СДСМ: Мицкоски ја потврдува поврзаноста на ВМРО-ДПМНЕ со насилството од 27 април


Скопје, 10 декември, 2018 - 10:36 (META) 

За владејачката СДСМ е неприфатливо барање на Христијан Мицкоски да се формира независно тело кое ќе ги преслуша снимките на судиите и обвинителите во изминатите две години.

„Мицкоски ги потврдува сведоштвата за сериозна поврзаност на насилниците со ВМРО-ДПМНЕ во организацијата и координацијата на насилството од 27 април. Преку нелогични, несериозни и неосновани барања, интерпелации, измислици, Мицкоски се обидува да ги закочи реформите, да ги блокира процесите за интеграција на Македонија во НАТО и ЕУ. Не му беа доволни 11 години прислушување на Мицкоски па бара нови снимки да преслушувале „експертите“ од ВМРО-ДПМНЕ, одговори вчера СДСМ.

Мицкоски своите вкупно шест барања ги упати вчера од Кочани, каде ВМРО-ДПМНЕ одржа протест.

„Веднаш да се формира независно тело предводено човек предложен од опозицијата, коешто ќе ги преслуша, анализира, систематизира сите материјали коишто се собрани  изминативе две години како резултат на црниот Вотергејт на Заев, односно прислушувањето на сите судии и обвинители. Да ги видиме нарачаните пресуди  за поткуп, да ја видиме нарачаната пресуда за „Глобал“ , да видиме како нарачувате обвиненија за луѓето од 27 Април, да видиме како нарачувате обвиненија за ВМРО-ДПМНЕ, побара претседателот на ВМРО-ДПМНЕ од Кочани.

Тој рече дека после секој протест ќе има нови барања и побара оставки од министрите Спасовски и Димитров.

– Итна и неотповиклива оставка на министерот којшто својата нација ја нарече искомплексирана нација. Министерот кој благодарение на ова нација која го полни буџетот зема плата, ужива во привилегиите да се школува неговото семејство надвор од Република Македонија со стипендиите кој овој народ ги обезбедил. Итна и неотповиклива оставка на министерот за терор и прогон т.е. полиција, Оливер Спасовски затоа што откако е министер само порази шпиунски акции, претреси и омаловажувања на нашите браќа и сестри, граѓани на Република Македонија – рече Мицкоски.

Тој побара веднаш да сопре иницијативата од Владата за покачување на даноците „и да престане осиромашувањето на бизнисот и на граѓаните.“ Побара и соодветни мерки за решавање на проблемот со загадувањето на воздухот.

– Ги лажевте граѓаните испентарени на падините на преубавото Водно и велевте само да падне режимот и ќе започне да дува алпски воздух. Овде во Кочани им велевте на луѓето најзагаден град сте, многу скара вртите па затоа ви е загаден градот – рече Мицкоски, кој исто така побара „почитувања на јасно изразената волја на народот на референдум“.


Спасовски: Груевски последен пат користел обезбедување во четвртокот


Скопје, 13 ноември, 2018 - 11:48 (META) 

Во четвртокот Никола Груевски последен пат го повикал  обезбедувањето кое му следува како поранешен премиер на земјата, рече денеска министерот за внатрешни работи Оливер Спасовски.

Тој појасни дека иако на Груевски му следува обезбедување, екипата доаѓа на повик, а не е постојано со него.

– Според изјавите на обезбедувањето, последен пат тие го обезбедувале на 8 ноември кога го однеле до дома околу 23 часот – објасни Спасовски.

Тој изјави и дека не се чувствува виновен за бегството на поранешниот премиер и не размислува за оставка. Смета дека за тоа е одговорна судската власт.

– Одговорноста барајте ја кај судиите кои не одредиле мерка притвор за човек кој е осомничен за повеќе кривични дела – рече Спасовски, појаснувајќи дека полицијата работи врз основа на судски наредби.


Јанушев: Партиското СЈО и клиентелистичкиот суд незаконски го замрзнуваат имотот на ВМРО-ДПМНЕ


Скопје, 1 ноември, 2018 - 14:56 (META) 

Заев одлучи да го направи и последниот чекор и да го впрегне неговиот последен адут, партиското специјално јавно обвинителство и клиентелистички расположениот суд и да го замрзне имотот на ВМРО-ДПМНЕ, обвини на прес-конференција генералниот секретар на ВМРО-ДПМНЕ, Игор Јанушев, откако денеска по барање на Специјалното јавно обвинителство (СЈО), Основен суд Скопје 1 донесе решение со кое е изречена привремена мерка за обезбедување на имотот на најголемата опозициска партија.

