!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Почна пријавувањето за субвенции од Град Скопје за печки на пелети


Скопје, 15 ноември, 2017 - 11:52 (META) 

Град Скопје објави дека од денеска почнува пријавувањето за субвенции, односно надоместување на дел од трошоците на граѓаните на подрачјето на Град Скопје за купување печки на пелети, за 2017 година. Градската управа ќе покрие најмногу 70 отсто, но не повеќе од 30.000 денари како сума со вклучен персонален данок на доход, за купена печка на пелети од денеска до 22 ноември годинава. Пријавувањето трае, исто така, до 22 ноември, а парите ќе се доделуваат по принципот „прв дојден, прв услужен.

Јавниот повик е објавен на оваа страница на Град Скопје и во некои печатени медиуми.

Право на учество на овој Јавен повик имаат жителите на Град Скопје  (домаќинствата) во општините: Аеродром, Гази Баба, Кисела Вода, Карпош, Чаир, Шуто Оризари, Центар, Ѓорче Петров, Бутел и Сарај. На Јавниот повик немаат право на учество домаќинствата кои имаат приклучок на градското централно греење, без оглед на тоа дали го користат, како и сопствениците на станбени објекти кои се се уште во фаза на изградба и не живеат во објектите.

Купувачот на печка на пелети своето барање за искористување на правото за надоместок на дел од трошоците, заедно со потребната документација, треба да го достави во затворен плик до Град Скопје, булевар Илинден број 82, во архивата на Градот, секој работен ден од 8 до 16 часот.


Од волонтер до раководител на сектор меѓу осомничените за злоупотреби со субвенциите


Скопје, 5 октомври, 2017 - 14:23 (META) 

Од раководител на сектор во Министерството за земјоделство, шумарство и водостопанство (МЗШВ) преку волонтер во подрачна единица на министерството до бизнисмени, вкупно 24 лица добиле кривични пријави од Министерството за внатрешни работи (МВР) во врска со злоупотребите при доделување државно земјиште и давање субвенции, а од нив шестмина се приведени денеска во акцијата за која претходно извести Јавното обвинителство на Република Македонија.

Според пријавата, незаконски било давано државно земјиште под закуп, а потоа закупците барале и добивале субвенции за тоа земјиште. Во периодот од 2011 година до 2016 година, со тоа била нанесена штета од 222.730 евра на Агенцијата за финансиска подршка во земјоделството и руралниот развој.

Пријави до обвинителството за организиран криминал се поднесени против М.Б. (45) од Скопје, раководител на сектор за консолидација на земјоделско земјиште, размена и идентификација на земјишни парцели во Министерство за земјоделство, шумарство и водостопанство (МЗШВ), како и против Ѓ.Д. (55), исто така од Скопје, кој е помошник на раководител на сектор за меѓународна соработка во МЗШВ.

Пријавени се и помлад соработник во сектор за регистрирање, управување и продажба на земјоделско земјиште во државна сопственост, како и тројца соработници и еден референт во подрачната единица на министерството во Гевгелија.

Од подрачната единица во Валандово, кривични пријави добиле еден соработник, еден референт и еден волонтер, во подрачната единица Кисела Вода – еден референт и еден соработник, а во подрачната единица Чаир – двајца референти.

Тие се товарат за злоупотреба на службената положба и овластување, а истата квалификација ја имаат кривичните пријави и за Е.О. (39) од Богданци, државен инспектор во Државен инспекторат за земјоделство, З.Д. (34) од Скопје, управител на ДЗПТУ „Дедема плус“ од Скопје и С.В. (48) од Скопје, управител на ДПТУ „Агро проџек Велјанови“.

Истата пријава ја добиле и двајца турски државјани –  Х.Л.Д. (55), управител на „Агро лезет“, и Н.Ш. (53), управител на „Норм агро“.

Во листата на пријавените се и Р.В. (26) од Скопје, управител на „Агро проџек Рамака“ од Гевгелија, како и уште тројца скопјани и еден жител на Богданци.


Обвинителство: Приведени 24 лица поради незаконско доделување земјиште и субвенции


Скопје, 5 октомври, 2017 - 12:32 (META) 

Вкупно 24 лица од  Скопје, Тетово, Гевгелија и од Валандово се приведени денеска во акција на Основното јавно обвинителство за гонење организиран криминал и корупција спроведена со МВР. Приведените се осомничени за злоупотреба на службена положба и овластување во врска со доделување државно земјиште и субвенции, соопшти Јавното обвинителство на Република Македонија.

Надлежен јавен обвинител донел наредба за спроведување истражна постапка против 24 лица, од кои 15 службени лица се вработени во Министерството за земјоделство, шумарство и водостопанство и во подрачните единици на ова министерство, а другите осомничени се физички лица и одговорни лица во правни лица во приватна сопственост. Се товарат за штета од 220.000 евра нанесена на вуџетот на Република Македонија.

