Денеска ќе се протестира пред Основен суд 1 за поддршка на Савески и на Куновски


Скопје, 10 јуни, 2016 - 9:22 (META) 

„Шарената револуција“ денеска, во 9.45 часот, пред Основниот суд 1 ќе им даде поддршка на притворените демонстранти, членовите на Левица, Здравко Савески и Владимир Куновски, чие судење е закажано за денеска, а беше одложено трипати.

„45 дена нашите соборци Здравко и Владимир се неправедно во куќен притвор. 45 дена неправдата кон нив е неправда кон целото протестно движење. 45 дена правосудните органи се под жесток притисок од авторитарниот и корумпиран режим да носат одлуки на штета на демонстрантите“, се вели на страницата на „Фејсбук“ на „Шарената револуција“.

Савески и Куновски се обвинети за демолирање на канцеларијата на претседателот Ѓорге Иванов. Последното рочиште на 31 мај беше одложено, бидејќи одбраната не го имала добиено вештачењето поради што не можеле да ја подготват листата на докази.

Ослободување на демонстрантите од притвор е едно од барањата на „Шарената револуција“.


Британец силувал 200 деца, 22 пати осуден на доживотна робија


Лондон, 6 јуни, 2016 - 14:59 (META) 

На Британецот Ричард Хакл (30) му се досудени 22 казни доживотна робија откако призна дека е виновен за 71 дело поврзано со сексуално злоупотребување деца во Малезија.

Триесетгодишникот призна дека злоупотребувал деца на старост од шест месеци од 12 години во период од 2006 до 2014 година.

Судот во Лондон му досуди 22 пати да одлежи доживотна робија, а во затвор ќе мора да помине најмалку 23 години.

Се верува дека Хакл сексуално искористил 200 деца од сиромашни семејства во Куала Лумпур.

Тој се претставувал како христијански мисионер и првпат ја посетил Малезија кога имал 18 години.

Истражувачите кај него пронашле повеќе од 20.000 фотографии и видеоснимки на сексуални злоупотреби на деца кои Хакл ги дистрибуирал на педофили низ целиот свет.


Продолжува судењето за случајот „Диво Насеље“


Скопје, 6 јуни, 2016 - 9:13 (META) 

Денеска во 10 часот, во големата сала на Врховниот суд, треба да продолжи судскиот процес за настаните во Диво Насеље во Куманово од 9 и од 10 мај лани.

Претходното рочиште, кое беше закажано во вторник минатата недела, беше одложено бидејќи на новинарите и на адвокатите на обвинетите не им беше дозволено да влезат во салата на судот.

Истиот ден, Кривичниот и Врховниот суд преку соопштенија си ја префрлаа вината околу причините за одложувањето на рочиштето, како и за тоа кој е надлежен за организација на судскиот процес во големата сала на Врховниот суд.

Од Судскиот совет најавија дека ќе ги испитаат причините за одложувањето на рочиштето.

Големата сала на Врховниот суд со решенија на Владата му беше отстапена на Кривичниот суд за потребите на ова судење.

Според најавите, судскиот процес за случајот „Диво Насеље“ треба да почне од почеток, откако обвинителството го спои предметот „Молња“, во кој осум лица се обвинети за помагање и за давање логистика на кумановската група.

Во случајот „Диво Насеље“ се обвинети вкупно 29 лица, кои се товарат за тероризам и за терористичка организација.


Судскиот совет ќе ги испитува причините за одложувањето на судењето за „Диво Насеље“


Скопје, 1 јуни, 2016 - 12:00 (META) 

Судскиот совет денеска соопшти дека ќе ги испита причините за вчерашното одложување на рочиштето за случајот „Диво Насеље, кога на новинарите и на адвокатите на обвинетите не им беше дозволен влез во големата сала на Врховниот суд, во која требаше да се одржи судењето.

„Во согласност со својата законска надлежност да се грижи за угледот на судиите и да ја зајакнува довербата на граѓаните кон судството, Судскиот совет на Република Македонија ќе ги собере сите потребни информации преку усна и писмена комуникација со претседателите на Врховниот суд, Апелациониот суд Скопје, Основниот суд Скопје 1 Скопје и Основниот суд Скопје 2 Скопје, како и со други лица, ако е тоа потребно, со цел да ги утврди вистинските причини поради кои беше одложено судското рочиште“, стои во соопштението на Судскиот совет.