– За прв пат во историјата на Република Македонија, но и за прв пат на европско тло се бара замрзнување на имот на политичка партија која што е во опозиција. Ова е демократијата и демократските принципи за кои што се залагаат Заев и СДСМ! Принципи со кои што однародената власт се обидува да го умртви секое поинакво размислување и да забрани секакво политичко делување кое се разликува и кое не се согласува со антидржавните политики на Заев и СДСМ. Барањето на СЈО и Одлуката на судиите Димишкова и Реџепагиќ се целосно неосновани и без никаква правна аргументација. Барањето на СЈО и одлуката на судиите се исклучиво, и исклучиво политички мотивирани. Повредени се и протоколите и праксата на Европската конвенција за човекови права и Европскиот суд за заштита на човекови права – рече Јанушев.

Тој нагласи дека замрзнувањето на имотот се направило иако партијата ВМРО-ДПМНЕ како правно лице воопшто не е осомничена во постапката. Тој потсети и дека на вакво барање Апелацискиот суд Скопје веќе еднаш решавал и го отфрлил барањето за замрзнување на партискиот имот.


Заев најави интензивирање на судските реформи


Скопје, 31 октомври, 2018 - 12:56 (META) 

На шестата седница на Советот за следење на имплементацијата на Стратегијата за реформи на правосудниот сектор на Владата, која се одржала синоќа, премиерот Зоран Заев како претседавач на Советот најавил интензивирање на реформите во правосудниот сектор.

Како што стои во соопштението од Владата, министерката за правда, Рената Дескоска, го презентирала добиеното мислење од Венециската комисија за новите предлог-закони за судовите и за Судскиот совет.

Дескоска потенцирала дека се работи за „прецизно трасирање на насоките во делот на измените со конкретни на одредени членови од законот“ и притоа го нагласила како главна тема на забелешките аспектот на разрешувањето на судиите.

Притоа министерката укажала дека Венециската комисија прави дистинкција помеѓу нестручност и несовесност во работата на судиите.


ОЈО Скопје ја отфрли пријавата против 10 судии за бегството на Грујевски и Бошковски


Скопје, 26 октомври, 2018 - 16:34 (META) 

Основното јавно обвинителство денеска соопшти дека ја отфрлило кривичната пријава поднесена од Здружението за истражување, развој и анализа „Зелена лупа“ против десет судии, со која тие се товареа за злоупотреба на службената положба и овластување.

„Зелена лупа“, чиј претседател е Ване Цветанов, поранешниот прв човек на Управата за спречување перење пари, поднесе кривични пријави за судиите што одлучувале за притвор за поранешните функционери на МВР, Горан Грујевски и Никола Бошковски, кои избегаа од земјава. Станува збор за тројца судии од Кривичен суд Скопје, тројца од Апелациски суд Скопје и четиримина од Врховен суд.

Здружението ги товареше првите тројца судии дека како членови на Советот на Основен суд Скопје 1 Скопје, во кривичната постапка против Грујевски и Бошковски, и покрај постоење докази за опасност од бегство, го одбиле предлогот за определување притвор на двајцата поранешни функционери во МВР.

Пријавените тројца судии од Апелацискиот суд Скопје, пак, според наводите во пријавата, како членови на Советот на второстепениот суд донеле решение со кое ја прифатиле жалбата на обвинителството и го преиначиле решението на Советот на Основен суд Скопје 1 Скопје спрема обвинетите, но во решението навеле дека против истото е дозволено право на жалба, која го одложува извршувањето.

Според пријавата, четиримината судии на Врховниот суд како членови на Советот на највисокиот суд во земјава одлучувале по жалбата на обвинетите, наместо да ја отфрлат како неоснована.

Основното јавно обвинителство ја отфрлило кривичната пријава на „Зелена лупа“ против десетте судии, бидејќи не утврдило злоупотреба на службената положба од страна на судиите, за кои смета дека постапиле согласно чл.11 ст.1 од Законот за судовите, кој пропишува дека судијата одлучува непристрасно со примена на законот врз основа на слободна оцена на доказите.

„Во донесените одлуки пријавените јасно ги образложиле причините за одлуката што ја донеле“, велат од Обвинителство.


Уставен суд ќе одлучува за референдумот


Скопје, 19 септември, 2018 - 9:56 (META) 

На денешната седница Уставниот суд треба да се произнесе за иницијативите за референдумот што ги поднесоа „Левица“ и  Светскиот македонски конгрес, со кои се бара поништување на одлуката за референдумот и времено да бидат стопирани активностите поврзани со него.

Подносителите сметаат дека одлуката за референдумот не е во согласност со Уставот, Законот за референдум и, како и со воспоставените европски стандарди и добри референдумски практики утврдени од страна на Венецијанската комисија. Бараат Уставниот суд целосно да ја поништи одлуката за референдум, а доколку одлуката ја донесе по референдумот, тогаш да ги поништи резултатите.

