Прво рочиште за „Тортура“ – апсењето на Љубе Бошкоски


Скопје, 28 февруари, 2018 - 9:38 (META) 

Во Основен суд Скопје 1 денеска треба да се одржи првото рочиште од процесот „Тортура“, кој се однесува за апсењето на Љубе Бошкоски. Лидерот на „Обединети за Македонија“ и поранешен министер за внатрешни работи беше брутално уапсен пред камери на 6 јуни 2011 година, ден по предвремените парламентарни избори.

Во „Тортура” обинети се поранешниот прв човек на единицата „Алфи” Ивица Антевски – Пуки и уште петмина припадници на единицата. Специјалното јавно обвинителство ги гони за мачење и друго сурово, нечовечко или понижувачко постапување и казнување.

Во оваа постапка првообвинет беше поранешниот прв човек на УБК, Сашо Мијалков. Но, судот делумно го прифати обвинението на СЈО и според донесената одлука, ќе им се суди само на шетмината од единицата „Алфа”, но не и на поранешниот прв човек на УБК.

Предметот ќе го суди судијката Александра Ристеска.

Судијката Моника Бахчовановска претходно навела дека нема oснови на сомнение дека Мијалков, е поттикнувач на тортура против Бошкоски.


Рочиштето за „Сопот“ одложено – сведокот немал важечка лична карта


Скопје, 23 ноември, 2017 - 10:48 (META) 

Денешното рочиште за случајот „Сопот“ во Основен суд Скопје 1 беше одложено, откако судот не можеше да го утврди идентитетот на сведокот Рамадан Бајрами. Следното рочиште, како што кажа судијката Дијана Груевска-Илиевска, ќе се одржи на 20 декември.

Денешното рочиште требаше да почне со сведочењето на Бајрами, но кога тој требаше да се идентификува, покажа стара лична карта, со сини корици, издадена во 2002 година.

Тоа беше причина судијката со поротниците да се повлече на консултација, по што Илиевска рече дека судот не може да утврди идентификација и побара Бајрами на следното рочиште, на 20 декември, да дојде со важечка биометриска лична карта или со пасош.

Рамадани потоа објасни дека имал биометриски пасош, ама го оставил дома.

Предметот „Сопот“ се однесува на случајот од 2003 година кога двајца полски војници и еден македонски државјанин загинаа откако теренско возило на НАТО нагази мина. Во овој случај десет лица се осудени за тероризам, под обвинение дека ја подметнале експлозивната направа на локалниот пат Сушево – Сопот.

„Сопот“ беше повторно отворен годинава откако Основното јавно обвинителство за гонење организиран криминал и корупција во јули годинава му го предаде предметот на СЈО, затоа што во јавноста беа објавени разговори на владини функционери поврзани со овој случај.


СЈО: Судијката Бахчованска антидатирала одлука за отфрлање на „бомбите“ како доказ


Скопје, 1 ноември, 2017 - 14:14 (META) 

Специјалното јавно обвинителство поднело претставка до Советот за утврдување на факти и поведување постапка за утврдување одговорност за судија, против судијката Моника Бахчованска од скопскиот Кривичен суд. СЈО бара од Советот да ја испита работата на судијката Бахчованска поради наводи што укажуваат на нестручно и несовесно вршење на судиската функација.

Во претставката на СЈО се наведени околности кои укажуваат на тоа дека судијката Бахчованска го антидатирала решението со кое прислушуваните разговори се отфрлаат како доказ во постапката за случајот „Тифани“, во кој новинарката и уредничка на телевизиијата „Сител“ е обвинета за даночно затајување.

Според СЈО, Бахчованска решението за издвојување на „бомбите“ од доказниот материјал го донела на 11 септември оваа година, а во образложението на својата одлука се повикала на одлука на Апелацискиот суд Скопје околу користењето на прислушуваните разговори во случајот „Триста“, која второстепениот суд ја донел на 18 септември, односно седум дена подоцна.

Решението на Бахчованска за „Тифани“, СЈО го добило на 5 октомври.