Оттаму велат дека се запознаени за тоа дека имало недоразбирање меѓу припадниците на судската полиција од Врховниот суд и Кривичниот суд.

„Потсетуваме дека доколку кое било лице вработено во овие судови постапило спротивно на законските обврски, спротивно на препораките од оперативниот план за физичко обезбедување на судскиот процес или на кој било друг начин неосновано придонело за одлагањето на рочиштето, ќе мора за тоа соодветно да одговара“, се додава во соопштението.

По одложувањето на рочиштето, од Кривичниот суд вчера соопштија дека Врховниот суд не ја испочитувал одлуката на Владата и планот за користење на големата сала во овој суд за протребите на судскиот процес за „Диво Насеље“.

Од Врховниот суд, пак преку соопштение одговорија дека тие немаат никаква надлежност во организацијата на судењата за овој случај.


Врховен суд: Немаме никаква надлежност во организацијата на судењето за „Диво Насеље“


Скопје, 31 мај, 2016 - 15:06 (META) 

Врховниот суд попладнево преку соопштениe информира дека, во врска со денешното одложување на рочиштето на судскиот процес за „Диво Насеље“, тие немаат никаква надлежност за организацијата.

„Заради вистинито и воедначено информирање на јавноста Ве известуваме дека Врховниот суд на Република Македонија и судската полиција на Врховниот суд на Република Македонија немаат никаква надлежност во однос на организацијата на ова судење кое се одржува во свечената сала на Врховниот суд, дадена на времено користење на Основниот суд Скопје 1 за период од 6 месеци, со одлука на Владата на Република Македонија. Ве информираме дека за сите Ваши прашања и нејаснотии треба да се обратите до Основниот суд Скопје 1 Скопје“, стои во соопштението на Врховниот суд.

Од Кривичниот суд претходно соопштија дека Врховниот суд не ја испочитувал одлуката на Владата и планот за користење на големата сала во овој суд за протребите на судски процес за случајот „Диво Насеље“.

Денешното рочиште за „Диво Насеље“ беше одложено откако на новинарите и на адвокактите на обвинетите не им беше дозволено да влезат во свечената сала на Врховниот суд.

Следното рочиште, како што соопшти обвинителката Вилма Русковска, по излегувањето од судот, е закажано за 6 јуни.


Поранешната мис на Турција осудена поради навреда кон Ердоган


Анкара, 31 мај, 2016 - 13:13 (META) 

Турскиот суд ја осуди поранешната мис на Турција, Мерве Бујуксарач на условна казна затвор од 14 месеци поради навреда на турскиот претседател Реџеп Таип Ердоган на социјалните мрежи.

Судот заклучи дека 27-годишната манекенка е виновна за навредување на државен претставник, а доколку го повтори престапот ќе мора да ja издржи казната.

Бујуксарач која во 2006 година беше избрана за мис на Турција, кратко е задржана во притвор затоа што на својот „Инстаграм“ профил во 2014 година објавила сатирична песна за која обвинителите оцениле дека е навредлива за Ердоган, кој во тоа време беше премиер.

Откако стана претседател во 2014 година, Ердоган поднесе приближно 2.000 тужби за клевета во согласност со законот кој претходно беше ретко користен, а забранува упатување на навреди кон претседателот.


Левица: Апелациониот суд да го укине куќниот притвор за Савески и Куновски


Скопје, 31 мај, 2016 - 11:21 (META) 

Партијата Левица денеска побара од Апелациониот суд да ја прифати нивната жалба и да ја укине мерката куќен притвор за членовите на партијата, Здравко Савески и Владимир Куновски.

– Савески и Куновски се држат во куќен притвор веќе 36 дена. Ние се сомневаме дека тие ќе бидат во куќен притвор максимални 60 дена. Ваквата мерка е престрога имајќи ги во предвид доказите со кои располага обвинителството и со оглед на фактот дека и Савески и Куновски немаат никакви прекршоци во минатото – изјави Бранимир Јовановиќ пред Основниот суд Скопје 1 пред почетокот на судењето на Савески и Куновски.