Судот може да ја прифати или отфрли иницијативата, или пак, да прогласи за ненадлежен. Известител е судијката Елена Гошева и, како што се дознава неофицијално, таа во рефератот предлага Уставниот суд да поведе постапка за преиспитување на уставноста на одлуката и воведување времени мерки, што значи прекинување на сите подготовки за спроведување на референдумот, активностите на ДИК, на Владата, на Собранието и целата кампања.

Министерот за надворешни работи Никола Димитров вчера порача оти е голема одговорноста во овој момент, кое било тело, дури и Уставниот суд клучот да го земе од рацете на граѓаните.

На прес-конференцијата со германскиот колега Хајко Мас, рече дека на ниво на аргументи има две тези. Првата е дека ни треба посебен задолжителен референдум за стапување во сојуз со други држави. Таа уставна одредба, како што појасни, се однесува кога се пренесува суверенитет.

– Точно е дека за членство во ЕУ ќе имаме една таква работа, но тоа нема да се случи утре, ќе поминат неколку години – нагласи Димитров.

Тој смета дека одредбата се однесува главно на стапување во сојуз со други држави во смисла на федерација или конфедерација. Вели дека за НАТО, која е меѓународна владина организација, таа одредба не е релевантна.


Кривичен суд одговори на обвинувањата од адвокатите и Катица Јанева


Скопје, 30 август, 2018 - 17:08 (META) 

Основниот суд Скопје 1, познат и како Кривичен суд, денеска одговори на обвинувањата од адвокатите на обвинетите во судските процеси во кои обвинението го застапува Специјалното јавно обвинителство (СЈО), но и на вчера кажаната критика од специјалната обвинителка Катица Јанева дека не се закажуваат доволно рочишта за овие предмети.

Адвокатите се бунеа дека многу често се закажуваат рочишта, а некои и се поклопуваат, па не може да учествуваат на сите судења. Така, на денешното судење на Гордана Јанкулоска во случајот „Тенк“, и двајцата нејзини адвокати, Боро Тасевски и Сања Алексиќ, не беа на почетокот на рочиштето, бидејќи биле на судењето за „Насилство во Општина Центар“.

– Или да се јави еден адвокат, или ќе ги казнам и двајцата со висока парична казна и ќе ви назначам бранител по службена должност – и рече судијката Добрила Кацарска на Јанкулоска.

Дваесетина минути подоцна адвокатите дојдоа во судницата.

И поранешниот премиер Никола Груевски не се појави во Апелацискиот суд, каде требаше да се разгледува неговата пресуда во случајот „Тенк“, оти и тој и адвокатите биле на судењето за „Насилство во Општина Центар“.

Од судот порачаа дека судиите ги почитуваат правата на странките, а распоредите се прават со многу напор, за да бидат усогласени јавните расправи.

„Ја информираме јавноста дека судиите при Основниот суд Скопје 1 – Скопје во целост ги почитуваат првата на странките како во овие така и во сите други предмети и со крајни напори се прават прецизни и усогласени распореди на закажаување на главните расправи се со цел да се овозможи доволно време на обвинетите и нивните бранители квалитетно да ја подготват својата одбрана, доследно да се почитува принципот на еднаквост на оружјата и правото на судење во разумен рок“, порачаа од судот.

Велат и дека е проблем тоа што обвинетите во случаите на СЈО им се суди во неколку процеси, па не може да се закажува јавна расправа во ист ден.

„Дополнителен проблем е што поголем дел од обвинетите имаат по двајца или повеќе бранители, па затоа при насрочување на расправите се внимава на судењето да биде присутен барем еден од бранителите кои ги застапуваат обвинетите“, велат од Судот.

Во однос на критиките од Јанева дека за одредени предмети на СЈО не се насрочуваат доволно расправи, од Кривичниот суд напоменуваат дека само во текот на септември 2018 година, од 20 работни дена, во 19 од нив се насрочени расправи за 16 различни предмети по кои постапува Специјалното јавно обвинителство, а воедно термините се усогласени како би се овозможиле доволно време на одбраната да се подготви.

Во соопштението се напоменува и дека во моментов во судот се постапува по 1.633 други предмети во одделението кривично – полнолетни, како  и 126 други предмети во одделот за организиран криминал и корупција, меѓу кои и предмети со над 30 обвинети од кои дел се во притвор, „и овие предмети не може да се занемарат за сметка на други“.


ГРЕКО: Македонија не напреднала во спречувањето корупција на пратениците и судиите


Стразбур, 9 август, 2018 - 12:07 (META) 

Во својот втор извештај за усогласеност, објавен денеска, ГРЕКО (Група на земји против корупцијата), организација што функционира во рамките на Советот на Европа порача дека „Поранешна југословенска република Македонија не направила суштински напредок во спроведување на препораките за спречување корупција меѓу пратениците, судиите и обвинителите.“

Извештајот за усогласеност е направен според Ситуацискиот извештај со дополнителни информации за спроведувањето на 19-те препораки доставен од македонските власти на 31 јануари годинава.