„Оттука, произлегува дека судијата Бахчовановска посочила решение што во моментот на донесување на одлуката сè уште не е дел од правниот поредок на Република Македонија, односно не е воопшто донесено според временскиот момент. Се поставува прашањето како судијата Бахчовановска можела да ја знае содржината на одлуката на Апелацискиот суд Скопје седум дена пред истиот да одлучи. Тоа упатува дека решението на судијата Моника Бахчовановска од 11 септември 2017 година, всушност, е антидатирано решение, односно не е донесено на наведениот датум, туку на некој подоцнежен датум, што, пак, понатаму упатува на заклучок дека судијата Бахчовановска при носењето на наведената одлука постапувала несовесно“, стои во претставката на СЈО до Советот за утврдување на факти.

Од СЈО наведуваат дека „временскиот момент на носење на судските одлуки е исклучително значаен, бидејќи тоа е моментот од кој одредена судска одлука почнува да опстојува како таква во правниот поредок и стекнува одредена правна сила, односно произведува одредено правно дејство“, поради што е недозволива каква било манипулација.


Еден притворен за оштетувања на возилата на судијката и обвинителот во Охрид


Охрид, 4 април, 2017 - 12:08 (META) 

Во Охрид е притворено едно лице под сомнение дека ги оштетило возилата на охридската судијка Билјана Белеска – Пројкоска и на обвинителот Никола Довлев, дознава „Мета“ од извори во полицијата. Исто така, притворениот се доведува во врска и со двојното убиство во охридски ресторан во 2014 година.

Лицето било повикано во СВР Охрид во саботата, а вчера му е одреден притвор од 30 дена.

Возилото на судијката Белеска беше демолирано ноќта спроти 6 март годинава, во близина на нејзиниот дом на улицата „АСНОМ“ во Охрид. Искршени беа двете ветробрански стакла и двете стакла од совозачката страна на возилото, а на него не беше оставена никаква порака.

Истрагата на полицијата се обидувала да утврди дали се работи за обично разбојништво или случајот има поврзаност со работата на судијката, која работи како кривичар во Основниот суд во Охрид.

Според изворите на „Мета“, претходно имало провална кражба во домот на судијката.

Изворите од истрагата исто така потврдија дека притворањето на лицето се доведува во врска со судењето за двојното убиство што се случи во угостителскиот објект „Император“ во Охрид, во август 2014 година. Извршителот беше осуден на доживотна казна затвор од Основниот суд во Охрид за убиство на сопственикот на ресторанот и уште едно лице.

Судењето беше повторно спроведено на барање на Апелацискиот суд од Битола, но Судот во Охрид ја повтори одлуката за казна доживотен затвор.


Демолиран автомобилот на судијка од Основниот суд во Охрид


Охрид, 6 март, 2017 - 16:23 (META) 

Непознати сторители синоќа оштетиле возило во сопственост на судијката Билјана Белеска-Пројкоска, вработена во охридскиот Основен суд, која работи на предмети од областа на кривичното право.

Настанот, кој се случил на улицата АСНОМ во Охрид, во близина на домот на судијката, бил пријавен во СВР Охрид.

– Искршени се стаклата од возилото. Се работи на откривање на сторителите и на расчистување на настанот – информираат од СВР Охрид.

Сторителите ги искршиле двете ветробрански и двете стакла од совозачката страна. На возилото немало оставено никаква порака.


„Пуч“ пак одложен, Јанева и судијката се скараа


Скопје, 1 ноември, 2016 - 11:11 (META) 

Жестока расправија меѓу специјалната јавна обвинителка, Катица Јанева, и судијката Љубинка Башевска ја вжешти атмосферата на денешното рочиште од случајот „Пуч“, кое повторно е одложено, овојпат на неопределено време. Причина за кавгата и за реакцијата на Јанева беше назначувањето на две нови судијки поротници, кои немаат безбедносен сертификат поради што Башевска и го одложи рочиштето.

На почетокот од расправата, судијката соопшти дека судијката поротник Олга Крстевска била разрешена од должноста на нејзино барање, а за нов поротник била назначена Вања Штериова. Со одлука на Башевска, а на барање на членовите на Судечкиот совет, како негов дополнителен член е назначен уште еден судија поротник – Лилјана Ивановска. Токму овие две судијки поротнички, како што рече Башевска, немаат безбедносен сертификат и по ургенција на судот почната е постапка за негово издавање. Сепак, судијката рече дека не може да се знае до кога ќе трае процедурата за издавање на сертификатите и поради тоа го одложи судењето на недоредено време, а датумот кога тоа ќе се одржи ќе биде дополнително објавен.