Јовановиќ рече дека според нивни информации, одлуката за куќен притвор е донесена под силни притисоци на претседателот на Основниот суд Скопје 1, Владимир Панчевски и обвинителката Снежана Бундалевска.

– Според нас станува збор за политичка, а не за правна одлука. Ова е со цел да се заплашат демонстрантите и да се запрат протестите – рече Јовановиќ.

Тој вели дека ова се случува во ситуација кога се врши голем притисок врз демонстрантите, кога тие се повикуваат на информативни разговори во полиција, а синоќа беше приведен и еден од нив.

– Иако нашето правосудство е такво какво што е, ние сепак веруваме дека постојат судии со личен и професионален интегритет кои ги почитуваат законите и правдата. Се надеваме дека ќе донесат праведна пресуда – рече Јовановиќ.


Одложено „Диво Насеље“, на новинарите и адвокатите не им беше дозволен влез во салата


Скопје, 31 мај, 2016 - 10:55 (META) 

Судскиот процес „Диво Насеље“ за настаните од 9 и 10 мај минатата година денеска повторно се одложи откако судската полиција на Врховниот суд не им дозволи на новинарите и адвокатите да влезат во зградата на судот каде требаше да се одржи рочиштето.

Од Врховниот суд немаше конкретно објаснување зошто на новинарите и адвокатите не им е дозволен влезот. Оттаму само кратко телефонски рекоа дека ова судење го води Кривичниот суд и судската полиција на овој суд треба да го организира спроводот на странките.

По шетање на новинарите од еден до друг влез на Врховниот суд тие останаа пред главниот влез, а во големата сала влегоа само обвинетите и двајцата обвинители.

По околу еден час обвинителите излегоа од судот, а обвинителката Вилма Русковска рече дека рочиштето е одложено бидејќи судската полиција не ги пуштилa адвокатите да влезат. Таа информираше дека рочиштето е презакажано за 6 јуни.

Адвокатот Мефаил Арслани изјави дека ќе бараат објаснување од претседателот на Основниот суд Скопје 1 зошто денеска не им било дозволено да влезат во Врховниот суд.

– Која е играта што ја играат ние не знаеме. Имаме одговор дека денешното рочиште е одложено бидејќи адвокатите не се во судницата, но нас не ни беше дозволено да влеземе во судницата. За ова ќе бараме одговор од претседателот на Основен суд Скопје 1 – изјави Арслани.


Поранешниот диктатор на Чад доби доживотна казна затвор


Дакар, 30 мај, 2016 - 17:55 (META) 

Судот во Сенегал го прогласи поранешниот диктатор на Чад, Хисен Хабре, за виновен за злосторства против човештвото и го осуди на доживотна казна затвор.

„Хисен Хабре овој суд го прогласува за виновен за злосторства против човештвото, силувања, присилно ропство и киднапирања“, се наведува во пресудата која ја прочита претседавачот со Специјалниот суд во Сенегал, Гбердао Гистав Кам.

Хабре е осуден за мачење и смрт на илјада политички противници во текот на своето осумгодишно владеење кое започна во 1982 година.

Со таа пресуда се стави крај на 16 годишната борба на жртвите и на борците за заштита на човековите права да го изведат поранешниот диктатор од Чад пред лицето на правдата во Сенегал каде тој пребега откако во 1990 година беше симнат од власт со државен удар.

Хабре судењето по обвинувањата за воени злосторства го нарече политички мотивирано.


ВМРО-ДПМНЕ ја поздрави одлуката на претседателот Ѓорге Иванов


Скопје, 27 мај, 2016 - 17:03 (META) 

ВМРО-ДПМНЕ ја поздрави одлуката на претседателот, Ѓорге Иванов да ја искористи можноста предвидена во Законот за изменување и дополнување на Законот за помилување.

„ВМРО-ДПМНЕ беше прва партија која јавно излезе со став дека одлуката за аболиција не е во согласност со нашите политики. ВМРО-ДПМНЕ прва предложи четворицата лидери на најголемите политички партии да упатат писмо до претседателот Иванов за да ја преиспита претходно донесената одлука. Цениме дека со денешниот чин се дава можност во правниот систем да се докаже целата конструкција на Зоран Заев против партиските членови и активисти на ВМРО-ДПМНЕ“, стои во соопштението од владејачката партија.