Според обвинителството, во периодот од 2011 година до 2016 година осомничените службени лица ги пречекориле своите службени овластувања при склучување и раскинување договори за закуп на земјоделско земјиште, а во тоа биле помогнати од другите осомничени. Во исто време, одобрувале исплата на субвенции со кои овозможиле корист на повеќе правни и физички лица на штета на државниот буџет.

Надлежниот јавен обвинител до судијата за претходна постапка при Основниот суд Скопје 1 поднел предлог за притвор за седуммина од приведените.


МЗШВ исплати 125 милиони денари субвенции за земјоделците


Скопје, 18 септември, 2017 - 16:41 (META) 

Министерство за земјоделство, шумарство и водостопанство исплати околу 125 милиони денари субвенции за земјоделство, известуваат од таму.

Најголемиот дел или околу 61 милиони денари се субвенции за дополнителна финансиска поддршка за сертифициран семенски материјал, 35 милиони денари за субвенција за литар предадено млеко, повеќе од 17 милиони денари се субвенции за предаден зеленчук во преработувачки капацитети.

„Остатокот од исплатените субвенции се за различни земјоделски сектори. Во моментов се обработуваат решенијата за исплата на преостанатите субвенции за 2016 година, по што наскоро ќе следува исплата. Од 1 јуни досега се исплатени повеќе од 60 милиони евра за субвенции, кои легнаа директно на сметките на околу 50.000 земјоделци“, додаваат од МЗШВ.

Од таму потсетуваат дека работат на подготовка на петгодишната национална програма за финансиска поддршка на земјоделството и на руралниот развој и дека со Светска банка ќе спроведат анализа на досегашната ефикасност на субвенциите.


Рокот за поднесување барања за субвенции за земјоделството истекува в петок


Скопје, 12 септември, 2017 - 12:41 (META) 

Рокот за поднесување барања за субвенции за земјоделството од Програмата за финансиска поддршка во земјоделството за 2017 година истекува в петок, информира  Министерството за земјоделство, шумарство и водостопанство.

До денеска, според податоците од подрачните единици на министерството, поднесени  се 66.126 барања. Најмногу барања има поднесено во подрачните единици во Кавадарци – 6.233, потоа во Струмица – 5.962 и во Куманово – 5.075.

Земјоделците можат сами да поднесат барање за директни плаќања преку „е-барање“, кое е поставено на веб-страницата на Агенцијата за финансиска поддршка во земјоделството и руралниот развој. Барањето се поднесува по електронски пат без доставување документи, а врз основа на претходно евидентирани податоци во Единствениот регистар на земјоделски стопанства и Регистарот за идентификација и за регистрација на домашни животни.

Одгледувачите на говеда, овци, кози и на пчели, пред поднесување на барањето, треба задолжително да ја проверат и по потреба да ја ажурираат состојбата на животните во ветеринарното друштво со кое имаат склучено договор.

Постапката за поднесување барање за директни плаќања е иста како и претходната година. На сите огласни табли на подрачните единици на Министерството за земјоделство, на видно место се истакнати сите потребни информации за аплицирање. Земјоделците можат да побараат помош за аплицирањето од подрачните едници при МЗШВ, каде што го поднесуваат барањето, но може и да ги користат услугите на Агенцијата за поттикнување и развој на земјоделството.


Николовски во Кавадарци вети дополнителни субвенции за лозарите


Кавадарци, 9 септември, 2017 - 19:59 (META) 

Mинистерот за земјоделство, шумарство и водостопанство, Љупчо Николовски, денеска соопшти дека на првата наредна седница Владата ќе донесе одлука за дополнителни директни плаќања за произведено и предадено грозје во домашните винарски визби.

Тој беше во Кавадарци на традиционалната манифестација во чест на грозјето и виното „Тиквешки гроздобер“.

– Висината на субвенцијата ќе биде определена на самата седница на Влада. Со оваа мерка ќе бидат опфатени сите земјоделски стопанства што до 15 септември пријавуваат површини за лозје и кои произведеното и предадено грозје ќе го дадат во домашните винарски визби – рече Николовски.

Како што рече, според податоците од Државниот инспекторат за земјоделство, заклучно со 5 септември откупени се околу 16 милиони килограми грозје, од кои најголемиот дел се од сортите вранец и смедеревка.

– Би сакал да им порачам на лозарите дека грозјето од годинешната реколта ќе биде целосно откупено од винарските визби, а исплатата за откупеното грозје ќе се реализира според законските одредби и прописи. Државниот инспекторат за земјоделство ги зајакнува контролите на откупните пунктови на грозје за да нема манипулации со откупните цени – рече министерот за земјоделство.

