Апелација го врати случајот за малиот Алмир на повторно судење


Скопје, 8 јануари, 2019 - 11:12 (META) 

Кривичниот совет на Апелацискиот суд Скопје го поништил предметот во случајот на смртта на четиригодишниот кумановец Алмир Алиу и го вратил на повторно судење, потврди за „Порталб.мк“, адвокатот Асмир Алиспахиќ.

Адвокатите сè уште не ја знаат причината за укинување на случајот, бидејќи се уште не ја добиле одлуката.

– Сè уште ја немаме добиено одлуката од Апелацискиот суд за да видиме зошто судењето е поништено. Бидејќи предметот се враќа во Основниот суд во Куманово, Судот е должен да закаже седница за главната расправа – вели Алиспахиќ за „Порталб.мк“.

Според законските одредби, објаснува адвокатот Алиспахиќ, определениот притвор за првообвинетиот, Бобан Илиќ, во моментот кога е укинат случајот, се укинува и притворот за истиот, што значи дека Илиќ ќе се брани во слобода, но ќе има мерки за претпазливост.

Во јули 2016 година Алмир, беше прегазен со возило од Илиќ, бидејќи претходно таткото на детето и Илиќ имале банална караница во амбуланта.

Првично, Илиќ се гонеше за убиство со умисла, но истото потоа беше преквалификувано од страна на обвинителството, и го гонеа за кривичното дело „тешки кривични дела против безбедноста на луѓето и имотот во сообраќајот“.

Во јавноста имаше жестоки реакции, беа организирани масовни протести од страна на граѓаните кои го осудија чинот на обвинителството, поради преквалификација на предметот.

Во текот на судењето имаше реакции во врска со фактот дека во текот на постапката биле направени пропусти, за докази се земени невропсихијатриски вештачење на експерти со лиценци со истекнат рок.


16 граѓански организации побараa итно да се повлечат измените на Кривичниот законик


Скопје, 28 декември, 2018 - 15:46 (META) 

Вкупно 16 граѓански организации денеска од претседателот на Собранието и од пратениците-предлагачи, побараа итно да го повлечат Предлогот на закон за изменување и дополнување на Кривичниот законик, по скратена постапка. Тие сметаат дека со промената во членовите на Кривичниот законик, ќе им се овозможи во предметите кои ги води СЈО да се изречат помали казни или делата да застарат и со тоа да не се одговара за криминалот.

„Ние, долупотпишаните граѓански организации, бараме веднаш да го повлечете од дневен ред Предлогот на законот за изменување и дополнување на Кривичниот законик, по скратена постапка, доставен од пратениците Артан Груби, Снежана Калеска Ванчева, Соња Мираковска, Лидија Тасевска, Весел Мемеди и Реџеп Мемеди“, се вели во барањето на 16-те граѓански организации.

Тие велат дека преку повлекување на овој предлог-закон, пратениците ќе спречат можност некој да не понесе одговорност за сторениот криминал за кој СЈО води судски или истражни и предистражни постапки. Инаквото постапување ќе значи и продолжување на заробувањето на државата, порачаа организациите.

„Инсистираме на повлекување на предлогот, поради промената во членовите на Кривичниот законик, со кои ќе им се овозможи во предметите кои ги води СЈО да се изречат помали казни или делата да застарат и со тоа да не се одговара за криминалот. Неприфатливо е да се менува Кривичниот законик и кој било друг закон за да се избегне правдата и да се продолжи со заробување на државата од политичките партии. На овој начин се амнестираат криминалот и корупцијата, и продолжува неказнивоста“, се вели во прогласот.

– Итно повлекување на точката за промена на Кривичниот законик со којшто сметаме дека ќе овозможат најголем број од обвинетите во предмети на специјалното јавно обвинителство да имаат намалени казни или нивните обвиненија да застарат. Тој факт нè вознемирува многу. Се боревме за правда за да има мир. Нè вознемируваат овие измени, сметаме дека ова е неприфатливо за да се прават промени на закони за да се оневозможи правдата – рече Фани Каранфилова-Пановска од Фондација „Отворено општество“.

Зад барањето за повлекување на законот застанаа Фондација Отворено општество – Македонија, Фондација за интернет и општество „Метаморфозис“, НВО Инфоцентар Центар за европски стратегии, Евротинк Форум – ЦСИД,  Коалиција „Сите за правично судење“, Институт за демократија „Социетас цивилис“ Скопје, Хелсиншки комитет за човекови права на Република Македонија, Македонско здружение на млади правници, Агора – Центар за промовирање на граѓански вредности Скопје, ЦИВИЛ – Центар за слобода, Kоалиција МАРГИНИ, Центар за современи уметности и Институтот за европска политика – Скопје и Институт за човекови права.


