Одложено судењето на новинарот Зоран Божиновски


Скопје, 1 септември, 2016 - 12:34 (META) 

Кривичниот суд денеска го одложи рочиштето од судењето на новинарот Зоран Божиновски, обвинет во случајот „Шпион“, јавува „Нова ТВ“.

Судијката Александра Крстиќ посочи дека иако судот поднел барање до Апелацискиот да се достават сите доказни материјали поврзани со предметот, сè до почнување на денешното рочиште Апелацискиот суд не го направил тоа.

Судијката Крстиќ рече дека токму поради ова, донела наредба Божиновски воопшто да не биде донесен во судот, бидејќи, како што рече таа, нема услови за одржување на рочиштето.

Пред почетокот на судењето, новинарите протестираа пред Основен суд Скопје 1. Тие побараа поддршка на колегата Зоран Божиновски.

Претседателот на Здружението на новинарите, Насер Селмани, рече дека се дојдени да покажат солидарност со Божиновски, кој веќе три години е изложен на судски прогон поради неговата работа како новинар.

„Ги потсетуваме судиите дека Македонија е втора земја во Европа во која има новинар во затвор. Прво беше осуден Томислав Кежаровски, а сега и Божиновски. Гласно прашуваме кој ќе биде следниот. Во земјата каде што новинарите се затвораат, таму е заробена и слободата на говорот и слободата на медиумите. Таквите судски постапки имаат цел да ги казнуваат непослушните новинари и да ги застрашуваат и да ги дисциплинираат другите“, рече Селмани.

Во случајот „Шпион“, на  18 обвинети им се суди за злосторничко здружување, шпионажа и за уцена, опфатени се поранешни и сегашни разузнавачи од цивилното и од военото разузнавање, поранешни полициски службеници, ексдиректорот на Управата за борба против перење пари, поранешниот шеф на кабинетот на претседателот на Собранието на Република Македонија.

Меѓу нив е и новинарот Зоран Божиновски, кој се товари за три дела, но неговата постапка беше во прекин затоа што српските власти, кои го уапсија во 2013 година, не ѝ го испорачуваа на Македонија, сè до март годинава, кога во „брза“ постапка, за само еден ден, беше екстрадиран.


ЗНМ ги повика сите новинари да се приклучат на утрешниот протест


Скопје, 31 август, 2016 - 15:01 (META) 

Здружението на новинарите на Македонија (ЗНМ) ги повика сите новинари да се приклучат на протестот за проддршка на новинарот Зоран Божиновски, закажан за утре во 10 часот пред Основниот суд Скопје 1.

„Ги повикуваме сите новинари да се приклучат на протестот и заедно да му изразиме поддршка на колегата Божиновски. Во исто време, сакаме да го осудиме прогонот на новинари, кој во Македонија се заканува да стане практика. Нема дилема дека Божиновски стана предмет на кривичен прогон поради неговата работа како новинар и поради неговите објавени злоупотреби за власта. Тој е обвинет за тешки кривични дела затоа што власта преку злоупотреба на законите и на институциите сака да ги затскрие вистинските намери, да замолчи еден новинар, да ги дисциплинира и да ги заплашува другите и да спречи јавноста да ја дознае вистината за начинот на нејзиното владеење“, стои во соопштението од ЗНМ.

Утре, во 10.30 часот, во Основниот суд Скопје 1 треба да почне судскиот процес против Божиновски, кој се товари за шпионажа, злосторничко здружување и за уцена.

„Со ваквите судски процеси, власта се обидува да ги дискредитира и да ги девалвира сите новинари и сака да го наруши кредибилитетот на новинарската професија. Ваквиот прогон влијае негативно и на слободата на изразувањето и на слободата на медиумите. На Божиновски му треба нашата поддршка. Тој ја заслужува нашата солидарност!“, се додава во соопштението на ЗНМ.

Самостојниот синдикат на новинари и медиумски работници (ССНМ), Македонскиот институт за медиуми (МИМ) и Институтот за комуникациски студии (ИКС) денеска соопштија дека ќе го поддржат утрешниот протест на ЗНМ.


