Полицијата спречила криумчарење на 143 килограми марихуана


Скопје, 28 февруари, 2018 - 16:49 (META) 

Во две одвоени акции, Министерството за внатрешни работи (МВР) вчера спречила криумчарење на околу 143 килограми марихуана, при што приведени се осум лица. Шестмина се македонски државјани, а другите двајца албански државјани, соопшти директорот на Бирото за јавна безбедност (БЈБМ), Лазо Велковски на денешната прес конференција во МВР.

Во првиот случај, од Албанија преку Македонија во Грција требало да бидат пренесени 55 килограми марихуана со вредност на нарко пазарот од околу 150.000 евра. Во оваа акција се уапсени шест македонски и еден албански државјанин.

Во близина на браната на Мавровско Езеро вчера биле уапсени четири жители на скопско Студеничани, кои со автомобили „бмв“ и „ауди“ ја презеле марихуаната од Дебар и требало да ја транспортираат до Солун, за надомест од 9.000 евра.

По ова апсење, набргу во Дебар бил уапсен 49-годишен маж од албанското село Блата, Република Албанија, кој ја прокриумчарил дрогата во Македонија илегално премиинувајќи ја границата.

Набргу се уапсени и двајца роднини од Дебар, кои биле на 26 и 27 годишна возраст. Тие ја презеле дрогата од Албанецот и ја предале на жителите на Студеничани.

Во вториот случај вчера околу 18 часот на граничниот премин „Деве Баир“ од слобода е лишен 47-годишен државјанин на Албанија. Тој управувал со камион во чија приколка биле пронајдени 88 килограми марихуана. Дел од дрогата била скриена во штици од приколката на камионот.


ДЗС: Оспособени за сообраќај повеќе патни правци во општина Студеничани


Скопје, 8 јануари, 2017 - 18:40 (META) 

Со ангажирање градежна механизација, во текот на денешниот ден оспособени за сообраќај на моторни возила се патните правци кон Долно и Горно Количани, Црвена Вода, Китка, Маркова Сушица, Цветово, Осинчани, Бела Црква, Елово и кон Црн Врв во општина Студеничани, додека на патниот правец кон викенд-населбата Мала Река сè уште се работи, соопшти Дирекцијата за заштита и спасување.

Поради вонредно ниската температура, градежната механизација ангажирана во општина Зелениково имала проблеми при активирањето во утринските часови, поради што била ангажирана дополнителна механизација.

Во општина Дебар, како што се наведува во соопштението на ДЗС, упатената механизација сè уште работи на расчистување на патните правци кон Горно Косоврасти, Гари, Осој и ком Татар и Елевци.

На стариот патен правец од Куманово кон Свети Николе, во текот на вчерашниот ден биле завеани возила и камион на „Македонија пат“. Вработени од подрачните одделенија на Дирекцијата за заштита и спасување од Куманово и од Свети Николе со возила заедно со припадници на полицијата се упатиле од двете страни да дојдат до завеаните кои биле извлечени.

ДЗС апелира до граѓаните ако не е неопходно да не заминуваат на пат, да носат топла облеки и консумираат топли пијалаци. Доколку треба да работат на отворено, тоа да се прави со паузи.


Николовски: СДСМ нема да учествува и нема да дозволи уште едни криминални избори


Скопје, 23 февруари, 2016 - 20:38 (META) 

Дополнителниот заменик-министер за земјоделство, шумарство и водостопанство, Љупчо Николовски, со жителите на Студеничани, Батинци и на Долно Количани разговараше за невработеноста и за тешкиот секојдневен живот, проблемот со иселувањето на младите кои бараат подобро утре надвор од земјава, соопштуваат од СДСМ.

Како што се наведува во партиското соопштение, жителите се пожалиле на лошата патна инфраструктура, како и на немање основни услови за нормален живот.

– Оваа расипничка власт во заминување на криминален начин потроши 630 милиони евра за споменици. Со само 2,5 милиони евра можеа да се решат сите проблеми во вашето населено место, пат, водовод, канализација, сè, да се создадат нормални услови за живот. Ние имаме решенија, имаме мерки во програмата, знаеме како да ги вратиме младите дома. За секој млад човек ќе обезбедиме иднина во својата земја – рече Николовски.

На средбите со граѓаните се разговарало и за актуелната политичка ситуација во Македонија. Николовски го повторил ставот дека СДСМ нема да учествува и нема да дозволи уште едни криминални избори.

– Меѓународната заедница, САД и ЕУ, потврдија дека на 24 април не може да има фер и веродостојни избори. Без да се исполнат неопходните услови, без прочистување на избирачкиот список и без реформи за слободни медиуми, нема фер избори. Демократските промени во земјава ќе се случат на фер, демократски и слободни избори, ниедно сценарио не може да го спречи тоа – рече Николовски.


Професор претепал ученик во скопско Студеничани


Скопје, 14 ноември, 2014 - 8:47 (META) 

Тринаесетгодишен ученик бил претепан од професор во училиштето на скопското село Студеничани. Момчето имало повреди на главата и побарало лекарска помош, пренесува „МКД“.

Чичкото на ученикот, во изјава за телевизија „Сител“, рекол дека инцидентот се случил во основното училиште „Наим Фрашери“.

Повеќе информации за случајот се очекува полицијата да соопшти во текот на денот.