Чавков не поднел барање за амнестија, смета дека е невин


Скопје, 26 декември, 2018 - 11:36 (META) 

Митко Чавков, поранешниот министер за внатрешни работи и директор на Бирото за јавна безбедност во времето на упадот и насилството во Собранието на 27 април 2017 година, не поднел барање за амнестија, според новиот закон. Рокот за ваквите барања истече вчера.

Информацијата ја кажа утрово адвокатот Сашко Дукоски, бранител на Чавков, пред денешното рочиште за упадот во Собранието.

Според Дукоски, Чавков сака да докаже пред судот дека не е виновен и, според него, Законот за амнестија е донесен и составен наменски за одредени луѓе кои се обвинети во случајот за „крвавиот четврток“.


Нинџа: Сè беше под контрола на УБК и паравоениот штаб на ВМРО-ДПМНЕ


Скопје, 6 декември, 2018 - 14:03 (META) 

Упадот во Собранието на 27 април беше командуван од паравоениот штаб на ВМРО-ДПМНЕ. „За заедничка Македонија“  беше формирана од ВМРО-ДПМНЕ и имаше фиктивни водачи. На протестите на „За заедничка Македонија“ 80 отсто беа од ВМРО-ДПМНЕ, која ги даваше сите реквизити што се користеа. Сите водачи на протестите ги имам гледано во штабот на ВМРО-ДПМНЕ кај Кирил Божиновски, рече обвинетиот Александар Василевски  – Нинџа во својот денешен исказ пред судот во врска со настаните во Собранието на 27 април минатата годинa.

Тој рече дека бил ангажиран во Управата за безбедност и контраразузнавање (УБК) од Горан Грујевски, а потоа му бил „очи и уши“ на Никола Бошкоски. Обајцата сега се избегани во Грција.

– Сите водачи на протестите ги имам гледано во штабот на ВМРО-ДПМНЕ кај Кирил Божиновски – рече обвинетиот Александар Василевски  – Нинџа.

Според него, оперативните податоци до кои што тој дошол велеле дека организаторите на протестите биле исплаќани од ВМРО-ДПМНЕ.

– Јас само ги видов во партијата со Кирил Божиновски, но не можев да ги видам нивните џепови – рече Нинџа.

Но малку подоцна, на вкрстено прашање, дали биле плаќани водачите на „За заедничка Македонија“ Игор Дурловски, Богдан Илиевски – Бетмен, Борис Дамовски и Владо Јовановски од ВМРО-ДПМНЕ, или протестите ги воделе од патриотски причини, Нинџа одговори:

– Јас не сум ги видел со свои очи што имаа во џебовите кога излегуваа откај Кирил Божиновски, но од оперативни сознанија на Петтата управа знам дека биле плаќани од ВМРО-ДПМНЕ. Впрочем и Никола Бошкоски ми кажа дека за тоа го информирал директорот на УБК, Владимир Атанасовски – рече тој.

Александар Василевски – Нинџа, исто така кажа дека по налог на поранешниот директор на УБК, Владимир Атанасовски, кога бил формиран „Фронтот за Македонија“ се сретнал со Ченто и Игор Југ. Задачата во однос на Југ била да процени дали е проруски ориентиран.

– Кон 15 април зовре состојбата и се скандираше против „тиранската платформа“. Во свест ни беше врежан патриотизмот. Никој од овие во судница не знаеше што може да се случи на 27 април. Тој ден околу 12:30 часот ми се јави директорот на УБК и ми кажа да бидам во Скопје, бидејќи има информации дека нешто ќе се случи – рече Нинџа.

Додаде дека околу 16 часот повторно му се јавил Атанасовски и му рекол дека има информации оти СДСМ ќе бира претседател на Собранието и оти тоа го знае и Ченто.

Нинџа пред судот истакна дека имал контакт и со Сашо Мијалков, кој го викнал да оди во „Мериот“ и штабот на ВМРО. Околу 18 часот бил во штабот на партијата, но Мијалков не бил таму. Таму, како што додаде, имало лица од парламентарниот командно-оперативен штаб на партијата – Бришковска-Бошковски, Божиновски, Јанакиески, Чавков.

Од тука, како што посочи Нинџа, се координирало што се случуваше на 27 април.

Бришковска-Бошковски кажала дека не поминало првото сценарио и пратениците не си ја завршиле работата и не предизвикале тепачка.

– Потоа му се јави на Трајко Вељаноски и му рече да се отворат вратите од Собранието, а во 19:15 му се јавил Атанасовски и му рекол да оди да известува од терен – додаде Нинџа.