Порача дека уште во првите 100 дена на новата влада се зголемени субвенциите за одржување на лозови насади за 10 отсто по хектар, како и дека за одржување на површини со лозови насади по Програмата за 2016 година се исплатени 8,7 милиони евра, а за вкупно 13 винарски визби за откупено грозје се исплатени субвенции од 700.000 евра.


Сугарески се сретна со претставници на авиокомпанијата „Полиш ерлајнс“


Скопје, 31 август, 2017 - 13:28 (META) 

Министерот за транспорт и врски, Горан Сугарески, денеска се сретна со претставници од авиокомпанијата „Полиш ерлајнс“, на која присуствуваше и амбасадорот на Полска во Македонија, Јацек Мултановски.

На средбата се разговарало и за можноста за воспоставување летови и од аеродормот „Св. Апостол Павле“ во Охрид, со што би се заголемиле капацитетите на искористенот на овој аеродром.

Сугарески ги презентирал можностите и условите што ги нуди Македонија на авиокомпаниите кои се заинтересирани да оперираат од двата аеродроми.


Мицкоски: Инвеститорите ќе нè заобиколат поради објавување на висината на субвенциите


Скопје, 30 август, 2017 - 17:41 (META) 

Владата на вчерашната седница донесе одлука за декласифицирање и за објавување на субвенциите што им се даваат на странските инвеститори во Македонија, потег кој ќе влијае на потенцијалните инвеститори и на нивните намери да дојдат во земјава да инвестираат, изјави денеска на прес-конференција генералниот секретар на ВМРО-ДПМНЕ, Христијан Мицкоски.

Тој додаде дека не е никаква тајна, ниту е незаконски тоа што Македонија, како и повеќето земји низ светот што се борат за странски инвестиции, дава субвенции по некаква основа.

– Давањето субвенции било во согласност со закон и даде огромни резултати во намалување на невработеноста, отворањето нови работни места, зголемување на извозот, пренос на технологии и знаење, обезбедување работа за домашните компании, како и за доставувачи или партнери од различен вид. На крај, резултираше со зголемување на индустриското производство, раздвижување на економијата, зголемување на конкурентноста и со пораст на севкупниот домашен бруто-производ – изјави Мицкоски.

Според него, постои огромна конкуренција при привлекувањето на инвеститорите, вклучително и во сегментот на субвенциите.

– Компаниите кои доаѓаат, не посакуваат јавно објавување на нивните договори и приходи врз основа на субвенции, а тоа не ѝ одговара ни на државата. Понекогаш кога конкуренцијата на земји за еден инвеститор е голема и силна, а неговата важност огромна, субвенциите се поголеми, а некогаш може да се успее и со помали субвенции, тоа е предмет на преговори, а во поретки случаи се успева и без субвенции – додаде Мицкоски и нагласи дека наместо во Македонија, земји на инвестирање ќе бидат Бугарија, Србија, Албанија, Романија, Турција, Унгарија и Чешка.


МЗШВ: Рокот за поднесување барања за субвенции во земјоделството е до 15 септември


Скопје, 29 август, 2017 - 12:24 (META) 

Министерството за земјоделство, шумарство и водостопанство ги известува земјоделците дека рокот за поднесување барања за субвенции за земјоделство од Програмата за финансиска поддршка во земјоделството за 2017 година, кој почна на 3 јули, трае до 15 септември.

Земјоделците можат сами да поднесат барање за директни плаќања преку е-барање, кое е поставено на веб-страницата на Агенцијата за финансиска поддршка во земјоделството и руралниот развој.

„Оние земјоделци кои не се во можност сами да си креираат барање, најдоцна до 30 август годинава треба да побараат техничка поддршка од подрачната единица на Министерството за земјоделство, шумарство и водостопанство, за да можат да го запазат рокот за аплицирање на 15 септември“, велат од МЗШВ.

За помош околу аплицирањето земјоделците можат да ги користат и услугите на Агенцијата за поттикнување и развој на земјоделството.


Николовски најави целосно исплаќање на субвенциите за земјоделците за 2016 година


Скопје, 19 август, 2017 - 12:39 (META) 

Министерот за земјоделство, шумарство и водостопанство, Љупчо Николовски денеска на прес-конференција најави дека до крајот на овој или почетокот на следниот месец, целосно ќе бидат исплатени субвенциите за земјоделците за 2016 година.

– Во изминатите два месеца, исплативме околу 60 милиони евра субвенции преку програмата за директна финансиска поддршка. Вчера на сметките на земјоделците се исплатени дополнителни 5,7 милиони евра по однос на повеќе мерки и култури на целата територија на државата. Останатиот дел од околу 10 милиони евра од програмата за 2016 година, што се во постапка, целосно ќе бидат исплатени во текот на месецов или на почетокот на септември – изјави Николовски.

Тој додаде дека со новиот директор на Платежната агенција се во постојан контакт за да ги решат и исплатите од 2012 до 2015 година каде што, по различни основи има застој.