На ова жестоко реагираше Јанева, која го извади својот безбедносен сертификат и побара тоа да го сторат и судијката Башевска и другите членови на Судечкиот совет. Ова судот го одби, а Јанева на висок тон ѝ се обрати на судијката, велејќи „На што личи ова. Не може да го одложувате судењето на неопределено време. Како не Ви е срам, цела година го одлагате предметот и ја манипулирате јавноста“.

Реагираше и обвинетиот Зоран Верушевски и адвокатот Филип Медарски, кои бараа од судијката да каже дали за денешното рочиште го повикала единствениот сведок во случајот (Никола Груевски н.з.).

Судијката Башевска неколкупати ги предупреди обвинетите и специјалната обвинителка дека ќе ги казни ако продолжат со нарушување на редот во судницата, а потоа ја напушти судницата во моментот кога за збор се јави лидерот на СДСМ, Зоран Заев, кој е еден од обвинетите во „Пуч“.

По завршувањето на денешното тензично рочиште, Заев изјави дека денеска судот покажал дека е на колена и дека наместо правни процеси, во него се водат политички процеси.

– Зошто судијката не назначила поротници кои имаат безбедносен сертификат и зошто не е повикан единствениот сведок на денешното рочиште? Ова што денеска го видовте потврдува дека македонското правосудство мора да биде променето оти во моментот тоа не постои. Но, за среќа, тоа ќе биде променето за 40 дена. Обврска на правосудството е да одговори на прашањата кој прислушувал и зошто – изјави Заев.

Одговарајќи на новинарско прашање, тој рече дека кога се јавил за збор во судот, сакал да ја праша судијката Башевска дали е свесна дека наместо правен води политички процес. Тој нагласи дека денешното одложување на судењето за „Пуч“ на неодредено време, јасно покажува дека судот ја остварува политичката агенда на Никола Груевски во пресрет на изборите.

Случајот „Пуч“ е еден од првите што Специјалното јавно обвинителство ги презеде во своја надлежност, но рочиштата со кои и официјално требаше да почне судењето досега повеќепати беа одложувани.

Претходното рочиште требаше да се одржи на 16 септември, но беше одложено бидејќи не беше присутен еден од судиите поротници.


Апелацискиот суд ја одби жалбата на СЈО за неизземањето на судијката од „Трезор“


Скопје, 14 октомври, 2016 - 17:11 (META) 

Апелацискиот суд Скопје ја одби жалбата на Специјалното јавно обвинителство (СЈО) против одлуката на претседателот на Основниот суд Скопје 1, Владимир Панчевски, кој не го прифати барањето за изземање на судијката на претходна постапка што треба да одлучува за мерките за претпазливост за тројца осомничени во случајот „Трезор“.

Специјалното јавно обвиниетелство бараше изземање на судијката поради сомнеж во нејзината непристраност. Поточно, деверот на судијката, односно братот на нејзиниот сопруг, работи за фирма која е во блиски деловни односи со фирмата „Финзи“.

„Апелацискиот суд ги ценел наводите во жалбата на СЈО, но ги одбил како неосновани и утврдил дека претседателот на првостепениот суд правилно постапил кога согласно одредбите од член 33, став 2 од Законот за кривична постапка, со образложено решение, го одбил барањето за изземање на судијата бидејќи не постојат околности што предизвикуваат сомневање за непристрасност на судијата за кој се бара изземање“, стои во соопштението од Кривичниот суд.

Минатата недела Апелацискиот суд ја отфрли и жалбата на СЈО против одлуката на Кривичниот суд да не му одреди притвор на еден од осомничените во „Трезор“.

СЈО на крајот на септември го презентираше случајот „Трезор, во кој осомничени се три раководни лица од Управата за безбедност и контраразузнавање (УБК) и едно лице од МВР.

Според СЈО, осомничените преку фирмата „Финзи“, со која во еден период управувал сега починатиот Коста Крпач, набавувале опрема за УБК и го оштетиле буџетот за 862.045 евра.


Судијката Габер-Дамјановска најквалификувана од македонските кандидати за ЕСЧП


Стразбур, 7 октомври, 2016 - 19:18 (META) 

Уставната судијка Наташа Габер-Дамјановска е најквалификувана од тројцата македонски кандидати за судија во Европскиот суд за човекови права (ЕСЧП) во Стразбур, пишува „Нова ТВ“.

Кандидатите од Македонија биле интервјуирани на 29 и на 30 септември, а Комитетот за избор на судии му предложил на Парламентарното собрание на Советот на Европа за судија од Македонија да ја избере Наташа Габер-Дамјановска.