Нарекувајќи го постигнатото во оваа фаза „навистина разочарувачки“, антикорупциската група на Советот на Европа ги повикува властите да преземат порешителни и пофокусирани активности за спроведување на препораките издадени уште пред четири и пол години. ГРЕКО  констатира дека има многу ниска усогласено со препораките, односно нивото е „генерално незадоволнително“.

Поточно, само шест од вкупно 19 препораки се спроведени на задоволително ниво. Од останатите, шест се делумно спроведени, а пет останале неспроведени.

Во однос на пратениците, ниту една од препорачаните измени не е спроведена ниту делумно, со исклучок на донесувањето на Кодексот на однесување на пратениците, кое претходно беше во блокада од крајот на 2016 година.

Во однос на спречувањето корупција меѓу судиите и обвинителите, вториот извештај за усогласеност посочува дека е направен ограничен прогрес, посочувајќи на измените на Законот за Судскиот совет, донесени во декември минатата година и во мај годинава.

ГРЕКО напоменува дека се креираат нови советодавни и надзорни тела за судиите и обвинителите, како нивна поддршка во примената на правилата на постапување. Сепак, на ова антикорупциската група на Советот на Европа поподробно ќе се осврне откако ќе добие повеќе сознанија.

Што се однесува до анкетните листови, односно пријавувањето на имотот и конфликтите на интереси, ГРЕКО со жалење констатира дека не е направен значителен напредок за засилување на контролната функција, како и на политички понезависен пристап на Државната комисија за спречување на корупцијата.

Антикорупционерите од Советот на Европа го посочуваат и случајот поради кој речиси сите членови на Антикорупциска си поднесоа оставки.

Следниот извештај се очекува на 30 јуни 2019 година.


Обвинителството ги отфрли кривичните пријави на Тодор Петров против уставни судии


Скопје, 2 јули, 2018 - 15:54 (META) 

Основното јавно обвинителство (ОЈО) Скопје ги отфрлило кривичните пријави поднесени против судии од Уставниот суд од страна на Тодор Петров, претседател на Светскиот македонски конгрес (СМК). Петров ги товари судиите дека ја злоупотребиле службената положба и направиле самовластие со тоа што не постапиле по трите иницијативи што гој ги поднел, со кои барал поништување на законот за Специјалното јавно обвинителство, поништување на изборот на претседателот на Собранието Талат Џафери и поништување на Одлуката за стапување на Македонија во членство на Северноатланската Алијанса – НАТО.

„Надлежен јавен обвинител од Основното јавно обвинителство Скопје утврди дека нема основано сомнение дека осомничените ги сториле кривичните дела за кои беа пријавени, по што донесе Решение за отфрлање на кривичните пријави. Утврдено дека во Уставниот суд веднаш по приемот на иницијативите, а согласно на Деловникот за работа на Уставниот суд, се оформени предмети по кои во континуитет се преземани дејствија од судско-аналитички карактер, барани се податоци потребни за одлучување по предметот и вршено е споредбено истражување на нормативните решенија и  уставно судски одлуки. Проверена е и уставно-судската практика како елемент кој се зема предвид при одлучувањето на Уставниот суд“, соопштија од ОЈО Скопје.

Постапката по две иницијативи е во тек во Уставниот суд, додека за иницијативата за поништување на Одлуката за стапување на Република Македонија во членство на Северноатланската Алијанса – НАТО е одлучувано на седница на уставниот суд, при што е донесено Решение за неповедување на постапка за оценување на уставноста и законитоста.


Измените и дополнувањата на законите не ги исполнија очекувањата на судите


Скопје, 17 мај, 2018 - 14:50 (META) 

Последните измени и дополнувања на Законот за судовите и Законот за Судски совет, не ги исполнија очекувањата на судите за ефективно реформирање на овој сектор, особено измените и дополнувањата кои ги регулираат статусните прашања, односно дисциплинската одговорност на судиите и основите за разрешување.

Таков заклучок донел Управниот одбор на Здружението на судии (ЗСРМ) на својата последна седница одржана завчера. Тој смета дека измените не се во корелација со Стратегијата за реформа на правосудниот сектор за период 2017 – 2022 година и изразената определба за реален инклузивен пристап на судиите во овој процес.

Од здружението ги повикуваат Владата и опозицијата да преземат законодавни активности кои во прв план ќе ги стават интересите на судиите, притоа креирајќи стабилни  решенија кои ќе ја гарантираат судската независност и самостојност.