Македонец убил пријател додека правеле „селфи“ со сачмарка во Мелбурн


Мелбурн, 4 август, 2016 - 12:44 (META) 

Дваесетгодишен Македонец во Австралија го застрелал и го убил својот пријател додека позирале со сачмарка за да се сликаат, во мотел во градот Мелбурн, пренесуваат светските медиуми.

Настанот, како што пишува лондонски „Гардијан“, се случил на почетокот на март годинава, а вчера почнал судскиот процес во врска со случајот. На рочиштето, обвинетиот Македонец, Алберт Раповски, се изјаснил за виновен, а судот му го продолжил притворот до следното сослушување.

Според документите изнесени пред судот, Раповски и неколкумина негови пријатели, меѓу кои и 22-годишниот Махамд Хасан, на 5 март се собрале во соба на мотелот „Парксајд ин мотел“ каде донеле пушка – сачмарка и почнале да си играат со неа.

Хасан, наводно, му кажал на Раповски да го испразни оружјето за да не застрела некого. Според полицијата, Македонецот ја отворил пушката, а еден од неговите пријатели од неа извадил два патрони.

Раповски во еден момент ја вперил пушката во главата на Хасан додека тој се подготвувал да се слика себеси со мобилниот телефон. Македонецот го повлекол орозот и оружјето испукало директно во главата на неговиот пријател.

Раповски, според полицискиот извештај, почнал да плаче и да вреска, викајќи „Го застрелав Мо, го застрелав Мо“, а потоа побегнал од хотелот.

Телото на Хасан го открил сопственикот на мотелот. Следниот ден, како што пишува „Гардијан“, Раповски се обидел да избега во Македонија. Тој на свој пријател, кој работел како туристички агент, му рекол дека мора итно да замине во Македонија за да ја види својата баба, која, наводно, била болна.

Тој бил пресретнат од полицијата на аеродромот во Мелбурн на 6 март, каде е уапсен, а потоа и обвинет за убиство на својот пријател од средношколските денови.


Судењето за настаните во Диво Насеље ќе паузира еден месец


Скопје, 29 јули, 2016 - 13:23 (META) 

Судскиот процес за настаните во Диво Насеље, Кумановско, од 9 и од 10 мај минатата година, ќе има пауза од околу еден месец, а следното рочиште е закажно за 6 септември, велат за „Мета“ од Кривичниот суд.

И следното рочиште, како што информираат од судот, ќе биде затворено за јавноста и нема да им биде дозволено на новинарите да го следат, бидејќи сè уште не е завршено сослушувањето на заштитените сведоци, предложени од Обвинителството.

Од судот велат дека паузата е по договор меѓу адвокатите на одбраната и судечкиот совет, односно меѓу странките во постапката, и дека едномесечниот период нема да го наруши континуитетот на судењето. Според законските одредби, доколку 60 дена не се одржи ниту едно рочиште за одреден предмет, судењето треба да почне од почеток.

Инаку, последното рочиште за случајот „Диво Насеље“ пред паузата, се одржа вчера и како и претходните неколку беше затворено за јавност.

Од судот информираат дека и вчера дел од обвинетите се пожалиле на здравстевни проблеми и тврделе дека биле малтретирани, поради што била повикана и екипа на итна помош. Но, по прегледот на обвинетите, лекар констатирал дека тие можат да го следат рочиштето.

Судскиот процес против 29 обвинети во случајот „Диво Насеље“ почна на почетокот на февруари годинава. На почетокот на јуни, целиот процес почна одново откако обвинителството со овој случај го спои и предметот „Молња“, во кој осум лица се обвинети дека обезбедувале логистичка поддршка за кумановската група.

Во настаните во Куманово животите ги загубија осум припадници на специјалните полициски единици, а 37 беа ранети, додека во борбите со полицијата беа убиени 10 членови на вооружената група.