Рече дека на една од клупите во „Жена парк“ го сретнал и Горан Грујоски, кој му рекол дека има седум до осум луѓе во Собрание од прикриени операции.

Одговарајќи на вкрстени прашања од обвинителството Александар Василевски-Нинџа рече дека УБК ги следело Зоран Заев, Зоран Верушевски и Оливер Спасовски, иако тогаш бил министер за внатрешни работи. Додаде дека бил следен и политичкиот аналитичар Алберт Муслиу кому му биле поставени камери кога не бил дома.


Пратеник на српската СНС: Бегството на Груевски е најдоброто решение


Белград, 30 ноември, 2018 - 16:22 (META) 

Бегството на поранешниот македонски премиер Никола Груевски од земјата е најдоброто решение, оти со тоа „американскиот пион Зоран Заев на подолго време загуби адекватен противник на политичката сцена, а Груевски не лежи робија за глупост, порачува во колумна објавена во вчерашниот број на српскиот весник „Блиц“ парламентарецот и функционер на владејачката Српска напредна партија (СНС), Владимир Ѓукановиќ.

Во колумната во која најострите обвинувања ги упатува кон САД, Ѓукановиќ вели оти се поставува прашањето „дали Груевски доброволно се согласил да замине или пак бил натеран, по принципот дека тоа му била единствената шанса да ја зачува главата“.

На крајот, Ѓукановиќ обвинува дека пресудата за Груевски е „напишана во американската амбасада во Скопје“, но и дека „на самите Американци им е јасно дека од него не смее да се прави политичка жртва, па најдоброто решение било некако да се отарасат од него“.

Груевски беше правосилно осуден на затворска казна од две години во судскиот процес „Тенк“.

Рочиштата беа отворени за јавноста и медиумите известуваа за нивниот тек.

На пресудата неговите адвокати се жалеа, но безуспешно, бидејќи Апелацискиот суд ја потврди пресудата. Потоа кога беше издадено решението за да се јави в затвор, Груевски поднесе барање да му се одложи почетокот на издржувањето на казната, но и тоа му беше одбиено. Потоа Груевски исчезна.


Одложено рочиштето за „Маѓар Телеком“, судењето продолжува в година


Скопје, 27 ноември, 2018 - 11:08 (META) 

Денешното рочиште за предметот „Маѓар Телеком“ е одложено поради обемноста на доказниот материјал на предметот. На денешното рочиште требаше да биде сослушан сведок од одбраната.

Случајот „Маѓар Телеком“ во 2009 година беше отворен од Основното јавно обвинителство.

СЈО во неколку наврати бараше и преземање на предметот во нивни раце, но од ОЈО не дозволуваа, велејќи дека не произлегувал од содржината на незаконското следење на комуникациите.

Во предметот обвинети се тројца екс-директори на „Телеком“: Атила Сендреи, Ролф Плат и Золтан Кишјакус, за злоупотреба на службената положба, кои повеќе од седум години се недостапни за органите на прогонот.

Следното рочиште е закажано за 25 јануари 2019 година.


Мијалков не беше донесен в суд, одложено е рочиштето за “Титаник 2“


Скопје, 27 ноември, 2018 - 10:00 (META) 

Денешното рочиште за предметот „Титаник 2“ во кој се обвинети поранешниот директор на Управата за безбедност и контраразузнавање (УБК), Сашо Мијалков, и претседателот на ДПА, Мендух Тачи, беше одложено.

Доколку рочиштето се одржеше, тоа ќе беше прво излегување на Мијалков од затворот „Скопје“ во населбата Шуто Оризари, каде се наоѓа веќе девет дена.

Причината за денешното одложување беше тоа што Мендух Тачи побарал да оди на прослава на албанското знаме во Тирана.

Освен Мијалков и Тачи, во предметот се обвинети уште и Бедредин Ибраими од ДПА, потоа Елизабета Стефанова, Влатко Сајковски и Сашо Срцев.


Мијалков денеска првпат излегува од „Шутка“


Скопје, 27 ноември, 2018 - 9:30 (META) 

Поранешниот шеф на Управата за безбедност и контраразузнавање, Сашо Мијалков, денеска, првпат откако е притворен пред девет дена, ќе излезе од затворот „Скопје“ во населбата Шуто Оризари. Треба да биде спроведен на судењето за случајот „Титаник 2“ во Основен суд Скопје 2.

Тој во Кривичниот суд требаше да има судење и минатата седмица, и тоа за случајот „Таргет – Тврдина“ за кој всушност му беше одреден притворот, но судењето не се одржа со образложение дека судот немал доволно време да испрати наредба за спровод на обвинетиот до Истражниот затвор во Шутка.


