Студено време со северен ветер и провејување на слаб снег


Скопје, 11 декември, 2018 - 9:08 (META) 

Времето денеска ќе биде променливо облачно, на места со провејување на слаб снег ќе дува ветер претежно од северен правец.

Утринската температура ќе се движи од минус осум до еден, а дневната од минус два до шест Целзиусови степени.

Во Скопје времето ќе биде умерено облачно со слаб северен ветер. Утринската температура ќе се спушти до минус три, а дневната ќе достигне до четири Целзиусови степени.

Во среда ќе биде стабилно со ниски минимални температури, а во четврток на места ќе има врнежи претежно од снег со слаб до умерен интензитет. Во петок и сабота по котлините ќе има услови за појава на магла.


Студено утро со температурa под нулата, сончево време во текот на денот


Скопје, 7 декември, 2018 - 9:32 (META) 

Температури под нулата изутринава има во цела Македонија, а најниските се измерени во Берово 10 Целзиусови степени под нулата и во Скопје минус осум Целзиусови степени.

Времето денеска ќе биде сончево со мала до умерена облачност. Ќе дува слаб ветер од променлив правец. Максималната температура ќе се движи од 6 до 12  Целзиусови степени.

Под влијание на влажен бран утре попладне и во текот на ноќта кон недела ќе има повремени врнежи од дожд, особено во западните подрачја.

На планините врнежите ќе бидат од снег. Во недела во текот на денот ќе преовладува сончево време со мала до умерена облачност.


Променливо облачно и релативно студено време


Скопје, 30 ноември, 2018 - 9:10 (META) 

Времето денеска ќе биде променливо облачно и релативно студено, со намалување на облачноста во текот на денот во одредени места, вели прогнозата на Управата за хидрометеоролошки работи (УХМР).

Ќе дува слаб до умерен југоисточен ветер, а во североисточниот дел од земјава ќе биде претежно тивко. Во доцните попладневни часови ќе има повторно зголемување на облачноста.

Максималната температура ќе се движи од 2 до 7 Целзиусови степени.

Во Скопје времето ќе биде променливо облачно со сончеви периоди во текот на денот.

Во наредните денови ќе преовладува стабилно време, со утрински температури кои на повеќето места ќе бидат под нулата, особено в недела. Од утре по котлините и по речните долини ќе има појава на магла и ниска облачност.

В понеделник кон вторник ќе има услови за краткотраен локален дожд.


Студено време со провејување на слаб снег


Скопје, 29 ноември, 2018 - 9:28 (META) 

Времето денеска ќе биде студено со умерен северен ветер, а на места ќе провејува снег.

Утринската температура ќе се движи од минус пет до три, а дневната од минус еден до пет Целзиусови степени.

Во Скопје студено со умерен северен ветер. Утринската температура ќе се спушти до нула, а дневната ќе достигне до четири Целзиусови степени.

Во наредните денови ќе преовладува стабилно време со ниски утрински температури, а дневните ќе бидат во постепен пораст.


Денеска сончево со мала облачност


Скопје, 12 ноември, 2018 - 9:22 (META) 

Времето во Македонија денеска ќе биде сончево со мала облачност, по одделни котлини со појава на утринска магла. Ќе дува слаб, претежно источен ветер.

Утринската температура се движеше од -3 до 4 Целзиусови степени, а дневната ќе изнесува меѓу 14 и 22 степени.

До крајот на седмицава ќе се задржи стабилно и суво време, со студени утра, а до вторник наутро ќе има услови за магла по одделни котлини. Од среда ќе почне да дува северен ветер, што ќе придонесе за расчистување на воздухот по котлините и ќе услови опаѓање на дневната температура.

Инаку, намалена видливост поради појава на магла во раните утрински часови од 100 до 150 метри има на патниот правец Скопје – Катланово, а до 100 метри на патот Велес-Катланово и обратно, соопшти Автомотосојузот на Македонија (АМСМ).