Кристин Лагард на судење поради несовесно работење


Париз, 22 јули, 2016 - 16:56 (META) 

Директорката на Меѓународниот монетарен фонд (ММФ), Кристин Лагард, ќе мора да се појави на судење во Франција бидејќи е обвинета за несовесно работење. Таа му исплатила надомест на францускиот бизнисмен Бернар Тапи 404 милиони евра, кога беше министерка за финансии.

Тапи одлучил да ги продаде сите свои акции во компанијата „Адидас Франс“ и за тоа ја овластил државната банка „Креди – Лионез“. Подоцна ја тужел банката дека го измамила, тврдејќи дека нереално и ниско ги проценила неговите акции.

Лагард се обвинува дека своеволно му ја исплатила разликата на Тапи од 404 милиони евра, не чекајќи ја одлуката на судот и разврската од процесот меѓу Тапи и банката.

Меѓународниот монетарен фонд (ММФ) во меѓувреме соопшти дека одлуката да ѝ се суди на Лагард не ја менува нејзината позиција прв човек на ММФ затоа што таа ја има целосната доверба на сите членови на извршниот одбор.

Кристин Лагард од јануари оваа година го почна својот втор петгодишен мандат како директорка на ММФ.


Денеска продолжува судењето за „Диво Насеље“, се сослушуваат заштитени сведоци


Скопје, 22 јули, 2016 - 10:45 (META) 

Денеска во големата сала на Врховниот суд продолжува главната расправа од судскиот процес за настаните во Диво Насеље, Кумановско, од 9 и од 10 мај минатата година. Денешното рочиште, како и неколуте претходни, е затворено за јавноста, односно на новинарите не им е дозволено присуство, бидејќи се сослушуваат заштитени сведоци, предложени од Обвинителството.

Следното рочиште, кое исто така ќе биде затворено за јавноста, како што информираат од Кривичниот суд, е закажано за 28 јули. По ова рочиште, според информациите, странките во процесот и судот треба да се договорат кога ќе продолжат со рочиштата од судскиот процес.

Судскиот процес против 29 обвинети во случајот „Диво Насеље“ почна на почетокот на февруари годинава. На почетокот на јуни, целиот процес почна одново откако обвинителството со овој случај го спои и предметот „Молња“, во кој осум лица се обвинети дека обезбедувале логистичка поддршка за кумановската група.

Во настаните во Куманово на 9 и на 10 мај минатата година животите ги загубија осум припадници на специјалните полициски единици, а 37 беа ранети, додека во борбите со полицијата беа убиени 10 членови на вооружената група.

Обвинетите во случајот се товарат за тероризам и за терористичка организација.


Поради болест на еден од обвинетите, одложено денешното рочиште за „Диво Насеље“


Скопје, 6 јули, 2016 - 14:22 (META) 

Рочиштето од судскиот процес за настаните во Диво Насеље во Куманово од 9 и од 10 мај минатата година, кое беше закажано за денеска, е одложено бидејќи еден од обвинетите не бил спроведен од прилепскиот затвор во судот.

Како што информираат од Кривичниот суд, обвинетиот не бил спроведен поради медицинската терапија што ја примал.

„Главната расправа за предметот со КОК бр. 127/15, поврзан со настаните од кумановско Диво Насеље, која беше закажана за денеска во 10 часот, со одлука на судечкиот совет се одложува бидејќи од затворот во Прилеп пристигнато е известување дека еден од обвинетите кој е опфатен во конкретниот предмет, од 3 јули 2016 година, по направени испитувања на здравствената состојба, препишана му е терапија и дадено е мислење од доктор дека лицето во следните седум дена, заради примање на конкретната терапија, нема да биде во можност да присуствува на судењето“, стои во соопштението на судот.

Оттаму додаваат дека главната расправа ќе продолжи на 14 јули.

Изминатите неколку рочишта од судењето за „Диво Насеље“ се одвиваат зад затворени врати, односно јавноста е исклучена од следењето на процесот бидејќи се сослушуваат заштитени сведоци, предложени од Обвинителството.


