротивно ќе пристапи кон присилнa мобилизација.

Вработените во поморскиот сектор се бунат против високите даноци на нивните приходи и лошите услови за работа во секторот.


Жестоки судири меѓу демонстрантите и полицијата на протестите во Атина


Атина, 7 декември, 2016 - 11:03 (META) 

Атина повторно преживеа сцени на насилни судири и хаос на вчерашните протести за одбележување на годишнината од убиството на младиот Александрос Григоропулос, кој беше жртва на полициско насилство. Полицијата уапси 25 и приведе 26 лица во немирите кои траеја со часови во центарот на градот и во бунтовната населба Ексархија.

Ексархија наликуваше на бојно поле. Демонстрантите напаѓаа со стотици молотови коктели, камења и со пиротехника, а полицијата одговараше со шок-бомби и со солзавец. Полициските мерки не помогнаа многу за да се смират немирите, па во анархистичкиот кварт до доцна во ноќта одекнуваа експлозии, а граѓаните се задушуваа во солзавец.

Во судирите е повреден еден полицаец, а причинета е голема материјална штета на личен имот и на приватни возила.

Пред судирите во центарот на градот имаше десетици протестни поворки со кои се одбележува сеќавањето на Григоропулос и на бунтот против полициското насилство.

Младиот Григоропулос загина од куршум на грчки полицаец пред осум години, по кавга во наслебата Ексархија. Неговото убиство предизвика интензивни тримесечни протести и демонстрации низ цела Грција и беше една од причините за падот на владата на Костас Караманлис.


Жестоки судири меѓу полицијата и анархистите во Атина


Атина, 18 ноември, 2016 - 9:11 (META) 

Полицијата уапси 13 лица и приведе петмина во синоќешните немири во Атина, на протестот за одбележувањето на годишнината од Политехнио, бунтот против воената хунта во 70-тите години на минатиот век. Атинската бунтовна населба Ексархија со часови наликуваше на воено поле поради постојаните судири меѓу групи анархисти и полицијата.

Анархистите со часови напаѓааа со молотови коктели, камења, па дури фрлаа и столови, а полицијата одговараше со солзавец и со шок-бомби. Цела вечер владееше хаос, на моменти ситуацијата изгледаше како да е надвор од контролата на полицијата, а дел од полициските припадници во еден момент дури и беа принудени да бегаат од група анархисти, кои ги бркаа низ улиците на Ексархија.

Анархистите, според информациите, еден ден претходно го окупирале просторот на Политехничкиот факултет, кој е симбол на бунтот против воената хунта и од каде со студентски протест почна бунтот во 1973 година, складирајќи ја целата своја „муниција“ и блокирајќи го просторот околу факултетот за полицијата да не може воопшто да им се приближи.

Доцна вечерта, за да стави крај на судирите, полицијата даде наредба новинарите и фоторепортерите да си заминат од просторот. Судирите завршија нешто пред 2 часот утрото по локално време. Во инцидентите е причинета голема материјална штета на просторот околу факултетот, а уништен е и дел од инвентарот од факултетот.

Освен во Атина, немири имаше и во Солун, Јанина и во Волос.


Судир меѓу турските и курдските сили долж турско-сириската граница


Анкара, 20 октомври, 2016 - 14:54 (META) 

Пет проектили се испукани од територија што ја контролира курдската милиција во Сирија на турската провинција Хатај, што предизвика возвратен напад на турската војска, соопшти армијата на Турција.

Во соопштението се наведува дека проектилите се испукани околу 5.50 часот наутро по локално време и оти нема жртви и причинета материјална штета во нападот, кој бил изведен во ненаселено подрачје.

Турската војска возврати, напаѓајќи позиции на курдската милиција во сириската провинција Арфин.

Турската воена авијација утринава извршила 26 воздушни напади на 18 позиции на курдските „Народни заштитни единици“ во Северна Сирија.