Сашо Мијалков од притвор денеска треба да биде донесен на судење за „Тврдина-Таргет“


Скопје, 21 ноември, 2018 - 8:46 (META) 

Поранешниот директор на Управата за безбедност и контраразузнавање (УБК), Сашо Мијалков, кој вчеравечер заврши во притвор, денеска од затворот „Скопје“ во населбата Шуто Оризари треба да биде донесен со полициско комби во Основен суд Скопје 1, каде му се суди во случајот „Таргет -Тврдина“.

Мијалков беше приведен од хотелот „Мериот“ на скопскиот плоштад, откако му беше одреден 30-дневен притвор поради опасност од бегство. Притворот го побара Специјалното јавно обвинителство, а беше одобрен од судот каде му се суди.

Покрај него, од истиот затвор треба да биде донесен и поранешниот министер за транспорт и врски, Миле Јанакиески, кому во Кривичен суд ќе му се суди за „Топлик“.

Во предметот „Таргет – Тврдина“ обвинети се поранешниот началник на Петтата управа во МВР Горан Грујевски и вработениот во УБК Никола Бошкоски, кои се во во Грција, како и поранешната министерка за внатрешни работи Гордана Јанкулоска, потоа Сашо Мијалков и шефот на кабинетот на Мијалков, Тони Јакимовски, Владимир Варелов од УБК и уште пет други лица од Управата.

Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби. Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви. Прислушувани биле над 20.000 граѓани.

Сашо Мијалков и Горан Грујовски, заедно со Гордана Јанкулоска и Никола Бошкоски се товарат и за уништување на системот за прислушкување на МВР и интермедијациските уреди на операторите во вредност од 1.418.879 евра, а Валентина Симоновска за фалсификување службен документ.


Ослободителна пресуда за гинеколог од Тетово обвинет за смрт на родилка


Тетово, 16 ноември, 2018 - 15:44 (META) 

Гинекологот Казимир Копривњак е ослободен од страна на Основниот суд во Тетово по обвинението за тешки дела против здравјето на луѓето, во врска со смртта на 33- годишната родилка Виолета Кировска во август 2015 година. Клучна улога во ваквата одлука имале трите вештачења спроведени од експерти од врвните здравствени установи во земјава, истакна судијата Садула Изаири. Јавното обвинителство најави жалба на пресудата.

Адвокатот на гинекологот, Гоце Ристески, изјави дека ослободителната пресуда била очекувана од нивна страна.

– Ваквата пресуда беше единствена законита и правилна и произлегуваше од обемниот доказен материјал со коишто располагаше судот – рече Ристески.

Милан Ивановски, застапникот на семејството на почината родилка, рече дека не се задоволни од одлуката на судот.

– Ние сè уште сметаме дека постојат доволно материјални докази што укажуваат на голема низа на пропусти при третирањето на починатата, но судот даде верба на вештачењата, иако и таму имаше констатации за пропусти во функционирање на системот. Во вештачењата околу постапката беа наведени ненавремено земање на крвни слики, пропусти во подготовката на операцијата, ненавремено отпочнување на операцијата, а според нас, тука сигурно има моменти што довеле до смрт на починатата – изјави Ивановски.

Тој најави дека ќе поднесат жалба на пресудата до Апелацискиот суд во Гостивар, како и дека ќе се консултираат со Јавното обвинителство.

Славица Михајловска, мајката на починатата родилка, вели дека веќе три години се соочуваат со, како што рече, циркус од страна на сите што учествувале во овој процес.

-Никој не може да нè разубеди дека сè ова не беше лага и еден голем циркус и ова е еден срам за човештвото и за здравството, почнувајќи од сестрите, па сè до вештаците. Без разлика на пресудата, ние сме повеќе од сигурни дека станува збор за убиство на мојата Виолета – рече Михајловска.

Основното јавно обвинителство – Тетово попладнево соопшти дека е незадоволно од донесената пресуда и ќе вложи жалба во законскиот рок.

„Обвинителството цени дека обвинетиот го сторил кривичното дело кое му се става на товар и дека доказите кои беа обезбедени од страна на обвинителството ги докажуваат наводите во обвинителниот акт“, се вели во соопштението.

Виолета Кировска почина на 25 август 2015 година околу една недела по породувањето во тетовската клиничка болница. Во Тетово бил извршен царски рез од страна на Казимир Копривњак, а поради обилното крварење било извршено и вадење на матката. Следеле неколку трансфузии на крв, но и покрај тоа пациентката западнала во хеморагичен шок. Потоа била пренесена на клиниките во Скопје, каде што починала. Нејзиното новороденче почина околу еден месец потоа.