Апелација: Судењето за случајот „Пуч“ може да продолжи


Скопје, 15 јуни, 2016 - 17:00 (META) 

Лидерот на СДСМ, Зоран Заев, и поранешниот директор на Управата за безбедност и контраразузнавање (УБК), Зоран Верушевски, повторно ќе седнат на обвинителна клупа во случајот „Пуч“, откако Апелацискиот суд Скопје ја уважи нивната жалба на одлуката на Кривичниот суд за запирање на судската постапка, по аболицијата од страна претседателот Ѓорге Иванов од 12 април годинава.

Покрај Заев и Верушевски, кој е првообвинет, во случајот „Пуч“ обвинети се и неговата сопруга, Соња Верушевска, и Бранко Палифров, службеник во Општина Струмица.

Апелацискиот суд утврдил дека жалбата на обвинетите е основана и дека по поништувањето на аболицијата нема никакви правни пречки предметот да се врати на натамошно судење во Кривичниот суд.

„Апелацискиот суд Скопје до Основниот суд Скопје 1 достави решение со кое жалбата на обвинетите З.В., С.В., З.З. и Б.П., кои се дел од предметот КОК бр. 77 /15 ,во јавноста познат како „Пуч“, изјавена преку нивниот бранител, против решението на судијата за запирање на постапката за конкретниот предмет, се уважува и предметот се враќа на понатамошно постапување. Второстепениот суд утврдил дека Кривичниот суд не ги повредил одредбите од кривичното материјално и процесно право кога донел решение за запирање на постапката за конкретниот предмет бидејќи во времето на донесување на решението во правниот поредок егзистирала одлуката на претседателот на Република Македонија за помилување – ослободување од понатамошно гонење без спроведување постапка за обвинетите. Но, имајќи предвид дека со повлекување на аболицијата, односно одлуката на претседателот на Република Македонија за помилување – ослободување од понатамошно гонење, се поништуваат и правните последици кои настанале со донесување на одлуката и се воспоставуаат правните односи и состојби што постоеле пред донесување на овој акт, второстепениот суд постапувајќи по службена должност утврдил дека жалбата е основана и предметот се враќа на понатамошно постапување во првостепениот суд“, стои во соопштението на Основниот суд Скопје 1 за одлуката на Апелацискиот суд.

Предлог за укинување на решението на Кривичниот суд за запирање на кривичната постапка за случајот „Пуч“, со барање таа да продолжи понатаму, до Апелацискиот суд Скопје достави и Специјалното јавно обвинителство, во чија надлежност е овој предмет.

Четворицата обвинети во „Пуч“ се товарат за шпионажа, насилство врз преставници на највисоките државни органи, неовластено прислушување и за тонско снимање.


Обвинет во „Диво Насеље“: Специјалци ме удираа и ме газеа


Скопје, 14 јуни, 2016 - 11:31 (META) 

На денешното рочиште за случајот „Диво Насеље“ се читаа исказите на сведоците дадени пред спојувањето на предметот „Молња“ со овој случај. Пред почетокот на рочиштето, еден од обвинетите се пожали дека бил малтретиран од припадници на специјалните единици.

– Ме газеа и ме удираа од специјалната единица и шест пати ми ги креваа рацете одзади – рече обвинетиот.

Судијаката Верка Петковска му одговори дека ќе му се јави на директорот на затворот, каде обвинетиот издржува притвор.

Рочиштето сè уште трае и се читаат исказите. Ако денеска заврши судот со читањето на исказите, според најавите, следното рочиште треба да биде затворено за јавност, бидејќи ќе продолжи сослушувањето на заштитените сведоци.


Продолжува судскиот процес за Диво Насеље


Скопје, 14 јуни, 2016 - 9:40 (META) 

Во свечената сала на Врховниот суд денеска продолжува судскиот процес за Диво Насеље. Во овој предмет им се суди на 37 обвинети за тероризам и за логистичка поддршка на оваа терористичка група.

Лани на 9 и на 10 мај во кумановско Диво Насеље вооружена група се судри со безбедносните сили. Во престрелката загинаа осум полицајци од специјалните и од посебните единици на МВР, додека четириесетина беа тешко повредени.