Времето денеска со дожд, а на планините со услови за снег


Скопје, 22 октомври, 2018 - 9:14 (META) 

Облачно, свежо и ветровито време ќе преовладува денеска. Ќе има врнежи од дожд, кои на места ќе бидат пообилни, а на повисоките планини ќе има услови за снег, вели прогнозата на УХМР.

Дневните температури ќе се движат во интервал од 13 до 20 Целзиусови степени.

Во Скопје и околината слично време со дневна температура до 19 Целзиусови степени.

Во наредните денови времето ќе биде променливо и постудено со повремени локални врнежи од дожд, а на повисоките планини со услови за снег, особено в среда.


Сончево и студено време со температура до 25 степени


Скопје, 28 септември, 2018 - 9:17 (META) 

Времето во Македонија ќе биде ведро и студено, преку денот сончево со мала до умерена облачност. Попладне облачноста ќе се зголеми, особено во јужните делови каде ќе има услови за локален краткотраен дожд. Ќе дува слаб до умерен југоисточен ветер.

Утринската температура ќе се движи од минус три до шест, а дневната температура од 19 до 25 Целзиусови степени.

Во Скопје ќе биде сончево со мала, а попладне со умерена облачност и со слаб до умерен југоисточен ветер. Температурата ќе се движи од еден до 23 Целзиусови степени.

Од сабота следува период на променливо облачно време со услови за локален дожд. Утринските температури поради наоблачувањето ќе се зголемат, додека дневните ќе бидат без поголеми промени.


Облачно време, попладне со пороен дожд


Скопје, 5 април, 2018 - 9:12 (META) 

Времето денеска ќе биде променливо облачно и топло со повремен слаб локален дожд. Попладне на места врнежите ќе бидат поројни со грмежи.

Ќе дува слаб до умерен јужен ветер, а кон крајот на денот и во ноќните часови ќе го промени правецот во северозападен. Поинтензивни врнежите ќе бидат во ноќните часови. Утринската температура ќе се движи од два до девет, а дневната температура на воздухот ќе се движи во интервалот од 18 до 24 Целзиусови степени.

Во Скопје ќе биде променливо облачно попладне со локален пороен дожд и појава на грмежи. Утринската температура ќе достигне до шест степени, а дневната температура до 25 степени.

Врнежите ќе продолжат во текот на ноќта, утре и задутре претпладне. За време на велигденските празници времето ќе биде стабилно, суво и релативно топло.


Времето денеска со повремен снег


Скопје, 22 март, 2018 - 9:41 (META) 

Времето денеска ќе биде облачно и студено со повремени врнежи од снег, а во јужните делови од земјава дожд и снег, додека во крајниот југоисточен дел од дожд. На повеќе места врнежите ќе бидат пообилни и ќе наврнат над 15 литри на квадратен метар. Снежната покривка на планините значително ќе се зголеми.

Ќе дува слаб до умерен, а во западните делови повремено засилен ветер од северен правец.Максималната температура ќе достигне од 1 до 6 Целзиусови степени.

Во Скопје времето ќе биде облачно со врнежи од снег и со слаб до умерен ветер од североисточен правец правец. Температурата ќе достигне до 2 Целзиусови степена.

Утре се уште ќе има повремени врнежи од дожд и снег, но кон крајот на денот ќе престануваат. В сабота ќе биде променливо облачно со провејување на слаб снег.


Облачно и студено време со слаб локален снег


Скопје, 28 февруари, 2018 - 9:06 (META) 

Времето денеска ќе биде променливо облачно и студено со сончеви периоди и со слаби и локални врнежи претежно од снег. Особено студено ќе биде во утринските часови.

Во западните и крајните северни делови ќе провејува повремен слаб локален снег, особено претпладне. Ќе дува умерен, на повисоките места и планините засилен северен ветер.

Највисоката температура преку денот ќе достигне од минус 3 до 3 Целзиусови степени.

Во Скопје ќе биде променливо облачно со услови за слабо проврнување на снег. Температурата ќе достигне до околу нула.