За замена на судијката Мирјана Лазарова-Трајковска, чиј мандат во ЕСЧП истекува во јануари, Министерството за надворешни работи ги предложи јавниот обвинител Јован Илиевски, уставната судијка Наташа Габер-Дамјановска и амбасадорот на Република Македонија во Ватикан, Звонимир Јанкуловски.


Одбиени жалбите на СЈО за притворот во „Трезор“ и за судијката Петровска


Скопје, 7 октомври, 2016 - 17:13 (META) 

Кривичниот совет на Основниот суд Скопје 1 денеска ја одби жалбата на Специјалното јавно обвинителство и го потврди решението на судијата на претходна постапка да не му биде одреден притвор на еден од осомничените во случајот „Трезор“.

„Кривичниот совет при Основниот суд Скопје 1, постапувајќи по жалба на Јавното обвинителство за гонење кривични дела поврзани и кои произлегуваат од незаконското следење на комуникациите (СЈО) против решение на судија на претходна постапка при овој суд, денеска во присуство на странките, по барање на СЈО, одржа седница на која донесе решение со кое жалбата на СЈО се одбива како неоснована, а се потврдува решението на судија на претходна постапка, со кое не беше прифатен предлогот на СЈО за определување мерка притвор против едно лице опфатено со предметот на наведеното обвинителство во јавноста познат како „Трезор“, бидејќи не се основани наводите во предлогот на обвинителството“, стои во соопштението на судот.

До Кривичниот суд, информираат оттаму, денеска стигнало и решение со кое Апелацискиот суд ја одбил жалбата на СЈО на одлуката на претседателот на Основниот суд Скопје 1, Владимир Панчевски, да не го прифати барањето на Специјалното јавно обвинителство за изземање на судијката Лидија Петровска. Петровска треба да постапува по обвинението што СЈО го поднесе против седум лица кои се товарат за фалсификување служебна исправа, односно за уништување на документацијата поврзана со опремата од нелегалното прислушување.

„Апелацискиот суд ги ценел наводите во жалбата на СЈО, но ги одбил како неосновани и утврдил дека претседателот на првостепениот суд правилно постапил кога согласно одредбите од член 33, став 2 од Законот за кривична постапка (ЗКП), со образложено решение, го одбил барањето за изземање на судијата бидејќи не постојат околностите што предизвикуваат сомневање за непристрасност на судијата за кој се бара изземање“, велат од Кривичниот суд.


Панчевски го одби барањето на СЈО за изземање на судијката во „Трезор“


Скопје, 5 октомври, 2016 - 16:33 (META) 

Претседателот на Основниот суд Скопје 1, Владимир Панчевски, го одби како неосновано барањето на Специјалното јавно обвинителство (СЈО) за изземање на судијката на претходна постапка што треба да одлучува по предлогот на СЈО за одредување мерки на претпазливост за тројца осомничени во случајот „Трезор“.

Специјалното јавно обвинителство бараше изземање на судијката поради околности што упатуваат на сомнеж во нејзината непристраност. Поточно, деверот на судијката, односно братот на нејзиниот сопруг, работи за фирма која е во блиски деловни односи со фирмата „Финзи“.

„Постапувајќи по барањето на Јавното обвинителство за гонење кривични дела поврзани и кои произлегуваат од незаконското следење на комуникациите (СЈО) за изземање на судија на претходна постапка кој треба да одлучува по предлог на истото обвинителството за определување мерки за претпазливост против три лица опфатени во предметот на СЈО познат како „Трезор“, претседателот на Основниот суд Скопје 1 – Скопје, донесе решение со кое барањето се одбива бидејќи не се основани причините за изземање на судија кои СЈО ги навело во своето барање“, стои во соопштението од судот.

Бидејќи станува збор за изземање на судија на претходна постапка, СЈО има право на жалба во рок од три дена до Апелацискиот суд.

Од Кривичниот суд додаваат дека жалбата на СЈО против одлуката на судијата на претходна постапка кој го одби барањето за одредување на притвор на еден од осомничените во „Трезор“ е доставена до страките во постапката и веднаш штом ќе бидат комплетирани списите за предметот, тој ќе биде даден на Кривичниот совет, кој треба да одлучува.

Засега нема информација од судот кога ќе биде одлучувано по барањето на СЈО за замрзнување на сметката на фирмата „Финзи“.